الخميس، نوفمبر 04، 2010

جيــل السبعينــات



كلمة لها رونقها الخاص جدا ، إذا كنت من مواليد سبعينات القرن العشرين فأول ما هاتسمع الكلمة دي لازم تترسم على وشك ابتسامة دافية ، وتلاقي شريط من الذكريات مَر قدام عنيك وتبدأ تسترسل في الكلام عن كل ما يمت للجيل ده بِصِلة :
• كانوا بيسمونا جيل الفيديو لإنه ظهر كجهاز للاستخدام في المنزل في فترة السبعينات ، وبدأ بالشرايط الصغيرة (بيتاماكس) بعدين الكبيرة (في إتش إس) ، وكنا في البيت عندنا منقسمين لفريقين : أخويا الكبير بيحتكر الشرايط لتسجيل حلقات (جريندايز) ، وأنا وأختي بنحاول نحصل على شريط واحد علشان نسجل حلقات (بابيرو) .

• ده الجيل إللي شهد أنواع مختلفة وراقية من مسلسلات الكارتون زي : جريندايزر ، جونجر ، الأميرة ياقوت (أميرة أنثى بقلب رجل) ، الرجل الحديدي (الفكرة الأولى للباور رينجرز) ، السندباد البحري ، بابيرو ، كوالا ، السيدة ملعقة ، فارس الفضاء ، الغواصة الزرقاء (زعلت قوي لما اضطروا يستغنوا عن الغواصة الصغيرة شيلا علشان يحولوا الكبيرة إلى مركبة فضائية لمحاربة الغزاة) ، عدنان ولينا ، السنافر ، سِنان ، الغابة الخضراء ، مازنجر (مستنسخ من جريندايزر) ، ريمي (فاضحكوا لريمي) ، أبطال الملاعب (الفكرة الأولى قبل كابتن ماجد بكتييير) ، من قَصص الشعوب (أغنية الشارة بصوت الطفلة أصالة نصري) ، ساندي بل ، سوسن ، هايدي ، بيل وسيباستيان ، بشار ، النحلة زينة .

• ده غير برامج الأطفال : افتح يا سمسم ، المناهل ، سينما الأطفال يوم الجمعة الصبح ، وماما نجوى وبقلظ يوم الإثنين والخميس من كل أسبوع .

• جيلنا برضه كان له نصيب من البرامج الإذاعية الجميلة : قال الفيلسوف الساعة اتنين إلا ربع بعد منتصف الليل ، ألف ليلة وليلة بصوت الرائعة زوزو نبيل الساعة عشرة بالليل ، أبلة فضيلة الساعة 11 الصبح ، والمسرحيات إللي كانت بتتعرض في السهرات بالليل وبيقوم المذيع بالتعليق عليها علشان يشرح إللي بيحصل طبعا .

• الجيل ده شهد انطلاق نجومية حميد الشاعري إللي ظهر بسببه كل جيل المطربين الكبار دلوقتي : عمرو دياب ، إيهاب توفيق ، علاء عبد الخالق ، والكتييييير من شرايط الكاسيت إللي جمعت عشرات المغنيين ، ده طبعا غير ظهور فرقة الأصدقاء (منى عبد الغني وحنان وعلاء عبد الخالق) وأغانيهم الجميلة ومن أشهرها على الحدود والموضة ، وفريق الجيتس إللي حفظنا معاه أغنية خلصنا الامتحانات علشان أول واحد يخلص في البيت يغيظ بيها الباقي .

• طبعا ماحدش من جيلنا يقدر ينسى فريق البوني إم وأغنية دادي كوول وراسبوتين ، وفريق الدولي دوتس وأغنية ليلى ، وفريق آبا وأغنية شيكيتيتا .

• وبلا فخر إحنا الجيل إللي كان بيحفظ أغاني إعلانات طارق نور عن ظهر قلب ونروح تاني يوم المدرسة نغنيها مع بعض ، ده غير إن في طفولتنا ظهر أول كوتشي بيطلع نور (أميجو إللي بينور) ، واللبان السحري ، ومسابقات الشمعدان (10 أحمر و10 ألوان) ، وكان عندنا هواية كطلبة إننا نركب كلمات على لحن الإعلان ... مش عارفة ليه .

• واحنا أول من لعب بفيديو جيم قديم شوية اسمه : الأتاري ، وكان له شرايط بتركب فيه ، لعبة الدبابات ، سوبر مان ، river ride ، الفرخة إللي بتعدي الشارع ، ده طبعا غير ظهور الكمبيوتر صخر وإمكانياته الفوق طبيعية بالنسبالنا في الوقت ده .

• من أفضل مسرحياتنا مدرسة المشاغبين والعيال كبرت ، مش هاتلاقي حد من جيل السبعينات إلا وحافظ المسرحيتين دول ، وكمان شاهد ماشافش حاجة ، المتزوجون .

• أما الدراما التليفزيونية فحدّث ولا حرج : الشهد والدموع ، ليالي الحلمية ، رأفت الهجان ، أبو العلا البشري (الجزء الأول) ، المحروسة 85 ، عيلة الدوغري ، الطاحونة ، ليلة القبض على فاطمة (فردوس عبد الحميد وفاروق الفيشاوي) ، أولاد آدم (مسلسل ولا أروع مش عارفة ليه مش بيعيدوه) ، أنا وأنت وبابا في المشمش (فردوس عبد الحميد وحسن عابدين) ، أهلا بالسكان (حسن عابدين ونبيلة السيد) ، أرض الأحلام (مدبولي وعمر الحريري ورجاء الجداوي) ، بابا عبده ، ده غير السهرات التليفزيونية الرااائعة .

• ومانقدرش نسيب التليفزيون من غير ما نقول إننا اتفرجنا على أجمل فوازير قطاع الإنتاج على الإطلاق : فوازير نيللي ، وفوازير فطوطة ، وفوازير شريهان ، وكلهم كانوا من إخراج فهمي عبد الحميد .

• للأسف ... البرامج الدينية كانت على هامش الخريطة التليفزيونية ، ولكن ده عمره ما هايقلل من حلقات تفسير القرآن ونور على نور للشيخ الشعراوي عليه رحمة الله .

• وأخيرا وليس آخرا ... جيل السبعينات كان أحد الأجيال إللي شهدوا آخر لحظة كرامة وعِزة في تاريخ مصر ، لحظة رفع العلم المصري على طابا ، اليوم إللي غنينا فيه كل الأغاني الوطنية الجميلة : مصر هي أمي (عفاف راضي) ، بلدي يا بلدي (محمد ثروت وهاني شاكر) ، مصريتنا (محمد ثروت) ، المصريين أهما (ياسمين الخيام) ، يا مصر يا غالية (وردة ومحمود يس) .


عزيزي القاريء ... لو حضرتك من جيل السبعينات أعتقد إني قلبت جواك ذكريات كتيرة قوي ، وياريت تشركنا معاك في ذكريات الطفولة لإني غالبا هاكون نسيت حاجات كتيرة قوي .

‏هناك 4 تعليقات:

يا مراكبي يقول...

http://yamarakby.blogspot.com/2009/08/blog-post_27.html#links

يا مراكبي يقول...

http://yamarakby.blogspot.com/2010/09/1.html#links

يا مراكبي يقول...

http://yamarakby.blogspot.com/2010/09/2.html#links

إيمان الحسيني يقول...

يا مراكبي
:)

الظاهر إن جيلنا كله بدأ يحس بالغربة وبدأ ينغلق على نفسه
أغلبنا مش قادر يتكيف مع العصر الجديد بكل محدثاته
زمان كنا بنقول جيل السبعينات وجيل التمانينات
دلوقتي كل سنة بيظهر جيل جديد مختلف عن إللي قبله
شيء مخيف فعلا