الجمعة، يناير 25، 2008

نظارة ... مقاس 38 بني !!!

مرة أيام الكلية كنت باتكلم مع زميلة ليا والكلام أخدنا عن البرد والشتا وفوجئت بيها بتقولي :
- ماتلبسيش شراب وانتي نايمة علشان كده غلط .
- غلط ليه ؟!!!!
- علشان بيأثر على النظر .
- ؟!!!!!!!!! ... إزاي يعني ؟ وإيه دخل الشراب بعيني ؟
- ماعرفش ، بس هما دايما بيقولولنا كده .
المهم بقى إني من أيام الكلية ولحد دلوقتي اكتشفت إن الفكرة دي منتشرة جدا جدا جدا وبشكل غير طبيعي وبين جميع مستويات الشعب الثقافية والاجتماعية
ولما تسأل عن السبب ماتلاقيش غير إجابة واحدة :
- ماعرفش ، بس هما دايما بيقولولنا كده .
والغريب إنهم بيدافعوا عن الفكرة دي باستماتة وبيستغربوا منك جدا لما يلاقوك مصمم تلبس الشراب وأنت نايم !!!
ياريت لو فيه حد من إللي هيقرا البوست ده يكون دكتور عيون أو صاحب محل أحذية يقولنا :
إيه الفكرة من الربط ما بين لبس الشراب أثناء النوم وضعف النظر ؟
وجزاكم الله كل خير .

هناك 28 تعليقًا:

Bella يقول...

هههههههه

انا ضربت عرض الحائط بتلك التحذيرات وعايشة حياتي عادي مافيش اي مشكلة

ونفسي كمان حد من متزعمي هذه الفكرة يبرر لي باسباب منطقية سبب تبنيه هذه الفكرة

إيمان الحسيني يقول...

مانا كمان يا بيلا ضاربة بيها عرض الحائط من أول مرة سمعتها فيها
بس لما تلاقي ناس مراكز ومستويات تعليمية عالية وبيرددوا نفس الكلام
يبقى لازم نعرف أصل الموضوع إيه بالصبط

منوراني :)

خمسة فضفضة يقول...

السلام عليكم ورحمة الله وبركاته

دي كلها خزعبلات زي اللي ياكل سمك وبعيد يشرب لبن يتجنن واللي تشرب مية كتير وهي بترضع لبنها يبقي خفيف واللي يخطي من فوق الملوخيه وهي بتتخرط الملوخيه ترقد
واللي يدخل بلحمه نيه علي واحده والده لبنها ينشف
وغيرها من الحاجات الغريبه اللي مش عارفه بيجيبوها منين

يابنتي نامي بالشراب واتكلي علي الله مافيش حاجه من الكلام دا صحيحه

إيمان الحسيني يقول...

وعليكم السلام ورحمة الله وبركاته

هههههههههههههههههههه
أول مرة أسمع موضوع اللحمة النية ده
ربنا يكرمك ويعزك يا فضفضة
وأنا طبعا بانام بالشراب
أومال هاستحمل الصقيع إللي احنا فيه ده إزاي ؟
أنا بس نفسي أعرف الفكرة بدأت إزاي
:D

اسكندراني اوي يقول...

ههههههههههههههههه
حقولك زي ما قالت فضفضه
واضيف عليها المشاهره
يقولك على الست اللي ما بتخلف اطفال دي متشاهره
يعني اموت من البرد ولا البس شراب يدفي لي رجليا
ههههههههههههههه

عصفور المدينة يقول...

أنا مش بانام بشراب بس نظري ضعيف بس بالبس الشراب وانا قاعد قدام الكمبيوتر عشان اشوف كويس

عصفور المدينة يقول...

على فكرة ماذكرته دكتورة فضفضة جزء من قائمة تطول مثل رمي الإبرة بالليل على الأرض والضحك في المرآة بالليل وقلب الشبشب والكنس ليلا شهقة الملوخية ويمنع دخول حالق لحيته على الوالدة وفيه أشياء مركبة شوية عن كدة مش فاكرها

adhm يقول...


اظرف حاجة فى حكاية النوم بالشراب فى الشتا دى ان الواحد بيمسح على الشراب علشان الوضوء للفجر
بس يمكن الاشاعة دى ظهرت زمان للتخلص من رائحة الشراب اللى بتبقى مش ظريفة ابدا وتطير النوم من العين وكوسيلة مضادة لمكافحة الرائحة
كان فية واحد عندة اختبار لتغيير الشراب وهو ببساطة انة بعد ما يقلعة يحدفة فى المراية اذا لزق يغيرة واذا وقع يلبسة تانى يوم
,كمان احب اضيف على العادات الغريبة دى ان الراجل مش ممكن يدخل على ست لسة والدة اذا كان حالق ذقنة واذا حصل لازم الست دى تخطى على عدة مزين قديمة سبع مرات علشان اللبن ما ينقطعشى

المضحك فى موضوع النوم بالشراب دة عند البحث فية فى جوجل طلعت
حاجات تضحك بصراحة
تحياتى

إيمان الحسيني يقول...

إسكندراني
يعني تدفي رجليك على حساب نظرك ؟
:D

والله المصريين دول عليهم حاجات عجيبة !!!!

إيمان الحسيني يقول...

عصفور المدينة
طب أنا بقى عندي مشكلة في نوع الشراب إللي هالبسه قدام الكمبيوتر
لإني عندي استكماتيزم
ألبسه كاروهات ؟

إيمان الحسيني يقول...

أدهم
بالنسبة للتجربة إللي حضرتك ذكرتها
هل أثبتت فعاليتها ؟!!!

:)

منور مدونتي
بس على فكرة الرابط إللي أنت حطيته بتاع مدونة اسمها : هنادي

adhm يقول...

و اللخبطة دى تثبت ان النوم بالشراب بيأثر على النظر
ربنا يستر
الرابط هنا
مع الاعتذار لهنادى

محمد عبد الغفار يقول...

أتارينى لابس نظاره


مره وانا فى رابعة ابتدائى كنت بردان ولبست شراب وانانايم

يا مراكبي يقول...

نتكلم جد شوية وبشكل علمي

جاوبي على السؤال ده الأول

هو الشراب ده طويل قوي لدرجة إنه بيوصل للعيون فوق وألا شراب قصير عادي؟

أحمد جلال يقول...

انتي متعرفيش؟..السوسيوجلوجية الفكرية المرتبطة بأستيك الشراب تؤدي إلى إحباط اثروبيولوجي مريع وانفاجارات نفسية عاطفية..كل ده بيأثر على عينيكي..افهموها بقى.
------
هيا دي مشكلتنا..قول اللي بيقوله غيرك..هو معقول يعني حيقولولي حاجة غلط..بنمشي على هذا المنوال في كل حاجة ...ربنا يستر.

إيمان الحسيني يقول...

ماكونتش أعرف يا أدهم إن الفكرة دي منتشرة في السعودية كمان
!!!
سبحان الله

إيمان الحسيني يقول...

كل ده يا محمد علشان لبست الشراب مرة ؟
أومال لو بتلبسه على طول كان حصل إيه ؟
:)

إيمان الحسيني يقول...

واضح يا مراكبي إنك كنت بتكتب الرد ده وأنت جعان
لإن إللي أنت بتوصفه ده يبقى صباع محشي
مش شراب أبدا
:)

إيمان الحسيني يقول...

أحمد المصري
ماكونتش أعرف إنهم فتحوا في كلية الطب قسم شرابات !!!
:)

منور مدونتي :)

أمــانــى يقول...

هههههههههههههههه
هههههههههههههههههه
بصى انا بقى اللى كان بيتقالى احنا لازم نلبس شراب غير اللى بنلبسه فى الجزمة يعنى بتاع النوم غير بتاع الجزمة علشان بيجب وجع العينين بس ضعف النظر دى ماجاتش عندنا
D:
عســل يا طعمتى

رفقة عمر يقول...

ازيك عامله ايه واخبار النت ايه
بخصوص موضوع الشراب ماما دايما تقولى كدة
بس حتى لو حقيقى تفتكرى اعمل ايه فى الجو البرد دة ماينفعشى نهائى انام من غير شراب دة من المستحيلات فى الشتا

إيمان الحسيني يقول...

ربنا يكرمك ويعزك يا أماني
ربي يرزقك السعادة في الدارين
اللهم آمين

إيمان الحسيني يقول...

منوراني يا رفقة عمر
في اليوم إللي قررت أنزل علشان أعمل الاشتراك مع تي داتا لقيت صاحب السايبر بيتصل بيا ويبلغني إن النت رجع تاني
:)
شوفتي الحظ ؟!!
بس على مين
بإذن الله هاعمل الاشتراك برضه تحسبا لأي ظروف طارئة
مش هاسيب نفسي تحت رحمتهم تاني


أما بقى بخصوص الجو البرد ده ولبس الشرابات
فأنا قريبا جدا هتلاقوني نايمة بالجزمة
مش بالشراب بس
ربنا يعدي الشتوية دي على خير
اللهم آمين

محمود بهجت يقول...

ana kaman sa3an banam be elsharab w 3eny el7md le ALLAH lm tata2thar zy ma heya -5.25, -7.75

:D

إيمان الحسيني يقول...

ههههههههههههههههههههههههههههه

ربنا يكرم ويعزك يا إم بي
كويس إن عينك لما تتأثر أكتر من كده

أخـت فـى الله يقول...

طب استنى كدة اقلع الشراب يمكن نظرى يرجع تانى



اه صدقى رجع!!!!

ناس مخها شارابتى صحيح

باب البحر يقول...

يمكن يكون الشراب بيكتم على الرجلين و بيضغط على الشعيرات الدموية فبيقلل تدفق الدم إلى المخ و العينين ... بقول ممكن مثلا !!


ع العموم ده كان مجرد إجتهاد ، بس برضه مش مقتنع أنه يسيب كل الأعضاء و يركز ع العينين !!

جزاكم الله خيرا

NOUR Kamal يقول...

السلام عليكم

قد استغربت كثيرا من كلامك

ولا يوجد له اي شيء من قبيل العلم ، من أتيتم به لا ادري

احترامي