الجمعة، ديسمبر 09، 2011

يا الميدان ..





ياااه يا الميدان كنت فين من زمان ؟
معاك غنينا ومعاك شقينا
وحاربنا خوفنا ودعينا
إيد واحدة نهار وليل
ومافيش معاك شيء مستحيل
صوت الحرية بيجمعنا
خلاص حياتنا بقى ليها معنى
مافيش رجوع صوتنا مسموع
والحلم خلاص مابقاش ممنوع

ياااه يا الميدان كنت فين من زمان ؟
هديت السور .. نورت النور
لميت حواليك شعب مكسور
اتولدنا من جديد
واتولد الحلم العنيد
بنختلف والنية صافية
أوقات الصورة ماكانتش واضحة
هانصون بلدنا وولاد ولادنا
حق إللي راحوا من شبابنا

ياااه يا الميدان كنت فين من زمان ؟
معاك حسينا وابتدينا
بعد ما بعدنا وانتهينا
لازم بإيدينا نغير نفسينا
إديتنا كتير والباقي علينا
ساعات باخاف تبقى ذكرى
نبعد عنك تموت الفكرة
نرجع تاني ننسى إللي فات
نحكي عنك في الحكايات

ياااه يا الميدان كنت فين من زمان ؟
ميدان مليان بأنواع
إللي بايع والشجاع
فيه إللي حابب وإللي راكب
وإللي بيزعق وإللي ساكت
نتجمع نشرب الشاي
والحق عرفنا بنجيبه إزاي
خليت العالم يسمعوا
والجيران يتجمعوا

ياااه يا الميدان كنت فين من زمان ؟
فكرتنا هي قوتنا
وسلاحنا في وحدتنا
ميدان بيقول الحق
بيقول للظالم دايما لأ
الميدان زي الموجة
ناس راكبة وناس مشدودة
ناس برة بيقولوا دي هوجة
والأعمال مكتوبة

ياااه يا الميدان كنت فين من زمان ؟

ليست هناك تعليقات: