الثلاثاء، يناير 29، 2008

ســورة مريــم

السلام عليكم جميعا
أعتقد إن كلنا نعرف إن فيه قراءات مُتعددة للقرآن الكريم
أنا طبعا مافهمش حاجة في موضوع القراءات ده
بس الواحد مننا بيبقى حافظ بعض الآيات من سور القرآن
فلما بيمسع الآية إللي هو حافظها بطريقة مختلفة بيقدر يستنتج إن دي رواية مختلفة عن رواية (حفص عن عاصم) وإللي كلنا بنقرأ بيها القرآن وبنسمعها دايما في إذاعة القرآن الكريم

من حوالي 3 شهور كنت راكبة تاكسي ومروحة البيت وكانت هموم الدنيا ملياني
سواق التاكسي كان مشغل سورة مريم بصوت الشيخ العفاسي
في بعض الآيات إللي أنا حافظاها من السورة لاحظت إن الشيخ بيقرأها بطريقة مختلفة
فاستنتجت إنها قراءة تانية غير قراءة حفص
المهم ...
السورة نزلت على قلبي وعقلي بردا وسلاما
حسيت فيها بلهفة سيدنا زكريا للابن
وحزن السيدة مريم وخوفها من كلام الناس
وفرحتها بنصر الله إللي ظهر على لسان وليدها سيدنا عيسى
ورحمة سيدنا إبراهيم بأبوه وهو بيدعوه إلى الله
حسيت بده كله بطريقة غريبة
وصراحة صوت الشيخ العفاسي وطريقة تلاوته كانت مميزة جدا
ومن ساعتها قررت أشتري الشريط ده
وفضلت أدور عليه لحد ما ربنا يسرلي أمري ولقيته
وطلع استنتاجي في محله والقراءة كانت برواية (شُعبة عن عاصم)

أنصحكم بالاستماع لسورة مريم بالقراءة دي
صدقوني هتفرق كتير معاكم خاصة لو كنتم مهمومين
ونسأل الله لنا جميعا العفو والعافية
اللهم آمين

للاستماع للسورة : اضغط هنــا
لتحميل السورة : اضغط هنــا

هناك 13 تعليقًا:

اسلام رفاعى يقول...

على فكرة فى عشر قراءات للقرأن منها حمزة... شعبة .... ورش .... قالون ... حفص
وعلى فكرة برضه فى معهد تابع للازهر بيدرس القراءت اسمه معهد القراءات من شروط الالتحاق بيه ان يكون حافظ نصف القرأن على الاقل
سعيد بزيارة مدونتك
اتمنى تشرفينى فى مدونتى

اسلام رفاعى يقول...

على فكرة هناك عشر قراءات للقرأن منها ورش ... قالون ... حمزة ... حفص ...
سعيد بزيارة مدونتك
لتمنى تشرفين ىفى مدونتى

Maha يقول...

جزاك الله خيرا :)

أنا كمان بحب سورة مريم جدا

والرواية دي كمان سمعتها من زمان وعجبتي ودخت عليها في النت لغاية ما جبتها

بس من ساعتها ومسمعتهاش كتير :)

فكرتيني بيها دلوقتي :)

أنا باجي مدونتك كل سنة مرة كده :)

بس ما شاء الله مدونتك حلوة ومواضيعك جميلة :)

في أمان الله

إيمان الحسيني يقول...

جزاك الله خير الجزاء أخي إسلام رفاعي
وفيه معهد كمان تابع للجمعية الشرعية
ده موقعها على النت

http://www.alshareyah.org/main/index.aspx

منور مدونتي :)

إيمان الحسيني يقول...

وإياكم أخي الطائر الحزين

إيمان الحسيني يقول...

جزاكم الله خير الجزاء يا مها
منوراني :)

أخـت فـى الله يقول...

من اكثر السور اللى بحبها
فيها كمية ايمان لو وزع على اهل الارض لكفتهم
جزاك الله خيرا

إيمان الحسيني يقول...

وإياكم يا شيمي

باب البحر يقول...

بالفعل أحببت هذه السورة عند سماعها بالقراءتين.

ما دامت أعجبت حضرتك .. أظن أن سورة محمد و الأنفال و الأنبياء و ص و الأنعام ستعجب حضرتك إن شاء الله (احرصي على اقتناء هذه الشرائط من شركة النور .. فشرائط هاي كواليتي لقراءة حديثة للشيخ و مختلفة).

و أظن أيضا أنه ستعجبك سورة ق إصدار هاي كواليتي.

جزاكم الله خيرا

إيمان الحسيني يقول...

ربنا يكرمك ويعزك يا باب البحر
بس حضرتك تقصد السور دي بقراءة شعبة ولا حفص ؟
بإذن الله أجيبهم قريبا

باب البحر يقول...

لا لا .. كلها برواية حفص إن شاء الله.

أأمل أن تزيد قربك من الله .. بإذن الله.

و إن واجهت مشاكل مادية فسآتي بالروابط من موقع طريق الإسلام.

و جزاكم الله خيرا

إيمان الحسيني يقول...

ربنايكرمك ويعزك يا أخي الكريم
الحمد لله رب العالمين أنا باشتغل وأستطيع التكفل بهذه الأمور :)

بإذن الله أجيبهم قريبا

و القادم....أجمل يقول...

السلام عليكم
انا برضوو بحب السورة دي جدا
أيام امتحانات الباطنة كنت علي طول
بشغلها
بس انا بعشقها برواية حفص
راائعه من الشيخ مشاري

ربنا يكرمك و يوفقك يارب

:)