MONK

متهيألي أغلبنا يعرف الممثل الأمريكي – اللبناني الأصل – توني شلهوب
بطل المسلسل الأجنبي : MONK
صراحة شخصيته في المسلسل هي إللي بتخليني أتابع الحلقات
مش مواضيع الحلقات في حد ذاتها
الوسواس القهري إللي عنده في النظافة لدرجة إنه مش بيسلم بالإيد على حد
النظام الفائق لدرجة إنه ممكن يكون في وسط التحقيق في القضية ويسيب التحقيق علشان ينظم مجموعة كتب محطوطة بشكل تلقائي
أو إن مجرد كتاب من الكتب دي لفت نظره وشاف إنه مش محطوط بالشكل إللي يريح العين
!!!!!
الغريب في الموضوع إني بعد متابعتي للمسلسل ده وبعد سماعي لبعض التعليقات من زميلة عمل ليا وصديقة في نفس الوقت
اكتشفت إني فيا كتير منه
بس ولله الحمد مش للدرجة المرضية دي :)

* في الشغل علشان أبدأ في حصر أي مشروع جديد لازم أعملّه جدول حصر على برنامج الإكسل تسهيلا لكتابة المعادلات من غير استخدام الآلة الحاسبة ، ولازم الجدول يبقى بفونت معين ، وأستخدم الألوان الممكنة للتمييز ما بين المعطيات والنتائج والإجماليات ، ولازم تبقى الكتابة كلها متوسطنة في الخلية ، وحدود الجدول الخارجية تبقى مميزة عن الداخلية ، ولو اكتشفت إن خلية واحدة حدودها مختلفة في ضلع واحد لازم أعدلها وإلا هتفضل عيني عليها طول ما أنا باشتغل ، وإذا طبعت ورقة واكتشفت إن فيه كلمة واحدة نسيت أكتب الألف بتاعتها من غير همزة زي مثلا (اكتب) لازم أعيد كتابتها صح (أكتب) وأطبع الورقة من جديد ، وفي وسط الحصر إذا حسبت مساحة غرفة وضربت الطول × العرض ، لازم أحسب مساحة الغرفة التانية بضرب الطول × العرض برضه مش بضرب العرض × الطول .

* بالنسبة للفلوس فلازم تكون مترتبة بشكل كويس جدا في محفظتي ، ولازم تكون مترتبة من الكبير للصغير ، يعني الفئة الكبيرة للخارج والفئة الصغيرة للداخل ، وأبدأ كل فئة بوضع الورقة الجديدة فالأقدم ، ولازم تكون رصة العملات كلها على نفس الناحية من العملة ، مش ورقة عربي وورقة إنجليزي ، أو ورقة شمال وورقة يمين .

* لو دخلت سوبر ماركت عيني بتقع على الرف إللي عليه بضاعة مش مترتبة بنفس الكيفية – يعني عيني بتقع على الرفوف كلها – وباكون متدايقة فعلا من جوايا لإنه بيبقى منظر مش مُريح لعيني ، بس طبعا باشتري إللي أنا عاوزاه وأخرج على طول ومن سُكات .


وحجات من دي كتيييييير ماخدتش بالي إني باعملها بمنتهى التلقائية وبدون أي تعمد مني إلا لما تابعت مسلسل MONK
ودلوقتي بس عرفت أنا باتابعه ليه .... :)