شخبطـــة
ولسه باكتبلك حروفي
يمكن في يوم تقراها
يمكن تشوف عيونك
حـاجـات
كنت زمان كاتباها
يمكن ترجّعْلي قلمي
مع شطرة وزن كسراها
وتعرف إن أحلامي لِسّاها
من ورا الحرف
شايفـه سماهـا
يمكن تحس بتلميحة
ما بين السطور شايلاها
وتقرا الكلمة إللي لغيرك
عمري ماهاكون قايلاها
عهد وعلى نفسي خدته
كلمتي ليك وللورق سايباها
كراسة قديمة ورقها أصفر
وعالهــامش
رموز الحب ملياهـا
قلب وياه سحابة صيف
وضلاية قاعدة أستناها
ويلامس الحر جبيني
ويسهيني
ألاقي حروفي
نقطة عرق مسحاها
وتفضل الرموز مرسومة
ويفضل الهامش معاها
ياترى يا حبيبي هتفك الرموز ؟
ولا دي شخبطة ... أحلامي رسماها ؟
هناك 5 تعليقات:
رائعه شخبطاتك
جزاك الله كل خير يا ميدو
جزاكم الله كل خير
جزاك الله كل خير يا تامر :)
روعة مفيش كلام :)
مااحنا حلوين وأساتذة اهو
:) ماشي يا طعمة
إرسال تعليق