الجمعة، فبراير 08، 2008

عمو عزيز

العنوان جملة شهيرة كانت بتقولها الفنانة ماجدة في أحد افلامها القديمة
قصة الفيلم إنها بنت وحيدة لأم (أمينة رزق) ومن أسرة راقية
وكانت الأمر مُصرة تتعامل معاها على إنها طفلة حتى وهي في المرحلة الثانوية في حين إن جميع صديقاتها بدأوا يلبسوا الأحذية إللي بكعب ويسرحوا شعرهم بطريقة تنم عن إنهم كبروا وبقوا آنسات
لكن هي كانت دايما بالجزمة والشراب والفيونكتين في شعرها
وظهر عمو عزيز (زكي رستم) وإللي كان صديق العائلة الثري ومن سن أبوها وكانت بتعتبره في مقام أبوها أو عمها ودايما كانت بتندهله بـ : عمو عزيز !
لحد ما في يوم طلب من الأم إنه يتزوجها لأنها كبرت خلاص وبقيت عروسة ... يتزوج البنت الصغيرة مش الأم
الأم وافقت والبنت فرحت جدااااااااا
عارفين طبعا فرحت ليه ؟
لأنها ولأول مرة في حياتها تحس إنها كبرت وبقيت آنسة وهتلبس الفستان الطويل الواسع والجزمة إللي بكعب وهتفك الفيونكات من شعرها
وأعتقد لحد هنا بقية أحداث الفيلم معروفة أو متوقع إيه للي هيحصل بعد الزواج


* هل أنتِ على استعداد إنك تتزوجي واحد أكبر منك بحوالي 20 سنة لمجرد إنك تحققي أحلامك ؟
* هل أنتِ على استعداد إنك تتزوجي واحد بفرق السن ده لمجرد إنك تخطيتي سن الثلاثين وماتجوزتيش لسه والناس كلها قاعدة تلح عليكي في مسألة الزواج ؟
* هل أنتِ شايفة إن زوج أكبر منك بـ 20 سنة قادر على إنه يسعدك ؟
* هل أنتِ على استعداد للزواج من عمو عزيز ؟

ملاحظة : طرح الموضوع مش خاص بمسألة الحلال والحرام ، الموضوع يخص حياتنا الاجتماعية وعصرنا الحالي ، وهل إذا كان الأمر ده ناجح في السنين السابقة هل بقى ناجح في العصر الحالي ؟

الأسئلة مُوجهة للبنات فعلا لكن مافيش أي مانع إن الأخوة يشاركوا معانا
ولو فيه واحدة من الأخوات عندها تجربة شخصية وعاوزة تشارك معانا فهي ممكن تبعتهالي كرد على الموضوع لإني عاملة تحكم في إظهار الردود
يعني الرد مش هيظهر غير لما أنا أعمله نشر
بس تكتب في آخر الرد إنها مش عاوزة تنشره باسمها الحقيقي
وأنا هاضيفه كتحديث داخل التدوينة
------------------------------------------------------
* تحديث (1) :
ده كان رد إحدى الأخوات في منتدى قلوب مُحبة لله ولقيت إنه المفروض يبقى جزء من التدوينة :
" السلام عليكم ، بصراحة الموضوع شدني للدخول في النقاش معكم ، انا طبعا مش عارفة هل كل اللي بيتكلموا عن استعدادهم لمثل هذا الفارق مازالوا في مرحلة الدراسة ام منهم من تزوج؟؟ انا هاقول رايي من حيث الخبرة فانا متزوجة من ثلاث سنوات بفارق اسبوع واحد بيني و بين زوجي ,اللي عاوزة اقوله بدون تطويل ان الموضوع مش بيكون مجرد دين او حكمة او عقل فقط, رغم انها عوامل مهمة و لا تستغنى اي زيجة عن هذه العوامل,انما تقارب السن له توابع ,مثلا في طريقة قضاء اوقات الفراغ,مشاهدة برامج معينة, طريقة الاستمتاع اثناء نزهة معينة,الاستعداد لخوض تجارب جديدة و مغامرات شيقة, طريقة الهذار بين الازواج, نوعية الحوار و الموضوعات, النظرة العامة للحياة, بمعنى اصح جربي او جرب تخرج مع باباك و انظر لطريقة كل منكما في الاستمتاع بأي شئ, هل متماثلين؟؟؟؟ او تحسوا انه هناك فجوة,كانكما التقاء جيل مع جيل اخر ؟؟؟؟ و لو حدث الان تشابه الى حد ما , فماذا بعد عشر سنوات؟؟؟؟؟ "

هناك 30 تعليقًا:

أبو عمر - الصارم الحاسم يقول...

هل عمو عزيز ينفع كزوج من جميع النواحي

هل هيبقى فيه توافق وقبول...هل شخصيته تنفع

وهل شخصية من ستتزوجه هتتقبل هذا - ده ان كان اجابة السؤالين اعلاه ايجابية

قلما يكون هذا...لكن احيانا نعم

إيمان الحسيني يقول...

ينفع كزوج من جميع النواحي
توافق
قبول
شخصيته تنفع

كل دي كماليات في نظر المجتمع بالنسبة لبنت عديت سن الـ 30 ولم تتزوج بعد

جزاك الله كل خير أخي الكريم

ibn_abdel_aziz يقول...

بصي يا ايمان
انا كتبت في الموضوع ده كثير جدا
موضوع الانماط
وان المجتمع جعل الشخص المناسب له صفات محددة وثابتة مع ان الامر نسبي
ياريت تقري اخر بوست كتبته بعنوان

مؤسسة الزواج المصرية الفاشلة

http://justice4every1.blogspot.com/2008/02/blog-post_02.html


انا حاطط اجابات كثيرة بقترحها علي تساؤلك ده

من وجهة نظري
ان البنت اللي عدت سن الثلاثين طبعا بتلاقي ضغط من اسرتها والمجتمع
بصراحة
انا اشجع اي فتاة في هذا الوضع ان تقول طز كبيرة قوي
وتفعل الذي تراه صالحا لها

الشخص اللي جاي ده لا يجب ان تقبله الفتاة لمجرد انه هو ده اللي قدامها
اطلاقا
هذا ظلم مبين

كل شخص يقاس بحاله الخاصة تماما
انا من وجهة نظري ان الشخص هو القصة
والحكاية والرواية
لو كان فيه ما تريده الفتاة فاهلا وسهلا
والا فلا

من رايي الشخصي ان الفتاة اللي يتقدملها شخص وفارق السن تراه مقلق
من وجهة نظري انها تعطيه فرصة للمعايشة بالتجربة ويستغرق الامر عدة شهور حتي تتاكد هي مما تريد بالفعل
ان لم تشعر بانها تريد ذلك فكل واحد يروح في حاله
وانتهي الامر
ولتدعها من ضغط المجتمع وقرفه
فرق السن مسالة مهمة ولكنها ليست هي كل القضية
كل شخص بيفرق عن التاني
مثلا فارق السن بين زوجين اعرفهما 13 سنة وزواجهما غير ناجح
واخر فارق السن 15 سنة وهو ناجح جدا

في الاول كان الرجل سئ الخلق ظالم ويضرب المرأة
والثاني كان حنين ويعرف لها حقها

يبقي فارق السن لا يكفي وحده للحكم
ولكنه ايضا فارق مهم
هل الشخص الاصغر سنا في العلاقة يقبل شكل الشخص الاكبر سنا في العلاقة؟
هل يمكن للشخص الاصغر ان يتوافق في اللغة المستخدمة بينهما؟
اسئلة من النوع ده مهمة
وعلي الفتاة التاكد

في النهاية لو البنت حاسة انه صعب
يبقي صعب
وترفض وينتهي الامر ومحدش له دعوة بيها ابدا

والله اعلم

إيمان الحسيني يقول...

منور يا شريف

بالنسبة لإعطاء الفرصة وتجربة المعايشة شهرين تلاتة فدي تبقى مصيبة كبيرة
لإن البنت بعد أول مقابلة إذا قالت إنها محتاجة تقعد مع العريس قاعدة تانية الكل بيعتبر الطلب ده موافقة صريحة على الارتباط والزواج
واحتمال القاعدة التانية دي تتحول لقاعدة اتفاق وقراءة فاتحة وتتحط البنت قدام الأمر الواقع وهي ماكانتش محتاجة أكتر من قاعدة تانية علشان تقدر تحدد إذا كان فيه قبول مبدئي ولا لأ

eldoctor يقول...

المشكلة مش فى فارق العمر بس .. المشكلة فى التطور النفسى للرجل و المرأة و برضه التطور الفسيولوجى .. يعنى الرجل فى سن العشرين تتحكم فيه الهرمونات و الغريزة بمعدل اكثر منه فى الثلاثين .. و تقل تدريجيا حتى سن الاربعين .. و عند سن الاربعين للرجال يبدا الاتزان النفسى و الفكرى .. و التمكن من الغرائز ..
و يمكن لو تلاحظى ان جاء فى القران .. فاذا بلغ اشده و بلغ اربعين عاما قال ربى اوزعنى ان اشكر نعمتك على و على والدى و ان اعمل صالحا ترضاه .. و تكليف الانبياء عموما ياتى عند الاربعين باستثناء قلة مثل سيدنا عيسى و سيدنا يوسف و سيدنا يحيى ..
فارجع و اقول عند سن الاربعين الوضع مختلف.. عند الرجل ..
بالنسبة للمرأة التطور الفسيولوجى بيزيد و يقل و بيستقر عند سن 45 سنة .. و تقبلها الفكرى لمنطق الزواج بيعتمد على الظروف المحيطة و الاهل و التقاليد اكثر من الرجل يعنى بالرغم من اننا من المفروض فى مجتمع اسلامى و ان القاعدة للرجل اظفر بذات الدين تربت يداك و بالنسبة لاهل المرأة (اهل المرأة مش المرأة) من جاءكم من ترضون دينه و خلقه و امانته فزوجوه .. الا ان الواقع مختلف .. يعنى عن تجارب شفتها ناس على دين و خلق و حاولوا يتوجوا من بنات افاضل كان الموضوع المادى طاغى جدا بالرغم من اننا نحسب الجميع على خير بسبب الوضع الاجتماعى ..

معلش انا شكلى طولت

إيمان الحسيني يقول...

ده إللي أنا باتكلم عليه يا أخي الكريم الدكتور
التوافق في كل شيء
هل يستطيع رجل أن يُجاري زوجة أصغر منه بـ 20 سنة ؟
سواء في التفكير أو الحياة بشكل عام

مش بأقول إن لازم الحالة دي تفشل
أنا بس عاوزة ألفت النظر إن المجتمع لازم يراعي مسألة القبول والتكافؤ والتوافق
مش علشان واحدة تزوجت إنسان أكبر منها بـ 20 أو 30 سنة ونجحت في حياتها يبقى ده المبدأ !!!

جزاك الله كل خير أخي الكريم
وياريت تطول كل مرة :)

ibn_abdel_aziz يقول...

ماهو طبعا يا ايمان
مش مبدأ

هو مين قال ان جوازة نجحت وفارق السن عشرين سنة ان اي جوازة فارق السن فيها عشرين سنة ناجحة؟

انتي قريتي الاحصائيات اللي طالعة رسميا من مراكز الاحصاء القومي؟

نسبة الطلاق في مصر بلغت 41 في المائة من المتزوجين حديثا
ومين دول بقي؟
دول اللي هما الشباب اللي محدش يختلف عليهم اصلا انهم مرسومين بالمسطرة ومناسبين بالشكل النمطي المعروف

يعني تلاقي فروق السن سنة واتنين وخمسة
اللي هي بيعتبروها فروق طبيعية

نقدر نقول بقي ان فرق السن الصغير سيؤدي الي مصيبة؟
ونقول للراجل اللي بينه وبين الست 4 سنين مثلا انت احتمال تطلق بنسبة 41 بالمائة؟
لا طبعا

عشان كدة انا قلت الشخص هو القصة والحكاية والرواية
الشخص هو الموضوع والمادة والمحتوى

الست بتضنج اسرع من الراجل بفارق عشر سنين
يعني اللي عندها 30 هي في نضج الاربعين
والراجل بيكون نضجه في سنة بالظبط عادة

عشان كدة ساعات فروق السن الكبيرة بتكون افضل لبعض الزواجات
يعني من 10 ل 15 بيكون معقول وهو امر معتاد عليه في ثقافات كثيرة وحتي الان وليس الامر بالشاذ علي الاطلاق

كمان الراجل عامل ازاي؟
شكله ايه؟
صحيح جسديا
شاب روحا
عقليته عاملة ايه

بالنسبة للنقطة اللي ذكرتيها يا ايمان
بتاعة ان لو البنت طلبت مهلة تتعرف
يعتبروها راضية وهوبا لبسوا دبل وبقت ورطة
في الحالة دي يبقي فيه وضعين
الاول انها تقول بصراحة انا عاوزة فرصة ولي الحق في الرفض والقبول ومحدش يضغط علي وسيبوني اعمل اللي يريحني

ولو الوضع ده مش متاج نتيجة لظلم المجتمع المقرف وضغط الاسرة اللي يعل
يبقي البنت ترفض من الباب وفورا

دي قاعدة لا يمكن الفصال فيها
البنت لازم تجرب وتتعرف وتفهم وتاخد وقتها لو ده مش متاح يبقي تطلع من الموضوع من بابه
مش بس في حالة فرق سن 20
لا ولو فرق سن خمس سنين

دي مسالة مبدا ولا يجب التنازل فيها

علي فكرة الزواجات اللي فروق السن كبيرة فيها وناجحة مش حتسمعي عنها
حتسمعي عن الفاشلة بس
عشان احنا مجتمع اسود وبيدور في المصيبة وينشرها

مش عارف اكون افدتك برايي ده واللا لأ
بس يعني انا غرقان في مواضيع اجتماعية زي دي لشوشتي ومن عدة نواحي
وعشان كدة المواضيع دي بتخليني اشارك باخلاص
واتمني ان ربنا يوفق كل راغب او راغبة في الزواج
وان يكون بالحرية التامة
وانه يقل الوصم في المجتمع
عشان الجواز بقي معركة حربية بصراحة
حاجة تقرف

Dr.khaled يقول...

برأيي لو رأت فيه الكفاءة...
أقصد يعني لو رأى وليها الكفاءة فيه..
فميش مشاكل -والله أعلم-
ولو هنمشي في الاجتماعيات ورا كلام الناس...
يبقى مش هنعمل حاجة...

طيب أقول لحضرتك...
كان فيه إحدى الاخوات سنها حوالي 41 سنة....اتقدم لخطبتها رجل سنه...حاجة وستين...
لكن وليها (اللي هو ابنها) كان شايف انه كفء....
وفعلا تم الزواج...ووالله كان زواج سعيد جدا بالرغم ان الفرق تقريبا عشرين سنة...
والرجل ده كان طيب جدا وعطوف جدا وكريم كمان...
ومات -رحمه الله- من حوالي شهر...
والاخت دي الآن حالتها يرثى لها بسبب حزنها على هذا الزوج..الذي يكبرها
بـــ عشرين سنــة

يا مراكبي يقول...

موضوعك ده وموضوع إبن عبد العزيز من قبله بجد اقف لهم إحتراما

يحتاج مجتمعنا لمعالجة نفسية شديدة .. لأنه بيدوس على افرادة من مبدأ الكترة بتغلب الشجاعة .. ومافيش جد قادر إنه يهيش منبوذ أمام ضغوط المجتمع

20 سنة فرق بتعني فجوة كبيرة بين ثقافتين مختلفتين .. جيلين مختلفين تماما .. وظروف صحية ونفسية وجسمانية مختلة .. يزداد وضوحها أكتر مع مرور الزمن

نجاح مثل هذه التجارب هو هيكون الشذوذ اللي يعضد القاعدة مش أكتر

إيمان الحسيني يقول...

جزاك الله كل خير يا شريف
المهم بس إن الأهل والمجتمع يعملوا حساب لأحاسيس البنت وتفكيرها
ومايعتبروش أي حاجة بتقولها غلط لمجرد إنهم شافوا تجربة ناجحة ويصمموا إنهم يفرضوا التجربة دي على بنتهم بالعافية حتى لو هي رافضة

إيمان الحسيني يقول...

جزاك الله كل خير يا دكتور خالد

أنا ماعنديش أي اعتراض على التجارب الناجحة
بس مش علشان فيه إنسانة وافقت على فرق السن ده وتجربتها نجحت يبقى المفروض كل البنات توافق
كل واحدة وليها شخصيتها وتفكيرها وأحلامها
ليه مصممين على إن البنات كلهم عينة واحدة ولازم ينفذوا إللي المجتمع فرضوا عليهم ؟!!!!

إيمان الحسيني يقول...

جزاك الله كل خير يا مراكبي
للأسف المجتمع مش قادر يفهم كلمات زي :
التوافق النفسي والبدني
التكافؤ
التواصل والتفكير
المجتمع فاهم حاجة واحدة وبس :
البنت مالهاش غير الجواز
أي جوازة والسلام المهم ماتبقاش عانس


تخيل إن عندي في الشغل فيه بنات ببيحاولوا يقنعوني إني أتجوز أي جوازة والسلام علشان أخلف حتة عيل أفرح بيه ومش مهم بعد كده لو اطلقت ؟!!!

شوفت المجتمع وصل لحد فين ؟
الله المستعان

ibn_abdel_aziz يقول...

انتي عارفة ان المجتمع بجد اقدر اقول عليه
قليل الادب ومش متربي
ده لو ينفع اني اضم كل الناس في بوتقة واحدة واشتمهم علي بعض كدة

بصي مثلا الحالة اللي انتي ذكرتيها
عشان الفتاة تجاوزت الثلاثين اهلها عايزين يجبروها علي الزواج من شخص فارق السن 20 سنة

تعالي بقي لو البنت دي عندها 21 سنة لسة وجالها نفس الراجل وكان عنده ساعتها 40 سنة
الاهل حيرفضوا
صح؟؟
يبقي البنت في الحالتين رأيها ايه؟
البنت في الحالتين كيس جوافة

وبعدين معليش يعني ولي ايه ؟هو الولي ده مش ليه شروط ؟
هو فيه ولي اصلا اليومين دول ينطبق عليه شروط العدالة والامانة والتقوى؟
وبمقياس مين ان شاء الله

وانا هنا برد علي الدكتور خالد اللي واضع القضية كلها في يد الولي
الولي يشوف والولي يعمل والولي يقرر

البنت راحت فين ؟
رأيها فين وعواطفها فين وقبولها ليه فين وتكاملها معاه فين ؟

البنت لازم هي اللي تقرر اولا واخيرا
وهي اللي تحدد مناسب او لا
وبعدين بنت عندها 30 سنة مش زي عيلة عندها 16 سنة

انا هنا مش ضد ولا مع فارق سن معين
ولا يهمني الفرق خمسة واللا خمسين
الفكرة كلها
ان الفتاة هي اللي تحدد وبس
نقولها تاني
البنت هي اللي تحدد وبس
البنت هي اللي تحدد وبس
البنت هي اللي تحدد وبس

تتجوز واحد اكبر منها بعشرين سنة بارادتها وبس

من غير اجبار
ولا تدخل ولا اي شئ
اللي يحدد الكفاءة والتوافق هي
تستشير ايوة وتسال الناس ماشي
بس محدش يقرفها في عيشتها
وابقوا بقي وروني الاهل دول لما كانت هي لسة عندها 20 سنة وجالها عريس عنده 40 سنة كانوا حيعملوا ايه ساعتها؟
كانوا حيطلعوا فيه القطط الفاطسة
لان المشكلة عند الاهل مش البنت
لا المشكلة بوار البنت
لان ده مجتمع مش محترم اصلا وبيعامل الست كأنها كيس بطاطس
والله الذي لا اله الا هو
في بلاد الغرب الانسان بيعيش اسلامه احسن من البلد دي مليون مرة
حسبي الله ونعم الوكيل في العادات والتقاليد وتدخل الاسرة والقرف ده
حسبي الله و نعم الوكيل فيه بجد
ومحدش يخبي القرف ده بدين ربنا
ونقول دي طاعة للولي والولي يشوف والولي يعمل

ان كان الولي مش عاقل ومفرط وجاهل بانسانية البنت اللي رباها طول حياتها وكل خوفه عليها انها تبور
يبقي ولي ايه؟

ايه ده بس يا ناس ايه ده بس
سبحان الله
اللي جوز النبي من خديجة وهي اكبر منه ب 15 سنة ولا حد تدخل ولا حد فرض
ايجاب قبول رضا توافق
الاطراف المعنية بس هي اللي تتدخل
والاطراف المعنية هي
الفتاة والرجل
ودول اهم اطراف
وده حق الله لهم

يا ايمان
ان كان القهر وصل للدرجادي
يبقي بجد طز

البنت اللي عندها 20 سنة وبتتشرط
هي نفس البنت اللي عندها 30 و من حقها تتشرط وتختار اللي هي شايفاه مناسب
لو لقيت ابو خمسين سنة ده مناسب تتوكل علي الله
لقيته مش مناسب تشوف غيره
القصة واضحة قوي قوي قوي

إيمان الحسيني يقول...

روق بس يا شريف
والأخوة والأخوات بيقولوا آراءهم
وأخونا الدكتور خالد - نحسبه على خير ولا نزكي على الله أحد - بيتكلم على أساس إن المفروض إن ولي أمر البنت هو إللي بيراعي مصالحها في مسألة الزواج خاصة إذا كانت بكر
لكن في الأول والآخر مافيش حد - من الناحية الشرعية - يقدر يغصب بنت على الزواج من رجل رفضاه

عامة هي كانت مشكلة مريت بيها من حوالي 3 شهور وطبعا رفضت وصممت على رأيي
وماحدش من أهلي غصب عليا حاجة لإن والدي مريض بجلطة في المخ أصبح بسببها غير مُكلف
ووالدتي مش عاوزة غير إنها تشوفني سعيدة
خاصة وإنها عرفت وبالتجربة العملية إن رأيي في إللي قدامي غالبا بيبقى صح وبابقى شايفة إللي هي مش شايفاه كأم

الضغط إللي أنا اتعرضت ليه كان من زميلاتي في الشغل إللي استغربوا إني رفضت العريس من غير ما أشوفه لمجرد إني عرفت إنه أكبر مني بـ 20 سنة

الله المستعان

ibn_abdel_aziz يقول...

انا مش بزعق ولا حاجة يا ايمان

وبعدين انا بتكلم في مبادئ عامة جدا
ولا اعرف انتي بتتكلمي علي مين ولا وليها مين
ولا يفرق معايا بصراحة التفاصيل دي

المبدأ الواضح وضوح الشمس هو ان الفتاة يجب ان يكون رأيها هو الفيصل
ودي مسألة منتهي فيها النقاش عندي

من حيث الناس
نص الشعب المصري حاشر نفسه في حل مشاكل النص التاني

واللي معاكي في الشغل انفسهم قد لا يقومون بما ينصحوكي به
من التجربة العملية اكتشفت ان الكلام ببلاش وكثر منه

انا مش عاوزك تفكري كثير في موضوع فرق السن بشكل سلبي او ايجابي يا ايمان

الفكرة كلها ان انتي ممكن تكوني رافضة حد اكبر منك ب 20 سنة لان انتي شايفة انه ده فرق كبير
وممكن كمان شهرين تتعرفي علي شخص فرق السن حوالي 20 سنة وتتعايشي معاه كام شهر من خلال شغل او انشطة وتلاقي نفسك بتغيري رايك
في النهاية اللي انا بقوله انك انتي بس اللي تقدري تحددي
متقارنيش نفسك بالناس
متقوليش اصل فلانة اتجوزت واحد فرق السن سنتين بس واهي سعيدة اهي لاننا منعرفش فرق السن هو السبب اصلا واللا لأ؟
محدش يعرف لان فيه اسباب تانية كثيرة

انا زي ما قلت انا لا ضد ولا مع
كل واحد يشوف اللي يناسبه ايه وخلاص
لا بحط انماط ولا يهمني تجارب الناس ايه
ولا بقارن نفسي بيهم
ولا الشخص اللي عاوز اقترن بيه بالبنات التانيين

القضية وما فيها ان سيادتك يجب ان تحددي لنفسك ما هو مناسب وما هو غير مناسب
واول شئ حرري نفسك تماما من كلام الناس
اللي مع او اللي ضد

انتي لو جالك عريس اصغر منك بخمس سنين
الناس حتقول ايه؟
حيقوللك ما ينفعش ومش طبيعي وازاي
وكيت وكيت
في النهاية محدش سايب حد في حاله

احسن نصيحة تاخديها مش شخص بيحبك بجد و حريص عليكي
هو الشخص اللي يحط نفسه قدامك محايد تماما
اللي ميقولشي يا اما ده يا اما بلاش
اللي يقوللك رأيه بحب من غير تأنيب وعتاب وصداع وتحدي وتسفيه لرأيك انتي
لو لقيتي الشخص ده امسكي فيه بايدك وسنانك لان ده صديق موضوعي بيفكر معاكي زي مبيفكر لنفسه بالظبط

حاجة اخيرة
انا طبعا مش معترض ان الدكتور خالد يقول رايه
انا بس حسيت ان موضوع ولي الامر ده حسب طريقته في سرد رأيه
مش متزن بالمرة
تقريبا لغى راي البنت تماما وخلي الموضوع كله في ايد ولي الامر
او ده اللي فهمته
وده انا شخصيا رافضه تماما
ولي الأمر هو شخص معين علي اتخاذ القرار برفق وحب ومشاورة مش بتسليم الامر له تماما وكأنه هو الذي يدري ويعلم والفتاة ليس لها من الامر شئ

بصي يا ايمان انا عندي ليكي قصة تانية
واحدة عندها 22 سنة واتقدملها شخص عنده 36 سنة
هي موافقة واهلها رفضوا تماما
لو البنت دي كان عندها 30 وهو عنده 44 كانوا وافقوا
خدتي بالك انا قصدي ايه ؟
في النهاية البنت شوال بطاطس
وللاسف صاحبات نفس البنت اللي معاها في سنها وهي عندها 22 حيقولولها : ليه يعني دنتي لسة 22 سنة استني شوية ويجيلك سيد سيده " ولو كان عندها 30 نفس الصديقات حيوقلولها :" يا هبلة طبعا اقبلي هو حد لاقي يتجوز ؟ "

في النهاية
لا البنت نفسها كانت تفرق معاهم
ولا الشخص اللي اتقدم فرق معاهم
كله مقارنات ف مقارنات ف مقارنات
فشل في فشل في فشل

بس كدة

إيمان الحسيني يقول...

والله العظيم أنا فاهمة رأيك ده يا شريف ومقتنعة بيه وده إللي أنا باقوله دايما
بس الزن على الودان بيخلي الواحد للحظة يشك إنه على صواب
فبيطلب آراء الآخرين علشان يعرف هو صح ولا غلط

beeboo يقول...

لو ممكن أخدكوا في سكة تانية
لو عمو عزيز كان عنده تلاتين سنة
وشاب وسيم - عنده شقة - وعربية
بس متجوز وعنده عيال
ممكن أعرف رأيكم
ويا ريت ولاد حوا يعلقوا
نشوف رأيهم يعني
وماتنرفزش نفسك يابن عبدالعزيز
لا نكاح بدون ولي يابن عبدالعزيز
ماتخليش ثقافة الفرنجة تبهت عليك

إيمان الحسيني يقول...

التعدد حق شرعي للرجل في الإسلام
لكن برضه من حق البنت تقبل أو ترفض إنها تكون زوجة تانية

أنا عن نفسي شيلت فكرة الزوجة التانية من دكاغي تماما حتى لو كان أوسك وأغنى رجل في الدنيا وكان من سني ومناسب ليا تماما
وربنا شهيد على ما اقول

بالنسبة لكلام أخونا المهندس شريف
فهو عارف طبعا إنه لا زواج بدون ولي
هو مش بيتلكم عن الولاية في حد ذاتها
هو بيتكلم عن اتخاذ قرار الزواج بالموافقة أو الرفض في حد ذاته
وشايف إن القرار ده من حق البنت بس ومش من حق حد إنه يفرض عليها رأيه حتى لو كان وليها الشرعي
لكن في الأول وفي الآخر البنت مش هتتجوز بدون إذن وليها وموافقته

منور مدونتي يا بيبو :)

و القادم....أجمل يقول...

السلام عليكم
انا حاسة ان مسألة فرق السن
معدتش بتفرق
بس اهم حاجة التوافق في التفكير
و هل هي علي استعداد تقضي بقية حياتها
مع الشخص اللي اختارته بكل ما فيه
من ايجابيات و سلبيات
===
زوجة تانية
صعب بس لما الواحد بيتحط في موقف
بيكون رأيه علي حسب طبيعه الموقف

تحياتي و تقديري لك
و يارب تكوني دايما بخير و بصحة
:)

محمد يقول...

ما شاء الله تبدوا تدوينة جيدة .. أمر لأقرأها بإذن الله

الأخت الكريمة .. مررت لأخبرك بتمرير هذا التاج لك والذي يهمني أن أرى إجابته لديك أنا مسلم

إيمان الحسيني يقول...

وعليكم السلام ورحمة الله وبركاته

المسألة مش مسألة يفرق أو مايفرقش يا ولاء
المشكلة الأساسية زي ما قال المهندس شريف
التنميط والقوالب إللي اندفنا فيها من مئات السنين
طالما فيه بنت وافقت على المبدأ ده وحياتها نجحت يبقى لازم اي بنت تانية توافق خاصة إذا كانت كبرت ولسه ماتجوزتش
ومش مهم حياتها تنجح بعد كده أو لأ

منوراني دايما يا ست البنات :)

إيمان الحسيني يقول...

جزاك الله خير الجزاء أخي وضاح
بإذن الله أجاوب على التاج في أقرب وقت
بس شكله صعب قوي
الله المستعان

وفي انتظار رأيك على في الموضوع

محمد يقول...

شاهدت بعض الزيجات الفرق فيها أكثر من خمسة وعشرون عاما .. ولكن أغلبها ناجح

ربما يشتكي أحيانا كثيرة الطرفين .. ولكن غالبا ما يستطيعوا تجاوز الأمر , ربما لأن الرجل خبرته حينها أكبر من الآخر الذي يكبر الزوجة بسنوات قليلة .

ولكن حقيقة .. أحيانا كثيرة أشعر أن فيها إجحاف لحق المرأة .. ربما يتأخر الرجل في سن الإنجاب إلى سن كبيرة .. وفي المقابل المرأة تشعر أن حياتها انتهت بالوصول لسن اليأس والذي يكون فيه الزوج في أوج نشاطه .

حقيقة أحبذ الفرق بين الأزواج ولكن في حدود ..

ولكن دائما وأبدا في هذه الأمور لا توجد قاعدة واحدة تجمعها .. وهذه رحمة الله

فكل واحد يستطيع أن يحدد مدى راحته للطرف الآخر , وكل زيجة لها ظروفها

ibn_abdel_aziz يقول...

" لا نكاح بدون ولي يابن عبدالعزيز
ماتخليش ثقافة الفرنجة تبهت عليك
"
وعلي كدة يا اخ بيبو ابو حنيفة كان متأثر بالثقافة الغربية ؟
ما هو يري ان شرط الولي ليس بشرط لصحة عقد النكاح :)

لا غربية ولا شرقية

وعلي فكرة ايام زمان كان لما الولي يبلطج كان من حق البنت تشكوه للقاضي
في ايامنا دي محدش فاضي
الاب والام يدوسوا والمجتمع يسحق
وفيه ناس غلابة كثيرة مش عارفة تعمل ايه
بص يا سيدي
موضوع الولي ده مينفعش يتطبق بالمللي كدة وبالنص عمال علي بطال
اصل بصراحة انا مش شايف ناس كثير ف مصر يعرفوا معني العدالة والامانة والرحمة في مصر يعني فمتخيل ان الولي فيه نفس المشكلة بصراحة
يعني هو حييجي منين ؟

وبعدين انت عاوز تقوللي ان البكر اللي عندها عشر سنين اللي لسة عيلة زي البنت اللي عندها 25 او 30 سنة؟

مش كانوا بيجوزوا البنات في سن صغيرة جدا ايام زمان ؟ طب دول محتاجين اولياء
طب والناضجين البالغين العاقلين
محتاجين ولي بنفس الدرجة اللي علية عندها 10 - 13 سنة محتاجاه؟

المسألة مش كوبي وبيست من وجهة نظري
وفيه شروط ومسائل وتفاصيل كثيرة قوي قوي

وفي النهاية
احنا بنعاني من أزمة فهم للدين
وازمة تطبيق
وازمة نفسنة

فيعني بلاش نسلط نصوص واحكام فقهية علي رؤوس العباد كدة في وضع لا يوجد فيه من يوازن في الحقوق ولا يفهم النصوص

زي الراجل اللي يطلب زوجته للفراش
ولسة ضاربها علقة سخنة
ويقول ده حقي والملايكة تلعنك
وياتري حال الملايكة معاه ايه هو كمان وهو واخدها ماتش ملاكمة؟

صلوا عالنبي يا جماعة
لكل شئ مناطاته مش رزع بنصوص كدة

مروة الزارع يقول...

مدونتك رائعة ماشاء الله

سعيدة بإكتشافى ليها

.............

على فكرة الحب ميعرفش فرق سن

انا ممكن اتجوز عمو عزيز لو حبيتة بس

مش عشان يحقق احلامى

يارب تكونى فهمتينى

تحياتى ليكى

إيمان الحسيني يقول...

يا جماعة ربنا يكرمك ويعزكم جميعا

أنا مش عاملة الموضع علشان يقلب بخناقة
من حق كل واحد إنه يعرض وجهة نظره بس من غير ما يسفه من آراء الآخرين
والكلام مش مُوجه لشخص بعينه
الكلام مُوجه لكل زوار المدونة وإللي باعتبرهم أصحاب بيت

إيمان الحسيني يقول...

جزاك الله كل خير أخي الكريم وضاح
وزي ما قولنا إحنا مش عاوزين نحدد رأي واحد لإن المسألة بتختلف من شخصية لأخرى
وده إللي احنا عاوزين نحققه
ماحدش يفرض رأيه على التاني لمجرد إنه شاف تجربة مُشابهة وناجحة

إيمان الحسيني يقول...

منوراني يا مروة

وأنا حددت أسباب الزواج من الشخص الكبير في المدونة نفسها
لتحقيق الأحلام أو لكبر سن الفتاة
هل دي أسباب كافية علشان البنت توافق تتزوج برجل أكبر منها بـ 20 سنة ؟
ماجيتش ناحية الحب خالص :)

باب البحر يقول...
أزال أحد مشرفي المدونة هذا التعليق.
إيمان الحسيني يقول...

أخي الكريم باب البحر
جزاك الله خير الجزاء
رسالتك وصلت
وباعتذر عن نشرها وحذفها بعد كده
لإني عادة باقرأ اسم صاحب الرد وبانشر على أساس الاسم إذا كنت أعرفه ولا لأ
ولما قرأت الرد حذفته بناء على رغبتك مش علشان أنا شايفة إنه فيه حاجة تستحق الحذف

أنا لما بافتح النقاش في مواضيع زي دي بيبقى ليا سببين :
الأول : إني أفضفض عن إللي جوايا وإللي ماحدش قادر يسمعه أو يفهمه .
الثاني : إني أحاول أكون سبب في حل مشكلات كتيرة بتواجه البنات المسلمات بسبب المجتمع إللي احنا عايشين فيه والعادات والتقاليد إللي بتحكمه .

الجمال شيء نسبي جدا
والجمال الزائد عن اللزوم - في رأيي الشخصي - بيبقى لعنة على صاحبته وعلى مَن يتزوجها

نسأل الله العفو والعافية
وأن يسترنا فوق الأرض وتحت الأرض ويوم العرض عليه
اللهم آمين