الجمعة، نوفمبر 23، 2007

هذا ما ينقص الأمة حتى تنهض !!!

صراحة مش لاقية تعليق أقوله غير العنوان
خلاص الأمة عملت كل إللي عليها ومش ناقصها غير الحاجة دي علشان تكون متحضرة ومن دول العالم الأول
إحدى القنوات الفضائية بدأت من حوالي أسبوعين في عرض برنامج مسابقات جديد من عينة سوبر ستار وستار أكاديمي
لكن المرة دي البرنامج مش عن الغناء والتواصل بلغة الألحان
المرة دي البرنامج عن لغة الجسد
مبدئيا كده البرنامج اسمه : هزي يا نواعم
اسم يخض مش كده ؟
طبعا واضح من الاسم الغرض من البرنامج ألا وهو :
مشاركة أكبر عدد ممكن من الفتيات من مختلف الجنسيات علشان كل واحدة منهم تثبت مقدرتها الفظيعة على الرقص وهز الوسط
والحكام في البرنامج الجديد ده :
الحكم الأول : الراقصة نجوى فؤاد إللي قالت عن البرنامج : أتمنى أن يكون البرنامج فرصة جيدة لإحياء الرقص الشرقي ، وسأتعمد الصراحة خلال مشاركتى فى الاختيار إلى أبعد الحدود ولن أجامل أحد ، لأنني أتمنى أن يتم تخريج راقصة راقية تمثل هذا الفن خير تمثيل .
وأضافت قائلة : الرقص الشرقي فن راقي يمتع المشاهد ، وأنا أرى أن الراقصة الشرقية لا يفترض أن تكون من جنسية معينة ، المطلوب بالدرجة الأولى ليونة ومسؤولية وإحساس .
الحكم الثاني : سيمون أسمر (صانع النجوم كما يصفوه) وإللي قال عن البرنامج : يأتي هذا البرنامج في سياق حب الشعب اللبناني للحياة وللفن في مواجهة العنف ، بهدف وضع الرقص الشرقي في مصاف الفنون العريقة، خصوصاً أن هذا الفن أصبح غير متداول مؤخراً، فاليوم نحن نريد إعادة إحياء فن عريق من خلال مسابقة تجمع متباريات من العالم أجمع .
الحكم الثالث : المتخصصة ناردة عساف والتي تحمل شهادات عالمية في مجال الرقص الشرقي وقالت عن البرنامج : أحببت الفكرة وبشكل خاص لأن هناك لجنة حكم تقيّم وتقرر من يفترض أن يغادر ومن يفترض أن يبقى .
الحكم الرابع : مدرب الرقص ظاظا الذي حمل رسالة تعليم هذا الفن لكل أرجاء العالم يقول عن البرنامج : فكرة البرنامج هي من أجمل الأفكار ، مشدداً على أن الرقص الشرقي فن يرتكز على الإحساس أولا والتمرين والتقنية ثانيا .
الحكم الخامس : مدربة الرقص أميليا زيدان تقول عن البرنامج : مسؤولية يجب أن تتحملها الراقصة الشرقية في فرض الإحترام، وفرض أسلوبها الراقي في تقديم فن كغيره من الفنون الراقصة .
وبكده تكون منظومة النهضة العربية والإسلامية اكتملت علشان نبقى من دول العالم الأول
وحسبنا الله ونعم الوكيل

هناك 25 تعليقًا:

محمد عبد الغفار يقول...

انت ضد الرقص الشرقى المحترم الذى يسمو بالروح والوجدان !!! يال الهول

إيمان الحسيني يقول...

أنت هاتجيبلي تُهمة وأنا قاعدة في بيتنا يا عم محمد ؟ :D
فعلا هو بيسموا بالروح والوجدان سمو فظيع مالهوش حل
سمو يوصل على جهنم عِدل

نسأل الله العفو والعافية
ونحمد الله الذي عافنا مما ابتلى به غيرنا

Bella يقول...

انت بقى من العالم المتحجرة اللى ضد الليونة والمرونة؟؟

امرك يحتاج لنظر سريع

ماتسكتيش على نفسك يابنتي
ده التوجه الجديد
تحويل كل البنات اما لممثلات او لراقصات

وكل واحدة ودرجة ليونتها ومرونتها بقى

علشان كده لازم شوية تمرين على الليونة

كان فيه من فترة مؤتمر اتعمل للرقص الشرقي وكانت بتشرف عليه الست دينا

ح اشوف الموضوع اللى كنت كاتباه عن الحكاية دي واوريهولك

هههههههههههه

إيمان الحسيني يقول...

وهانجيب ليونة منين بس يا بيلا وأوضاع البلد بتدعونا إلى التقشف ؟
ده الواحد مش بيعرف يتقلب بالليل في السرير من شدة التقشف :(
مش يفرجوها علينا شوية علشان نشارك في حركات الليونة الشعبية ؟
:D


منتظرة عودتك
ومنورة مدونتي :)

عصفور المدينة يقول...

وش مكسوف
الواد الطائر الحزين صاحبي وحبيبي كان عايز يكتب عن الموضوع ده قلت له لأ

اسامة يس يقول...

اختي الكريمة طعمه ..
كيف الحال ..
اظن ان حضرتك الاخت طعمه التي التقيت بها في عالم النت عبر المنتديات ان لم تخني الذاكرة ..
عبر القصص الادبية التي كان يخطها قلمك ...

هذا هو الحال الذي صرنا اليه ... واذا لم تستح فاصنع ما شئت ...
وفي النهاية نسأل الله ان يحفظنا من الوقوع في الذلل...
دمت بكل ود..
خالص تحياتي

اسكندراني اوي يقول...

ههههههههههههههههههههههههههههههههههه

اضحكك الله كما اضحكتيني

هو انتي اسمك نواعم
لا
طيب
زعلانه ليه بقى

والله العظيم ما جايبنا ورا غير البلاء ده

نستاهل اللي يجرى فينا بعد كده

نسال الله السلامه

إيمان الحسيني يقول...

هههههههههههههه
ربنا يكرمك ويعزك يا عصفور المدينة

والله الهرم اتقلب فعلا
بقى إللي بيجاهدوا لإرضاء الله يتكسفوا
وإللي بيجاهدوا لإغضاب الله يذيعوا على الفضائيات ؟

يا أخي الكريم
لو انتوا كرجال مكسوفين قيراط
فأنا وبنات جنسي مكسوفين 24 قيراط
لإن المتسابقات دول بيعرضوا أجساد البنات كلهم مش أجسادهم هما بس
حسبنا الله ونعم الوكيل

نسأل الله السلامة

إيمان الحسيني يقول...

منور مدونت يا أسامة
وإن كنت مش عارفة أسامة مين بالضبط :)
(أسامة يس) ؟
بس الأكيد إن حضرتك شرفتني بالزيارة الجميلة دي

فعلا إذا لم تستحِ فاصنع ما شئت
ودول ناس لفظ الحياء عندهم ينحصر في إحمرار الخدود وفقط
حسبنا الله ونعم الوكيل

إيمان الحسيني يقول...

يا إسكندراني
للأسف ومع احترامي لكل رجل محترم
فأنا كـ(إيمان) أرجل من ذكور كثيرين متنطورين في الشارع دلوقتي
تقوللي نواعم ؟!!!!
الحمد لله الذي عافانا مما ابتلى به غيرنا

Bella يقول...

تاني ياطعمة

مش معقول كده ياست الكل

ازاي تتصوري انهم بيعرفوا حمرة الخجل

حرام عليكي

صححي معلوماتك بقى علشان مش كويس علشاننا اننا نفضل متصورين غلط كتير

الحمرة اللى بيعرفوها حمرة ادوات التجميل فقط

اما الخجل فكلمة لاتوجد في معاجمهم

وبصراحة العيب مش عليهم

العيب على المتهافتين وراءهم

تصوري مثلا اي بنت رقيع من هؤلاء البنات كام شاب متنطع سيجري وراءها بالكيلو

وكام رجل اعمال من لصوص البلد سيجري وراءهم

وهكذا

شوفي راقصات مصر متجوزين مين وانت تعرفي لماذا اخترن هذا الطريق

وليس هذا فحسب

شوفي احتفال التليفزيون بيهم ولو كانت الواحدة فيهم عملت بحث علمي عليه القيمة ماكانش حد عبرها
ولو كانت توصلت لكشف علمي هام ماكانش حد بص في وشها اصلا

يااختي نحن نعيش زمن الانحطاط في ابشع صوره

انحطاط فج يفقأ اعيننا كلما نظرنا في اي مكان

ثم ماتنسيش القول الخالد للراقصة خالدة الذكر اللى قالت انها بتقرا الفاتحة وشوية ادعية قبل ماتدخل ع المسرح علشان ربنا يوفقها

ولا الممثلة علانة العلانية اللى قالت انها كممثلة لها رسالة تجاه الجماهير الغفيرة

خلاص بقى مفروض نلم عزالنا ونشوف لنا مدفن نندفن فيه

حاجة تقهر صراحة

اسامة يس يقول...

دا نورك .. والشرف لي انا
نعم اسامة يس ...

لك خالص الود والتحية

إيمان الحسيني يقول...

حتى حُمرة الخجل طلعت بودرة :(

والله كلامك أحزني بعد ما كونت واخدة الموضوع تريقة

صدق رسول الله (صلى الله عليه وسلم) حين قال عن أشراط الساعة :
من أشراط الساعة أن يرفع العلم ، ويظهر الجهل ، ويشرب الخمر ، ويظهر الزنا ، ويقل الرجال ، ويكثر النساء حتى يكون للخمسين امرأة القيم الواحد ... رواه البخاري

إيمان الحسيني يقول...

منور أخي الكريم أسامة :)
صاحب القلم المرهف والحس الراقي

AHMED SAMIR يقول...

انا بقى بقوول ان هدف البرنامج هو توحيد الشعوب العربية بالرقص على نغمة واحدة
ههههههه
تحياتي ليكي
بوست رائع كالعادة

إيمان الحسيني يقول...

ماهي دي الكارثة
الشعوب العربية - إلا من رحم ربي - مش بتتجمع غير في الهايفة
وعلى راي المثل :
علمني الهيافة يابا
قال تعالى في الهايفة واتصدر

منور مدونتي يا
A.SAMIR
:)

الطائر الحزين يقول...

انتى ضد السامية

http://sadbrd.blogspot.com/2007/05/blog-post_01.html

تدوينة قديمة كتبتها فكرتينى بها

وبعدين انت فينك فين تعليقاتك

تحياتى

إيمان الحسيني يقول...

أكيد تقصد "سامية" جمال
:D

أنا مش مختفية ولا حاجة يا أخي الكريم
بس تقدر تقول إني مركزة على مدونتي حاليا علشان أخليها مكان مفيد قدر الإمكان
والله المستعان

هاروح أقرأ التدوينة بتاعتك :)

... يقول...

طعمة.. أكثر ما لفت انتباهي هو الباقة الساطعة من المحكمين الذين سيقيمون ويدرسون ويحللون ويقيسون درجات الليونة..ناس بتشقي وبتشتغل بجد..احنا بس اللي ناس مفترية مش بتقدر العمل الضاري والمجهودات الخرافية لإرساء الفنون اللينة.. الحق علينا احنا اللي رجعيين وناقصين ليونة

إيمان الحسيني يقول...

هي باقة ساطعة بعقل ؟
دي تعمي أي بصير

نسأل الله السلامة

منوراني يا حلم

aliaa يقول...

يااااه يا طعمة فرحتينى اوى بالخبر الهايل اللى هيفجر الدنيا ويخليها جمرة من جهنم ... اخيرا هتبقى فى راقصات راقيات لديهن ليونات ومرونات فى كل المكانات ؟
اسعدتينى لان بكده هيكون هتبقى مصر متخصصة فى فن الرقص وهو الشئ الوحيد اللى هنقدر نصدره وبدل ماحنا عمالين نستورد عمال على بطال نسد حاجتنا بقى شوية
الا قوليلى هو على قناه اسمها ايه ؟ عشان ابقى اطبع ورقة بيه وانشره على بنات مصر عشان تتعلم حاجة مفيدة طالما انهم لا نافعين فى طبخ ولا مذاكرة ولا جواز خلينا ناخد فيهم ثواب بالرغم من انهم مش محتاجين يعنى

ربنا يهدينا ويثبتنا ويعافينا
وعلى فكرة انا زعلانه منك كل مرة اقولك كلمينى على الميل مش راضية انا مش وحشه اوى كده
ربنا يعزك

و القادم....أجمل يقول...

حسبي الله و نعم الوكيل

انا الصراحه اول مرة اسمع عن الخيبة

اصدي الخبر

ربنا يهدينا يارب

حاجة ترجع لوراااااا ميت سنه

:(

ربنا يحفظك يا ايمان يارب

و يحفظ جميع المسلمين

و يهدينا آآآآآآآمين

محبتي

:)

إيمان الحسيني يقول...

شوفتي إزاي يا علياء أنا باجيب أخبار تشرح القلب
:D

ربنا يعافينا ويعفو عنا
اللهم آمين

بالنسبة للميسنجر صدقيني أنا بادخل أعمل أكتب الردود وأضبط المدونة وأخرج
مش بأقعد كتير

ربنا ييسر إن شاء الله ونتقابل أونلاين :)

إيمان الحسيني يقول...

ربنا يحفظك يا ولاء
والله الواحد مش عارف أطفال الجيل ده هتتربى إزاي
البيت يقعد يأكد ويرسخ في القيم
ويادوب يخرج من البيت كل حاجة تتنسي

حسبنا الله ونعم الوكيل

أُكتب بالرصاص يقول...

عجبني رأي المخضرمة نجوى بنت عم فؤاد

الليونة ..وعرفناها... كلامها صحيح

الإحساس.... يعني..هانمشيها...

إنما المسئولية...مسئولية تجاه إيه بالظبط .؟

وأتذكر كمان رأي لخالدة الذكر بنت عم عبده

لما قالت..إن الرقض عمل
والعمل زي ما احنا عارفين ..عبادة

يبقى الرقص

على حسب قولها

عبادة


صحيح..تكلمت الرويضة

شكرا يا طعمة..وما تأخديش على كلامهم .. عدي