ترويع الآمنين بما أحل الله !!!

مش عارفة إزاي ممكن ده يحصل بس فعلا هو بيحصل
فعلا ممكن إنك تروّع إنسان آمن وتبدل أمنه لخوف وهدوؤه لقلق بمجرد إنك تتلفظ بما أحله الله في الأساس
ويمكن كتير مننا بالشكل ده بيتبع مبدأ ميكافيللي : الغاية تبرر الوسيلة .
أو المبدأ الإسلامي العربي الأصيل عندنا : كلمة حق يُراد بها باطل .
لما الزوج يفضل كل شوية يهدد زوجته بإنه هيتزوج عليها – وهو مش ناوي أصلا ولا عنده المقدرة على كده – لكن كل شوية يردد عليها الكلمة دي علشان يحقق غرض في نفسه ألا وهو كسر الزوجة وإخضاعها له
وعلشان يوصل لتحقيق الغرض ده قرر إنه يستخدم ترديد أمر أباحه الله وأحله ألا وهو التعدد
بس هل ربنا لما أباح التعدد أباحه علشان الرجل يهدد زوجته بيه كل شوية ويروع أمنها ويخليها تتخيل الحياة كما يصفها الزوج في حالات العِند والغضب : هاسيبك كده لا طايلة سما ولا أرض وهاروح أتجوز واحدة تانية ؟!!!!!
مجرد إن الرجل يتحدث في أمر وهو عارف كويس قوي إن الأمر ده بيهدد أمن إنسانة من المفترض إنها زوجته وفي نفس الوقت هو بيهدد فقط لكن مش ناوي يعمل أي حاجة ... هل التهديد ده يليق بمستواه كرجل ربنا ترك القوامة أمانة بين إيديه ؟!!!!
ده طبعا غير التهديد الشائع جدا في مجتماعتنا الإسلامية ألا وهو التهديد بالطلاق في كل كبيرة وصغيرة
حتى لما بيكون الزوج وسط أصحابه تلاقيه يحلف بالطلاق لمجرد إنه يثبت وجهة نظره
طب المسكينة إللي ممكن تكون اطلقت بالفعل دي ... ذنبها إيه في هزار زوجها مع أصحابه ؟!!!
ولما تلفت نظر الزوج لخطورة الأمر ده يرد عليك بمنتهى البساطة : أنا مش قصدي حاجة ... أنا كنت باهزر ... أو ... أنا كنت باهددها بس !!!
وهو غافل عن حديث رسول الله (صلى الله عليه وسلم) : ثلاث جدهن جد ، وهزلهن جد : النكاح والطلاق والرجعة ... صححه الألباني .
وبالرغم من إن الطلاق أمر مُباح في الإسلام عند استحالة العِشرة ما بين الزوجين بالمعروف لكن استخدامه هنا في غير محله بالمرة
يا جماعة ياللي بتزرعوا الرعب والخوف في حياة من ملككم الله أمرهم افتكروا كويس إن ربنا أمر رسول الله (صلى الله عليه وسلم) بتأمين الكافر حتى يسمع كلام الله
" وَإِنْ أَحَدٌ مِّنَ الْمُشْرِكِينَ اسْتَجَارَكَ فَأَجِرْهُ حَتَّى يَسْمَعَ كَلامَ اللَّهِ ثُمَّ أَبْلِغْهُ مَأْمَنَهُ ذَلِكَ بِأَنَّهُمْ قَوْمٌ لاَّ يَعْلَمُونَ " التوبة (6)
فما بالكم بترويع أمن المسلمين المُوحدين ؟!!!
يا ترى فيه كام بيت حوالينا بتُحرم فيه الزوجة من النوم بالليل لأنها قاعدة مستنية اليوم إللي حيهجرها فيه الزوج ويسيبها كالمعلقة علشان يروح يتجوز عليها ؟!!!
ويا ترى فيه كام بيت حوالينا عايشين فيه الأزواج مع بعض داخل علاقة غير مشروعة نتيجة لترديد الزوج لكلمة الطلاق عمال على بطال ؟!!!