السبت، أبريل 28، 2007

اسم الضحية: السيد محمد طنطاوي

السيد محمد طنطاوي شاب مصري عنده 17 سنة من محافظة الغربية ولاعب في فريق الكرة الطائرة في نادي سموحة في إسكندرية
والقصة زي ما حكاها والده ووالدته في برنامج 90 دقيقة على قناة المحور :
في يوم 9/إبريل كان سيد وزملاؤه في الشقة إللي بيستأجروها في إسكندرية علشان يكونوا قريبين من النادي
العمارة 16 دور مافيهاش غير أسانسير واحد فقط وغالبا عطلان
والسلم مالهوش درابزين
سيد كان دايما بيفضل يستخدم السلم في الطلوع والنزول
في اليوم ده أصدقاؤه سبقوه لتحت وهو نزل بعدهم بشوية
وقرر يستخدم الأسانسير
ولإن قدر الله نفذ فتح سيد باب الأسانسير الخارجي وفوجيء بنفسه بيحط رجله عالهوا !!!
المفروض طالما إن الأسانسير مش موجود يبقى الباب الخارجي ما يفتحش
الباب فتح مع محمد ووقع 7 أدوار
المهم ....
أصحابه خرجوه ونزلوه تحت وفضلوا يتصلوا بالإسعاف وطبعا كالعادة الإسعاف ولا هما هنا
لحد ما عدى ساعة إلا ربع وجت العربية
السواق رفض يركبه في العربية غير لما ينطق اسمه
ولما ركب أصحابه معاه طلبوا من السواق يوديهم المستشفى العسكري
السواق رفض لأنها بعيدة ومش كويسة ووداهم مستشفى خاصة على مزاجه (مستشفى الأهرام)
في المستشفى رفضوا يستقبلوا الحالة غير لما يدفعوا التأمين
أصحابه طلعوا موبايلاتهم وادوها للراجل في الاستقبال كرهن لحد ما أبوه يوصل ومعاه الفلوس
وطبعا فضلوا يسحبوا من الشباب 100 في 70 في 80 بحجة إنه محتاج وعاوز وبنعمله !!!
بلغوا والده إللي طلع من ميت غمر على طول مع والدته في عربيته الخاصة واتصل بأبو واحد من زمايل ابنه علشان يسبقه على المستشفى ويتصرف لحد ما هما يوصلوا
وبعد كده اتصل بمدير المستشفى وقعد يترجى فيه إنه يسعف ابنه وإنه جاي والعربية مليانة فلوس بس يسعف ابنه لحد ما يوصلوا
مدير المستشفى قفل السكة في وش الأب !!!
الأب بيقول إنه في اللحظة دي حس إن ابنه مات
ولما وصلوا المستشفى الدكتور ادعى إنهم عملوا للولد 3 عمليات وإنه في الإنعاش
وهما طالعين في الأسانسير علشان يشوفوا ابنهم في الإنعاش عامل الأمن قالهم : ابنكم ميت بقاله ساعتين
الأب كشف جثة ابنه لقى مافيش حتى أثر لمكركروم أو أي خياطة أو أي حاجة تدل على إن فيه إسعافات أولية اتعملت لابنهم
والدكتور بيقول إنهم عملوا 3 عمليات !!!
بعد كده المستشفى رفضت تسلمهم جثمان ابنهم لحد ما يدفعوا بقية الفلوس إللي عليهم
وادعوا إن فيه شبهة جنائية في الوفاة علشان يعطلوا إجراءات تصريح الدفن واستلام الجثة
حسبنا الله ونعم الوكيل
والبقاء لله في أمنا الحبيبة مِصر
------------------------------------

هناك 7 تعليقات:

خالد وليس بخالد يقول...

حسبنا الله ونعم الوكيل

Ahmed AL-Hussany يقول...

الله يخرب بيوتهم
خلاص عمر الانسان مالوش ثمن
ربنا ينتقم منهم
وحسبي الله ونعم الوكيل
فيهم كلهم

ShAb 3AdY يقول...

لا حول ولا قوة الا بالله

والبقاء لله

abeer يقول...

الله يحرق قلوبهم الميته
حسبنا الله ونعم الوكيل
نفسى اتفرج على اشكلهم القذرة وهما واقفين يتحاسبوا نفسى اشاهد حساب الطغاة
نفسى اتفرج عليهم وهما مدلدلين
نفسى اضحك قوى وربنا بياخد لنا حقنا منهم فى الدنيا واذا ملحقتيش يبقى فى الآخره
هو يا طعمه مفيش فايده فاكرة موضوع بنت أختك والسماعة المستورده
حسبى الله ونعم الوكيل
أم البنات

لحظة يقول...

نفسي اشوف واحد من كل المستهترين والمتاجرين بحياة الناس لو ولادهم في نفس الموقف هيعملو ايه؟
رحمه الله وصبر اهله

eldoctor يقول...

سبحان الله .. فيه ناس ربنا مش رايد لها الخير .. و أظن ان أهاليها داعية عليها ( انا أقصد الفريق المكون من سائق الاسعاف . و طاقم المستشفى الموقر) لانهم بكده ساهموا فى قتل نفس .. و رايحين فى داهية باذن الله ...
اما امتى و ازاى فدى نسيبها لمن لا يغفل و لا ينام ..
فمن احياها فكأنما احيا الناس جميعا ...
انما دول
...

khaled يقول...

حسبى الله و نعم الوكيل
حسبى الله و نعم الوكيل
حسبى الله و نعم الوكيل