الثلاثاء، أغسطس 02، 2005

علّمتنــي المِحنــة

أتوجه بكلماتي هذه إلى كل مَن ردد نفس الجُمل في يوم من الأيام بجهله البشري وقلة علمه وضيق نظرته ...

هاعرضلكم دلوقتي بعض الجُمل إللي ناس كتير جدا بترددها بدون وعي
وأنا كنت واحدة من الناس دول في يوم من الأيام
وحاليا باطلب العفو والعافية من الله ...

عمالة أدعي وربنا مش بيستجيب ليّه ... وغيري بيدعي وربنا بيديله !!!
عملت خير في فلان ورد عالخير بنُكران وجحود ... يعني دي آخرة عمل الخير يا رب ؟!!!
هافضل عايشة طول عمري مظلومة ... امتى بقى هآخد حقي ؟!!!
يعني يا ربي أنا باصلي وبادعي وباعمل خير وغيري بيعصيك ... ليه أنا تعبانة والعاصي مرتاح ؟!!!

وجُمل تانية كتير كنت بارددها وقت يأسي وأنا مش واخدة بالي
أو بمعنى أصح كنتُ باصة تحت رجلي وبس
لحد ما جه اليوم إللي والدي وقع فيه بسبب جلطة في المخ أثرت على الجزء الشمال من جسمه وعلى لسانه
لقيت نفسي بشكل أتوماتيك قاعدة جنبه على السرير – وإحنا مستنيين الإسعاف – بارقيه بالرُّقية الشرعية وبانطق الشهادة في ودنه
ومن وقت للتاني باطلب منه برفق إنه يقولها ، فكان بيجي على نفسه ويقولها بالرغم من تقل لسانه في الكلام
وروحنا المستشفى بسرعة ولله الحمد ودخل العناية المركزة
وفضلت أدعيله في كل صلاة وفي قيام الليل وفي كل وقت أنا عارفة إنه وقت استجابة للدعاء
وطلبت من كل الناس حوالينا وفي المنتديات إنها تدعيله
ولقينا ناس كتيرة قوي واقفة جنبنا وبتعرض علينا خدمات مادية ومعنوية
ومنهم أخ فاضل – أحسبه على خير ولا أزكي على الله أحد – بيعمل في مكة قاللي إنه هيبعتلي مية زمزم مع واحد نازل مصر
ناس كتير كان نفسها بس إننا نقولها عاوزين حاجة وهي على استعداد تقدم عنيها لينا بالرغم من إن 90% منهم لا يعرفوا والدي ولا عمرهم شافوه !!!!
وتوجهت لنقابة المهندسين علشان أحاول ضم والدي لبطاقتي العلاجية بالرغم من إنه مش معاد تجديد البطاقة لإننا حسينا إن المصاريف هتبقى كتيرة جدا في علاج والدي خاصة وإن العلاج هيطول لشهور
وفضلت طول الطريق أكلم ربنا وأقوله : ظني فيك خير يا رب .
واتصلت بناس – جزاهم الله خير الجزاء – علشان أطلب منهم يشوفولي واسطة أقدر بيها أضم والدي للبطاقة العلاجية قبل معاد التجديد السنوي وإللي بيبقى من شهر نوفمبر لشهر يناير من السنة الجديدة
والحمد لله حمدا طيبا كثيرا مُباركا فيه
الموضوع اتحل وبدون أي واسطة
وفي خلال 5 أيام من دخوله المستشفى بدأت الحالة تتحسن ببطء شديد جدا
بس المهم إنها بتتحسن
وبعد ما كان والدي يا إما في شبه غيبوبة يا إما صاحي بس مش واعي لينا ولا عارفنا ولا فاهم كلامنا
لقيناه بيفوق وبيتعرف علينا وبيكلمنا وبيرد على كلامنا وبيهزر كمان
وأخويا إللي في الكويت وإللي كان المفروض إنه هينزل أجازة من يوم الخميس 4/8/2005
قدر يقدم معاد الأجازة أسبوع كامل بسهولة وبدون مشاكل
ولقى حجز بمنتهى السهولة في طيارة فجر يوم الأحد بالرغم من إنه موسم سياحة لمصر والطيران بيبقى مزدحم جدا خاصة إللي جاي من الخليج
وجه أخويا بالسلامة وكان وجوده من أحد الأسباب الرئيسية – بعد فضل الله وكرمه – في تحسن حالة والدي

الأحداث دي كلها خلتني أعرف سبب ثباتي يوم محنة والدي
وخلتني أعرف كمان الإجابة على الأسئلة إللي قولتها في البداية :
عمالة أدعي وربنا مش بيستجيب ليّه ... وغيري بيدعي وربنا بيديله !!!
عملت خير في فلان ورد عالخير بنُكران وجحود ... يعني دي آخرة عمل الخير يا رب ؟!!!
هافضل عايشة طول عمري والناس بتغلط فيّه ... امتى بقى هآخد حقي ؟!!!
يعني يا ربي أنا باصلي وبادعي وباعمل خير وغيري بيعصيك ... ليه أنا تعبانة والعاصي مرتاح ؟!!!
عرفت إن دعواتي ربنا شالهالي لليوم ده علشان ييسرلنا أمورنا
عرفت إن الخير إللي عملناه واتقابل بجحود ما ضاعش أبدا ... ربنا شاله لينا علشان يتردلنا في الوقت إللي هنبقى فعلا محتاجينله فيه
عرفت معنى إن ربنا يسترنا برحمته أولا وأخير ثم بعملنا الطيب وقت الاحتياج
باختصار شديد جدا المحنة دي علمتني حاجة جميلة جدا :
يوم ما أدعي ربنا ودعوتي ما تجليش زي ما أنا عاوزة ... لازم أعرف إن الغيب ممكن يكون فيه ابتلاء وربنا هيخفف عني الابتلاء ده بدعوتي دي
والخير إللي بنعمله وبنقول إنه بيروح في الهوا ... ربنا بيحفظهولنا علشان يجازينا عليه وقت محنتنا
ربنا مش ظالم يا جماعة
ربنا هو الحق والعدل ... وهو الرحمن الرحيم

علشان كده باطلب من كل يائس إنه يُحسن الظن بالله
ويتأكد تماما ويقينا بإن ربنا هيكون عند حُسن ظنه
ماتبصوش تحت رجليكم
بصوا للمستقبل والغيب إللي مانعرفش عنه حاجة
وربنا بس هو إللي يعرف عنه كل حاجة
وهو بس إللي عارف إحنا هنحتاج للتعويض امتى وإزاي
هو بس إللي عارف مصلحتنا فين

فيا ربنا لك الحمد كما ينبغي لجلال وجهك وعظيم سلطانك
يا ربنا لك الحمد في الأولى والآخرة
يا ربنا لك الحمد في السراء والضراء
يا ربنا لك الحمد على كل حال
ونعوذ بك من حال أهل النار

إيمان الحسيني
2/8/2005م

هناك 4 تعليقات:

Mohammed Gamal يقول...

Ebles, what you say is devastating.
Everyone is free to believe in what he wants to believe.
You want to be an atheist, fine, do whatever you want, you want to worship cows, again fine, do whatever. But you just can't criticize and make fun of people on the basis of what they believe.

إيمان الحسيني يقول...

جزاك الله خير الجزاء أخي محمد
ودع الكلاب تعوي
فالقافلة تسير بأمر الله

غير معرف يقول...

هو إبليس عدى من هنا؟
همممممممممم..محسبهاش صح المرة دي..

عموما ما يقع الا الشاطر :)..

مش بيقولوا برضو الشيطان صايع؟

إيمان الحسيني يقول...

أيوة يا عياش عدى من هنا وقعد يتريق
ربنا يهديه
وجزاك الله كل خير لمرورك