الأحد، أبريل 06، 2008

أبسط صور الخروج على الجماعة

الصبح لما بانزل أروح شغلي باضطر أعدي شارع جسر السويس علشان أوصل لميدان الألف مسكن
طبعا في الوقت ده من الصبح بتبقى الدنيا زحمة جدا والشارع ماينفعش يتعدى أصلا
نقوم نعمل إيه ؟
نجمع نفسنا كعدد ونقف جنب بعض صف دون سابق معرفة أو اتفاق مجرد تصرف تلقائي اتعود عليه كل شخص بيعدي شارع جسر السويس الصبح
وفي لحظة مناسبة بنعدي كلنا مع بعض وبنجبر العربيات إنها تهدي علشان إحنا نعدي
في لحظة التعدية دي ممكن حد مننا يسبقنا كلنا ويقدم خطوة ويتراجع فيها
المشكلة بقى في إللي بيقلده كرد فعل تلقائي بدون ما يقصد
بيفضل واقف مكانه وبيبقى مش عارف يستمر في التعدية ولا يرجع تاني يقف معانا
لحظة من الوقت خطيرة جدا ممكن تضيع فيها روح بني آدم
لمجرد إن واحد خرج عن الجماعة إللي واقفة وأخد خطوة لقدام ورجع فيها !!!

هناك 23 تعليقًا:

Jana يقول...

اى مجموعة لازم يكون لها ليدر والا تبعثرت ولم تعد مجموعة ...وتشكيل هذه المجموعة اوتوماتيكيا لمرور الطريق فى هذا الوقت القصير جدا ..يتطلب تحديد قائد لها فى وقت اقصر ...وبشكل اوتوماتيكى ايضا ..ويعتمد على الحدس
يعنى انتوا وحظكم بقا
واحمدى ربنا ان عندكم ثوان لاختيار القائد ..
الاختيار مبقاش متاح عندنا دلوقت فى حياتنا بشكل عام
:)
وانتى اخبارك ايه ؟؟

إيمان الحسيني يقول...

عادة الليدر بيكون أول واحد واقف في مواجهة العربيات مباشرة
بس فيه ناس بتبقى مستعجلة فابتكسر الصف
والحمد لله إنها لحد دلوقتي بتعدي على خير

أنا الحمد لله بخير يا جنى
ربنا يسمعنا عنك كل خير
:)

Lasto-adri *Blue* يقول...

بس يا ايمان.. فى أوقات بيكون واجب على الفرد الخروج على الجماعة.. والا يكون آثم

لو إن الجماعة راضية بحكم فاسد.. تفتكرى مش واجب عليكى قول الحق فى وجه سلطان جائر؟
لو إن الجماعة فضلت قاعدة الى ما لا نهاية مستنية الشارع يفضى ومابتعديش
مش واجب عليكى كفرد الخروج عن الجماعة عشان تعدى بنفسك؟

محمد عبد الغفار يقول...

القائد ممكن يكون حده الهدف ومش شرط يكون شخص

هى كده هتفضل تعدى على خير لحد متيجى الطوبه فى المعطوبه ولن يتغير اى شئ نتيجه لذلك

إيمان الحسيني يقول...

lasto-adri*blue*
كلامك سليم طبعا
بس أنا باتكلم على الجماعة إللي حددت لنفسها هدف واحد واتفقت عليه
وحددت شخص بعينه - ضمنيا - علشان يكون الليدر
خروج واحد من نص الصف بيعرض إللي بعده للخطر لإن ممكن واحد منهم يتصرف بشكل تلقائي بدون تفكير
وفي النهاية يلاقي نفسه لوحده في نص الشارع ومرتبك
مش عارف إذا كان يرجع للصف ولا يكمل تعدية

إيمان الحسيني يقول...

هو الهدف واحد يا محمد
بس طبيعي إننيا لما بنقف جنب بعض بتفضل عنينا على أول واحد بيواجه العربيات علشان نمشي على مشيته
المشكلة بتحصل لما واحد يستعجل وياخد خطوة لقدام بعدين يرجع في كلامه
ربنا يسترها مع الجميع

Lasto-adri *Blue* يقول...

ممكن أسألك إن كنتى بتتكلمى عن الجماعة فى العموم؟ ولا تقصدى بها رمز بعينه

لو فى العموم فأتفق معاكى بكل ما أملك
إنما لو بتتكلمى عن الرمز اللى فى دماغى.. يبقى ممكن أسألك سؤال.. بس هل أنا قدرت أحدد هذا الفرد وعلى أساسه لازم أكمل وراه؟ وهل هو فعلا فى هدف معروف ممكن أصدقه؟

صيد الخاطر يقول...

تمثيل رائع ومنطبق على الواقع يااستاذة
جزاكم اللهخيرا
والله فلا الامر زي ما قلتي بالظيط

إيمان الحسيني يقول...

Lasto-adri *Blue*
أحب بس أوضح نقطة مهمة
أنا مش منتمية لأي جماعة
لا إخوان ولا سلف ولا تبليغ
أنا مسلمة بأقول لا إله إلا الله محمد رسول الله ... وكفى

أنا في الأساس باتكلم عن جماعة المسلمين وباضرب مثل بالنموذج المصغر ده
وجماعة المسلمين قال عنهم رسول الله (صلى الله عليه وسلم) : لا تجتمع هذه الأمة – أو قال : أمة محمد – على ضلالة ، ويد الله على الجماعة ، ومن شذ شذ في النار ... إسناده صحيح

وطبعا المثال بينطبق على أي جماعة اجتمعت على أمر صحيح
أي حد هيشذ عنها غالبا هيسبب ضرر للجماعة كلها أو لأحد أفرادها على الأقل

إيمان الحسيني يقول...

جزاك الله خير الجزاء أخي صيد الخاطر
وأسأل الله أن يُرينا الحق حقا وأن يرزقنا اتباعه
وأن يُرينا الباطل باطلا وأن يرزقنا اجتنابه
اللهم آمين

dr. Ahmed Sakr يقول...

ما شاء الله

بصراحة فكرتك ممتازه أنك تعبرى عن الرأى السليم ومن شذ عن الجماعة بالفعل سيجد نفسه واحداً منفرداً والواحد لو عاش لوحده عمره ما هيحس بقيمة نفسه ولكن ما بيكون ليه مكان إلا لو كان فعلاً فى وسط ناس يحبهم ويحبوه ويعمل بفكرهم ومنهجهم

أحييك أختى على أسلوبك الراقى

Lasto-adri *Blue* يقول...

:)

حصل سوء فهم.. وعلى أى حال فكلامك صحيح على "الجماعة" بمعناها الأعم.. ولا أقصد به لا إخوان ولا غيرهم

:) :)

إيمان الحسيني يقول...

الحشري
جزاك الله كل خير
ونورت مدونتي


lasto-adri*blue*
حصل خير
:)
وأرجو إن فكرتي تكون وصلت

اسكندراني اوي يقول...

سيدتي رغم بساطة المثل الا انه يعني الكثيييير
الخروج على الجماعه قد يؤدي الى الهلاك

والتجمع برضه بيؤدي بالحتميه الى النجاح
اظن فكرتي وصلت

لكي كل التحيه

إيمان الحسيني يقول...

جزاك الله كل خير يا إسكندراني
لخصت الفكرة كلها في جملتين حلوين قوي
ربنا يكرمك ويعزك

امنية يقول...

طعمة
والله وحشتينى..
خلينا نشوفك

:)

Ahmed يقول...

السلام عليكم ورحمه الله وبركاته

مش عاوز اكرر كلام انا قلته قبل كده ان مدونتك مدونه رائعه وجميله وتحمل صاحبتها فكر جميل لان ده اقل مما يجب ذكره

انا هقولك ياما عديت الشارع ده بالذات من نفس النقطه بالضبط عشان المدرسه والجامعه والشغل بس عمري ما فكرت اني بنتمي الي جماعه وانا بعدي

انا ليه بقول الكلام ده عشان اقرب لحضرتك اني عايش نفس الواقع عشان كلامي هيحمل رؤيه تانيه لموضوع
....
انا هسال حضرتك سؤل كام مره كنتي قائده لهذاالجمع, ليه بسال لان قرار موصله السير لن تكون في يدكي بل تجبركي السيارات علي تسريع او تبطيء الحركه او الوقوف تماما اي انها حركه عشوائيه غير مخططه وغير منظمه المقصود ان حتي وانت قائد لست انت سيد قرارك في هذا الوقت لانك توجه الخطر لوحدك ولا يوجد من يدعمك من يمينك او يسارك لان لا يوجد صف موحد ترتكز عليه وذلك لانك اصبحت قائد ولم تغرز مبدا احترام قرار الجماعه وعدم الخروج عنها فاصبحت قائد علي صفوف غير منظمه مثل صفوف الجيش مثلا
انما اقصد بكل كلامي انه اذا شت احدنا اذا اعتبرت اننا في جماعه فلا يستحق اي لوم
لان في هذا الوقت كل منا هو مسؤل عن نفسه ولوا اردنا ان نقيم جماعه تجبر من حولنا علي احترامنا فيجب توحيد الافكار والمباديء ومن هنا نصبح علي مستوي موجه المواقف بقلب واحد تحت رايه واحد يحملها قائد واحد ومن حينه نصبح قدرين علي معاقبه كل من يشت عن الوحده

ولكني اعلم انكي قصدتي في هذا البوست ان تحت رايه الجماعه تكون اقدر علي موجه الاخطار ولكني أسفا لم اري هذا المثل من هذا البعد
واخيرًَاَ
راي صحيح يحتمل الخطأ ورأي خطأ يحتمل الصواب
و جزاكي الله عنا خيرا
ووفق اولي الامر منا علي توحيد مبدا يستند عليها الامه الاسلاميه وهو الحكم بكتاب الله وسنه سيدنا محمد صلي الله عليه وسلم.

إيمان الحسيني يقول...

منوراني يا أمنية
:)
واحشيني كلكم والله
ربنا ييسر الأمور لينا جميعا
اللهم آمين

إيمان الحسيني يقول...

وعليكم السلام ورحمة الله وبركاته أخي الرجل الخفي
جزاك كل خير
ووجهة نظرك طبعا تستحق الاحترام
وأكيد هيبقى فيه اغختلافات في الآراء ما بين الأفراد
بس فيه أوقات كتيرة القائد بيجبر العربيات إنها تبطيء بمجرد ما ياخد أول خطوة لإننا بنمشي جنبه على طول
وفي أحيان تانية بتحصل حالة شذوذ الفرد إللي ضربتها أنا كمثال ممكن يسبب الأذى لأحد أفراد الصف ده

غالبا أنا باتحاشى إني أكون قائد للصف ده لإني عارفة إن رجلي ممكن تخوني في لحظة التعدية

ربنا يسترها مع الجميع
اللهم آمين

يا مراكبي يقول...

تشبيه رائع جدا .. فعلا الخروج عن الجماعة بيكون فيه خطورة رهيبة على الفرد .. وعلى الجماعة كمان

أحييكي على التشبية الرائع ده

إيمان الحسيني يقول...

جزاك الله كل خير يا مراكبي
:)

محمود بهجت يقول...

كادر فى منتهى الرووووووووووووووووعة

إيمان الحسيني يقول...

رينا يكرمك ويعزك يا باشمهندس
:)