تاجين في الراس

السلام عليكم

في خلال الفترة إللي تعطل فيها الـ dsl - ومازال العطل مستمرا - جالي تاج من أخونا ما علينا وتاج آخر من أخونا باب البحر

بإذن الله هارد على التاجين دلوقتي

التاج الأول :

ما هي سورتك فى القرآن (أى أحب سورة إليك تقرأها في فرحك وفي حزنك) ؟

فيه سورتين باحبهم جدا وغالبا يا إما باقرأهم يا إما باسمعهم
سورة يوسف وسورة مريم
وباحب أسمعهم جدا من الشيخ مشاري العفاسي لإني باحس إنه بيحول الكلمات لصور
زي ما أكون باتفرج على الأحداث قدامي

ما هي أحب آيه إليك ؟ الآيه التى دائما تتمناها ؟

" فَصَبْرٌ جَمِيلٌ وَاللَّهُ الْمُسْتَعَانُ عَلَى مَا تَصِفُونَ " يوسف (18)
ما هي أكثر آيه تخاف منها وتدعو الله ألا تكون من أصحابها ؟

" قُلْ هَلْ نُنَبِّئُكُمْ بِالأَخْسَرِينَ أَعْمَالا ، الَّذِينَ ضَلَّ سَعْيُهُمْ فِي الْحَيَاةِ الدُّنْيَا وَهُمْ يَحْسَبُونَ أَنَّهُمْ يُحْسِنُونَ صُنْعًا " الكهف (104:103)
ماهي الآيه التي تشعر أنها تتكلم عنك ؟
بافتكر الآية دي دايما لما نفسي بتزينلي إني بقيت أفضل عند الله من الشخص إللي قدامي :
" كَذَلِكَ كُنتُم مِّن قَبْلُ فَمَنَّ اللَّهُ عَلَيْكُمْ " النساء (94)
من أحب صحابي وأحب صحابية ؟

من الصحابة الكِرام باحب جدا عُمر بن الخطاب وكان نفسي أكون ولو حتى ملك يمينه في الدنيا
وبادعو الله إني أكون إحدى زوجاته في الجنة
اللهم آمين
بالنسبة للصحابيات أحبهن إليا أم المؤمنين وسيدة نساء العالمين أمي الحبيبة خديجة بنت خويلد

من أحب نبي إليك بعد الحبيب (صلى الله عليه وسلم) ؟

نبي الله يوسف عليه وعلى نبينا أفضل الصلاة وأتم التسليم

إذا كنت على عهد رسول الله (صلى الله عليه وسلم) فمن كنت تحب أن تكون ولماذا ؟

لو كنت على عهد النبي (صلى الله عليه وسلم) أحب أن أكون الصحابية الجليلة نُسيبة بنت كعب (أم عمارة) لأنها كانت امرأة بالف رجل وثبتت عندما فر الرجال يوم أُحد

ما هو منتداك وموقعك المفضل ؟

اعتزلت المنتديات من فترة ومواقعي المُفضلة في السايد بار :)

ماهى أحب الأسماء التي تحب أن تُنادى بها ؟

أحب إني أتعرف باسم : إيمان الحسيني (الحسيني لقب العائلة)
ونفسي أُكنى بـ (أم حمزة) لكن طبعا وكعادة مجتمعنا المصري إن البنت مايتقالهاش يا أم فلان إلا إذا كانت اتجوزت وخلفت فلان ده فعلا :)

من هو كاتبك المفضل ؟

غالبا باقرأ الكتاب بموضوعه مش باسم الكاتب

مدون له فضل عليك واستفدت منه ؟

كل مُدون محترم دار نقاش بيني وبينه في أحد الموضوعات
من هو قارئ القرآن المفضل لك ؟

العفاسي ، الغامدي ، العجمي ومحمود علي البنا

من هو منشدك المفضل ؟

برضه في الغالب باسمع النشيد إللي بيميل ليه قلبي بغض النظر عن المُنشد
لكن في الذهن دائما : الغامدي ، العفاسي وياسر فاروق أبو عمار

ما هو نشيدك المفضل ؟

مسألة حالة نفسية وظروف بتخلي النشيد ده مُفضل النهاردة وغيره مُفضل بكرة
بس غالبا باحب أسمع نشيد يا طيبة ونشيد أنا العبد للعفاسي

إذا كان لك دعوة تدعوها وستتحقق باذن الله فبماذا تدعو ؟

بادعو الله دائما أن يرزقني الرضا بقضائه

ما هو الداعية المفضل لديك أو شيخك المفضل ؟

الشيخ محمد حسان والدكتور عُمر عبد الكافي والشيخ وجدي غُنيم فرّج الله كربه
لكل منهم إحساس خاص في توصيل المعلومة

ما هي أكثر عبادة تشعرك أنك قريب جدا من الله ؟

قيام الليل

من أحب أفراد عائلتك إليك ؟

أمي الحبيبة
ماهو أملك فى الحياة ؟

السؤال ده فكرني بكلمة الشيخ أحمد يس عليه رحمة الله :
أملي أن يرضى الله عني

*********************************

التاج الثاني :

لماذا اخترت اسم مدونتك؟
ده أول اسم اتعرفت بيه في عالم النت وعالم المنتديات
te3mah
طعمة
اعربها
أعتقد إنها خبر لمبتدأ محذوف تقديره أنا
والله أعلى وأعلم
لماذا تدون؟
متنفس من الحرية في العالم الافتراضي بعد أن ضاق بنا العالم الحقيقي
لومكنتش مصري بس عربي كانت هتبقى إيه نظرتك للمصريين واللي بيحصل في مصر دلوقتي؟ أو لوكنت أوروبي أو غير مسلم بردو إيه نظرتك للعرب والمسلمين ؟
كلنا في الهم سواء
لو قالولك إنت بقيت رئيس جمهورية هتعمل إيه؟
هارفض بكل تأكيد
لو كان ينفع ترجع طفل تاني وتخليك طفل علطول هترجع؟ وليه؟
أكيد هارجع طفلة تاني علشان هيبقى القلم مرفوع عني
لو إنت طبيب وعندك مريض ميؤوس من حالته .. أيهما تفضل .. إنك تصارحه بالوضع وتقوله كل شيء بأمر الله في الآخر ولا تغرس فيه الأمل لغاية لما يموت؟
على حسب المريض إللي قدامي
بس غالبا أنا بافضل الصراحة المُهداة في اليقين بقدرة الله تعالى
لو سمح لك برؤية الرسول (عليه الصلاة والسلام) وإنك تقوله كلمة واحدة بس أو جملة واحدة بس هتكون إيه؟
إني أُحبك يا رسول الله
لو خطبت واحدة أو اتخطبتي لواحد وأثناء الخطبة إكتشفت أو إكتشفتي إن الطرف الآخرغير قادر على الإنجاب هيكون تصرفك إيه؟
من أهم الأسباب للزواج هي التناسل كما قال الحبيب المصطفى : تناكحوا تناسلوا ...
غالبا هارفض الارتباط بيه
لو طلعت القمر هتكتب إيه عليه؟
لا إله إلا الله
لوكنا في عصر إزدهار الأندلس كنت تتخيل نفسك إزاي؟
مجرد فتاة مسلمة عادية
لو مررت التاج ده لحد وما جاوبش عليه أعمل فيه إيه؟
اقتله :)
لو هتسافر في أي مكان في الدنيا تعيش فيه هتروح فين ؟
إمارة الشارقة في دولة الإمارات
لو مررت التاج تمرره لمين ؟؟
أحمد الحسيني
رضوى
أم البنات

أمنية