الخميس، ديسمبر 22، 2005

يا تليفــون .... يا



مُكالمة (1) :
الطرف الأول : أهلا يا طنط إزيك عاملة إيه ؟
الطرف الثاني : الحمد لله ... بأقولك إيه ...
الطرف الأول : خير يا طنط ..
الطرف الثاني : أنا جايبالك عريس مواصفاته .............
الطرف الأول : طب عنده كام سنة يا طنط ؟
الطرف الثاني : 48 سنة .
الطرف الأول : لا يا طنط فرق السن كبير قوي !!!
الطرف الثاني : كبير فين ... يادوووووب ... مانتي عندك 30 سنة !!!!

مُكالمة (2) :
الطرف الأول : أهلا إزيك عاملة إيه ؟
بنت الطرف الثاني : الحمد لله ... بأقولك إيه ...
الطرف الأول : خير يا رب !!!!
بنت الطرف الثاني : أنا جايبالك عريس لقطة ...
الطرف الأول : خير ... مواصفاته إيه ؟
بنت الطرف الثاني : عنده عربية وبيسافر علشان شغله وهتلفي معاه الدنيا وعنده شقتين و لم يسبق له الزواج قبل كده خالص .
الطرف الأول : جميل ... وعنده كام سنة بقى ؟
بنت الطرف الثاني : عنده 57 سنة .
الطرف الأول : !!!!!!!!!!!!!!
بنت الطرف الثاني : ألووووو ... انتي معايا ؟!!!
الطرف الأول : طب يا ريت تقفلي السكة قبل ما أقفلها أنا في وشك !!!!

تحديث :
الطرف الأول : إزيك يا طنط عاملة إيه ؟
الطرف الثاني : الحمد لله ... بأقولك ...
الطرف الأول : أيوا معاكي ...
الطرف الثاني : فيه عريس دكتور أنف وأذن وحنجرة عنده شقة في مدينة نصر وفيلا في التجمع الخامس وعنده 49 سنة ... ينفع ؟
الطرف الأول : هو مافيش في البلد دي غيري يا جدعاااان ؟!!!!!

هناك 39 تعليقًا:

~ se3loah ~ يقول...

ههههههههههههه

انا اقول .. اللي عمره 48 مش بطال
:P

مجاهد مصرى يقول...

سلميلى على طنط وقوليلها عاوز عروسة فى السبعينات ..
_ _ _ _ _

ربنا يرزقك الزوج الصالح ويجمع بينكم فى الحلال ..

tamer يقول...

تسلمى عزيزتى طعمة على العرض الطيب


صحيح المجتمع بيعانى بين توفر القدرة المادية فى سن متاخر اذا وجدتك كمان


وقليل من لشباب من تجدى قدرتة بنفس قدرة من تخطى الارعين وانتى طالعة

مشكلة اقتصادية عايز حل

شكرااااا

وفقنا الله لما فية الخير

مع خالص تحياتى

انا الذي يمشي في الظلال يقول...

حد كان بيقرا يوميات بنوته مفروسه كانت علي عشرنات من كام شهر ??
كانت التوقيع باسم رغداء بندق
كانت برضه بتتكلم عن نفس الموضوع

اوعي تكون انت با طعمه
:-)

te3mah يقول...

وأنا بأقول قلتهم أحسن يا سلعوة :D

te3mah يقول...

سلامك هيوصل إن شاء الله يا مصري
بس أنا مش مسأولة عن أي أخطاء فنية :D

te3mah يقول...

على فكرة يا تامر
فيه شباب صغير كتير ومعاه يتزوج
بس المشكلة إن الشباب الصغير ده عاوز بنت 18 سنة أو بالكتير قوي 20 :D

te3mah يقول...

لا يا فندم يا للي ماشي في الظلام
أنا صاحبة يوميات خاطبة :D

منورين البلوج يا جماعة :)

Taher يقول...

ههههههههههههههههههههههههههههههههه
حضرت انا موضوع زى ده مرة
بصراحة ضحكت ضحك
بوست ظريف

te3mah يقول...

ده حضرتك لسه ماقريتش التحديث يا طاهر :)

DeadinLife يقول...

يعنى عايزين الراجل يلحق يكون نفسه فى
البلد دى قبل سن الخمسين ؟؟؟!!!!
انا عن نفسى قررت اتجوز ممرضه من المستشفى على سن 53

te3mah يقول...

ربنا يوفقك

شمهورش يقول...

هههههه وماله فيها ايه يعني مادول لسه شباب
ههههه
ولا يعني المشاهير بس هما اللي عندهم حق
يجوزوا حد اصغر منهم والباقي ممنوع يبقى احنا
مش سواسيه كاسنان المشط ولا حاجه العدل راح
فين ياجدعان

ibn_abdel_aziz يقول...

فرق السن مسالة نسبية
ولا ينبغي فيها الا ان يكون امر متروك بالكلية لصاحب الشان وصاحبة الشان

عادة فرق السن يكون مناسب لو كان الرجل اكبر من المراة ب 5 - 10 سنيين

او كان الرجل اصغر بحوالي 5 او ست سنين

من تجارب شخصية
لكن الامر متروك في النهاية للشخص

رايت حالات كثيرة سعيدة لفروق سن كبيرة
وحالات تعيسة
وكله موجود

ربنا يرزقك بمن اذا رايتيه ...علمتي انه...هو هو من كان مقدر لكي
سواء كان اصغر او اكبر

وستعلمين..حين ياتي الوقت
ربنا يرزقك بمن لا يظلم ولا يحرم ولا يجرم ولا يشتم ولا ينتقم واذا احبكي اكرمكي
واذا كرهكي لم يظلمكي

انا اري انه لو تواجد عريس سنه لا يتجاوز ال 42 ربما يكون جيد
او ربما 28 - 30 ايضا والله اعلم

جزاكم الله خيرا

shady يقول...

الطرف الأول : جميل ... وعنده كام سنة بقى ؟
بنت الطرف الثاني : عنده 57 سنة
الطرف اللى بيقرا: ههههههههههههه

te3mah يقول...

شمهورش
العدل هتلاقيه يوم الحساب إن شاء الله
بس حاليا
ياريت حد يشوفلي أتوبيس أرمي نفسي تحتيه :(

te3mah يقول...

كلام جميل يا شريف مافيش عليه أي اعتراض
بس لما تبقى وضحت وجهة نظرك للي قدامك وتلاقيه برضه مُصر على الحاجة إللي أنت رافضها
ده يبقى اسمه إيه ده ؟

وعلى فكرة أنا مرة اتقدملي عريس أصغر مني بسنتين
وكان مناسب وحصل قبول بيني وبينه
لكن أهله رفضه لإني أكبر منه

متهيألي الموضوع أكبر من مجرد شخصين بيقولوا رأيهم في بعض

منور :)

te3mah يقول...

الطرف الأول : جميل ... وعنده كام سنة بقى ؟
بنت الطرف الثاني : عنده 57 سنة
الطرف اللى بيقرا: ههههههههههههه

الطرف الأول : عُقبالك يا شادي
:P

Ahmed Shokeir يقول...

طعمة
أنا بيتهيألى إنى علقت عندك على
البوست ده قبل كده

صح ولا بيتهيألي ؟

te3mah يقول...

لا والله يا بيه ماحصل
حتى شوف بنفسك :)

tamer يقول...

عندك حق.

بس ما الكل عزيزتى طعمة انا قاربت على نهاية العشرينات


وان وجدت فتاة ارتاح لها وترتاح لى حتى لو فى نفس سنى او اصغر سنة او اثنين هرتبط بها

وفقنا الله لما فية الخير

مع خالص تحياتى

te3mah يقول...

انت مافهمتنيش يا تامر
في سنك طبيعي إنك هتدور على واحدة من سنك
لكن اختيار الزوجة عند أغلبية الرجال بيفضل ثابت عند سن معين بالرغم من إنهم بيكبروا في السن

tamer يقول...

عزيزتى طعمة


طبعا بالنسبة لى اقول عادى ممكن ارتبط بانسانة كبيرة او قريبة منى فى السن


مش لازم تكون بنت 18 او 20

بالنسبة للشباب انا معاكى فى اغلبية بتختار البنت فى حدود سن معينة كما قولتى

ودة يرجع الى ثقافة مجتمع وتقاليد وعادات عايشة بداخل البعض
غير قابلة لادخال افكار جديدة من رايها انها غير مجدية

وفقنا الله لما فية الخير

مع خالص تحياتى

Ahmed Shokeir يقول...

طمنتيني .. أنا قلت الواحد لازم يعد صوابعه قبل مايدخل عندكوا .. التعليقات بتتسرق ولا إيه

هو المخروب التليفون ده مابيبعتش إلا الأوفر إيدج ولا إيه ؟
واللى قعد لغاية مابقى عنده 57 ده إيه اللي فكره دلوقتي ولا 49 سنة
يابنتي دى كلها عالم عندها مشاكل اللي يخليهم كده

بصي أنا آخر جملة عجبتني جدا

هو مافيش في البلد دي غيري يا جدعاااان ؟!!!!!

برافو عليكي

te3mah يقول...

ماتخافش يا أحمد
إحنا قفلنا الفرع بتاع محطة مصر
:D

وياريت فعلا يشوفوا حد غيري في البلد دي
حاكم الموضوع بقى استنصاد :(

arabprof يقول...

هذا هو اسلوب يوميات خاطبة

ربنا يوفقك ويرزقنا واياكي الجنة

te3mah يقول...

جزاك الله كل خير يا أبو محمد :)
فعلا مع الخاطبة ياما هنشوف :)

ibn_abdel_aziz يقول...

اهله رفضوا وهو سمع كلامهم ؟
يبقي كويس انك متجوزتهوش

انتي عارفة في امريكا
صحيح الزنا سهل
بس الجواز اسهل

يعني لو شفت واحدة في الشارع وقلتها
would you marry me ?
لا شبكة ولا مهر ولا شقة ولا قرايب ولا هباب
ويادوبك الاب والام يعرفوا ويحضروا الفرح

ملعون ابو دي عادات وتقاليد في بلادنا
اللي عاوز يتجوز واحدة في سن امه هو حر
واللي عاوزة تتجوز واحد في سن ابوها هي حرة
واللي عاوز يتجوز عفريت هو حر
واللي عاوز يقلع ملط هو حر
واللي عاوز يعدد هو حر
واللي عاوزة تتجوز فقير وهي اميرة هي حرة
واللي عاوز يتجوز مدرسته في المدرسة هو حر
واللي عاوز ميتجوزشي هو حر

عشان كدة الانسان لسة انسان في امريكا
وفي بلادنا
حاجة قرف
قرف
قرف

te3mah يقول...

اسمحلي أختلف معاك يا ابن العزيز
طالما أنا رضيت أبقى مسلمة بكامل إرادتي
يبقى أنا مش حرة
أنا ملزمة بتطبيق قوانين إلهية
والقوانين دي طبعا لمصلحتي أنا أولا وأخيرا

يعني الصور إللي أنت ذكرتها في أمريكا دي مش حرية ولا حاجة
ده انعدام منهج واختلال فطرة

قمة الحرية إنك تطبق إللي أمرك بيه ربك

أما مسألة العادات والتقاليد في بلدنا
فأنا بابصم بالعشرة إنها حادت عن الشرع تماما
وده فعلا سبب المأساة والمشكلة
إننا بعدنا

ibn_abdel_aziz يقول...

حرية ينتج عنها بعض الفساد
افضل من قيد كل ما ينتج عنه فاسد

النبي اتجوز خديجة وعائشة ومحدش عمل قصة ورواية
حتي كفار مكة اللي مستنين عليه غلطة مقولش شاب بيتجوز عجوزة عشان يضخك عليها وياخد فلوسها
ولا قالوا شيخ متصابي بيتجوز عيلة لما اتجوز عائشة

والناس كانت ممشية حالها وكل واحد ف حاله

جاهلية ايام النبي كان فيها حاجات احسن بكثير من دلوقتي

te3mah يقول...

أنا ماقصدتش من كلامي كدى شرعية زواج الكبير من صغيرة أو العكس
أنا قصدت النقاط إللي أنت ذكرتها دي :

واللي عاوز يتجوز عفريت هو حر
واللي عاوز يقلع ملط هو حر
واللي عاوز يعدد هو حر
واللي عاوزة تتجوز فقير وهي اميرة هي حرة
واللي عاوز ميتجوزشي هو حر

بجانب إننا مانقدرش نقارن بين مجتمع الرسول والمجتمع حاليا
دلوقتي التكافؤ بقى مطلوب في كل شيء

حتى أيام الرسول كان فيه جارية للسيدة عائشة متزوجة من عبد
والسيدة عائشة أعتقتها
فالجارية طلبت الطلاق وخدته لإنه حقها
ولما الرسول كلمها في إنها ترجع لزوجها إللي بيحبها
رفضت والرسول طبعا مايقدرش يغصبها على زيجة هي مش عاوزاها
لأنها طالبة التكافؤ وده حقها

لكن التغاضي عن الأمور دي كلها تحت مسميات الحب والراجل مايعيبهوش إلا جيبه والبنت الجاهلة أريح من المتعلمة
ده كله مش هيجيب وراه غير الخراب

وعامة كل زيجة بيبقى ليها ظروفها الخاصة جدا
ومانقدرش نعمم الأحكام

Romantic Rose يقول...

اسمحيلي يا طعمه .. المبدا نفسه رهيــــــــــــــب .. ف الافيه التالته و لبنت مثقفه و متعلمه زيك مش ممكن تتجوزي بالطريقه دي يا بنتي و لو عمرك 40 سنه ..

قبل ما تقرري الجواز اسألي نفسك بتتجوزي ليه ؟؟ بتتجوزي استكمالا للشكل الاجتماعي و فرارا من شبح العنوسه و الاكتئاب ؟؟ ولا علشان تبني بيت مسلم بجد و تربي أولاد يبقوا ف يوم من الايام زي مريم العذراء و صلاح الدين الايوبي ؟؟

لو عايزه جوازه و السلام خدي الكبير .. لانه هيدلعك و هيحس دايما انك اتنازلتي لما قبلتيه و اتجوزتيه و هيتمنالك الرضا ترضي بس خلي بالك من الغيره .. و لو عايزه البيت و السكن و الذريه اللي بجد تتمنيها .. اصبري شويه لحد ما تلاقي اللي اول ما تشوفيه و تتكلم معاه تقولي هو ده .. و لو استنيتي كتير ما تيأسيش و ما تزهقيش .. خليكي علي مبدأك و عليكي و علي الدعاء و تحري أوقات الاجابه .. و الله ان شاء الله ربنا مش هيخذلك ابدا .. و قولي لطنط ما تتعبش نفسها اكتر من كده .. و ما نجيلهاش ف حاجه وحشه ..

te3mah يقول...

يا رومانتك أنا لو عليه عارفة ومتيقنة تماما إن الزواج رزق
يا مكتوب يا لأ
لكن أهلي والناس والضغوط بتخلي الواحد يقبل بأقل الحلول ضررا

مش عاوزة أقولك إن في واحدة جارتنا عرضت على ماما إني أروح أسجل في أحد مكاتب التزويج !!!

صدقيني والله أنا راضية وحامدة ربي
لكن الأهل والناس مش بيرحموا
خاصة لما يلاقوا بنات أصغر منك اتجوزوا وخلفوا وانتي لسه
ماحدش بيقول ده نصيب ورزق
للأسف ..

والله المستعان

ibn_abdel_aziz يقول...

بقولك ايه يا طعمة فيه خدمات اون لاين بتاعة
match making
بيستخدمها مئات الالاف من الناس
من كل الاعمار
من سن ال 18 الي 80
للمسلمين وغير المسلمين

سبحان الله ممكن يكون نصيبك مش في واحد مصري اصلا
ويكون شاب من عمرك وجاهز وعاوز زوجة كويسة

اعرف ناس كثيرة استخدمتها والحمدلله متجوزين الان

دي مش بس دعوة ليكي
لا لاي اخت او اخ
شايف ان الفرص قد تكون اقل بكثير في مصر

يعني مثلا انا اعرف اخ مصري اتجوز فلسطينية مش عشان قلة البنات في مصر
عشان كل ما يخطب بنت اهلها يقرفوه بالمطالب

راح دور برة مصر ولقي
سبحان الله
الرزق مش ف مصر بس
الرزق في كل مكان

طب وليه لا
يمكن تلاقي مسلم امريكي نضيف من اللي اسلموا عن اقتناع مش تقليد ولا كوبي وبيست

اعرف واحدة مصرية اتجوزت امريكي بالطريقة دي..تقربي لي من بعيد
والراجل جالها مخصوص

ان كان الراجل مش جاهز في مصر..دوري عليه برة مصر
وان كانت البنت مش جاهزة في مصر دوري عليها برة مصر

يا جدعان دا الواحد ممكن يتجوز في امريكا بخمسة دولار والله العظيم

مش دي حاجة تكسف
اننا في بلادنا يتم اثقال الشاب بالعبء لحد ميتجوز وهو في الاربعين
والبنات تقل فرصها لان محدش عارف يتقدم من شدة الفقر او قلة الحيلة او ارهاق الاهل بالمصاريف والمطالب؟

te3mah يقول...

المواقع دي في حد ذاتها مافيش عليها اعتراض من ناحيتي لإني عارفة إني أقدر أحط للقدامي خطوط حمرا لا يتعداها
بس المشكلة إن أهلي رافضين الفكرة دي من أساسها

بالنسبة لموضوع إثقال كاهل العريس بالطلبات
صدقني والله ده بقى موضوع قديم قوي

وعن تجرية شخصية

أنا كنت مخطوبة مرتين
وفي المرتين قدمنا تنازلات
يعني مش بنحدد رقم للشبكة بنقول للعريس دي هدية منك لعروستك
ومش بنطلب مهر بنكتب مؤخر وقايمة بس
والمؤخر مبلغ بسيط مش جامد يعني
وللأسف في المرتين دول الناس إللي قدامنا فهمونا غلط
فهموا إن إحنا ماصدقنا لقينا راجل وأهلي عاوزين يخلصوا مني والسلام علشان أزمة الجواز اليومين دول
وعندهم استعداد يجوزوني ببلاش
وتلاقي العريس من دول بعد ما كان متفق معانا على حاجات معينة
يبدأ يضغط علينا علشان نعمله إحنا الحاجات دي بالرعم من إنه قادر ماديا على تنفيذها
يا إما ماكنش اتفق من البداية

والدنيا مليانة
ولو مكتوبلي في رزقي أتجوز
أكيد هاتجوز :)

ibn_abdel_aziz يقول...

طب واهلك يرفضوا ليه اسلوب زي ده مثلا؟


الظاهر ان الناس كلها في مصر محدش عنده ثقة في الثاني
يا الكل منتهز الفرصة يستغلها من اللي قدامه
يعني يا اهل طماعين وعاوزين يبلعو العريس
يا اهل مهاودين يروح العريس يقوللك دول زهدانين في بنتهم ...طب مش متجوز
يا ربي ..ده ايه العقد دي؟
سبحان الله بجد في الناس

ده واضح اننا كلنا بقينا مرضي نفسيين

te3mah يقول...

طبيعي يا شريف إن الأهل يرفضوا شيء غامض بالنسبالهم
يعني لو روحت قولتلهم إن فيه عريس جايلي عن طريق النت هيقولولي عاوز يتسلى وانتي تعرفيه منين
مايعرفوش إن في أي مجال من مجالات التعارف بغرض الزواج بكل أشكالها بيبقى فيه نسبة عاوزة تتسلى
بس ماحدش يقدر ينكر إنها على النت أكبر

وعلى فكرة موضوع إن الأهل بيتساهلوا في الطلبات المادية ده بيخلي الشاب يفرح بنفسه جدا
بيفتكر نفسه حاجة كبيرة وإن الأهل ما صدقوا وبيبقى فعلا عاوز يتمم الجوازة
بس أهل البنت هما إللي يشيلوا الجوازة كلها من الألف للياء

والله المستعان

محمد مكاوى يقول...

والله بلوج رائع اختى طعمه
ماشاء الله عليكي

من ابداع الى ابداع

اخوكى محمد مكاوى

te3mah يقول...

جزاك الله كل خير يا محمد
منور البلوج :)