الثلاثاء، يناير 01، 2008

مجرّد فضفضة ... قبل ما أطق

السلام عليكم جميعا
ومازال الـ DSL عاطلا عن العمل
ومازلتُ أتحدث عن طريق الـ dial up
ومازال الصبر رفيقي :)
* خرجت مع أختي وبناتها أول يوم عيد الأضحى وياريتني ما خرجت أصلا ، البنات في الشارع زي ما يكونوا خارجين يصطادوا الرجالة !!! (طبعا مش باتكلم عن بنات أختي :) )
* يوم الخميس إللي فات خرجت مع صديقة ليا ونزلنا روكسي نتفرج على المحلات ، واحنا واقفين قدام إحدى الفاترينات فوجئنا بشاب جه وقف ورانا وبيسألنا : مافيش واحدة فيكم عاوزة تتجوز عرفي ؟!!! ... بعد ما كانت المصيبة دي بتم في الخفاء وبعيدا عن أعين الناس بقيت الدعوة ليها على الملأ وعلى عينك يا تاجر ، الموقف ده فكرني بتدوينة سابقة : عوض علينا عوض الصابرين يا رب .
* الأسعار من غلاء إلى غلاء والعيشة بقيت ضنك ، وتفتح الجرائد الحكومية تلاقي المانشيتات : لا مساس بمحدودي الدخل ، انخفاض معدلات البطالة بنسبة 8% ، زيادة واردات قناة السويس .
* في جريدة الأهرام يوم الأربع إللي فات واحد اسمه (جمال زايدة) كاتب عمود في الصفحة السادسة بعنوان : تأملات سياسية ، بيشكر في العمود ده العامل السعودي لإنه أصدر حكم بالعفو عن فتاة القطيف ( أنا مش باتكلم عن القضية دي أصلا) ... ويستطرد الكاتب قائلا : العباءة والنقاب يُكرّسان مفاهيم متخلفة مثل أن الأنثى شر يجب أن نحمي المجتمع منه .... وتغطية النساء من الرأس إلى أخمص القدم لن يدفع مجتمعنا إلى الأمام ... وراسلت الكاتب على إيميله أسأله سؤال واقف في زوري : هو لما الدولة الإسلامية كانت في أوج قوتها وتقدمها العلمي والعسكري في عصر رسول الله (صلى الله عليه وسلم) وعصر الخلفاء الراشدين والدولة الأموية والدولة العباسية كانت النساء في الوقت ده مش لابسين عباءة ونقاب ؟!!!! ... ياريت تبطلوا حجج فارغة وتدوروا على الأسباب الحقيقية لتخلفنا (طبعا ماكتبتش الجملة الأخيرة في الإيميل :) )
وإنا لله وإنا إليه راجعون

هناك 18 تعليقًا:

عصفور المدينة يقول...

ربنا يعينك ويعيننا

إيمان الحسيني يقول...

اللهم آمين ... اللهم آمين

Unknown يقول...

احنا لينا ربنا يابنتي
وبعدين حد يدخل دايل اب وتضايقه الحاجات الصغيرة دي (لسه متعلمتيش الصبر ياطعمة)
:))

إيمان الحسيني يقول...

صراحة الدايل أب علمني الأدب
:D

منوراني يا مُناجاة :)

الفقيرة إلى الله أم البنات يقول...

طعمة يا ست الكل
خايفه يوم اروح اجيبك من القسم
ايجابيتك الشديده دى بموت فيها
يا بنتى كبرى دماغك....مفيش أمل الا لما ان شاء الله ينزع الملك
يا غاليه دولتنا المسلمه استقبلت
الفرنسى المنحل ساركوزى وصديقته علشان ان ست مؤدبه مش هاقول الكلمة اللى بنسمعها
والفاتيكان ..واخده بالك رفض استقبال مامة صاحبته..علشان ملهاش صفه
تفتكرى هما النصارى مش عنده برضه الصديقه حرام
يعنى لو رفضنا دخول اليهودى القبيح هذا ومن معه
حد هيعمل لنا حاجه
اه نسيت وقتها هيقولوا اسلام وتخلف
والمدنيه والحضارة
صحيح يا طعمه...الواد الهايف اللى بيسأل على الجواز العرفى
فاهم انه ده هيبقى زنا وممكن ان شاء الله ينقل له الامراض
وان اللى بيعمله ده سفاله وعينى عينك
طعمه دمى اتحرق بشده
طيب الشخص ده مش شايف حضرتك وانت لابسه العبايه
ولا كان سكران..ما البنات اللى على شاكله كتيير
حسبى الله ونعم الوكيل

خمسة فضفضة يقول...

السلام عليكم ورحمة الله وبركاته

الله يكون في عونك ويقويكي علي الدايل اب وعلي الحاجات التانيه

محمد عبد الغفار يقول...

متنحريش فى قلبك على الفاضى ونفوض امرنا الى الله

الطائر الحزين يقول...

ومن كان فى هذه اعمى فهو فى الأخرة اعمى واضل سبيلا


بارك الله فيك

ma 3lina يقول...

كويس إن فيه دايل آب برضه .. أهو نص اللي مش عارف ايه ولا اللي مش عارف ايه كله

فضفضة ماشي .. تطقي لأ .. اصل حتطقي على إيه .. قصدي على ايه ولا ايه ولا ايه ..

الحمد لله على سلامتك ..
أخينا بتاع الجواز العرفي ده عملتوا فيه إيه ؟؟ آآ قصدي اتصرفتوا معاه ازاي ؟

اسكندراني اوي يقول...

اه يااااااني

بجد شيئ يحزن
ربنا يفكها من عنده بقى لحسن خلاااااص الناس بقت وحشه اوي

كل سنه وانتي طيبه

إيمان الحسيني يقول...

والله وحشاني قوي يا أم البنات
الشوارع دلوقتي بقيت وحشة قوي ومخيفة
وغذا كان الواحد بيخاف من الغُرب قيراط
فهو بيخاف من رجال الأمن 24 قيراط
والله المستعان

بالنسبة للجماهير إللي بتسأل عن شبه الرجل إللي رمى السؤال عليا أنا وصاحبتي عملنا معاه إيه
متوقعين هنعمل معاه إيه يعني ؟
بصينا لبعض وإحنا متفاجئين من السؤال وأخدنا بعضنا ومشينا متنحين
افتركت ساعتها الآية الكريمة : " إن الذين يحبون أن تشيع الفاحشة في الذين آمنوا .... "

إيمان الحسيني يقول...

وعليكم السلام ورحمة الله وبركاته
جزاكِ الله كل خير يا فضفضة
ونسأل الله الصبر والثبات
اللهم آمين

إيمان الحسيني يقول...

والله يا محمد الواحد أعصابه تعبت فعلا من إللي بيشوفه حواليه كل يوم
ربنا يستر
أنا بانزل كل يوم الشغل وبأقول يا رب بس أرجع البيت لأمي سليمة إذا لا قدر الله حصل حاجة في البلد

إيمان الحسيني يقول...

بارك الله فيك وبك أخي الطائر الحزين
ونسأل الله أن يجعل لبصائرنا وبصيراتنا نورا من عنده
اللهم آمين

إيمان الحسيني يقول...

ربنا يكرمك يا ما علينا
وأنا فاكرة التاج والله بتاعك وبتاع أخونا باب البحر
بس مستنية النت يرجع تاني علشان بس أبقى باجاوب بروقان :)

بالنسبة للعيل إللي رمى الكلمة ده فزي ما قولت لأم البنات
مشينا وإحنا متنحين من الكلمة لإن ماكوناش متخيلين إن المسألة وصلت للعرض والطلب على قارعة الطريق كده

حسبنا الله ونعم الوكيل

إيمان الحسيني يقول...

وأي حزن يا إسكندراني
ربنا يستر علينا من يوم العقاب
اللهم آمين

الفقيرة إلى الله أم البنات يقول...

حبيبتى طعمه لاء بجد الحكايه بقت بايخه قوى
وعلى رأى الدستور زمان كلن البوليس هو الرجل الطيب واللى بيحب الخيردلوقت لاء بقى البوليس العنصر الشرير فى الفيلم



وفى الواقع
طعمة ااقولك ايه
غرباء

إيمان الحسيني يقول...

هي بوخت بعقل يا أم البنات
ربنا يسترها معانا دنيا وآخرة
اللهم آمين