حدود تعامل السفارة الإسرائيلية مع المواطنين المصريين

الدكتور زغلول النجار كان ضيف على قناة الرحمة امبارح وللأسف شوفت الحلقة من نصها

قال إنه فوجئ بجار ليه جايله وهو متدايق جدا ومعاه جواب أو طرد من السفارة الإسرائيلية وخايف يفتحه ومش عارف هما جابوا عنوانه منين

الدكتور زغلول فتح الجواب بدل جاره وفوجئ بكتاب اسمه : ذرية إبراهيم

وعلى ما أذكر الدكتور زغلول قال إن مكتوب على الغلاف الآية دي :

" وَلَقَدْ آتَيْنَا بَنِي إِسْرَائِيلَ الْكِتَابَ وَالْحُكْمَ وَالنُّبُوَّةَ وَرَزَقْنَاهُم مِّنَ الطَّيِّبَاتِ وَفَضَّلْنَاهُمْ عَلَى الْعَالَمِينَ " الجاثية (16)

وفكرة الكتاب إنهم بيطلبوا فيه من المسلمين إنهم يأيدوا حق الإسرائيليين بدولة من الفرات للنيل وذاكرين أدلة من القرآن والسنة تثبت الحق ده ليهم

وكمل الدكتور زغلول النجار كلامه بإن مجموعة شباب من إحدى كليات الإعلام المصرية كانوا بيعملوا مشروع التخرج بتاعهم

وقرروا إنه يكون لقاء مع السفير الإسرائيلي في مصر

وتم قبول طلبهم طبعا واستضافوهم بمستوى عالي جدا من كرم الضيافة ووزعوا عليهم نسخ من الكتاب ده

للأسف الشباب الجامعي ده اقتنع باللي في الكتاب وقال إن إللي كانوا فاهمينه عن الاحتلال الانجليزي ووعد بلفور طلع غلط

وإن لإسرائيل الحق في إقامة دولة من الفرات للنيل بنصوص القرآن والسنة إللي طبعا تم اقتطاعها من سياقها وتفسيرها على أهواء الإسرائيليين

السؤال دلوقتي :

الحكومة فين ؟

السفارة الإسرائيلية بتراسل مواطنين مصريين بأي حق وبصفتها إيه ؟

وإزاي الكتاب ده بيتم الترويج ليه ؟ وليه مش بيتصادر ؟