الخميس، أكتوبر 16، 2008

تعالي يا بنتي أفتحلك المصحف !!!

العنوان غريب جدا طبعا
لإننا غالبا بنسمع مصطلح : نفتح الكوتشينة أو المندل
لكن فتح المصحف ... جديدة وغريبة فعلا
من كام يوم فوجئت بإنسانة كنت باعتبرها في يوم من الأيام أخت ليا بتتصل بيا وتقولي إنها اتكلمت مع ست كبيرة بتعالج بالقرآن .....
غ : أيوة يا إيمان أنا لقيت ست طيبة وكبيرة وبتعالج بالقرآن .
أنا : أيوة طب أنا مالي ؟!!!
غ : مش يمكن معمولك حاجة بوقف الحال ... هي مش بتعمل حاجة غير إنها بتقرا قرآن ومش هاتخسري حاجة .
أنا : طب لو سمحتي يا غ ماتجيش غير لما أديكي الأوكيه ... ماشي ؟
غ : ماشي خلاص هاتنسى منك تليفون .
وفوجئت بيها في نفس اليوم الساعة 7 بالليل جايه وجايبة معاها الست إياها
طبعا رحبت بيهم أنا وماما ودخلناهم البيت
الست قعدت تتكلم عن نفسها وإنها عملت عمرة وحجيت وبدأ العجب العجاب أول ما قالت : وأنا في المدينة المصحف اتفتحلي !!!
أنا : المصحف اتفتح ؟ إزاي يعني أنا أول مرة أسمع الموضوع ده !!!
هي : لأ إزاي ده الشيخ الشعراوي اتفتحله المصحف في المدينة برضه .
أنا : الشيخ الشعراوي دلوقتي الله يرحمه خلينا في حضرتك .
استأذنت الست علشان تتوضى
بصيت لصديقتي وسألتها بعصبية : هو المصحف دلوقتي بيتفتح يا غ ؟ كلام ربنا دلوقتي بقى زي الكوتشينة والمندل ؟
ابتسمت وقاليتلي : مش هاتخسري حاجة ولو معمولك سحر المفروض تفكيه بسحر زيه مش حرام .
أنا : إزاي مش حرام ؟ إذا كان التعامل مع الجن على إطلاقه حرام وده مش كلامي ده كلام علماء موثوق فيهم ؟ والرسول قال : تداوا ولا تتداوا بحرام .
غ : مش برضوا بيقولوا فداوني بالتي كانت هي الداء ؟
أنا : يعني أسيب حديث الرسول علشان خاطر بيت شعر ؟!!!!!
غ : لأ ده مش شعر ده في الشرع !!!
أنا : شرع مين ؟ أنا جيبتلك حديث صحيح ، هاتيلي انتي بقى آية أو حديث يثبتوا بيت الشعر إللي انتي بتقوليه ده !!!!
سكتنا لما الست رجعت تاني وبدأت أنا أقرأ آية الكرسي والإخلاص والمعوذتين في سري
قعدت على الأرض وقعدتني قدامها
ولعت البخور - بخور آل البيت البركة - وطلبت مني أعدي فوقيه 7 مرات
قولت أشوف آخرها
جابت ميه في طبق غويط وقعدت تقرا عليها بصوت واطي قوي فسألتها : حضرتك بتقري إيه ؟
هي : قرآن ... فيه شفاء من كل شيء هو أنا هاقرا غير القرآن !!!!
طلبت مني أشرب الميه وغسلت بيها وشي كمان
بعدين طلعت مصحف قديم جدا وطلعت مفتاح كبير وقديم مربوط فيه شريطين خضر
حطيت المفتاح جوا المصحف زي ما بنحطه في كالون الباب
وقفلت عليه المصحف ولفت الشريطين على المصحف علشان يمسك المفتاح ومايفلتش منه
ومسكت طرف المفتاح بصوباعين اتنين وبدأت تقول : السلام عليكم ، إذا كنتوا قبلتوا السلام لفوا ناحية اليمين ، وإذا كنتوا رفضتوه لفوا ناحية الشمال .
طبعا هي زقت المفتاح بصوابعها علشان المصحف يلف ناحية اليمين وأنا قاعدة قدامها وشايفة
فسألتها : حضرتك بتكلمي مين ؟
بصلتي باستغراب وقالت : دول عباد لله مسلمين وموحدين زينا بالضبط .
غ (صاحبتي) : دول خُدام المصحف .
أنا : بس المصحف مالهوش خدام ، المصحف ربنا حافظه بنفسه !!!!
الست اتنرفزت وقاليتلي : يعني انتي هاتفهمي أكتر مني ؟
أنا : أنا ماقولتش كده .
هي : اسمك إيمان بنت مين ؟
أنا : إيمان بنت حسين .
هي : !!!! اسم أمك يا بنتي مش أبوكي .
أنا : بس حرام تسأليني عن اسم أمي .
هي : حرام إزاي هو انتي هاتفهمي أكتر مني ؟
أنا : لأ ده مش كلامي ده كلام العلماء إللي في التليفزيون هما قالوا إن ده حرام ، حتى ربنا قال في القرآن : ادعوهم لآبائهم ... (وبدأت أتنرفز على الست أنا كمان )
هي : ده في الآخرة ...
أنا : لأ ده الآية دي نزلت في الدنيا مش في الآخرة .
هي : خلاص ماهو العلماء دول بيفهموا أكتر مننا بقى وانتي أعلم مننا كلنا .
أنا : يا أمي بالله عليكي ماتقولينيش كلام ماقولتهوش .. ده كلام ناس درست وفهمت وعرفت مش كلامي ولا من دماغي .
كل ده وصاحبتي عمالة تغمزلي علشان أسكت وأتابع الموضوع وتقول للست : ماهو بتوع التليفزيون دول بيخربوا عقول الناس !!!!
وطبعا الست سألت خدام المصحف تاني وعرفت إن عليا أسياد وإن أنا سبب المشاكل إللي في البيت والابتلاءات كلها !!!
وإني إذا آمنت باللي هي بتعمله ووافقت إنها تعالجني كل ده هايروح وهانبقى كلنا زي الفل !!!!
طبعا أنا رفضت لإني مش هاخسر آخرتي علشان دجل وشعوذة
الست غضبت ولمت عزالها ومشيت
وصاحبتي جات تسلم عليا بعدت عنها
ومسكت ماما عند الباب تقولها : إيه إللي إيمان بتعمله ده ، إزاي تقول كده هي مش مؤمنة ؟!!!
المهم نزلوا هما الاتنين وطلبت من ماما إن الإنسانة دي ماتدخلش البيت تاني
تاني يوم هي اتصلت تتطمن عليا ماما دخلت فيها شمال وقالتلها إني ماعنديش أي استعداد أتعامل معاها تاني وأحرجتها جامد في الكلام .
والحمد لله على نعمة العقل والعلم
قعدت يوميها فعلا أحمد ربنا كتير إني عارفة وفاهمة ومش جاهلة
أنا مش بانكر حقيقة المس والسحر
بس فيه علاج يرضي ربنا
وفيه علاج يغضب ربنا
والحلال بين والحرام بين
أسأل الله لي ولكم أن ينفعنا بما علمنا
اللهم آمين

هناك 24 تعليقًا:

عصفور المدينة يقول...

أسأل الله أن يمن عليك من فضله
ربنا آمنا بما أنزلت واتبعنا الرسول فاكتبنا مع الشاهدين

إيمان الحسيني يقول...

اللهم آمين اللهم آمين
جزاك الله خير الجزاء يا أخي الكريم

خمسة فضفضة يقول...

السلام عليكم ورحمة الله وبركاته

لا حول ولا قوة الا بالله

حتي القرآن لم يسلم من هذا العبث

انا لله وانا اليه راجعون

إيمان الحسيني يقول...

وعليكم السلام ورحمة الله وبركاته
الكارثة يا فضفضة إنهم بيجادلوا بدون زهق أو ملل
ممكن يوصلوا معاكي في الآخر لإنك تسكتي وماتعرفيش تردي عليهم

الله المستعان

... يقول...

إيمان
تعرفي اني اتعرضت في يوم لنفس الحركة دي
حركة المفتاح
بس مش في مصحف بأة لا في كتاب عادي وكانت مسبوقة بحكايات عن آدم وعيسي ومريم
من كان في صحبتي كان مصدق وأنا طبعا كنت حاسة انه تخريف
وعلشان كدة الراجل ركز معايا أنا آل علشان يهديني
وبرضه مشيته وكنت عنيفة جدا معاه
بس صدقيني المشكلة مش في الأفاقين دول المشكلة في اللي بيصدقهم ويبعد عن صحيح الدين

إيمان الحسيني يقول...

فعلا يا بثينة
بعد ما الست دي مشيت هي وصاحبتتي أنا كنت متنرفزة جدا
ماما قعدت تقولي : ماتديقيش نفسك دي ست جاهلة
قولتلها : أنا مش متدايقة من الست أنا متدايقة من صاحبتي إللي المفروض إنها متعلمة ومتدينة وفرضتها عليا بدون حتى استئذان

الله المستعان

وشوشات يقول...

انا مش قادرة أصدق ان لسه فيه ناس بتفكر بالطريقة دي.. هو الدجل ده مش هايحل عن أمة محمد بأه عشان نفوق؟ و بعدين مين اللي قال ان اللي حاصل ده اسمه وقف حال؟ كل شئ بإيد ربنا، و لا هانعدل على ربنا كمان في الميقات اللي محدده لحدوث الأشياء؟ استغفر الله العظيم.

برافو عليكي يا إيمان في موقفك ده، ربنا يثبتك كمان و كمان ويرزقك الخير يا رب.

يا مراكبي يقول...

أنا كمان إتنرفزت لما قريت الموضوع ده .. اللي بينرفز مش الدجال نفسه .. اللي بينرفز هو اللي بيصدق الكلام ده .. طيب حتى لو اللي بيصدق ده مش متفقه في الدين .. كمان مش بيشغل أبجديات المنطق والعقل في حكمه على الأمور؟

خلاص بقينا بنلغي دماغنا ونستسهل للجوء للغيبيات في حل مشاكلنا؟

إيمان الحسيني يقول...

وإياكم يا علا
اللهم آمين

الكارثة إن صاحبتي دي مهندسة ومن عيلة مستواها المادي والاجتماعي مرتفع
مش عارفة ليه الناس إللي من المستويات دي - إلا من رحم ربي - بقيت تستسهل مشوار الدجالين كده ؟!!!!!

إيمان الحسيني يقول...

للأسف يا مراكبي
الناس من كتر ضغوط الواقع بقيت بتسلي نفسها بالغيبيات إللي احنا مش مسئولين عنها أصلا
نسأل الله العفو والعافية

محمد يقول...

ماشاء الله

أسعدني جدا رد فعلك.. أكرمك الله ومن عليك من فضله.. وفرج ما بك.. الحمدلله

حفظك الله أختي.. وجزاك الله خيرا

إيمان الحسيني يقول...

جزاك الله خير الجزاء يا أخي الكريم وضاح

الفقيرة إلى الله أم البنات يقول...

إيمان وحشتينى قوى
على فكرة لانى عارفه انك بنت جدعه بجد
كنت متأكده إنك مش هتسكتى
عارفه الخيبه فين
فى ناس متعلمين ومثقفين..وينخدعوا
بس دول علشان مدخلش الإيمان قلوبهم
ربنا يكتر من أمثالك
ويقلل من أمثال الآخرين
هو كمان القران ..مش ناقص الا كده
حسبنا الله ونعم الوكيل

إيمان الحسيني يقول...

وحشاني قوي يا أم البنات
أخبارك إيه وأخبار البانوتات ؟
ربنا يطمنك عليهم

والله يا أم البنات يحمدوا ربنا إني ماطردتهومش من الأول
لكن الست احترمت كبر سنها بس
الله المستعان

باب البحر يقول...

ربنا يثبت حضرتك على الحق .. و يرزقك بالخير . إكراما لك أولا .. ثم ليكون خزيا لهؤلاء ثانيا.

~ أنين ~ يقول...

عندك حق ياإيمى
الحمد لله على نعمة الدين والعلم

الناس دى لسة عايشة

على فكرة انتِ لسة فكرانى ؟؟

ماشاء الله مدونتك تحفة...

زبطيلى بتاعتى يهتاخدى عين مدورة
هههههه

تسلم ايدك ^ _ ^

الطائر الحزين يقول...

ولا حول ولا قوة الا بالله
من الله عليك بفضلة وكرمة

الطائر الحزين يقول...

ولا حول ولا قوة الا بالله

من الله عليك بجودة وكرمة وفضلة

إيمان الحسيني يقول...

باب البحر
وإياكم أخي الكريم


سندس
انتي سندس الجنة صح ؟
طبعا فاكراكي من أيام كتكوت :)
ربنا يكرمك ويعزك يا ست البنات
هابص على مدونتك وأبقى أبلغك بطلباتي كلها
:D


الطائر الحزين
جزاك الله خير الجزاء يا أخي الكريم

ghorBty يقول...

السلام عليكم ورحمة الله وبركاته

ربنا يبارك لك ان شاء الله

والله ربنا بيقول وفي السماء رزقكم وما توعدون

والناس دائما كدا لو حاجه حصلت يبقي فيه عمل ودجل وكلام فاضي فين بقي التوكل علي الله والرضا بالقضاء والقدر

ربنا يكملك بعقلك ويبعد عنك كل شئ مؤذي

ادعوكي لزياردة مدونتي

إيمان الحسيني يقول...

وعليكم السلام ورحمة الله وبركاته
جزاكِ الله خير الجزاء يا غربتي
ونسأل الله الثبات على الحق
اللهم آمين

ما شاء الله لا قوة إلا بالله مدونتك مبشرة بكل خير :)

ghorBty يقول...

ربنا يبارك فيك ان شاء الله

سعدت كثيرا بزيارتك لمدونتي وانها عجبتك ربنا يتقبل ويرزقنا الاخلاص

دمت بخير

a Dreamer with feet on the Floor يقول...

Dear >> I am so sorry that U passed that experiences,,,, But I hope.. If U did not do it from The start.. U should have said no .. and never start doing it ... as U allready now it is all .. Acting..

is this all .. 4 Marriage.. I can solve U that Proplem without Majic...take care

Dr.Soha Adel يقول...

انا اول مره اسمع موضوع المفتاح ده بصراحه

هي لو جت تقرا قرآن و بس ممكن الواحد يتقبلها لكن الهبل ده لا طبعا

انتي خليكي مع سوره البقره و ان شاء الله ربنا يبعد عنك اي شر

ربنا يحميكي و يبعد عنك اي حاجه وحشه يارب