الجمعة، مارس 07، 2008

خسارة الدنيا والآخرة

السلام عليكم جميعا
إمبارح كنت في مشوار وأخدت تاكسي علشان أروّح بيه
سواق التاكسي رجل في الأربعينات من عمره تقريبا
واحنا ماشيين بالعربية واحد وقفه وسأله عن إنه يوصله لمنطقة شعبية نوعا ما
السواق جري بالتاكسي ورفض وقال : حد برضه يسكن في .... ؟
فسألته باستغراب وكإن موضوع السكن بقى اختياري جدا في الوقت الحالي : أومال هيروحوا فين يعني ؟!!!!
قال : يروحوا مصر الجديدة ولا مدينة نصر .
عرفت إنه بيتريق فرديت عليه : إللي معاه بقى .
قاللي : أيوااااااااااا ... إللي معاه .
وبعدها فتح ماسورة دُعا على أخينا إياه بسبب سوء حالة البلد والاقتصاد والعيشة إللي مش عارفين نعيشها دي
حاولت أهون عليه بالرغم من تشابه الحالة النفسية وقلتله : ربنا اسمه العدل وأكيد هينتقم منه .
فوجئت برده : ينتقم لمين ولا لمين ؟ ولا هينتقم للي ماتوا كمان ؟ ... طب إزاي هينتقم منه ؟
الرجل للأسف بقى عنده شك في إمكانية انتقام الله من الظالم
وكمّل كلامه وهو بيقول : ده احنا كل ما نقول " حسبنا الله ونعم الوكيل " نلاقي عمره طال أكتر ومصايبه زادت على دماغتنا !!!!
التزمت الصمت .... لإني الصراحة ماعرفتش أرد عليه
ملخص الموضوع إننا بدأنا نوصل لمرحلة زعزعة العقيدة
مش على مستوى المسلمين بس ... ده كمان على مستوى المسيحيين
لينا جارة مسيحية ... توفي ليها ابن وبنت وتبقى ابن واحد بس مَن الله عليه بالزواج وإنجاب طفلين صغيرين
في يوم كانت واقفة في البلكونة وبترغي مع ماما عن أحوال البلد والأسعار وحاكتلها عن إن حماة ابنها بتلح عليهم علشان ينجبوا بنت مع الولدين
وجارتنا بتقولها : لأ كفاية الولدين انتي مش شايفة حال البلد عامل إزاي !!!
حماة ابنها قالتلها : ربنا ما بينساش حد .
فوجئت بالجارة بتحكي لماما وبتقولها إنها رديت عليها وقالت : لأ بينسى .
نستغفر الله العظيم من كل إثم
ونسأل الله أن يرزقنا الثبات
اللهم آمين

هناك 16 تعليقًا:

وطني يقول...

ليس هناك تعليق أشمل و لا أكمل من الآية التي تضعينها فوق هذا التعليق
" يَوْمَ تَشْهَدُ عَلَيْهِمْ أَلْسِنَتُهُمْ وَأَيْدِيهِمْ وَأَرْجُلُهُم بِمَا كَانُوا يَعْمَلُونَ " صدق الله العظيم

ام البنات يقول...

ماهو يا ست البنات ..لما الظلم يشتد...قوى الناس اللى معندهاش إيمان بتشت..بس برضه سينزع الملك منهم
تصورى كنت بتفرج على برنامج مش عاره المرأة ومامتهم عماله تتكلم بالانجلش وانها وانهم هيعملوا للمرأة وهيحاولوا ينقص الفقر اقصد يقللوه
يعنى بدل ما الست الفقيرة ما تجيب 10 ارغف عيش هتجيب 10ونص
والمذيعه اللطيفه..اللى بتلبس من برة
وهى بتقول..فى برنامجها السمج
مصر بتتحرك بينا,,,,
هى مش عارفه ان مصر الآن واقف على كتله من الانزلاقات الطينيه
علشان كده بتتحرك

مفجأة جابها لى ابو البنات...تصورى لسه
والله العظيم شفته بعينى وأكلت منه
فى لسه رغيف ب5 قروش ..موجود ومحترم كمان تصورى انه فى دقيق اكتر من ابو 25 قرش اذا كان عاجبكم..ده رد صاحب الفرن

حـريــة الــفـكــر والابــداع يقول...

متى ياتى اليوم التى تشرق فية شمس الحرية ارض بلادى
المشكلة ليست فى عمرة المشكلة ان الشعب لا يريد التغير - لا اقول هيا لنذهب ونقاتل - مستحيل - لاننا كلنا اولا واخرا بشريون ولكن حينما اراد الارجينتينيون التغير فعلوا- صحيح ان المختفين منهم كان اكثر من 35 الف مختفى الا ان المتظاهرين وصولا لمبتغاهم لن يكون هناك عدل ولا خير الا بارادة - تكون نابعة من قلوب الجميع - مسلمين - مسيحين - وكل الحزبين
تحياتى

رفقة عمر يقول...

لاحول ولا قوة الابالله
نعوذ بالله من مضللات الفتن
الرسول صلى الله عليه وسلم كان بيستعيذ من الكفر والفقر والحق الاتنين ببعض
لان الفقر والقهر يولد الكفر والعياذ بالله الا من رحم ربى
اللهم ان اردت بقوما فتنه فاقبضنا اليك غير مفتونين اللهم امين يارب العالمين

الطائر الحزين يقول...

ونبلوكم بالشر والخير فتنة

اللهم يا مقلب القلوب ثبت قلبى على دينك


تحياتى

الطائر الحزين يقول...

ونبلوكم بالشر والخير فتنة

اللهم يا مقلب القلوب ثبت قلبى على دينك


تحياتى

inksarat يقول...

انا كنت راكب مع سواق ميكروباس والموضوع اتفتح والاسعار والدنيا والعيشه والبنزين ... ففاجأنى الرجل باسلوب كلامه وتحليله بل وابهرنى بعض الشىء
قال ... والله مااحنا عارفين ان كان اللى احنا فيه بلاء ولا ابتلاء ثم استكمل ابتلاء من ربنا بيمحصنا بيه ولا بلاء من اعمالنا السودة
وجدتنى قد لازمت الصمت وكنت قد لاحظت انه قد افرغ من سيجارته
ـــ

MB يقول...

la 7awl wala kowat ella b ALLAH

حطم القيود يقول...

حسبنا الله

سوء الحال بيعمى الناس ويضلهم -بس مش كلهم طبعا -...عشان كده مقولة"لو كان الفقر رجلا لقتلته"...شايفاها صحيحه تماما

ربنا يرفع عنا الغلاء والظلم ويصلح حالنا

تقبلى تحياتى

حطم القيود يقول...

حسبنا الله

صدق من قال " لو كان الفقر رجلا لقتلته"

سوء الحال بيضل ويعمى الناس...وقد يؤدى الفقر للكفر

رفع الله عنا الغلاء واصلح حالنا كله

جزيتم الجنه...تحياتى ،،،

semsem يقول...

لا الله الا الله

ان لم يكن الله لن فمن يكون
ان لم ينتقم لنا الجبار يوم العدل
فمن ينتقم

الناس دى مشكلتها انها مش فاهمه ان لسه فى حياه تانيه واخرة وحساب
وان كان الله يمهل فى الدنيا
فلن ينسانا يوم الموقف العظيم

يوم لا تظلم نفس شيئا

واشهد ا الله لا الله الا هو الحى القيوم العدل الحق الوكيل

monaliza يقول...

لعلها فتنة لنا جميعا نسأل الله الثبات

يا مراكبي يقول...

أستغفر الله العظيم

لا يوجد مبرر ولا ضغط يدفع الإنسان لأن يشكك في قدرة الله عز وجل ولا في عدله وحكمته سبحانه وما وراء إختباراته للبشر

اللهم ثبت إيماننا

eldoctor يقول...

ان الله ليمهل للظالم .. فاذا اخذه لم يفلته ..

وضـّاح يقول...

بدأ أحد أصدقائي دروس في العقيدة في مسجدنا بعد صلاة الفجر .. في البداية اعترضت .. أردت أن يتكلم في موضوع آخر

ولكن في الحقيقة .. نحن في زمن فتنة .. وياليتها فتنة مأكل أو مشرب ولكنها فتنة عقيدة .. أرجو أن ينجينا الله منها ويخرجنا من هذه الدنيا عقيدتنا التوحيد

أنا إنسان يقول...

الجوع كافر