الجمعة، فبراير 22، 2008

تطوير التعليم ... أم ... تحطيم التعليم ؟

السلام عليكم جميعا
طبعا إحنا بقالنا سنين كتيرة قوي بنسمع عن عملية تطوير التعليم في مصر علشان نبقى مواكبين لتطور الحياة العلمي والعملي في الدول التانية إللي بنعتبرها دول مُتقدمة
ده بقى منهج التيرم الثاني في مادة الرياضيات للصف الثاني الابتدائي :
الوحدة الأولى : جدول الضرب من (1) إلى (10) .
الوحدة الثانية : المحيط والأشكال والأنماط .
الوحدة الثالثة : الكسور كجزء من الشكل وكعدد .
الوحدة الرابعة : الساعة والدقيقة ووحدات الوزن والقياس والتقويم الهجري والميلادي .
الوحدة الخامسة : الإحصاء والتمثيل البياني .
طبعا في السن ده علشان الأطفال يحفظوا جدول الضرب بيضطروا - بأمر من المُدرِّسة - يكتبوا كل جدول 10 مرات ، والواجب بيبقى في حدود جدولين أو تلاتة في كل مرة
بنت أختي دلوقتي قاعدة تكتب جدول الضرب من (3) إلى (5) كل واحد 10 مرات !!!
ولما أختي ومجموعة من أولياء الأمور اشتكوا لقوا المدرسين بيقولوا : إن المنهج ده أصلا كان بينزل على سنة تالتة ورابعة وتم ضغطه علشان ينزل لأول مرة السنة دي لسنة تانية !!!! وهما نفسهم كمدرسين مش عارفين هيقدروا يوصلوا كَم المعلومات ده للأطفال إزاي .
يا ريت تسمعوا المحاضرة دي للشيخ وجدي غنيم : التضليل العلمي .

هناك 17 تعليقًا:

ض/خالد يقول...

نفس المشكلة بتقابلني مع اخويا في 2 ابتدائي

ولا تعليم ديني ولا اخلاقي ولا اي شئ...

وحسبنا الله
لكن بفضل الله-ان شاء الله-
هيفاجاءوا بجيل جديد بخلاف ما رسموا هم
ان شاء الله -تعالى-

(ليست تفاؤلات مبنية على أوهام..ولكن عن واقع معغايشة لكثير من الاطفال الصغار)
والحمد لله على كل حال

طـعـمـة يقول...

ربنا يكون في عون الجميع يا أخي الكريم
والله البنت بترجع من المدرسة تتغدا وتقعد تكتب في الواجبات بتاعتها لحد الساعة 11 بالليل
واجبات بس من غير مذاكرة أو مراجعة
مش عارفة هما ناويين يروحوا بينا لحد فين
والله المستعان

الطائر الحزين يقول...

مش عارف هناك نضوج فى الاطفال غير طبيعى يعنى ادراكهم للامور اكبر بكثير مما كنا عليه

يارب نقدر نستثمر هذه النقطة صح

اما التعليم فلا عزاء له عندى

تحياتى

الصارم الحاسم يقول...

بس فيه حاة

يمكن هما بينقلوا المناهج من سنة لسنة اقل يمكن عشان يدوهم حاجات متقدمة اكتر في النوات التي تليها

وده نوع من التطوير

لكن المشكلة في الواجبات

طـعـمـة يقول...

جزاك الله كل خير أخي الطائر الحزين
بس فيه فرق شاسع ما بين إن الأطفال دلوقتي ليهم اهتمامات بالكمبيوتر والنت والفيديو جيمز
ومابين إنك تجيبلهم منهج وتطلب منهم يذاكروه علشان يمتحنوا فيه ويبقوا عارفين إن مستقبلهم متوقف على الامتحان ده

في أمريكا مثلا لما بيلاقوا طفل سابق زمايله في الفصل الدراسي بيستأذنوا أهل الطفل إنهم يكبروه سنة دراسية لإن قدراته العقلية أكبر من السنة إللي هو فيها
لكن مش كل الأطفال بيتعمل معاهم كده طبعا

طـعـمـة يقول...

جزاك الله كل خير أخي الصارم الحاسم
بس فيه حاجة :)
في أمريكا مثلا - برضه - مش بيدرسوا لغة تاينة غير وهما في المدرسة الثانوية
يعني بيفضلوا 9 سنين يدرسوا لغتهم الأم فقط
عندنا الطفل بيدرس لغة تانية من أول حضانة
ده غير إنهم في نهايةمرحلة التعليم الأساسي (9 سنين) بيعملوا اختبار لكل الأطفال علشان يعرفوا توجهات كل طفل وقدراته ويبدأوا يمهدوله للدراسة المناسبة ليه من المرحلة الثانوية

آخر العنقود يقول...

اااااااااااااااااه
بقت فعلا مشكلة
ده دلوقتى اللى المرحلة اللى قبل الkgبقى ليها منهج تخيلى.زعربى وانجليزى
مش عارفة ساعات بحس انه صح
وساعات بقول فعلا نعلمهم بس نهتم بالكيف قبل الكم
رفقا بيهم

الله المستعان أخيتى
تحياتى ليكى
تقبلى مرورى

طـعـمـة يقول...

منوراني يا آخر العنقود
المشكلة الحقيقية : هل أطفالنا عندهم المقدرة على تحمل الكم ده ؟
وهل هما فعلا بيستفيدوا منه ؟
ولا كالعادة بنحفظ علشان نمتحن وننجح وناخد شهادة نعلقها في الصالون ؟
الله المستعان

Jana يقول...

سبحان الله أول مرة ازور مدونتك الجميلة...الاقيكى كاتبة التدوينة وكأنها عشانى
انا باكتب الكومنت وابنى قاعد جنبى يكتب فى تيبل 9 للمرة الثالثة
اه والله وصلوا للتسعة
تخيلى أطفال فى السن ده يجيلهم اكتئاب حاد واحباط تعليمى..اخاف ان يصبح مزمن...
لكنى عموما مقتنعة ان نجاحهم فى الحياة يتوقف على شخصياتهم..وليس على مراكزهم فيما بعد...يعنى ممكن يطلع دكتور ومعقد نفسيا...عشان كده باحاول ماضغطش عليه "لا يكلف الله نفسا الا وسعها"
تربية النفس والشخصية أهم من درجات امتحان آخر العام
تشرفت بزيارة مدونتك الرائعة

تحياتى

طـعـمـة يقول...

سبحان الله
أومال لو سمعتي بنت أختي بتقول لأختي إيه :
انتوا بتعذبوا فيا كده ليه ؟
حرام عليكم نفسي أخرج وأتفسح وألعب ؟
والكارثة الكبرى لما تشوف أختها إللي أصغر منها قاعدة بتلعب أو بتتفرج على كارتون
الله المستعان

نورتيني يا جانا وشرفتي مدونتي المتواضعة
:)

منة عماد يقول...

فكرتيني يا إيمان بأيام تانية أبتدائي لما كنا بناخد جدول الضرب وياما أضربت واتزنبت علشان ماكاتبتوش عشر مرات ودلوقتي أنا مش حافظة غير جدول خمسة واتنين لأنهم أسهل جدولين أما باقي الجداول فامابفتكرش غير شوية منهم بحس ساعات إني أتعقدت من كلمة جدول الضرب وكل ماتيجي سرته بحس بضيق جامد جدا. والحمد لله دخلت أدبي في ثانوية عامة رغم ان مدرس الرياضة كان بيقولي أن مخك نضيف في الرياضة وأنا مش عايزة أقوله أني مش حافظة جدول الضرب

ربنا يسامح اللى كان السبب

الصارم الحاسم يقول...

من ناحية اللغة التانية

فبما ان الدراسة حتى الان لم يتم تعريبها - المواد العلمية - يبقى مهم فعلا اللغة التاية

بل لغة تالتة ورابعة كمان للدعوة

لكن المشكلة كما ذكرتي في طريقة التعليم

وطريقة المتحان

وطريقة اكتشاف القدرات

هما - النظام بتاعنا - بيحاول يعوض ده بالكم

فبتلوص الحكاية والاطفال هم الضحايا

طـعـمـة يقول...

والله يامنة أنا باحمد ربنا كل يوم إني أمضيت الـ 6 سنين الأولى من تعليمي في دولة الكويت
صراحة ربنا كرمني فعلا بالموضوع ده لإني اتأسست صح هناك في كل المواد

منوراني :)

طـعـمـة يقول...

عامة يا أخي الكريم الصارم الحاسم موضوع تطوير التعليم في مصر
أو الحياة في مصر بوجه عام بتفكرني بسمير غانم في مسرحية المتزوجون :
لميت البنطلون الجاكيتة ضربت
:D

الصارم الحاسم يقول...

:))))

eldoctor يقول...

تعرفى انى خايف من التعليم فى مصر .. على ابنى لما ينزل ..
المدرسة هنا مختلفة .. يعنى كفاية تلاجتماع الشهرى .. المدرسة بتاعته بنقابلها كل شهر .. و نقعد نناقش معاها كل صغيرة و كبيرة .. الخط .. اسلوبه فى الفصل .. ملاحظتها عليه و ملاحظتنا احنا عليها .. و نمشى كده لحد ما نتفق على ايه اللى يتعمل ..
على ايامى انا مكانش كده .. (كان المدرسين عارفين اهالينا بالاسم ) فكانت المعلومة بتوصل بطريق تانى ,, دلوقت ده موجود فى مصر ؟؟ لا اظن .. كله حشو .. و سباق علشان مجتميع 200% و 500% علشان يحشروهم فى كليات لا تعلم شيئا .ز
دفعتى عند التخرج كانت 560 طبيب .. دلوقت الدفعة 2200 .. و لم يتم تغيير اى شىء فى اماكن التعليم و لا اسلوب التعليم .. تفتكروا فيها فايدة؟؟؟؟؟

طـعـمـة يقول...

والله يا دكتور احنا كمان اتصدمنا بالتعليم هنا لإننا - أنا وأخواتي - درسنا في الكويت فترة من حياتنا وأخويا واخد الثانوية العامة من هناك
بس برضه لما درست أنا وأختي في مدارس مصر ماكانش الوضع بالسوء ده لسه
دلوقتي مش عارفين نعمل إيه مع بنت أختي
لا عارفين نشرحلها ولا نفهمها
ولما آجي أشرحلها مسألة حساب جات إزاي تقولي : هي الميس قالت نحلها كده !!!
الله المستعان