الأحد، يوليو 29، 2007

رجلٌ والرجال ُ قليلُ

إمبارح خرجت أنا ووالدتي المُسنة في مشوار
وإحنا راجعين البيت ركبنا الميني باص الأخضر الصغير (أبو جنيه وبريزة)
كانت الكراسي كلها مشغولة
استنيت شوية يمكن حد من الشباب الحلو إللي ربنا ممتعه بالصحة والعافية يقوم علشان والدتي تقعد
لكن لحظات واكتشفت إن إللي بيجري في عروقهم ميه ساقعة
فضلنا واقفين أنا وماما لمدة 10 دقايق تقريبا
الكرسي إللي كنا واقفين عنده كان قاعد عليه بنتين صغيرين في سن الجامعة تقريبا
فوجئت بواحدة فيهم بتقعد على حِجر التانية وبيطلبوا من والدتي إنها تقعد على الكرسي التاني !!!!
والدتي حاولت ترفض لكن هما أصروا إنها لازم تقعد
ربنا يباركلهم في صحتهم
ويفرح أهاليهم بيهم
اللهم آمين

هناك 39 تعليقًا:

ma 3lina يقول...

حاجة تزعل بصراحة ..

بس متزعليش مني .. إحم إحم ..

هما القاهريين كده

:D

عصفور المدينة يقول...

كان فيه موضوع شبيه كتبته أستاذة رفقة عمر من أسبوعين وكانت تشتكي نفس الشكوى ولكن عن الفتيات وأنا رديت قلت إن اقتحام الفتيات ومزاحمتهم بلدت أحاسيس الشباب وجعلتهم لا يكرمون الفتيات

لكن مسنين وامرأة مسنة كمان
الله المستعان صورة سلبية جدا

إيمان الحسيني يقول...

إحم إحم
متهيألي تصحيحا للجملة المفروض إنها تكون:

هما الرجالة كده
:D


أعتقد الموضوع مالهوش علاقة بالبلد أكتر ماهو ليه علاقة بالتربية والنشأة
والأفكار المسمومة إللي نشرها بتوع تحرير المرأة (من ملابسها)

والله المستعان

إيمان الحسيني يقول...

جزاك الله كل خير يا عصفور المدينة
والله العظيم وربنا إللي شاهد عليا
إني لما باكون راكبة مواصلة وباشوف رجل أو ست مسنين بأقوم ليهم
وبيني وبين نفسي بأقول :
علشان والدتي تلاقي إللي يقوملها ويقعدها .

والحمد لله على كل حال

BinO يقول...

كلام يدعو للخجل
أحياناً أتسائل ما الذي أوصل الكثير الي هذه الدرجة من بلادة الأحساس
وأزاي الواحد يعمل نفسه مش شايف
رغم أن الواقع ممكن يخرم عين أي حد

جزاكم الله خيراً
وما تفعلوا من خيرٍ فأن الله يعلمه

BinO يقول...

http://alomrla7tha.blogspot.com/2007/07/blog-post_25.html
موضوع يتكلم عن الأحساس عند لحظة

Reemo يقول...

تصدقى انى كنت لسه بتكلم فى نفس الموضوع ده
وبحكى عن موقف شفته فى الشارع
عن شاب كان معدى من مكان ميسمحش بتعديه غير شخص واحد
فى الوقت نفسه اللى كانت معديه منه ست عجوزه
الغريب ان الشاب ده فقد ادنى احساس بالزوق او الرجوله
وقام معدى وخبط فى الست العجوزه ويكاد يكون طوحها على جنب علشان يعدى وهو مستعجل
والست كانت هتقع على الأرض لولا الناس سندتها
مش عارفه بجد الناس جرالها ايه
ربنا يجازى كل شخص على قد نيته
تحياتى

م يقول...

من حقك تضايقى يا طعمه
بس يعنى ممكن الرجاله دول يكونوا مثلا راجعين تعبانين
او كل يوم بيتعرضوا لحاجه زى دى فبالطريقه دى هيعيشوا واقفين فى المينى باص كل يوم
مش دفاع بس جايز فى عذر
وبصفه عامه فيه حاجات ايجابيه كتير اختفت والغريب بقى بصراحه انك مستغربه

eldoctor يقول...

سبحان الله.. احنا فعلا فى أخر الزمان .. الرحمة و الحياء مش موجودين دلوقت فى قلوب الناس..

طهقان يقول...

معلهش يا طعمة

بالنييابة عن القاهريين والرجالة
وبالاصالة عن نفسي

نعتذر

ما علينا حدفت طوبة علينا احنا القاهريين
وانت بعدها دفتي الطوبة على الرجالة

معلهش معلهش


ملحوقة

أمــانــى يقول...

يا لها من زمن ضاع فيها كل شئ
النخوة والرجولة والشهامة وكل شئ

إيمان الحسيني يقول...

جزاك الله خير الجزاء يا بينو

إيمان الحسيني يقول...

جزاكِ الله كل خير يا ريمو
أعتقد إن الشباب بوجه عام - ذكور وإناث - بقوا مُغيبين بشكل غير طبيعي
كله بينزل من البيت وهو بيفكر في نفسه وحريته ومصلحته وبس !!!!

إيمان الحسيني يقول...

جزاك الله كل خير أخي محمد الهنداوي
كلامك في محله
بس مش كلهم رجالة راجعين من أشغالهم
بيبقى فيه شباب كتير قاعد بيهزر ويضحك بشكل مستفز
وممكن كمان يقعد يتريق على والدتي ووالدتك وأي حد مُسن ركب معاهم
وبينسوا إن كلنا ماشيين في نفس الطريق ولنفس النهاية
والله المستعان

إيمان الحسيني يقول...

نسأل الله العفو والعافية أخي الدكتور

إيمان الحسيني يقول...

أخي الكريم طهقان
أولا : أنت منور مدونتي طبعا :)

ثانيا : ما علينا ... يبقى أخونا مش أختنا :)

ثالثا : رد أخونا ما علينا كان دعابة وأنا رديت عليه بدعابة تانية :)

إيمان الحسيني يقول...

جزاكِ الله خير الجزاء يا أماني

beeboo يقول...

معلش يا طعمة هانم
متزعليش
وقولي لماما كمان متزعلش
الحمد لله انهم كانوا بنتين
لأن لو كانوا بنت وولد وقاعدين فوق بعض
كانت بقت مشكلة

القاهريين مش كده يا ماعلينا
وأرجوك بلاش تعميم
لأن بتوع الأرياف أكثرهم ماعندهمش ذوق ولا بيفهموا
وريحتهم وحشة
بقول أكثرهم

إيمان الحسيني يقول...

لا إله إلا الله

فيه إيه يا جماعة ؟!!!
أخونا ما علينا ماكنش يقصد غير الهزار
أنا قاهرية وليا أب وأخ
يعني الكلام يشملهم
بس أنا عارفة إنه هزار
علشان كده رديت عليه بهزار برضه

مافيش داعي نجرح في بعض الله يكرمكم
العملية مش ناقصة

وأنا لا هانم ولا ليدي
أنا مجرد بنت مسلمة تسأل الله العفو والعافية

سبحانك اللهم وبحمدك
أشهد أن لا إله إلا أنت
أستغفرك وأتوب إليك

ياسر سليم يقول...

المهم ان الوالدة قعدت فى الأخر

وانا بحس ..

ان فى رجاله فى سرهم بيقولوا مش الستات عايزين المساواه وبيطالبوا بيها

اشمعنى ييجوا عند الكراسى وعايزنا نقوم وهما اللى يقعدوا

دا مبدأ اللى ما بيقومش لواحده

إيمان الحسيني يقول...

جزاك الله كل خير يا ياسر
وأنا عارفة إن ده تفكير الأغلبية
بس مش مع سيدة مُسنة يعني !!!

beeboo يقول...

انتي زعلتي ليه؟
انا ماقصدتش تريقة والله
انا بس مش عايزك تزعلي
المفروض تكوني اتعودتي ع الأفعال دي
يابنتي مستوي الأخلاق بينحدر طول الوقت
دي مشكلة شعب بالكامل
مابقاش في ذوق في الشارع
ولا في الشغل ولا مع الأصحاب
يبقي عادي لما يكون مفيش أخلاق في الأتوبيس
أحب أفكركم بحديث نبوي
الحديث بيقول
خالق الناس بخلق حسن
يعني حسن الأخلاق مفروض ع المسلمين
حد سمع حاجة عن الحديث ده؟؟؟؟

ومع ذلك هانم وستين هانم كمان
وأخيرا سلميلي علي ماما

طهقان يقول...

اختي طعمة

اولا..
ماعلينا ...اخت أو اخ....ماعلينا

ثانيا

هو بدء بدعابة

وانت رديتي عليه بدعابة ..
وانا
رديت عليكم بدعابة

:)
ربنا يكرمك ويكرمه
ويكرمني

امنية يقول...

حاجه تحرق الدم
هما هاجروا باين!!

أها

الرجاله اقصد

الا من رحم ربى
ضاعوووووو وسط ملايين عديمى الدم والاحساس والدين للاسف
ربنا يحفظ الرجاله من الزوال والانقراض

خمسة فضفضة يقول...

السلام عليكم ورحمة الله وبركاته

حاجه بصراحه تنرفز

للدرجه دي ماعدش فيه احساس ....ربنا يهدي

تحياتي

! Eslam ! يقول...

شوفت ليكى رد فى الاول بيقول

...............................
والله العظيم وربنا إللي شاهد عليا
إني لما باكون راكبة مواصلة وباشوف رجل أو ست مسنين بأقوم ليهم
وبيني وبين نفسي بأقول :
علشان والدتي تلاقي إللي يقوملها ويقعدها
................................

ياعنى لو كانت والدتك مش كبيره فى السن

مكنتيش فاكرتى تقومى

طعمه

نعالا عندنا اسكندريه

وانتى تشوفى الشهامه

والمجدعه

على رائ ما علينا هما القاهريين كده D:

إيمان الحسيني يقول...

جزاك الله كل خير يا بيبو

إيمان الحسيني يقول...

ربنا يكرمنا جميعا يا طهقان :)

إيمان الحسيني يقول...

والله يا أمنية البنتين إللي قعدوا ماما كانوا بالنسبالي بـ 100 راجل

إيمان الحسيني يقول...

وعليكم السلام ورحمة الله وبركاته يا فضفضة
والله أنا مش عارفة المشكلة والخلل بقوا فين بالضبط
والله المستعان

إيمان الحسيني يقول...

ربنا يكرمك يا إسلام
طبعا أنا ماقصدتش كده من ردي الأولاني
أنا قصدت إني لما باعمل حاجة باعملها لوجه الله وأدعي لربنا إنه يردهالي في موقف أكون محتجاها فيه
لكن في الموضوع ده بادعي لربنا إنه يردها لأمي الأول وليا من بعدها لما أكبر

وصلت يا هندسة ؟ :)

Unknown يقول...

يووووووووووووه

دى المواصلات دى بشوف منها العجب
ده ساعات بلاقى واحدة كبيرة هى اللى بتتحايل على الشاب عشان تقعد لان رجليها واجعينها اوى

لا حول ولا قوة الا بالله

وحسبى الله ونعم الوكيل

مش بياخدوا منى غير حسبنة
:@

يا مراكبي يقول...

الموضوع بجد بقى أكبر من موضوع أوتوبيس وتعدية شارع وخلافه .. كل دي دلائل على إنحدار أخلاقي خطير .. بمعنى إن اللي جاي بعد كده هيكون أسوأ وأسوأ واللي منتظرنا في المستقبل هيكون شيء مروع

نسأل الله العفو والعافية

ayman يقول...
أزال المؤلف هذا التعليق.
mhtaurus يقول...

أنا متفق مع "يامركبى" تماماً .. فعلا الواحد خايف من إللى هيحصل بعد كدة .. ربنا يستر

إيمان الحسيني يقول...

كلامك ده يا إنسانة فكرني بكلام ماما كانت قالتهولي قبل كده

قاليتلي إنها لما كانت صغيرة هي وخالاتي وكانوا بيخرجوا مع جدتي الله يرحمها ويركبوا الأوتوبيس
كانت جدتي تطلع وتحوط عليهم وتبص بس للرجالة إللي قاعدين جنبهم
تلاقي الكل قام وقعد ماما وخالاتي :)
وماكنش مهم عند جدتي إنها تقعد
كان كل إللي يهمها إنها تحافظ على بناتها

الله يرحمها

إيمان الحسيني يقول...

والله يا مراكبي الواحد خايف بعد كده مايلاقيش حد يسقيه بق ميه
الله المستعان

إيمان الحسيني يقول...

منور المدونة يا كازانوفا :)

عليوه يقول...

الشباب دى ما اتعلمت من كتب الابتدائى الاخلاق ولا عرفت تحترم الكبير وتعطف على الصغير حاجات اتعلمناها وفى ناس فهمتها وناس ما فهمتش مش عارف شباب البلد رايح على فين حتى احترام الكبار انتهى عصرة http://aaaaaaah7m.blogspot.com/