الجمعة، يونيو 15، 2007

استكمالا لحالة الإحباط

ما الحكمة من عرض برنامج :
Daddy's Spoiled Little Girl
ابنة أبيها المُدللة
على قناة عربية (mbc4) وللدول العربية التي يُعتبر الغالبية العُظمى من سكانها تحت خط الفقر ؟!!!!
في حلقة النهاردة البنت المدللة ضغطت على أبوها إللي بيحبها جدا علشان ترجع المدرسة بعد طول غياب بسبب المرض بحفلة في منزل على البحر
المنزل ده - أو الفيلا إن صح التعبير - تكلفة إيجاره في اليوم الواحد عشرة آلاف دولار (10000 $)
ده غير الهدية إللي اشتراها ليها أبوها
سيارة جر رباعي بقيمة 65000 دولار
ده غير قيمة فاتورة شراء الملابس الجديدة بـ 2000 دولار
كل ده بيُعرض على قناة فضائية رأس مالها عربي وتُبث للدول العربية في الأساس
والغالبية العُظمى من الشباب العربي عاطل عن العمل ولا يجد قوت يومه
هتقولوا إن الفقراء ماعندهمش دش
هاقولكم الجيران عندهم
والقهاوي عندها
ده غير إن تكلفة تركيب الدش دلوقتي بقيت لا تتعدى الـ 300 جنيه
لنا الله

هناك 8 تعليقات:

خمسة فضفضة يقول...

السلام عليكم ورحمة الله وبركاته

كل اللي اقدر اقوله ان دول ناس ماعندهمش احساس بالعالم من حواليهم ، عايشين داخل مكاتبهم المكيفة ، وليس لديهم احساس بان هناك حولهم من لا يجد ثمن رغيف العيش الحاف ، كل ما يفعلوه هو انفاق آلاف الدولارات لاستيراد برامج من هذه النوعيه المستفزه

وعلي رأيك حاجه تجيب احباط

Ahmed يقول...

خمسه وخميسه
يا ناس يا شر كفايه قر
بس على رأيك
ليه كل ده
حاجة تغيض
ناس فاضيه
كل دي فلوس عندهم
ياه ... كل دي فلوس
هيه الفلوس دي مبتخلصشي من عندهم
يالا ياستي جبتهملك على الارض
ولا تزعلي نفسك

ma 3lina يقول...

كل ما اسمع عن حاجة من الحاجات دي في الحقيقة مش في المسلسلات .. افتكر الآية

وَأَصْبَحَ الَّذِينَ تَمَنَّوْا مَكَانَهُ بِالْأَمْسِ يَقُولُونَ وَيْكَأَنَّ اللَّهَ يَبْسُطُ الرِّزْقَ لِمَن يَشَاء مِنْ عِبَادِهِ وَيَقْدِرُ لَوْلَا أَن مَّنَّ اللَّهُ عَلَيْنَا لَخَسَفَ بِنَا

فكرني البوست ده برضه بتلفزيوناتنا لما تجيب في النشرة الرياضية نتايج مباريات الجولف في أمريكا .. ههههه

إيمان الحسيني يقول...

أخي الكريم سعد الشاطر
ندعوا الله أن يفرج كرب المكروبين
وأن يرد كل مسجون إلى أهله سالما غانما
اللهم آمين

إيمان الحسيني يقول...

وعليكم السلام ورحمة الله وبركاته يا فضفضة
فعلا والله الحمد لله على نعمة الإحساس
ناس ماعندهاش أدنى مشاعر الإحساس بالآخرين
الله المستعان

إيمان الحسيني يقول...

هو ده الحل فعلا يا أحمد :)
نضربهم ضربة رجل واحد ونحدد يوم وساعة علشان نحسدهم :)

بس السؤال إللي بيطرح نفسه :
هنحسدهم على إيه بالضبط ؟!!!!

إيمان الحسيني يقول...

أخي الكريم ماعلينا
والله الواحد مش حمل مسئولية زي دي ولا بيتمناها لنفسه
بس على الأقل بنحلم بمستوى آدمي للمعيشة

المجاهدة يقول...

هما بيعملوا كده عشان يشغلوا الناس عن اهدافهم اصلأً...

و الي هينشغل يبقى هوا الي حقق ليهم اهدافهم
:)


احنا عندنا اهم و اعلى من الحاجات دي نشغل بيها نفسها :)


بس عندك حق... انا كذا مرة اقعد اقول اشمعني البرنامج ده!
اصلأً ليه عملوه حتنى عندهم!!


اتفرجت على شوية من حلقة فيهم و كنت متوقعه انهم هيجو اخر الحلقة باباها يقولها لازم تعتمدي على نفسك و كفاية كده

طلعوا انهم بيشوفوا مين اكتر واحد بتعرف تضحك على باباها الاهبل اللي عنده فلوس -_-