الخميس، أبريل 03، 2008

نظرية التعميم

* البنت دي لسه ماتجوزتش : أكيد وحشة يا إما أهلها بيغالوا في طلباتهم .

* الراجل ده لسه ماتجوزش : أكيد بخيل جدا يا إما مالهوش في الجواز .

* ده من (أسيوط – المنوفية – دمياط) : يعني بخيل إيحه .

* ده اسكندراني : ميه مالحة ووشوش كالحة .

* ده قصير : يبقى لئيم ومش سهل .

* ده فلاح : جينا بقى لكُهن الفلاحين .

* الراجل ده طلق مراته : تبقى أكيد نِكدية ... تستاهل .

* الراجل ده اتجوز على مراته : تبقى يا إما نِكدية يا إما عيانة ومش قادرة تلبي طلباته وطلبات البيت ... وده من حقه .

* الست دي خلعت زوجها : تبقى قليلة الأصل ومش صاينة للعِشرة ... ده لو عضم في قُفة لازم تفضل جنبه .

حد عنده تعميمات تانية نضمها لليستة إللي جايبانا ورا دي ؟

هناك 9 تعليقات:

ma 3lina يقول...

مع حضرتك إن كتير من التعميم غلط .. خصوصا تلك التعميمات التي تفضلتي بذكرها فهي غير صحيحة بالمرة ..

بس عايز اتكلم في نقطة لو تسمحي لي أظن لازم ناخد بالنا منهم ..

وهي إذا كان الاستثناء من التعميم أقل من أن يذكر فمفيش حرج من التعميم .. زي ما ربنا سبحانه وتعالى قال زين للناس حب الشهوات .. مع علمنا بدخول الأنبياء والصالحين والزهاد في كلمة الناس .. ومثال ذلك لو قلت كل الناس تخشى من الأسد .. مش صح إن واحد يقول لي ما تعممش لأن مربي الأسود في السيرك لا يخافها .. لأن الفئة محدودة والتعميم خرج مخرج الغالب على حال الناس

ومثال دا كتير .. والخلاصة لو تسمح لي بإبداء رأيي إن مش مطلق التعميم غلط خصوصا لما يكون الدلائل لا تشير لخلافه .. والاستثناء قليل

ما ذكرتيه من امثلة فعلاً بيجبنا ورا .. وفيه زيه كتير

بكرر اعتذاري واسفي

:)

موناليزا يقول...

صحيح الحسنة بتخص والسيئة بتعم
بس ليه لما الرجل بيكون مطلق بيبقى عريس لقطة ومايترفضش رغم ان اكيد مراته هى اللى طفشت وزهقت منه والمطلقة بيبقى فيها كلام كتير ده لو اتجوزت اصلا
انا شايفة ان اى تعميم فيه ظلم على اى حد
وفيه مثل بيقول تعرف فلان قال اه قاله عاشرته قاله لا قاله يبقى متعرفوش

اسكندراني اوي يقول...

ههههههههههه
طب ولما هيا ميه مالحه ووشوش كالحه بيجو يقرفونا فيها ليه
ويغلو علينا حتى الهوى
ههههههههههههه

إيمان الحسيني يقول...

طبعا باعتذر بشدة لكل الأخوة والأخوات إللي انطبقت حالتهم على أحد النقاط إللي ذكرتها
بس كنت عاوزة أوضح مش أكتر إن التعميم خطأ كبير بنقع فيه كلنا
وفي أحيان كتيرة جدا بنروجله كمان ونسعى لنشره
والله المستعان

abderrahman يقول...

معاكي حق بقى من الصعب انه الواحد يتعامل مع الناس دلوقت خارج هذه التعميمات
من ضمن التعميمات دي اللي بتبقى متصلة بمهنة معينة
والظاهر انه الواحد ساعات بيلجأ للتعميمات كمان لما بيبقى محبط

محمد يقول...

أتفق مع رأيك ورأي "ما علينا"

ولكن أقول ان أكثر التعميمات لدى الناس لدينا من النوع الذي ذكرتيه

هدانا الله وإياهم

الطائر الحزين يقول...

معك حق


لكن فى التعامل مع البشرية والامور التى تتعلق بالسلوك لا يحق بها التعميم

نحن لا نتحدث عن بديهيات مثل الخوف من الاسد أو ما شابة


نحن نتحدث عن الحكم على الناس

فاهم صح؟؟؟؟


تحياتى

محمد عبد الغفار يقول...

الراجل ده بيخش على النت من الشغل يبقى مبيشتغلش

شهيدة يقول...

الاشكاليه ليست في التعميمات بحد ذاتها

المشكله فيمن يصدقها ويسير عليها مسلما بها