الأربعاء، يونيو 14، 2006

وعدت سنة

من سنة فاتت كنت لسه بأخطو أولى خطواتي في عالم التدوين
والفضل يعود – من بعد الله تعالى – لأخويا
وليد وأخويا يحيى عياش

مش هاكدب عليكم في البداية ماكونتش فاهمة إيه إللي بيحصل
وماكونتش عارفة يعني إيه تدوين أصلا
قولت أجرب مع الكل وأشوف وأفهم
الحاجة إللي شجعتني على الاستمرار إنها مساحة حرة ليا أنا وبس
بمعنى إنها بتختلف عن عالم المنتديات إللي باشارك فيه بإنها صفحة خاصة بيا أنا وبتمشي بقوانيني الشخصية
تقريبا موضوع الحريات ده بقى عُقدة عند الشعوب العربية
ويمكن تفتكروا إني بدأت أفك عقدي في إني أحجر على الآراء إللي بتتكتب عندي
بالعكس ...
أنا سمحت للي عاوز يهاجمني يهاجم
وإللي مش عاجبة حاجة يقولها بمنتهى الصراحة
بس كان شرطي الوحيد إنها تكون صراحة بمنتهى الأدب
علشان كده حذفت الردود إللي كانت كلها شتيمة وسب وكُفر بالله
لإن مالهاش مكان في مدونتي أو حياتي

وبعد مرور سنة بالتمام والكمال
الله أعلم إللي كتبته خلال السنة دي في ميزان حسناتي ولا سيئاتي
بس أنا بارحب بالجميع على صفحتي المتواضعة دي
بارحب بيهم للنقاش والاختلاف
بس برضه بمنتهى الأدب :)

إيمان الحسيني

هناك 16 تعليقًا:

وليد يقول...

مبروك يا ايمان
وعقبال الف سنه
وتكتبى وتكتبى

te3mah يقول...

الله يبارك فيك ياوليد
ربنا يكرمك ويعزك يا رب
ويجعل كل كلمة حق كتبتها هنا في ميزان حسناتك أنت وعياش :)
اللهم آمين

محمد النقيب يقول...

انا برضه لقيت في التدوين مساحه حره اقول فيها اللي انا عايزه والاقي ناس بتتجاوب معايا ...
بس انا لسه جديد ..وعقبال ما اكمل سنه زيك..
مبروك وعقبال ما نباركلك على 10 سنين تدوين...

te3mah يقول...

منور التدوين كله يا محمد
وعقبال الـ 10 سنين يا سيدي :)

سيبها على الله يقول...

الاخت ايمان
بارك الله فيك وبصراحة مدونتك من ضمن المدونات التى ادخل عليها من آن لاخر لما اجد فيها من راحة نفسية داخلها...
اسلوبك ينم عن شخصية غاية فى الرقة والادب وهذا فى حد ذاته مكسب لمجموعة المدونين والذين يكتبون لهدف معين فى الحياة...
بارك الله فيك مرة ثانية ولا تحرمينا من آن لاخر من كتاباتك الممتعة

جواد الخير يقول...

السلام عليكم ورحمة الله

أولا : - أرجوا أن تسامحيني في إقتباسي إحدى الصور من مدونتك

ثانيا :- بما أنك (خبرة )و أ( أقدمية ( أرجوا تزوري مدونتي و تبدي لي رأيك بتعليق بكل صراحة و موضوعية .. فأنا جديد على عالم التدوين جدا و رأي الخبرات يهمني جدا

جواد الخير
مصر -القاهرة

http://goad.jeeran.com/

te3mah يقول...

أخي الكريم سيبها على الله
جزاك الله خير الجزاء
وبارك الله فيك
تصفحك لمدونتي شرف ليا

te3mah يقول...

وعليكم السلام ورحمة الله وبركاته أخي جواد الخير
منور مدونتي طبعا
وبخصوص الصورة إللي أنت اقتبستها من عندي
أنا ممكن أعملك واحدة غيرها وتكون بلون مناسب لألوان مدونتك
بلغني والله المستعان
جزاك الله كل خير

ارحم دماغك! يقول...

ياااا يا أخت إيمان!..
لو مكنتش دورت مين بيجيب سيرتي مكنتش لقيت الموضوع ده!!
كده تسيبيني أعرف بالصدفة؟!
ياللا حصل خير :)
كل سنة تدوينية وانتي ومدونتك طيبين، وعقبال كده يارب مدونات الصوت والصورة والجريدة والمجلة والإذاعة:)

te3mah يقول...

ربنا يكرمك ويعزك يا عياش
البركة فيك من بعد الله تعالى
بس مين إللي قالك إني باجيب في سيرتك ؟!!
:)

ارحم دماغك! يقول...

دي المميزات التقنية للورد برس:)
صحيح مش ناوية تيجي بقى؟!

te3mah يقول...

معلش يعني نعدل في صيغة السؤال
أنت مش ناوي تنقلني بقى ؟!!!
مانت عارف إني مافهمش حاجة في الوورد برس
ولسه متعلمة البلوج سبوت من قريب

Romantic Rose يقول...

كل سنة و أنتي طيبة يا طعمه يا أطعم من الطعامة .. مدونة محترمه و كلمات رقيقه و فعاله .. عقبال 100 سنه تدوين هداف !!

te3mah يقول...

ربنا يكرمك ويعزك يا رومانتك :)
وعقبالك إن شاء الله :)

عمران والدنيا يقول...

انا لسة فى اول دقيقة تدوين ويارب اقدر اتعلم واكون زيك

te3mah يقول...

ربنا يوفقك يا عمران :)