لو أنا مش طايقة إنسان ... يبقى أقعد معاه ليه ؟!!!
لو مش طايقة مكان ... أقعد فيه ليه ؟!!!
لو مش طايقة كتاب ... أتعب نفسي بقرايته ليه ؟!!!!
لو باكره كاتب ... يبقى أقرف نفسي وأقراله ليه أصلا ؟!!!!!
عزيزي القاريء ....
ممكن توجه لنفسك الأسئلة دي ؟
ولا أنت غاوي تقرف نفسك بنفسك وخلاص !!!!
هناك 18 تعليقًا:
أحيانا أو أوقات كتير مش بيكون بمزاجنا.. بنكون مجبرين على كده .. والأمثله كتير
بس واضح إنك بتحبى المختصر المفيد
مش مسألة المختصر المفيد يا أحمد
المسألة دلوقتي إني - مثلا يعني - مش ياحب اقرأ مواضيع لأخونا وليد
يبقى أدخل مدونته من الأساس ليه وأحرق دمي ؟!!!!
أعتقد كده اتفهم قصدي أكتر
منطق كويس لكن...
أحيانا الإنسان بيحتاج انه يقرأ كلام مش على هواه!..لأنه مش دايما الحقيقة بتبقى على هواه!
كلامك سليم يا يحيى لو كان القاريء بيبحث عن الحقيقة
لكن لما يكون القاريء داخل علشان يدايق نفسه باللي بيقراه ... يبقى إيه المقصود من كده ؟!!!
يمكن عشان تنشيط الدورة الدموية:)
بس يبقى يخلي باله بقى لحسن تقلب بجلطة :)
أنا غاويه أقرف نفسي وخلاص :) عن نفسي يا طعمه بتحصلي كتير بالعكس يمكن بتابع كتابات ناس مش متفقه معاهم او محبتش فكرهم او منطقهم بيدايقني بشكل أكثر من غيرهم ... الا اذا كان المقروء ده ادب مثلا ... فبعد أكثر من مره أجد اني لا يعجبني أسلوب فلان الشعري او فلان الرمزي فأتوقف عن قراءته ... بس على كل انا فاهمه قاصدك
منورة مدونتي يا بنت عادية :)
والحمد لله إنك فاهمة قصدي
سبحان الله الواحد ياما بيشوف في الدنيا دي
مالك داخلة شمال ليه كده ؟؟؟ .. هاهاها
ما علينا .. واضح ان الكلام نابع من تجربة شخصية ما ... لكن مش دايما بيكون الحل انى موجعش دماغى و مقرفش نفسى خاصة ان القرف بيهل علينا لغاية عندنا
و كمان فيه شعرة بين الى انتى بتقوليه و بين السلبيه .. فخلى بالك
يا بيبو هي فعلا تجربة شخصية
بس مش أنا إللي باعمل كده
يعني لما تلاقي واحد كل فترة يدخل مدونتك علشان يعترض على إللي أنت بتقوله ومافيش اي حاجة بتقولها عاجباه وفي الآخر يشتمك
طب بيدخل عندك ليه اصلا طالما إنه مش طايقك ؟!!!!
كلام سليم ميه الميه انا عن نفسى لا ادخل مدونات لاشخاص ما بحبش كلامهم او بيقولوا كلام مضاد لما اؤمن به وده اريح كتير
ولى ايضا رؤية عكسية من يدخل مدونة شخص ولا يعجبه كلامه عليه ترك المدونة والخروج بدون تعليق بدلا من ان يسفه احلامه لان دى جليطه وقلة ذوق برضو
مشاكل عالم التدوين بقت كتير
بس ما فيش احسن من تكبير الدمااااغ يعنى لو حد كتب موضوع طويل عريض يشتم فيك ما عليك الا ان تكبر دماغك وما تردش عليه
منار منجد هنا
يا مرحبا يا مرحبا
منورة التدوين يا منار :)
بس ماكونتش أعرف إننا مُرين قوي كده يا شيخة :)
كلامك في الجون يا شادي
مش معنى إني مختلفة مع شخص يبقى المفروض إني أحرق في دمي وأتابع مواضيعه علشان في الآخر أشتمه
اسمحولي ده كده يبقى إنسان مُهزأ فعلا ومريض نفسيا
وواضح إن الكل بيلطش فيه فبيحاول يثبت وجوده في العالم الافتراضي
منور يا شادي :)
العزيزة ... طعمه
لا أتصور أن تقتصر مطالعاتى على من أتفق معهم فى الرأى فقط والا فالنتيجة الحتمية هى أحادية الرؤية وضيق المنظور
استطيع أن اغلق مدونتى وأكتفى بكراسة أدون فيها ما أحب دون تطفل من أحد
لكن المسالة تبدو لى ابسط حيث أن ارتيادى للأخرين -او أرتيادهم لى - يفتح للعقول أن تتعرف ثم تفكر ثم تصحح ثم تتطور
والا فليس لعبارة الشافعى أى معنى أو مدلول
كلامك صح 100% يا ايوب
بس إطلاعي على تفكير الآخرين له آداب عامة يجب أن نتحلى بها جميعا
مش معنى إني أختلف مع شخص في الرأي يبقى كل شوية أدخل على موضوع ليه علشان أشتمه وأهينه
اختلاف الرأي مطلوب جدا يا إما الحياة هتقف
بس الحوار لازم يكون بأدب وذوق وأخلاق أما توجيه الإهانات عمال على بطال وبدون أي سبب - غير الاختلاف في الرأي - فده هيزيد الفجوة بينا وبين الآخر
أسأل نفسك ، منطق ، تفكير فى ليه وعشان ايه
هو الكلام ده لسه شغال
صراحة يا محمد أنا مش فاهمة ردك
!!!
معلش أصلي سايبة التعليم بقالي كتير
:D
إرسال تعليق