الأربعاء، أغسطس 01، 2007

عوّض علينا عوض الصابرين يا رب

مع افتراض إن البنات التالي ذكرهم محترمات وبنات ناس :

* لما واحدة تخرج من بيتهم وهي لابسة من غير هدوم وتتعاكس ... يبقى شيء طبيعي جدا وتستاهل إللي يجرالها

* لما واحدة لابسة هدوم نص نص وتتعاكس ... يبقى أكيد هي مش فاهمة إن حريتها الشخصية ليها حدود

* لما واحدة تكون مُحجبة حجاب تايواني وتتعاكس ... يبقى هي وهو فهموا الحجاب غلط

* لما واحدة مُحجبة لابسة خمار أو إسدال أو عباية وتتعاكس ... يبقى ده بني آدم ماعندهوش ريحة الدم أو الحياء

* لكن بقى لما واحدة تكون مُنتقبة ولابسة أسود×أسود وواقفة قدام أحد المولات مع ولادها الثلاثة (ولدين وبنت رضيعة شايلاها على دراعها) ومستنية زوجها يركن العربية ويحصلها وتلاقي واحد بيقف بعربيته ويضربلها كلكس ويقولها تركب ... ده يبقى اسمه إيه بالضبط ؟!!!

هناك 39 تعليقًا:

Bella يقول...

والله الواحد قرف

لاعارف يلاقيها منين ولا منين

طيب اللى لابسة حجاب مضروب في الخلاط دي او حجاب تايواني دي تتحمل مسؤولية نفسها

وشرحه اللى لابسه من غير هدوم او نص نص

الباقيين بقى ذنبهم ايه؟

ليه الناس اصبحت عديمة التمييز وبتحط عيشة على أم الخير وتعامل الكل على انه مش محترم

حكاية الوقفة بالعربيات دي بقت سخيفة قوي وفي منتهي قلة الادب

تتصوري مثلا لما تبقى راكنة في مكان وبتعدي الشارع علشان تركبي عربيتك وتلاقي اللى يقف جنبك ويديكي كلاكس برضه ويتكلم بسفالة

ولا تبقى واقفة في اشارة مرور لابيكي ولاعليكي والدنيا حر والزحمة خنقة وتلاقي اللى ميل ناحية شباك العربية وقال كلمتين سافين زيه

الواحد يروح فين بس

الناس محتاج تتربى من جديد

بس على مايربوهم نروح احنا فين

حاجة تقرف

إيمان الحسيني يقول...

والله يا بلا أنا لما بيحصلي موقف زي ده أول حاجة بتخطر في بالي
إن الرجالة الهايفة شبعت خلاص من العريان وبقيت ضامنة وجوده
فبقى عندها فضول إنها تشوف المستخبي وراء الحجاب

حسبنا الله ونعم الوكيل في كل من يحب أن تشيع الفاحشة في الذين آمنوا
اللهم آمين

الطائر الحزين يقول...

السلام عليكم
حضرتك طرقتى موضوع خطير
الأمر فى رأى له أكثر من بعد
طبعا الأحوال الاولى لا تعليق عليها أما أخر حالتين

بداية انا ضد اى معاكسات سواء كانت متبرجة او غيرها
فى ظنى والله أعلم ان هناك منتقبات أسأن الأدب مع نقابها واصبح له اشكال والوان ما انزل الله به من سلطان

بالاضافة الى الاعلام فهو يصور انه اداه للتخفى لعمل مصائب او للذهاب لاماكن دون ان يشك فيها أحد وطبعا ضعاف النفوس تصدق هذا

اللهم جنبنا الفواحش ما ظهر منها وما بطن
دعواتك

إيمان الحسيني يقول...

وعليكم السلام ورحمة الله وبركاته أخي الطائر الحزين

أنا تعمدت في البداية إني أنوه على إن الأمثلة المطروحة لبنات محترمات

يعني واحدة منتقبة ولابسة أسود×أسود وخارجة مع جوزها وأولادها ... تتحط في موقف زي ده ليه ؟
وإيه إللي يشجع خسيس زي ده على إنه يفكر فيها بالطريقة الحقيرة دي ؟

الله المستعان

... يقول...

تعرفى ان فعلا الموضوع ده زايد اوى اوى اوى
وبيخلى الواحدة تدور فى لبسها
وتدور فى مشيتها
وتدور فى وقفتها
وتدور حتى فى نظرة عينيها
يمكن تكون عملت اى حاجة تخلى اى حيوان يفكر كدة

بس يمكن المرة دى عايزها بعيالها
ونس يعنى

حاجة تقرف فعلاً

إيمان الحسيني يقول...

ده إلل يغيظ ويقرف فعلا
واقفة شايلة طفلة صغيرة على دراعها وجنبها ولدين في المرحلة الابتدائية
وزوجها على بُعد خطوات بيركن العربية
ومش باين منها أي حاجة

اللا آدمي ده كان بيفكر في إيه بالضبط ؟

ولا يمكن كان مُغيب فبقى هو والعربية سواء

عصفور المدينة يقول...

ده بعد إذنك اسمه سطلان وله اسم تاني عندي وهو القصور الذاتي
إن هؤلاء يعصون ربهم بالقصور الذاتي

Lasto-adri *Blue* يقول...

بس كان عندى سؤال... هو ايه الحجاب التيوانى دا؟

إيمان الحسيني يقول...

فعلا هي حالة قصور ذاتي
مش مالك حركة نفسه ولا مالك نفسه أصلا
أهواؤه هي إللي بتحركه

إيمان الحسيني يقول...

أختي الكريمة
الحجاب التايواني ... ده مصطلح بيطلقه الشيخ محمود المصري على إللي بتغطي شعرها بقطعة قماش وتلبس عليها بدي واسترتش
وفي الآخر تقول : أنا مُحجبة !!!

ma 3lina يقول...

دا راجل بارد معندوش دم اعمى القلب والنضر البعيد

... ويستاهل ضرب البلـ

معلش انا اسف على الألفاظ .. وراعيت ان المدونة نظيقة ولوا كده كنت قلت اللي في نفسي كله

:@

إيمان الحسيني يقول...

سبحان الله
الواحد بيحاول على قد ما يقدر يتقِ الله
ويجي واحد غبي زي ده يحملنا سيئات من الشتيمة بتصرفه الحقير

نسأل الله العفو والعافية
اللهم آمين

جنـه يقول...

هو انتي ما تعرفيش يا طعمه

ان الشائع دلوقتي عن المنتقبات
انهم واخدين النقاب ستار
وانهم اسهل ناس ممكن يعملوا الخطا

للاسف احنا بنعرف نبرر كل اخطائنا
يعني واحد عايز يعاكس منتقبه

يروح قايل يا عم دي ستاره مستخبيه وراها

وبعض المنتقبات انا متاكده انهم قله
للاسف بياكدوا عند البعض الصوره دي

وتنتشر المقوله والشائعه الي ان تصبح
شئ مسلم بيه

يلا ربنا يهدي

عصفور المدينة يقول...

القصور الذاتي هو الحركة بعد انعدام مصدر الحركة نفسه بقوة وزن الجسم
فكان قصدي أن هؤلاء ما بعد مرحلة تحريك الهوى يتحركون بفعل الإدمان شوفي يأجوج وماجوج بعد أن يقتلوا ويقتلوا يقولون قتلنا من في الرض هيا بنا نقتل من في السماء قصور ذاتي
وزي اللي بيموتوا من جرعة مخدرات زائدة
وزي اللي قتل الراهب فكمل به المائة قبل أن يتوب الله عليه
هي حالة يفقد الإنسان فيها اللذة الوقتية والدافع الذي كان يدفعه في المعصية بل ربما يكف الشيطان عن الوسوسة له كما يقال لأنه خلاص شغال بالقصور الذاتي
منقبة ماشي معاها أولاد معاهاش عجوزة حتى وأكثر ما يكون ذلك مصاحبا للمخدرات

وأقول يظل
يلوش ويتخبط
إما أن يسقط سقطة كبيرة مهلكة أو يتوب الله عليه

إيمان الحسيني يقول...

أنا معاكي يا جنة إن فيه محجبات ومنتقبات بيُسيئوا للدين بتصرفاتهم وأخلاقياتهم
بس دي واحدة واقفة مع ولادها الثلاثة يا عالم !!!

إيمان الحسيني يقول...

نسأل الله العفو والعافية أخي الكريم
وماخفي كان أعظم
فالتحرش في المواصلات العامة أصبح أمر تشمئز منه النفوس
وأيضا يكون موجها لصويحبات العباءة والنقاب بالذات دون الأخريات
!!!!

سكتم بكتم يقول...

أظن يبقي أسمها وكسة ووكسة تقيلة كمان

إيمان الحسيني يقول...

وهي وكسة بعقل يا سكتم بكتم
مابقاش فيه أمان خلاص
وأغلبنا - كبنات وسيدات - بنشتغل
ويعلم الله إن أغلبنا برضه بيشتغل علشان محتاج العمل
مش لإثبات الذات والمساواة والكلام العجيب إياه

لحظة يقول...

ده اسمه انعدام نظر
والواحد خلاص ما بقاش عارف يروح فين
قعدة جوة البيوت وقعدنا
بس الامر برضة ما يسلمش من مشوار او طلب
طب نعمل ايه
عموما انا اعتقد ان السبب هو القلة المندسة على النقاب والحجاب اللي مش بتحترمه ولا فاهماه
زي اللي لابسين الاسدال والملحفة موضة وبيشمرو دراعاتهم ويبينوا البدي والجزمة والشنطة والطرحة مطقمين مع بعضبنفس اللون وهو اسود
وما يش مانع يكون المكياج كامل كمان
ومع التصرفات اللي مش هية
يدوا الانطباع ده
فيقوموا ياخدوا العاطل في الباطل
انا لله وانا اليه راجعون
كده يبقى فعلا زي المثل ما قال
ولاد ال... ما خلوش لولاد الحلال حاجة

إيمان الحسيني يقول...

ربنا يرحمنا برحمته يا لحظة
نسأل الله أن يسترنا فوق الأرض وتحت الأرض ويوم العرض عليه
اللهم آمين

الباحث عن الحقيقة يقول...

مش هقول اكتر من

مجتمع مليان تناقضات اخلاقية عجيبه

على فكره انتى لسه ما شرفتنيش فى مدونتى الجديده ..ده احنا ولاد حارة واحده برضه
تحياتى

صاحب البوابــة يقول...

اختي الغالية طعمة

سعدت للغاية بإكتشاف مدونتك

ولا يسعنى الا ان اقول ان هذا الموقف تجاة من تلبس انقاب يعكس مدى اضمحلال تفكير صاحبه

نسأل الله ان يهديه

------------

لقد قرأت ايميلك الذي أرسلتيه لموقع حملات التوعية لأنني منسق تلك الحملة

وبحثت كثيراً عن ذلك المنتدى الذي يشجع الادمان فلم أستطع ان اصل اليه

ارجو منكِ افادتي بالمزيد من المعلومات على مدونتي او على موقع الحملات

انتظر ردك أختاة

وجزاك الله خيراً

جنـه يقول...

حبيبتي يا طعمه
انا ما اقصدش ان العيب في المنتقبه

العيب في الناس اللي بتدور علي اي كلمه حتي لو كانت تافهه عشان يبرروا تصرفاتهم اللا اخلاقيه

إيمان الحسيني يقول...

جزاك الله كل خير يا باحث عن الحقيقة
بإذن الله أزور مدونتك

إيمان الحسيني يقول...

أخي الكريم صاحب البوابة
منور مدونتي
على فكرة رابط المنتدى موجود في الإيميل إللي أنا أرسلته
اضغط على اسم المنتدى هتلاقي الرابط فتح
عامة هابعتهولك تاني بإذن الله تعالى
والله المستعان

إيمان الحسيني يقول...

أنا فاهمة قصدك يا جنة
إللي أنا أقصده إن الأخت كانت واقفة مع ولادها
دي الحاجة إللي تثير العجب فعلا
!!!!!!!!!

beeboo يقول...

واحدة واحدة ياجماعة
مش يمكن الراجل عايز يعمل خير ويوصلها
الأعمال بالنيات

La RoSe يقول...

ده أكيد واحد مسطول مش مُدرك هو بيعمل أيه بالظبط

زمان كان الواحد بمجرد مايشوف قدامه واحده مُختمرة أو مُنتقبة ، يُحط وشه في الأرض ويمشي ، دلوقتي بقوا مُنتهى البجاحة بصراحة ، إذا كان في الطريق ولا في المواصلات العامة ، والمشكلة إن الواحد بيستحي يعلّق أو يتكلم ...

ربنا يرحمنا جميعاً

إيمان الحسيني يقول...

فكرة برضه يا بيبو
بس المشكلة بقى إن جوزها كان بيركن العربية :)

إيمان الحسيني يقول...

فعلا يا شيماء
الرأي إللي أجمعنا عليه إنه مسطول أو شارب حاجة ومش في وعيه
بدليل إنه ماكانش شايف الولدين الصغيرين والبنت الرضيعة
!!!!!

mraghy يقول...

السلام عليكم و رحمة الله و بركاته

اعتقد ان اللي عمل كده اكيد كان شارب حاجه ( مسطول يعني ) لانه مش ممكن يكون طبيعي و يعمل كده يعني

تقبلي مروري

إيمان الحسيني يقول...

فعلا هو ماكانش طبيعي

Future_Preacher يقول...

السلام عليكم
اختي الفاضلة
لا تندهشي فمع الاسف هذا ما اصبح سائدا هو التبجح
ان لم تستحي فاصنع ما شئت
و ربنا يسترنا و لا يفضحنا و يقبضنا اليه غير مفتونين

إيمان الحسيني يقول...

اللهم آمين
جزاكِ الله خير الجزاء أختي الكريمة

رصاصة طـائشة يقول...

والله انا شايفا ان الموضوع اولا واخيرا ليس له اي علاقة باللبس
وان المعاكسات المفروض اصلا انو سلوك غير حضاري او آدمي بالمرة وآدمي هنا جاية من آدم وليس من انسانية يعني المعاكسة موش رجولة بتاتا ويللي عم يعاكس معتقد حالو خفيف فياليت فعلا يعرف ان يللي عم تتجاوب معو أكيد متلو ومن عينتو
سواء بئا كانت لابسا مايو او منقبة
لاني واثقة ان اللبس موش هو ابدا الدليل
وبلاش قذف المحصنات وليس المحصنة بملابسها على ما اعتقد
اعتقد المحصنة محصنة بأخلاقها وتربيتها

رصاصة طـائشة يقول...

معليش لي تعليق تاني بعد ماقريتالردود
فعلا هلا منتشر عن المنقبات انو ستار وخصوصا بعد مانسبة كبيرة اوي ارتدت الحجاب موضة ونسبة اخرى ارتدتو ستر لبعض النقائص
وقلة قليلة جدا جدا من تعي معنى الحجاب فالحجاب ليس غطاء رأس فقط
وليس ايضا ثوب فضفاض فقط ايضا
الحجاب سلوك قبل ان يكون ملبس
الالتزام يجب ان يكون داخلي قبل ان يكون خارجي
واعتقد ان عدم الالتزام سلوكيا من قبل البعض هو من اعطى تلك الفكرة

ولكني مازلت مصرة ان المعاكسة فعل شائن مرفوض سواء كان تجاه محجبة او غير محجبة
سواء كانت معها تلات اولاد او ماشيا لحالها



باربـــــــــــــي

ibn_abdel_aziz يقول...

اقوللك ليه ايمان وصلت للدرجة دي؟

كلنا شاركنا

احنا "شيئنا" المرأة بالدين
كما " شيئ" غير المتدينين المرأة باسم الحداثة

مجرد ما قلنا
الحجاب عفة وطهارة
افترضنا العكس فيمن لم يلبس الخمار

والتركيز علي المعني ده
واهمال ان المرأة روح وكرامة وشخصية

هانت علي الناس
هانت وهي عريانة
وهي متغطية

بالنسبة لي
كل الامثلة اللي ضربتيها متساوية

ان رجل يسمح لنفسه يتحرش بامراة غير مختمرة او لابسة ملابس غير شرعية
زيها زي اللي لابسة ملابس شرعية

ان تخطأ امرأة فهذا امر
وان يخطأ الرجل بأن يبرر لنفسه ان يؤذيها هذا امر اخر

انا شفت منتقبة طلعت عاهرة مرة
وعاكستني كمان

الملابس لمن يعد لها معني
واحنا - اي المتدينيين - اللي اصرينا نخلي ليها معني

راحت الناس لابسة الملابس
ولم تتغير من الداخل
وادينا شايفين الليلة عاملة
ازاي

انتي عارفة رايي طبعا

انا شخصيا ضد العري
جملة وتفصيلا
بس مش مع اتهام المرأة ايا كانت ملابسها بالفاحشة وتبرير ذلك بايذائها

جزء من الحل هو الشهامة
والشباب الحلو اللي مش عاجبه
اما يشوف مخاليق زي كدة بتتحرش
باي فتاة مهما كانت ملابسها

يعلمه درس في الادب
وعلي الملأ
ولا يخاف في الله لومة لائم

والله اعلم

إيمان الحسيني يقول...

أختي الكريمة رصاصة طائشة
أنا ضد المعاكسات على طول الخط حتى لو البنت لابسة من غير هدوم :)

أما مسألة إننا بنمسك في الزي وننسى الأخلاق
فدينا الحنيف علمنا إن الظاهر منا لازم يكون زي الباطن

يعني لو واحدة محجبة وأخلاقها وحشة يبقى فيه حاجة غلط
ولو واحد أخلاقها كويسة جدا بس مش محجبة
برضه فيه حاجة غلط
الاتنين لازم يمشوا مع بعض بالتوازي

منورة مدونتي :)

إيمان الحسيني يقول...

أنا معاك في كل الكلام إللي بتقوله يا شريف
وأنا باعيد وأزيد إني ضد التحرش بالمرأة أو المعاكسات مهما كان شكل المرأة دي أو زيها
لإن المسلم بيتقِ الله في كل وقت وعلى كل حال
ومافيش حاجة في الإسلام اسمها : أصل هي إللي شجعتني علشان أعصي ربنا وأعاكسها !!!

بس زي ما قولت لأختنا رصاصة طائشة
الإسلام ماهتمش بالجوهر فقط ولا اهتم بالظاهر فقط
الإسلام بيأمرنا بالاهتمام بالاتنين مع بعض

ومنور المدونة :)