الأحد، أكتوبر 16، 2005

أبو جهل وأم جهل (2) صور من حياتنا المعاصرة

عين الحسود ....


أم جهل : هاي يا زيزي أخبارك إيه ؟
زيزي : هاااااااي ... عاملة إيه ؟
أم جهل : الحمد لله كويسة .
زيزي : إيه الكوليه الجميل ده ، شكله شيك خالص ، والحجارة الزرقة دي طالعة موضا .
أم جهل : بجد عجبك ؟ أصلي لابساه علشان الحسد بعيد عنك .
زيزي : حسد ؟!!! يا ستار يا رب ... هي الناس دي مش بتسيب حد في حاله ليه ؟
أم جها : آه والله ده أنا اتنشيت عين ما يعلم بيها إلا ربنا ، بس الحمد لله عِترت في الشيخة أم العزايم .
زيزي : الشيخة أم العزايم ؟!!! ودي عملتلك ايه ؟
أم جهل : قعدت معايا ساعتين وفي الآخر قاليتلي احمدي ربنا إنك جيتيلي ده أنت محسودة ومعمولك عمل سُفلي .
زيزي : ياااااي ، وعملتي ايه قوليلي ؟
أم جهل : الحمد لله ، طلبت مني ألبس حاجة زرقة دايما في لبسي علشان الحسد ، وعمليتلي حجاب أحطه تحت مخدتي وأنا نايمة ، وبتعملي جلسات علاج بالقرآن ، زائد إنها كل مرة بتقرالي الفنجان وتحذرني من إللي هيحصلي في المستقبل .
زيزي : وجابت نتيجة معاكي ؟
أم جهل : طبعا جابت نتيجة دي الشيخة أم العزايم يا بنتي ، وأنا الحمد لله بقيت عال العال .
زيزي : طب الله يخليكي وديني ليها .
أم جهل : ليه انتي بتشتكي من حاجة ؟
زيزي : أيوة ، عاوزاها تقرالي الفنجان وتشوف إذا كنت هاتجوز من الواد ميدو ولا لأ .
أم جهل : خلاص يا ستي ، قومي بينا نروحلها ، بس خلي بالك ... دي بتقبض بالدولار .

قال تعالى : " وَاتَّبَعُواْ مَا تَتْلُواْ الشَّيَاطِينُ عَلَى مُلْكِ سُلَيْمَانَ وَمَآ كَفَرَ سُلَيْمَانُ وَلَكِنَّ الْشَّيَاطِينَ كَفَرُواْ يُعَلِّمُونَ النَّاسَ الْسِّحْرَ وَمَآ أُنزِلَ عَلَى الْمَلَكَيْنِ بِبَابِلَ هَارُوتَ وَمَارُوتَ ج وَمَا يُعَلِّمَانِ مِنْ أَحَدٍ حَتَّى يَقُولا إِنَّمَا نَحْنُ فِتْنَةٌ فَلاَ تَكْفُرْ فَيَتَعَلَّمُونَ مِنْهُمَا مَا يُفَرِّقُونَ بِهِ بَيْنَ الْمَرْءِ وَزَوْجِهِ ج وَمَا هُم بِضَآرِّينَ بِهِ مِنْ أَحَدٍ إِلاَّ بِإِذْنِ الله ج وَيَتَعَلَّمُونَ مَا يَضُرُّهُمْ وَلاَ يَنفَعُهُمْ ج وَلَقَدْ عَلِمُواْ لَمَنِ اشْتَرَاهُ مَا لَهُ فِي الآخِرَةِ مِنْ خَلاَقٍ ج وَلَبِئْسَ مَا شَرَوْا بِهِ أَنفُسَهُمْ ج لَوْ كَانُواْ يَعْلَمُونَ " ... سورة البقرة الآية (102)
وقال رسول الله (صلى الله عليه وسلم) : من أتى عرافا أو كاهنا ، فصدقه بما يقول ، فقد كفر بما أنزل على محمد ... حديث صحيح .
أحبتي في الله ....
إن من أكبر مظاهر الشرك بالله أن تُشرك معه في علم الغيب مخلوقا لا يملك لنفسه ضرا ولا نفعا ، فلا يعلم الغيب إلا الله ، وما من أحد بيده الضر أو النفع إلا الله ، والحجرة الزرقاء أو التميمة لن تغني عنك من قدر الله شيئا إلا أن تدعوَ الله دعوة صالحة ...
فهل أنتم على استعداد للشرك بالله ؟
أم أنتم على استعداد للكفر بما أنزل على محمد لمجرد اعتقادات خاطئة ؟

هناك 10 تعليقات:

Ahmed Shokeir يقول...

للأسف إن كثيرين لايعتقدون أن هذا أحد مظاهر الشرك بالله ، أو الطرق المؤديه للشرك بالله بغير ان يعلموا

te3mah يقول...

مشكلتنا يا أحمد إننا بقينا بنتعامل مع كتاب الله وسنة رسوله على إنها كتب تاريخ قديمة أو كتب حكايات
لكن مابقاش فيه أي إيمان باللي فيها أو اقتناع
يعني لما تقول لواحد اقرا المعوذتين وربنا هيحميك من الحسد
يبصلك بطريقة غريبة زي ما يكون مش مصدق
وكإن ربنا سبحانه وتعالى أو رسول الله هيكدبوا علينا

مكين يقول...

انا اسف جدا ياطـعـمـة : انا نقلت الموضوت ده ل منتدي تاني بس طبعا ذكرت المصدر

انا شايف ن الموضوع خطير جدا الشرك بالله حاجه مش بسيطه
انا نقلت الموضوع لاهميته ارجو انك تسامحيني
و جزاك لله خيرا

te3mah يقول...

وإياكم يا مكين
وتقبل الله منا ومنكم
اللهم آمين

ممكن تديني لينك الموضوع في المنتدى ؟

مكين يقول...

طبعا ممكن :)
بس لازم تعملي
Register

http://www.ahly4ever.com/forum/index.php?showtopic=12217
http://www.ahly4ever.com/forum/index.php?showtopic=12233

te3mah يقول...

هو أنت إسلام الكنيسي ؟

مكين يقول...

No
جت اوت :)

te3mah يقول...

يعني أنت من منتدى حارة زعتر ؟

مكين يقول...

لا انامش من اي حته انا مستقل فعلا
و مش علي مبادئ اي حد :)
سواح علي النت

te3mah يقول...

مرحب بيك :)