الأحد، أبريل 13، 2008

hurt people … hurt people



إمبارح كنت باتفرج على أوبرا وينفري Oprah على قناة mbc4
وكانت مستضيفة الممثل الكوميدي بيل كوسبي
يمكن إللي من سني يفتكروه في مسلسله الشهير Cosby Show
موضوع الحلقة كان شيق جدا لإنهم كانوا بيتكلموا عن الاضطهاد العنصري للأقليات في أمريكا وعلى رأس الأقليات دي الأمريكيين إللي من أصل أفريقي (الأفرو أمريكان)
وكان سبب استضافة الممثل بيل كوسبي هو إنه تعرض للانتقاد من بني جنسه من السود لإنه هاجمهم بشدة في أكتر من مناسبة
وكان سبب الهجوم هو : إنه شايف إن الأفرو أمريكان بقوا بيستسهلوا التحجج بالعنصرية إذا ما أخطأ أي حد فيهم بدل ما يحاولوا إيجاد فرص حياة أفضل لأنفسهم وفرض وجودهم على المجتمع الأمريكي بشكل صحيح
وقام بيل كوسبي وصديق ليه بإصدار كتاب يناقش فيه القضية دي ويطلب فيه من الأقلية السوداء إنها تبدأ تبحث عن الطرق الصحيحة لإثبات وجودها
واستضافوا شخصيات مروا بتجارب سيئة جدا ولولا وجود الأهل والأصحاب حواليهم كانت هتبقى نهايتهم زي إللي تسببوا في أذيتهم بالضبط
يا إما تجار مخدرات أو السجن أو ممارسة الرذيلة كمهنة
لإن الشخص إللي تعرض للأذى بيكون في البداية حزين وإذا مالقاش حد يقف جنبه ويحاول يجيبله حقه أو يهوّن عليه الأمر هيتحول الحزن ده داخله لغضب يعمي بصره ويقرر إنه يئذي الغير زي ما هو اتأذى
من الجمل الجميلة جدا إللي استوقفتني خلال الحلقة عنوان التدوينة :
hurt people ...hurt people
" الأشخاص الذين تعرضوا للأذي ... يؤذون الآخرين "
وجملة أخرى بتقول : " ليس المهم ما يفعله الناس بك .. بل المهم ما الذي لم تفعله أنت ؟ "
بالنسبة ليا أنا كـ(إيمان) حسيت بالجملتين دول فعلا
حسيت يعني إيه الواحد يحاول إنه يكون إنسان مفيد ومُلتزم بالرغم من إن مافيش حد يسانده
غالبا الشخص إللي بيحاول يكون كويس بدون ما يلاقي مُساندة من حد بيفشل
حتى الرسل والأنبياء لما ربنا أرسلهم جعلّهم فئة تؤمن بيهم علشان يساعدوهم في إيصال الرسالة
حتى لو كانت الفئة دي مجرد أهل بيته أو بناته الاتنين بس !!!
مافيش إنسان يقدر يواجه مشكلة لوحده ... ده رأيي الشخصي
ولما الكل يتخلى عني وأنا بألجأ ليهم علشان يساعدوني ... يبقى هما بيحكموا عليا إني أكون فرد فاسد في المجتمع
ووقتها هالاقي أفراد المجتمع إللي أنا طلبت مساعدتهم قبل كده واقفين علشان يحاكموني بذنب هما إللي ارتكبوه في الأصل
بس المهم إني أكون حاولت فعلا أوصل صوتي للناس دي علشان يساعدوني ومانتظرش إن حد يجي يسألني عن أحوالي
لازم أنا إللي آخد بزمام المباردة وأوصل صوتي للمجتمع ككل .

هناك 7 تعليقات:

الطائر الحزين يقول...

واللى مبيعرفش يحكى ويفضفض يعمل ايه

إيمان الحسيني يقول...

على الأقل ده ليه عذره
أعرف ناس فضفضت مع أمة لا إله إلا الله
وبالرغم من إن الكل قال إن فيه مشكلة فعلا
لكن للأسف ماحدش مد إيده بالمساعدة
الله المستعان

محمد عبد الغفار يقول...

زمام المبادرة

هو ده مربط الفرس

إيمان الحسيني يقول...

زمام المبادرة بقى أسهل حاجة دلوقتي يا محمد
المشكلة الأساسية بقيت إنك تلاقي حد يساعدك أو حتى يسمعك
والكلمة الشائعة : وأنا مالي ؟!!!

محمد يقول...

السلام عليكم
يا أخت ايمان .. أنا عاوز أكلمك لأمر ضروري شوي .. لو ممكن ؟

إيمان الحسيني يقول...

إيميلي موجود في البروفايل بتاعي يا أخ محمد
تقدر تراسلني عليه

eman-faith@maktoob.com

إيمان الحسيني يقول...

عفوا نسيت أرد السلام
وعليكم السلام ورحمة الله وبركاته