الخميس، مايو 03، 2007

شيء من التغيير

قررت النهاردة أغير شيء بسيط في حياتي
تغيير بسيط لكن أكيد كان له تأثير جميل وبسيط عليا
النهاردة قررت إني أغير نمرة موبايلي
واشتريت خط جديد من اتصالات
لسه ماشغلتهوش
بإذن الله أول ما أشغله هابلغ كل من يهمه الأمر بنمرتي الجديدة :)
----------------------------
* تحديث :
لكل من يهمه الأمر ... نمرة بيتنا زادت (2) من على الشمال .
* تحديث (2) :
الموبايل بتاعي باظ :) ... مش عارفة ليه افتكرت سمير غانم في مسرحية المتزوجون : لميت البنطلون الجاكيتة ضربت !!!

هناك 18 تعليقًا:

غير معرف يقول...

الف مبروك
شيء منالتغيير بيكون له فعلا تأثير جميل
بس اوعي تنسي حد ممن يهمهم الامر ليزعلوا

Dr.khaled يقول...

أحمد الله عزوجل
أنني لست ممن يملكون محمولاً
:)

وفقكم الله

وشوشات يقول...

مبروك الخط الجديد يا طعومة.. انا برضه عايزة اعمل زيك كده و حجزت خط اولريدي بس ماعنديش الجرأة اني أغير فودافون و النمرة اللي معايا من سنة 99، خصوصا اني مش باشتكي من حاجة في الخط و لا الخدمة الحمد لله.

إيمان الحسيني يقول...

الله يبارك فيكي يا لحظة
صدقيني والله قعدت فرغت كل الأسماء إللي عندي على الخط القديم
تقريبا 80 اسم
وكل اسم على الأقل تحته نمرتين
الله المستعان

إيمان الحسيني يقول...

وفقنا الله وإياكم يا دكتور خالد
وعقبال ما يبقى عندك محمول :)

إيمان الحسيني يقول...

حبيبة قلبي علا
منورة مدونتي
أنا والله أخدت القرار بصعوبة لإن خط الفودافون معايا من سنة 2000 برضه
بس صدقيني
التغيير حلو بره :)

ma 3lina يقول...

دا مش تغيير بسيط
ديزين المدونة يتغير ورقم الموبايل ورقم تليفون البيت .. دا تغيير كبير جداً .. لوحصل معايا ححس إن انا مش أنا

:)

ألف مبارك على شكل المدونة الجديد .. وإن كنت بحب القديم جداً واتعودت عليه جداً جدا .. بس برضه بكرة إن شاء الله اتعود ع التصميم الجديد

وإن شاء الله التغيير دا كله يكون فاتحة خير على حضرتك

إيمان الحسيني يقول...

ربنا يكرمك ويعزك يا ما علينا
على فكرة أنا من النوع إللي بارتبط بالأشياء جدا جدا جدا
وبيبقى من الصعب عليا أغير حاجة بقالها كتير معايا
بس الواحد محتاج يعمل تغيير في حياته من وقت للتاني
حتى لو كان بسيط وصغير
وحتى لو كان غصب عنه
التغيير مفيد فعلا

Ahmed يقول...

الف مبروك على الخط الجديد وعلى النيو لووك الجديد
لكن مش هبارك على زيارة الرقة ٢ على نمرة بيتكم لاني لحد ديلوقتي مش عارف لزمتها ايه انا شايفها خنقة وبس

إيمان الحسيني يقول...

معلش يا أحمد
هما عاوزين يوجدوا نمر جديدة علشان عدد التليفونات بيزيد
وماكنش فيه حل غير إنهم يزودوا رقم على النمر الحالية
يلا حصل خير إن شاء الله :)

محمد عبد الغفار يقول...

مبروك على الموبيل الجديد ، انا فودافون حتى الموت

شكل المدونة الجديد رقيق جداً

بانر المدونات النظيفه اللى عندك افضل من اللى عندى ، ممكن الكود بتاعه

إيمان الحسيني يقول...

جزاك الله كل خير يا محمد
الله يبارك فيك

تقدر تقف على البانر وتاخد اللينك بتاعه من الـ properties
هو مش مربوط بأي لينك
مجرد بانر بس
وأنا ضيفته عند خمسة فضفضة كمان

امنية يقول...

مبروك يا طعمة الرقم الجديد
بعد الفتره دى من استخدامك للاتصالات
حاسه بفرق؟
اصلى بفكر اجيب برضو


وحشانى جدا
متتأخري علينا بقى

السفاحه:D

إيمان الحسيني يقول...

ههههههههههههه
سفاحة حارة زعتر بذات نفسها في مدونتي

منورة يا أمنية
ربنا معاكي في الامتحانات
والله ليكم وحشة يا بنات
خلصوا بقى على خير علشان نتقابل إن شاء الله تعالى

بالنسبة لاتصالات
الفرق بينه وبين خطي السابق (فودافون)
إن الكارت باشتريه بقيمته بدون أي زيادات
الـ 100 بـ 100
والـ 10 بـ 10

الحاجة الثانية
إن خدمة النت مفتوحة بدون أي اشتراكات زي فوادفون لايف أو موبينيل لايف

الحاجة الثالثة
فيه عرض دلوقتي إن كل ما تتكلمي دقيقة كل شهر الشركة بتنزلك 5 دقايق مجانا من عندها

الحاجة الرابعة
إن لو حد اتصل بيكي وموبايلك مقفول الشركة بتبعتلك رسالة تبلغك بالرقم إللي اتصل بيكي

بالنسبة للشبكة عامة
ممتازة في اتصالاتها ومافيهاش مشاكل لحد دلوقتي والحمد لله

امنية يقول...

هغيره بس لماافضاله بقى ان شاء الله
هبيع الموبيل واشترى الخط :d

إيمان الحسيني يقول...

حرام عليكي يا شيخة
هتبيعي الموبايل علشان تشتري خط بـ 18 جنيه ؟!!!!
استلفيهم مني يا ستي وابقي أسطيهم براحتك :P

امنية يقول...

ايه ده ؟
18 جنيه
احم
هبيع سى دى الفوتوشوب واجيب الخط
:d

إيمان الحسيني يقول...

طب ابقى اطلبي مني حاجة تاني

:)