الخميس، يونيو 01، 2006

مش في رخص التراب .. ده احنا أرخص من التراب

امبارح بعد الفجر بنت أختي (عمرها سنتين) صدرها تعب جدا وجتلها أزمة ضيق تنفس
ماما وأختي أخدوا البنت وطلعوا على مستشفى الميريلاند إللي في جسر السويس لإن – على حد علمنا – الأطباء بتخصصاتهم بيبقوا متواجدين على مدار 24 ساعة
المهم ...
حجزوا كشف عن دكتورة الأطفال إللي كانت موجودة وقتها
ماما وأختي وبنت أختي - إللي مش قادرة تاخد نفسها - فضلوا مستنيين الكشف مدة ساعة إلا ربع تقريبا
مش علشان الدنيا زحمة ... لأ
علشان حضرة الدكتورة المحترمة بعتت ممرضة تدورلها على سماعة تكشف بيها على البنت
والممرضة لفت المستشفى من أولها لآخرها علشان تشوف للدكتورة سماعة وطبعا مالاقيتش !!!
ماما اتنرفزت واتخانقت مع الممرضة والدكتورة وقالتلهم : مستشفى طويلة عريضة مافيهاش سماعة ؟!!! اتقوا الله حرام عليكم .
ولما ماما وأختي قرروا يمشوا علشان يلحقوا البنت في أي مستشفى تانية الدكتورة قالت لماما : البنت شكلها تعبانة قوي ولازم تتحجز .
طبعا ماما هبت فيها وزعقت جامد : إذا كان المستشفى مافيهاش سماعة يبقى نسيبلكم البنت إزاي ؟!!! ويا ترى هتلاقولها علاج ؟

المهم ...
ماما وأختي أخدوا البنت وطلعوا على مستشفى الجنزوري في قصر الطاهرة
دخلوها الطواريء
وزير الصحة كان قال إن إي مريض يدخل الطواريء يتعالج بالمجان لمدة 24 ساعة في أي مستشفى حكومي أو خاص
وعلشان مافيش حاجة في بلدنا ببلاش
رفضوا يدخلوا البنت الطواريء وأصروا إن أختي تدفعلها كشف عند دكتورة الأطفال إللي موجودة
وبعد تشخيص الحالة (اشتباه في التهاب رئوي) طلبوا حجز البنت 24 ساعة علشان يتوصلها أكسجين وعلاج بيتاخد عن طريقة كمامة الأكسجين
ماما نزلت الاستهبال – أنا قاصدة أكتبها بالهاء - علشان تحجز أوضة بمرافق للبنت وأختي
الشاب المجدع إللي في الاستهبال قالها : لازم تدفعي 500 جنيه على الأقل دلوقتي علشان نحجزلها أوضة .
ماما قالتله : ماعاييش دلوقتي غير 200 جنيه بس ... خدهم وهاروح أجيبلك الباقي .
رفض بشدة واتنرفز على ماما وقالها : يا إما الـ 500 جنيه يا إما البنت تفضل برة !!!
ماما اترجته يديها مُهلة ساعة واحدة تروح تجيب بقية الفلوس وترجعله
ولإن خالي ساكن قريب من المستشفى راحتله واستلفت منه الفلوس .

أعتقد كده إحنا ماباقيناش في رخص التراب ...
إحنا بقينا أرخص من التراب نفسه .

والله ساعات بأقعد أفكر بيني وبين نفسي كده
أصحاب السُلطة دول – وعلى رأسهم الريس - هايتحاسبوا إزاي يوم القيامة ؟
يعني هيتحاسبوا على إيه ولا إيه ولا إيه ؟
ولما يقعدوا العباد المظلومين ياخدوا من حسناتهم لحد ما تخلص
ويبدأوا هما ياخدوا من سيئاتنا ...
يا ترى هنلاقي عندهم حسنات أصلا تتاخد ؟!!!
ويا ترى كَم السيئات إللي هيشيلوها على سيئاتهم هتبقى قد إيه ؟!!!


حسبنا الله ونعم الوكيل في كل مُهمل صاحب سُلطة .
_____________________________________
* شاهد في مدونة يحيى عياش : إنسان بسيط .. لكن مش للبيع!
_____________________________________
* تحديث : الدكتورة إللي كانت بتدور على سماعة في مستشفى المريلاند جت ممرضة وقالتها تطلع سماعتها إللي في درج مكتبها تكشف بيها ... فالدكتورة قالتلها ماينفعش لإنها ماركة كذا (ماركة غالية في سماعات الكشف) !!!!

هناك 18 تعليقًا:

Egypt Camira يقول...

بنت اختى تعبت برضه تقريباً بنفس المرض وروحنا الفجر معهد الصدر بأمبابة واحنا برة اول ما الفراش شافها قال لنا ان الدكتور هيكتبلها على جلسة استنشاق وهتبقى زى الفل وحصل فعلاً زى ما الفراش قال واحنا خارجين ناخد الجلسة قابلنا واحدة تانية داخلة بتقول انها سخنة أوى وبتكح .. والفراش قالها نفس الكلام وحصل .. دخلنا ناخد الجلسة لقينا المستشفى كلها بتاخد جلسات استنشاق
..
..
.. فى الأخر اكتشفت ان الدكتور مش موجود والممرض هو اللى كان بيقول كدة لكل العيانين لحد ما ربنا يسهل والدكتور ييجى

عبدالله مفتاح يقول...

على رايك والله
هيتحاسبوا على ايه ولا ايه ولا ايه
ده احنا بقينا ارخص من الدواب ومش (بنعثر بس) ده احنا بنتبهدل وعنينا بتطلع وبيحصل فينا كل حاجه ومحدش بيفكر في الحساب
يا مين يسمع كلام سيدنا عمر ويطبقه
لما بكى واشترى المظلمه وطلب توضع معاه في القبر
يا ربي كام مظلمه دلوقتي الناس حاسه بيها ومحدش من الحكام في باله
وآآآآآآآآه يا بلد

ارحم دماغك! يقول...

عدي علينا..حامي البلد حراميها يا أخت طعمة!

te3mah يقول...

جزاك الله خيرا يا egypt camira
ماهو في بلدنا كل من هب ودب عامل نفسه أبو العريف
ونسيوا مقولة سيدنا علي :
من قال لا أعلم فقد أفتى .

te3mah يقول...

وأين نحن من عُمر يا أخ عبد الله ؟
واحد بكى خوفا من تعثر دابة في بلد بعيدة عنه بآلاف الأميال
وواحد بيقتل إنسان وهو بيضحك مليء فيه

حسبنا الله ونعم الوكيل

te3mah يقول...

ولحد إمتى يا يحيى ؟
الموضوع طول قوي
بس نرجع ونقول :
" إن الله لا يغير ما بقوم حتى يغيروا ما بأنفسهم "

shady يقول...

أنتم زعلانين ليه ماهو ده نظام السوق
أبجنى تجدنى مامعكش مايلزمكش
بنى أدم بيضه حجر طوب كل ذى بعضه فى السوق كل بالحته وحتدفع على الراس قد ايه
الموضوع ان فيه دول قويه بتعرف تعمل نوع من الحمايه على الشعب بتاعها ضد الحتيان دى
وفى حالتنا حكومة ضعيفه فبتاجر معاهم وبعدين الوزير نفسه تاجر حيخسر يعنى علشان الكام ملطوش بتوع الوزاره
أحمدى ربنا إنك معاكى ال500 جنيه
فى ناس بتموت علشان مامعهاش

ألف سلامه للأموره الصغيره
وخليها تشرب اللبن بشاى

nefertiti يقول...

lel asaf mafesh la zema wala dameer
ta2kady rabena msh beyensa 7ad.
alf salama 3ala bent okhtek :)

جمال مبارك يقول...

هل المشكلة فى الإدارة
أم فى الناس
هل مفروض على الحاكم ان يتابع كل مؤسسه عاملة فى مصر ؟
لماذا لا تلوموا أنفسكم ؟

من الرخيص ولماذا رخص

te3mah يقول...

اسمحلي أختلف معاك يا شادي
كل حاجة في بلدنا ليها تمن
البيضة والحجر ليهم تمن
إلا البني آدم
مالهوش أي تمن ولا أي سعر
إلا لما يموت ويبدأوا يبيعوه بالقطعة !!!

te3mah يقول...

الله يسلمك يا نفرتيتي
منورة المدونة :)

te3mah يقول...

يا أستاذ جمال مبارك
رسولنا الكريم قال : كلكم راع وكلكم مسئول عن رعيته .
يعني كل واحد فينا مسئول
بس درجة المسئولية بتختلف من شخص للتاني حسب الأمانة إللي سعى بنفسه علشان يشيلها

مين السبب في إن الشباب - إلا من رحم ربي - بقى تافه وهايف ؟
مين السبب في ارتفاع الأسعار في بلدنا ؟
مين السبب في إهمال الأطباء ؟
مين السبب في إن المستشفيات بقيت مراكز تجارية وفنادق 5 نجوم والخدمة الأفضل لمن يدفع أكثر ؟

حسبنا الله ونعم الوكيل

Romantic Rose يقول...

انا عارفه كويسه صعوبة أزمة الصدر دي لاني بعاني منها .. بس أكيد لما طفلة صغيرة هي اللي تعاني بتبقي المعاناه مركزة ..

أحتسبي يا بنتي .. بجد دولا مش هيتحاسبوا زينا .. دولا حسابهم هيبقي مختلف كل الاختلاف .. لانهم مالو و ميلوا كل البلد .. و عمرنا ما هنسامحهم .. ربنا ينتقم منهم أشر انتقام بفضله و عدله ..

حسبنا الله و نعم الوكيل !!

te3mah يقول...

جزاكِ الله كل خير يا رومانتك روز
وربنا يمتعك بصحتك فيما يرضيه
اللهم آمين

Ahmed Shokeir يقول...

العنوان بتاع التدوينة لخص كل حاجة

أرجو إن بنت اختك تكون صحتها بقت كويسة إنشاء الله

te3mah يقول...

الحمد لله يا شقير
بقيت أحسن بكتير واتحسنت قوي
الحمد لله رب العالمين
جزاك الله كل خير

سيبها على الله يقول...

فعلا حسبنا الله ونعم الوكيل
بس باين ان الحسبنة مش نافعة وياهم...
احيانا يافندم احس ان التامل بين المصريين بعضعم ببعض هو الذى شجع الحكم على انه ينكل بالشعب ولا تنسى ياعزيزتى من اعمالكم سُلط عليكم وربنا يساويها بمعرفته

te3mah يقول...

صدق الله العظيم في قوله :
" إن الله لا يغير ما بقوم حتى يغيروا ما بأنفسهم "