الأربعاء، أكتوبر 12، 2005

أبو جهل وأم جهل (1) صور من حياتنا المعاصرة

جايلك يا طاهرة

أبو جهل : السلام عليكم يا سرحان ، إزيك عامل إيه ؟
سرحان : وعليكم السلام ورحمة الله ، أنا الحمد لله رب العالمين بخير .
أبو جهل : إيه مالك شكلك مهموم ؟!!!
سرحان : الحياة ماتخلاش والمشاكل مش سايبة حد .
أبو جهل : لا إله إلا الله ، طب وساكت على نفسك ليه ؟
سرحان : طب عاوزني أعمل إيه يعني ؟!!!
أبو جهل : إجري اشتري دستتين شمع واطلع على ستك زينب الطاهرة ، قدم الدستتين واطلب منها العون .
سرحان : تفتكر هينفع الموضوع ده ؟ أصلي جربت سيدي الرفاعي قبل كده وماجبش نتيجة .
أبو جهل : لااااا سيدك الرفاعي مين ؟ ستك زينب الطاهرة لا يُعلى عليها ، ده أنا في مرة روحتلها بالواد ابني بعد ما دوخت بيه على الدكاترة وخليته لمس حديد المقام بس ... تاني يوم بقى زي الفل ولا كإنه كان عيان ولا حاجة .
سرحان : خلاص على بركة الله أروحلها دلوقتي بدل ما أنا قاعد كده .
أبو جهل : وأنا جاي معاك لحسن في مشكلة بيني وبين مراتي ومش هيحلها غير السيدة ... جايلك يا أم هاشم .... جايلك يا طاااااهرة .
قال تعالى : " وَاتَّخَذُوا مِن دُونِهِ آلِهَةً لَّا يَخْلُقُونَ شَيْئًا وَهُمْ يُخْلَقُونَ وَلَا يَمْلِكُونَ لِأَنفُسِهِمْ ضَرًّا وَلَا نَفْعًا وَلَا يَمْلِكُونَ مَوْتًا وَلَا حَيَاةً وَلَا نُشُورًا " ... سورة الفرقان آية (3) .
أحبتي في الله ...
هذه صورة مُصغرة من مظاهر الشرك بالله التي باتت منتشرة في مجتمعاتنا الإسلامية ، فالكثير من المسلمين في عصرنا الحالي يعتقدون أن للأئمة والأولياء وأهل البيت بركات ونعم تظهر لمن يطلب منهم العون ، وهم من ذلك الاتهام أبرياء ، فهم بشر مثلنا وقد ماتوا ، لم يملكوا لأنفسهم نفعا ولا ضرا ، فكيف نطلب العون منهم ؟!!!!
الأولى أن نطلب العون ممن خلقهم وخلقنا ... نطلب العون من الله ... فهو وحده بيده النفع والضر ، فمن أسمائه الحسنى (النافع ، الضار) ... فمن يملك ضرنا إذا نفعنا ؟ ومن يملك نفعنا إذا قدّر لنا الضرر ؟

هناك 11 تعليقًا:

Zeryab يقول...

فعلا العو ن الوحيد اللى ممكن نستناه بيبقى من الخالق مش من المخلوق ..صدقت يا طعمة

ibn_abdel_aziz يقول...

الشرك انواع
اكبر واصغر

وهناك نوع ثالث
وهو النوع الاغبر

حيث يتبع الناس بعضهم البعض كل فرح بحزبه
وكل حزب يقول امتلك الحق

وهذا هو النوع الذي ادخل المسلمين في ماسي 1300 سنة ماضية

لا الشرك الاكبر الا هو نكران الله تماما او اتخاذ الهة معه

ولا الاصغر وهو النوع الذي كتبتي عنه ..وان كان هذا النوع بالتحديد يعتبره الاكثرون اكبرا ايضا
ويعتبرون الحلف بغير الله والحب مع الله هو الاصغر
في النهاية

الاصغر والاغبر
بعضهما يفضي الي بعض

والاغبر يملا الدنيا فهو في البيوت والشوارع والعقول

متاخديش في بالك في الكلمتين اللي كتبتهم من شوية
كنت بكلم نفسي

shady يقول...

انا معترض على حكاية ان فيه عدد كبير من الناس بتعمل كده ومتهيالى ان العمليه تكاد تكون انتهت ومن يمارسها شواذ وعندى دلائل واقعيه ان موضوع الاولياء ده تراث وانتهى من الثقافه الشعبيه فى مصر والجاهل قبل المتعلم بقا عارف الفرق بين الحلال والحرام
يعنى فى حاجه كانت زمان عندنا اسمها زفة مولد النبى كان بيخرج فيها بعض من المشعوذين ادعياء الصوفيه دى تقريبا انتهت خالص وظاهرة الموالد بثقافتها انتهت من مصر ولو لسه موجوده فهى لترفيه الشعبى لا اكثر اما المعتقدات خلاص انتهت من زمان

إيمان الحسيني يقول...

جزاك الله كل خير يا زرياب
نورت المدونة

إيمان الحسيني يقول...

كلامك بيدور في أذهان ناس كتير يا ابن عبد العزيز
النقطة الفاصلة إننا لازم نخرج من عبادة المخلوق إلى عبادة الخالق
بغض النظر عن الشرك الأكبر والشرك الأصغر

إيمان الحسيني يقول...

منور يا شادي
على فكر أنا ضربت المثل بضورة واضحة وصريحة وكلنا عارفينها
وإذا كانت مظاهر الاحتفال بالموالد اختفت
فأنا على يقين إن النصيب الكبير لاختفائها كان بسبب إنها مش على الموضة
وأكبر دليل على كده إن أغلبية زباين الدجالين والمشعوذين من أبناء الطبقة الراقيةوالغنية والمراكز المرموقة جدا
الفكر موجود لسه يا شادي
لكن بصور مختلفة في التطبيق

bluerose يقول...

مش عارفة يا طعمة ليه حاسة ان دا مش ذنبهم

اصل الناس دول مش هايسمعوني و لا هايسمعوكي ,المؤثر الاكبر فيهم رجل الدين و اللي باستغربه فعلا ان رجال الدين ليسوا بالايجابية الكافية تجاه هذه الافعال

إيمان الحسيني يقول...

كلامك في الصميم يا بلو روز
نفسي أعرف فين أئمة المساجد إللي مسئولين عن مساجد السيدة والحسين و... إلخ ؟
المشكلة إن بعض الأئمة دول نفسهم مقتنعين بالحاجات دي
ودي حاجة أنا شوفتها بتحصل قدامي
وأنا لما كتبت الموضوع ده كنت باقصد بيه الفئة المتعلمة
ربنا يعافينا ويعفو عنا جميعا

إيمان الحسيني يقول...

صدقت والله يا أبا محمد

Ahmed Shokeir يقول...

مرة كنت باصلى فى الحسين العصر وشفت منظر الناس عند المقام بعد الصلاه وعلى الحاجات اللى بيعملوها بصراحه خفت من اللى بيعملوه ده وسألت نفسي هما جابواالمعتقدات دى منين
لأ ياشادى اللى شفته مش قليل وبعدين فيهم ناس من ملابسهم باين عليهم ذوى ثقافه

إيمان الحسيني يقول...

بالضبط يا أحمد
المشكلة فعلا إن أصبح عدد المثقفين والمتعلمين بينهم كبير وملفت للنظر
ربنا عافينا ويعفو عنا جميعا