الجمعة، نوفمبر 04، 2005

مافيـش فايـدة

يعني تاعبين نفسنا
وعمالين نقول ضبط النفس وحقوق المواطنة
ودعوة جميع الأديان إلى إظهار مبادئها الأساسية من سلام وحب وتآخي
ووقعنا بكامل حريتنا على بيان مدوني مصر لنبذ العنف الطائفي
وفي النهاية يجي واحد يشتم ويسب في الإسلام والمسلمين بدون أي وجه حق لحد ما يتشد على أمن الدولة
من حقك ترفض الإسلام وتنقده
لكن مش من حقك تشتم وتسب
لإن الخطأ مش هيجيب إلا الخطأ في النهاية
وهنفضل نلف وندور ورا بعض في حلقات مُفرغة
ويبقى على رأي هاني رمزي في مسرحية وجهة نظر :
مافيش فايدة

هناك 7 تعليقات:

R يقول...

لا إن شاء الله فيه فايدة، لأنّنا لا نترك أحداً يتطاول على الله تعالى بدون أن نعلّق ونعترض وندافع ونعلن إيماننا،
ولأنّ كلّ من يهين الإسلام أو المسيحيّة أو أيّة مقدّسات دينيّة ينال سيلاً من تعليقات الاحتجاج والغضب والاستنكار،
ولأنّ المدوّنين أظهروا شجاعةً وتحضراً أكثر من الصحفيين-باتّخاذهم مواقف معتدلة ضد العنف الطائفيّ وضد اعتقال أيّ إنسان مهما كان رأيه.

كلّ ما قاله المدوّنون هو ألاّ يعتقل أحد بلا محاكمة، ولم يقولوا ألا يُحاكم أحد إن تعدى على أيّ قانون؛ والفارق كبير.

فيه فايدة، بس مش سهل...
ـ

ibn_abdel_aziz يقول...

وهل الاسلام يرضي يا طعمة بسحب واحد من بيته وجره ونفخه وتعذيبه وكهريته حتي لو كان بيسب الله او الرسول

اللي انتي كتبتيه كلنا متفقين عليه تقريبا

اللي رامي قاله وضح ازاي اننا فاهمين ان كريم كلامه يمثل نفسه
احنا بنتكلم علي الاسلوب

ترويع لا
وعلي فكرة كريم ده اول السلسلة بس
وبكرة
واخد ورا التاني

اذا مش عشانه يبقي عشان ميات حيتفتح عليهم باب جهنم لو رضيوا بان حد منهم يتجر زي البقرة

اضافة لان الحكومة بتلعب لغبة فرق تسد
اضرب الملجد بالمؤمن
اضرب المسلم بالمسيحي
اضرب العلماني بالاسلامي
وقول في الاخر
الله اكبر
ودور ضرب في الكل

يا ريت نفهم الصورة بشكل اوضح
مع احترامي الشديد لرايك

shady يقول...

فعلاً يا جماعه موضوع الأعتقال ده كارثه فعلاً لامحاكمات لا محامى لا قاضى لا شئ أنت والمعتقل والجلاد الأكثر توحشاً من الشياطين أرفض الاعتقال لأى أنسان من أول عبود الزمر لحد الأخ المدون
لابد أن يسود القانون وينتهى مسلسل الرعب المسمى بالأعتقال ربنا يستر على باقى المدونين أتمنى ألا تكون هذه البدايه

Mr-Biboooo يقول...

الانسان ده ميفرقش معايا فى حاجة و هو اصلا و لا يسوى حاجة

لكن مقدرش انكر انه يسوى حاجة مهمة جدا يا طعمة انه انسان

يبقى الانسان ده مهما كانت تفاهته له حقوق
ان شاالله حقوق انتساب

te3mah يقول...

يا جماعة الخير
مسألة الاعتقال العشوائي والمفاجيء بدون محاكمة ده أمر مرفوض تماما من أي عاقل

أنا بانقاش نقطة محددة
كل ما نحاول نلم الشمل نلاقي واحد طلع من حيث لا نعلم ويخبطنا في بعض
وما نقدرش نحط راسنا في التراب ونقول إن الأصوات دي مالهاش تأثير
لأ طبعا ليها تأثير
خاصة لما يتم اعتقاله بالشكل ده
ده هيخلي الناس تنقسم وتتحزب
اشمعنى اعتقلوا ده وسابوا ده ؟!!!

أرجو إن تكون وجهة نظري واضحة للجميع

ومنور المدونة يا دكتور رامي :)

Ahmed Shokeir يقول...

لأول مرة أحب مباحث أمن الدولة

te3mah يقول...

بلاش تهدي النفوس يا أحمد :)