السبت، سبتمبر 01، 2007

the more .... the more

السلام عليكم
متهيألي أغلبنا عارف قاعدة اللغة الإنجليزية :
the ..... the ....
القاعدة دي بتستخدم لعرض التناسب العكسي أو الطردي ما بين حاجتين
يعني مثلا :
كلما زاد الدخل ... زاد الإنفاق
كلما زاد المرض ... قلت حركة المريض
من المتعارف عليه بينا إن الشخص كلما زادت معرفته كلما ازدادت راحته لإنه بقى فاهم أكتر ولامم المواضيع بشكل أكبر
اسمحولي النظرية دي خطأ
والدليل من حالتي أنا شخصيا :
الدليل الأول : أنا باحب القراءة من صغري جدا جدا جدا ، والفضل في كده يعود لله أولا وأخيرا ومن بعده لأبي الحبيب ، مشكلتي إني من حبي الشديد للقراءة بقيت مُجهدة بصريا جدا ، مش قصدي ضعف النظر ، قصدي إني لو لقيت قدامي ورقة مرمية على الأرض في الشارع ممكن أقف علشان أقرا إللي فيها ومن غير حتى ما أرفعها من على الأرض ، وتخيلوا بقى حالتي لما أكون راكبة مواصلة أو أتوبيس الشغل ويافطات المحلات ولوح الإعلانات الصغير منها والكبير عمالة تمر جنبي ... تخيلوا حالتي البصرية بتبقى عاملة إزاي وقتها !!!
وطبعا معظم الحاجات دي أنا حافظاها أصلا لإني تقريبا بامر عليها كل يوم وأنا رايحة الشغل أو راجعة منه ، وبالرغم من كده مش باقدر أمنع نفسي من قرائتها تاني وتالت وعاشر .
الدليل الثاني : السنة إللي فاتت بدأت أتعلم الفوتوشوب والحمد لله رب العالمين ماشية فيه بشكل مُرضي ، المشكلة بقى إني دلوقتي ماباقيتش باقرأ الإعلانات واليافطات وبس ... لأ ... ده أنا بقيت باجهد تفكيري وتركيزي علشان أفتكر اسم الفونت إللي اتكتب بيه الإعلان ، وتحديد الطريقة إللي تم بها عمل الإعلان أو اليافطة ، ولو الصورة قريبة مني بافضل أفصصها وأطلع العيوب إللي فيها وإللي ماكونتش باشوفها زمان لإني ماكونتش أعرف حاجة في عالم الفوتشوب أو شغله ، ولما ألفت نظر حد معايا للعيب ده يبصلي زي ما يكون بيبص لشخص مجنون وفاضي ومش لاقي حاجة يعملها !!!
الإجهاد دلوقتي بقى إجهادين والله أعلم هيوصل بيا لفين
والله المستعان .

هناك 25 تعليقًا:

لحظة يقول...

وحشتيني اوييييييييييييييييييييي
انا كنت مسافرة
ولسه راجعه امبارح
بس مش في بيتنا
عشان كده فاتتني حلقات شوشو
بس اول ما ارجع هاقراها كلها
انا كمان بابتدي اتعلم فوتو شوب
واتمنى اكون كويسه فيه
وانا كمان لقيت من الاريح عدم مخالطة الناس
هم دول بس اللي لحقت اقراهم
قلت اعلق
واسلم
لحد ما احكيلك كتير عن سفريتي دي
انا راجعه منها مبسوطة قوي ومتعلمه حاجات كتير
ربنا يكرمك يا ايمان
ويثبتك ويرزقك الاخلاص
ويجمعني بك في مستقر رحمته
امين

إيمان الحسيني يقول...

ألف حمد الله على السلامة يا لحظة
ويارب تكون أجازة سعيدة
وفي انتظار حكاياتك إللي بإذن الله هتكون مفيدة وشيقة

بلغك الله رمضان ورزقك الجنة بلا حساب أو سابقة عذاب
اللهم آمين

الطائر الحزين يقول...

ربنا يكرمك ويجعل من علمك افادة
بارك الله فيك وثبت خطاك

دعواتك

عصفور المدينة يقول...

ده مخالف للقاعدة رقم 0
قلل من كم الأحداث والانشغالات
:)

ma 3lina يقول...

أظنه حيوصل بيكي إنك تصبحي أكثر تميزا في مجال التصميم .. وأظن مع المحبة بيكون التعب ممتع ..

باشمهندسة ياريت تجربي المدونة بعرض
800*600 ..

! Eslam ! يقول...

وعليكم السلام
طعمه
ما يحسدالمال الا اصحابه :D
--------------
بالمنسبه صحيح ايه رائيك لو تعملى
مدونه لتعلم الفوتوشوب ياعنى التصمصمات
بتاعتك كلها تحطها وكل تصميم تقولى لنا
اتعمل ازاى وكدة
ايه رئيك اهو برضوا تنميه ليكى :D

محمد عبد الغفار يقول...

انت مسمعتيش عن المثل اللى بيقول
المجانين فى نعيم
واللى بيقول
اصحاب العقول فى راحه - يقصد العقول اللى على قدها- انما العقل

فعذاب عذاب عذاب

Mounir يقول...

السلام عليكم

وكلما زاد الشئ عن حد انقلب لضده

الوسطية أفضل في كل شئ

لكن فيه حاجة يا أخت إيمان

النظرية صح في بعض الحاجات

مثلا كلما زاد اقترابك من ربك زاد إيمانك

كلما زاد علمك زادت قيمتك

فهي ترجع لمضمون ما نتحدث عليه في النهاية

.
.
.

اما بخصوي التصاميم

الله يرحم كالابوووووووووووووووووش

كان تصميم قوي والله

علي العموم

أنا لسه محتفظ بيه والله عندي علي الجهاز

.
.
.

وفقكم الله لما فيه الخير دوما

إيمان الحسيني يقول...

جزاك الله كل خير أخي الطائر الحزين

إيمان الحسيني يقول...

أخي عصفور المدينة
أنا كان نفسي آخد شهر رمضان كله أجازة لكن في الشغل رفضوا الطلب
شغل بالنهار ومع والدي ووالدتي بالليل
وكلاهما مُسن ومريض
نسأل الله العفو والعافية

إيمان الحسيني يقول...

جزاك الله كل خير يا ما علينا
بس ساعات باحس إني شامة ريحة شياط من دماغي
:D

إيمان الحسيني يقول...

ربنا يكرمك ويعزك يا إسلام
تعليم إيه بس يا باشمهندس وأنا أصلا لسه باتعلم
:D
الله المستعان

إيمان الحسيني يقول...

والله عندك حق يا محمد
فعلا الجاهل بيبقى في راحة ذهنية غريبة لإنه مش مطالب بتفسير أو التفكير بمنطقية في كل كبيرة وصغيرة
صحيح العلم فرض ومطلوب
لكن التشتت والتركيز بقى عامل مزعج جدا

إيمان الحسيني يقول...

منور يا إسلام
على فكرة القاعدة اللغوية في اللغة الإنجليزية بتحتمل الحاجتين
التناسب العكسي والطردي
يعني يا إما طرفي الجملة يزيدوا مع بعض أو ينقصوا مع بعض أو واحد يزيد وواحد ينقص

ربنا يباركلك في مدونتك الجديدة
:D

الطائر الحزين يقول...

هونى على نفسك شوية
لا تعطى كل شىء قدرة من التفكير المستمر المتعاقب واعتمدى على ما اكتسبتى من خبرات فى هذه المواقف ولا تعيدى التفكير فيها من البداية

Ahmed يقول...

رفقا رفقا بنفسك أستاذه طعمه
الاجنهاد بلا ترويح عن النفس يورث البلاده

Layla يقول...

ده بيدل على حبك لعملك ولمجالك...استمري وانشاء الله تتميزي

إيمان الحسيني يقول...

جزاك الله كل خير أخي الطائر الحزين
بس دي حاجة فعلا بتحصل غصب عني ومن غير ما أركز إني باعملها
بيبقى تصرف لا إرادي مني

إيمان الحسيني يقول...

ده مش اجتهاد يا أخي الكريم
زي ما قولت لأخونا الطائر الحزين
ده تصرف بيحصل بدون ما أفكر إنه بيحصل أصلا

عارف حضرتك زي إيه ؟
زي عملية التنفس
الواحد بياخد الشهيق والزفير من غير ما يفكر إنه المفروض دلوقتي ياخد شهيق أو إنه يطلع زفير

:D

إيمان الحسيني يقول...

هو لو على القراءة وشغل الفوتوشوب فأنا فعلا باحبهم
بس للأسف التصرف ده بيحصل مع كل شيء باعرف عنه ولو الحد الأدنى من المعلومات

:D

radwa يقول...

داء قرأة اليفط والاعلانات ده داء مؤذى
بعانى منه انا كمان
حتى الورق الصغير اللى بيبقى ملزوق مش بسيبه
وحتى لو عينى مش جايباه بركز وياجبته يامجبتوش
d:

إيمان الحسيني يقول...

ماهي كانت آخرتنا إيه يا رضوى ؟!!!
فاترينة متركبة على وشنا

:D

Me, myself, and her يقول...

مدونتك طعمة يا طعمة

فكرتيني لما كنت صغيرة .. كنت دايماً بحب اقرا كل شئ حتى علب البيبسي والشوكولا ، لازم اقرا العربي واقارنها بالحروف الانجليزية والا اضل ماسكة العلبة الى ما شاء الله

تحياتي لك

عمر عاشق القرآن يقول...

معلش العباقرة كلهم بيتعبوا كده !!!!!!

__________
ليكى ولكل المدونين المحترمين بمناسبة شهر رمضان دعوة مستعجلة عندى فى المدونة ياريت تشرفونى وتستلموها

إيمان الحسيني يقول...

منورة مدونتي يا ديجا فو :)


جزاك الله كل خير يا أخ عمر
وبإذن الله نقوم بزيارة لمدونتك :)