أنا ورمضـ(3)ـان وشوشو

ظللت جالسا في غرفتي طوال الليل في انتظار إبليس اللعين لأتشاجر معه ، وعندما بدأتُ أشعر بوجوده في الغرفة قلت بصوت مرتفع : أنت جيت يا بيه ؟!!
- إيه ده ؟ مش معقولة !!! أنت قاعد مستنيني ؟!!! كتر خيرك ، كنت عارف برضه إنك ابن أصول ومش هتنساني .
انتابتني نوبة من الغضب الشديد فصحتُ به : أنا قاعد مستنيك علشان أقولك عالمصيبة اللي حصلت بسببك .
ارتسمت على وجهه علامات التعجب فقال : مصيبة إيه بقى ؟!!!
- الجهاز بتاعي ضرب وكله من تحت راس شورتك المهببة دي ، قال ثقافة قال ؟!!! وزمان أحمد قريبي بلغ والدي باللي أنا عملته كمان .
تبدلت ملامح وجهه وبدأت تتحول إلى الغضب وهو يقول : وأنا مالي ؟!!!
- يعني إيه وأنت مالك ؟!!! مش أنت اللي قولتلي أشوف المواقع الزفت دي ؟
زادت نبرة الغضب في صوته : وأنا مالي ؟!!! هو أي حد يقولك أي حاجة تروح تعملها كده على طول ؟!!! هو أنت ماليكش عقل تفكر بيه ؟ مش المفروض إن العقل ده هو اللي ربنا فضلك بيه علينا كلنا ؟ جاي تلومني أنا دلوقتي ليه ؟!!!
بُهتُ من رده وألجمت الصدمة لساني فلم أستطع النطق ، وعندما أدرك أنه أصبح في موقع القوة من جديد بدأ يخفض من صوته ليعيد المياه إلى مجاريها ، ثم قال لي : عموما ملحوقة ، لسه قدامك 6 أيام تعمل فيهم اللي أنت عاوزه .
نظرتُ إليه نظرة عتاب فقال لي : اضحك بقى ماتخليش الشيطان يدخل بينا .
- نعم يا أخويا ؟!!!!!!!!!
ضحك ضحكة مدوية اهتزت لها جميع أركان غرفتي ، ثم جلس على كرسيه وطلب مني الجلوس لاستكمال دروس الأنشطة الترويحية التي ستعينني على استقبال شهر رمضان المبارك .

- قوللي بقى ... أخبار أصحابك في الكلية إيه ؟
- مالهم أصحابي ؟
- يعني مش بتفكروا تخرجوا تتفسحوا قبل رمضان فسحة حلوة كده ؟
- في حاجات كتيرة في دماغنا بس المذاكرة شغلانة قوي .
- مذاكرة إيه بس ؟!!! هو أنت عمرك سقطت ؟
- لأ ليه ؟!!!
- يبقى هتنجح السنة دي كمان ، ما تتحججش بالمذاكرة .
- عندك حق ، وجهة نظر برضه ... ما أنا طول عمري بانجح ... اشمعنى السنة دي يعني اللي هاسقط فيها ؟!!!
بدأت علامات اللؤم ترتسم على وجهه وهو يقول : ها ... ناوي تخرج فين مع أصحابك ؟
- مش عارف ، أنت عندك اقتراحات ؟
- لا يا عم أنا ماليش دعوة ، ترجع بعد كده تقوللي أنت السبب ؟ ... مع إني كنت مجهزلك كام مكان كده ... قشطة .
رددتُ عليه متلهفا : أماكن إيه ؟ قوللي ومش هالومك تاني أبدا .
- أعتبر ده وعد يعني ؟
- أيوة وعد .
- طب يا سيدي بص بقى .......
وبدأ في سرد أسماء بعض الأماكن التي من المقترح أن أذهب إليها أنا وأصدقائي للاستمتاع بأوقاتنا هناك ، وكلها أماكن تستهوي الشباب والفتيات ولا يستطيع أحد مقاومة الذهاب إليها ، ومما شجعني أكثر للذهاب هو أن فكرتها نفس فكرة الخيمة الرمضانية - كما أخبرني إبليس - ، وقمتُ باختيار أحد هذه الأماكن ، وما إن ذهبتُ إلى الكلية في اليوم التالي حتى أشرت على أصدقائي بهذه الفكرة ووافق الجميع دون تردد وقررنا الذهاب إلى هذا الملهى الليلي مساء .

وفي تمام الساعة العاشرة مساء كنت هناك أنا وأصدقائي وبهرتنا الأضواء والسيارات والشباب والفتيات ، خاصة الفتيات ... فقد كُنّ يرتدين ملابس على الموضة لم أرى لها مثيل من قبل إلا من خلال رحلتي الثقافية على الإنترنت ، وبدأنا الاختلاط بهذا المجتمع الجديد ، كان الجميع يُظهرون لنا الود وحب التعارف وكأنهم يشعرون أننا وجوه جديدة هنا ، فأرادوا اختصار الوقت لنا ... وقدموا لنا عصائر غريبة الطعم والنكهة ولكنها تركت أثرا رائعا فينا ، وبدأ كل منا في الانفراد بصديقته الجديدة إما للرقص أو للتحدث أو لشرب العصائر .

وما إن بدأنا في الاندماج حتى حدثت مشاجرة بين شابين في الملهى ، وكان السبب فيها فتاة ، وبدأت هذه المشاجرة بالسباب والشتائم وانتهت بالاشتباك بالأيدي على مستوى الملهى ككل ، ولم نشعر بأنفسنا إلا ورجال الشرطة يصطحبوننا إلى سيارتهم للذهاب بنا إلى قسم الشرطة ... وبدأنا هناك شوطا آخر من الإهانة والتجريح من قبل رجال الشرطة .

وعند الصباح بدأ مفعول العصائر يختفي شيئا فشيئا من رأسي فوجه إلي الضابط سؤالا بحده : ها ... افتكرت حاجة ولا لسه يا ابن الـ 0000 ؟
- أيوة يا بيه في إيه ؟!!!
- أنت اللي في إيه يا حبيبي ؟!!! مش عيب عليكم اللي بتعملوه في أهاليكم ده ؟ انتوا إيه ما بتحسوش ؟ اتفضل اتصل بحد من أهلك يجي يضمنك ويستلمك .
نزل الكلام علي كالصاعقة ، فأهلي كلهم في البلد وأنا مغترب هنا بمفردي ... ماذا سأفعل ؟!!!
وفي النهاية لم أجد أمامي حلا آخر سوى الاتصال بأحمد قريبي :
- أيوة يا أحمد أخبارك إيه ؟
- الحمد لله .... خير في حاجة ؟
- أيوة كنت عاوزك في خدمة صغيرة كده .
- يا فتاح يا عليم يا رزاق يا كريم ... خير خدمة إيه ؟
- لا خير إن شاء الله ... ممكن بس تيجي تستلمني من القسم ؟

يُتبـع

إيمان الحسيني