الاثنين، مايو 07، 2007

ترويع الآمنين بما أحل الله !!!

مش عارفة إزاي ممكن ده يحصل بس فعلا هو بيحصل
فعلا ممكن إنك تروّع إنسان آمن وتبدل أمنه لخوف وهدوؤه لقلق بمجرد إنك تتلفظ بما أحله الله في الأساس
ويمكن كتير مننا بالشكل ده بيتبع مبدأ ميكافيللي :
الغاية تبرر الوسيلة .
أو المبدأ الإسلامي العربي الأصيل عندنا : كلمة حق يُراد بها باطل .
لما الزوج يفضل كل شوية يهدد زوجته بإنه هيتزوج عليها – وهو مش ناوي أصلا ولا عنده المقدرة على كده – لكن كل شوية يردد عليها الكلمة دي علشان يحقق غرض في نفسه ألا وهو كسر الزوجة وإخضاعها له
وعلشان يوصل لتحقيق الغرض ده قرر إنه يستخدم ترديد أمر أباحه الله وأحله ألا وهو التعدد
بس هل ربنا لما أباح التعدد أباحه علشان الرجل يهدد زوجته بيه كل شوية ويروع أمنها ويخليها تتخيل الحياة كما يصفها الزوج في حالات العِند والغضب : هاسيبك كده لا طايلة سما ولا أرض وهاروح أتجوز واحدة تانية ؟!!!!!
مجرد إن الرجل يتحدث في أمر وهو عارف كويس قوي إن الأمر ده بيهدد أمن إنسانة من المفترض إنها زوجته وفي نفس الوقت هو بيهدد فقط لكن مش ناوي يعمل أي حاجة ... هل التهديد ده يليق بمستواه كرجل ربنا ترك القوامة أمانة بين إيديه ؟!!!!
ده طبعا غير التهديد الشائع جدا في مجتماعتنا الإسلامية ألا وهو التهديد بالطلاق في كل كبيرة وصغيرة
حتى لما بيكون الزوج وسط أصحابه تلاقيه يحلف بالطلاق لمجرد إنه يثبت وجهة نظره
طب المسكينة إللي ممكن تكون اطلقت بالفعل دي ... ذنبها إيه في هزار زوجها مع أصحابه ؟!!!
ولما تلفت نظر الزوج لخطورة الأمر ده يرد عليك بمنتهى البساطة : أنا مش قصدي حاجة ... أنا كنت باهزر ... أو ... أنا كنت باهددها بس !!!
وهو غافل عن حديث رسول الله (صلى الله عليه وسلم) : ثلاث جدهن جد ، وهزلهن جد : النكاح والطلاق والرجعة ... صححه الألباني .
وبالرغم من إن الطلاق أمر مُباح في الإسلام عند استحالة العِشرة ما بين الزوجين بالمعروف لكن استخدامه هنا في غير محله بالمرة
يا جماعة ياللي بتزرعوا الرعب والخوف في حياة من ملككم الله أمرهم افتكروا كويس إن ربنا أمر رسول الله (صلى الله عليه وسلم) بتأمين الكافر حتى يسمع كلام الله
" وَإِنْ أَحَدٌ مِّنَ الْمُشْرِكِينَ اسْتَجَارَكَ فَأَجِرْهُ حَتَّى يَسْمَعَ كَلامَ اللَّهِ ثُمَّ أَبْلِغْهُ مَأْمَنَهُ ذَلِكَ بِأَنَّهُمْ قَوْمٌ لاَّ يَعْلَمُونَ " التوبة (6)
فما بالكم بترويع أمن المسلمين المُوحدين ؟!!!
يا ترى فيه كام بيت حوالينا بتُحرم فيه الزوجة من النوم بالليل لأنها قاعدة مستنية اليوم إللي حيهجرها فيه الزوج ويسيبها كالمعلقة علشان يروح يتجوز عليها ؟!!!
ويا ترى فيه كام بيت حوالينا عايشين فيه الأزواج مع بعض داخل علاقة غير مشروعة نتيجة لترديد الزوج لكلمة الطلاق عمال على بطال ؟!!!

هناك 14 تعليقًا:

كراكيب عادل يقول...

من اتخذ يمين الطلاق في كل الحالات وتلفظ بة اكثر من مرة او ليثبت بة حق او باطل فهو جاهل

وباختصار شديد

لايستحق ان يكون لة زوجة من اصلة

لان الزواج وصف من الله بالميثاق الغليظ

عدى النهار يقول...

كل ما قلتيه سليم وصدقينى لو مثل هذا "الا" رجل وجد من يردعه (أو يكسر شوكته) هايراجع نفسه ألف مرة قبل أن يسىء لزوجته بكلمة أو تصرف. أو يتعامل بعنف مع أولاده

Ahmed يقول...

للاسف دي كلها حاجات طلعنا لاقينا المجتمع شغال بيها ومش بس كده لا دا كمال التلفزيون المحترم بينشرها في الافلام والمسلسلات ، لكن انا من رأيي ان كل واحد يعمل كده دا يبقى راجل عديم الرجولة والمروئة والنخوة ومش عايز امد في الكلام واقول ملوش دين
لكن ندعو الله بالهداية لكل صاحب لسان سايب
وان يتقي الله فيما اعطاه ورزقه

3adow azzolmah يقول...

بالنسبه للعنوان أعتقد به لغط شرعى أختى الفاضله فماأحله الله لايعتبر أمر مروع....فكل ماأنزل من تشريع مانزلت الا لصالحنا نحن المسلمون وأيضا غير المسلمين...لكن المشكله فينا نحن كمسلمين لما لا نستخدم الشرع ونصرفه لمصلحتنا فأنت تتحدثين عن الزوج الذى يهدد دائما بأنه سيتزوج على زوجته....ليتزوج عليها فلاضير من ذلك...لكنه تبع كلامه وقال" هاسيبك كده لاطايله سما ولا أرض" وهذا هو عين الظلم والاجحاف فعندما شرع الله الزواج وتعدده وضع شروط كثيره جدا وشدد من هذه الشروط حتى لاتخرب البيوت وتدمر المجتمعات فقال فى القرآن"فإن خفتم ألا تعدلوا فواحدة" اذا الأساس فى تعدد الزوجات هو العدل بين الجميع فى الابتسامه والمعامله وفى كل شئ يشتركان فيه من الحقوق الشرعيه الواجبه على الزوج...لكن النوعيه التى تتحدثين عنها من الرجال -وما أبئسهم من رجال وما أظلمهم لأنفسهم- فهؤلاء عندما يقولون ذلك فانما يقولونه من باب التهديد بالظلم والجور للأولى .....أما حديثك عن كثرة الحلف بالطلاق فالأمر أصبح بسيطا وسهلا أن يحلف بالطلاق لعدة أمور:
1-الجهل بالشريعه /فالآن الناس لايفقهون شئ عن دينهم فقد انشغلوا بدنياهم والكلام بهذا الباب يحتاج لصفحات حتى نوفيه حقه..
2- وجود أشخاص يدعون أنهم علماء يبيعون الفتاوى بالمال وللأسف هم متخرجون من جامعات ومعروفون بمجتمعاتهم فهؤلاء يسهلون الأمر فربما يكون الزوج قد طلقها بالثلاث ولا تحل له ويذهب لهذا وذاك والكل يجمع على أنه لاتحل له وينتهى به الحال لأحد هؤلاء فيبيعه فتوى ويشرعن له العيش مع امراة أصبحت أجنبيه عنه أعاذنا الله واياكم....

مجتمعنا يجمع(الجهل,الفقر,والمجون)وهذه أم الكوارث..وان شاء الله أفرد لها موضوع بمدونتى...
ربنا يوفقك وادعيلى اعدى امتحانات آخر سنه دى لأنى صراحه محتاج دعواة البرره أمثالكم .......وغير البرره-ابتسامه-
أخوكم/عدو الظلمه......

ـــــ
ادعوكِ واخوانى واخواتى لزيارة مدونتى لإنى جديد العهد بغوغل فكل مدوناتى كانت على مكتوب...

رفقة عمر يقول...

انا عارف ناس اتطلقوا وولا ميه مرة وعايشبن مع بعض عادى جدا وسبحان الله دلوقتى مافيش مشاكل بينهم علشان خلاص الشيطان استريح وعارف انهم عايشين حرام وهو دة اللى عايزة وكله برضه من قله الدين والعلم

محمد عبد الغفار يقول...

انت شاده حيلك على الرجاله كده ليه ، بالراحه علينا يا حاجه

ما زكرتيه صوره من صور الجهل الضارب بجذوره هنا وهناك رجال وسيدات متعلمين واميين ريف وحضر كله كله

إيمان الحسيني يقول...

جزاكم الله جميعا خير الجزاء
وأسأل الله أن يُرينا الحق حقا ويرزقنا اتباعه
وأن يُرينا الباطل باطلا ويرزقنا اجتنابه
اللهم آمين


أخي العدو الظلمة
ما قصدته من العنوان هو ما يحدث في الواقع
بعض المسلمين - إلا من رحم ربي - يستخدمون ما أحله الله في فعل ما حرمه الله


أخي محمد عبد الغفار
والله أنا مش شادة حيلي عالرجالة ولا حاجة
بس بقى فيه ظواهر غريبة في المجتمع مصدرها الرجالة فعلا
أقسم بالله العظيم إن زميل ليا في الشغل كبير في السن قاللي بالنص : مابقاش فيه رجالة خلاص !!!
طبعا مش المقصود التعميم
بس هو عنده بنت وخايف عليها برضه من مسألة الزواج والاختيار الخطأ بعد إللي شافه وسمعه من أقاربه ومن إللي حواليه بوجه عام

والله المستعان

ma 3lina يقول...

*************
علشان يحقق غرض في نفسه ألا وهو كسر الزوجة وإخضاعها له
*************
طبعاً اللي يهدد بالتعدد أو بالطلاق من أجل هذا الغرض دا إنسان مريض بعيد عن دين الله ولا يستحق القوامة التي وضعها الله في يده

لكن اسمحي لي فيه ناس تانية وهم في رأيي المتواضع الأكثرية بتهدد بالتعدد والطلاق وهم لن يفعلوا لسبب تاني وأظن إني ممكن اكون منهم .. السبب هو الحبشتكنات

والحبشتكنات دي شطة ما بين الأزواج بتخلي العيشة ظريفة خالص ..

حقول لحضرتك سر من اسرار الرجال .. الرجل دايما في حاجة للشعور بإنه مرغوب فيه وإنه لا غنى عنه لدي الأم قصدي لدى الزوجة .. ما هو زي ما الكل عارف الرجل طفل مدلل كبير .. والمشكلة ساعات كتيييير الزوجة بتتقل في التعبير عن حبها وحاجاتها للزوج .. فتلاقيه بلا وعي كده يحط شطة عشان يطلع مشاعرها المندفسة في المطبخ والشغل والمذاكرة للعيال .. المشكلة اللي تفرس إن الستات ردهم الدائم على التهديد .. طيب ما تتجوز وانا مالي ..

أظن الستات عندهم برضه حبشتكنات قياس الغلاوة دي برضه .. من نوعية حسين صاحب أخويا كان حيموت عشان يتجوزني ...

رأيي إن عشان الرجالة يبطلوا يهددوا بما أحل الله هو إن الست تعرف حاجات زوجها وتلبيها ودا مفيهوش عيب ..

وطبعاً الزوج كمان لازم يعرف احتياجات زوجته ويلبيها ليها

ساعتها لا حفكر اطلق ولا اتجوز واحدة تانية إلا بموافقتها ورضاها ولا اهدد بالجواز بواحدة تانية

دي وجهة نظر متواضعة واعتذر عن الإطالة واضم صوتي لصوت سي محمد عبد الغفار ... بالراحه علينا

إيمان الحسيني يقول...

ههههههههههههه
والله يا أخي الكريم انتوا حيرتونا معاكم

إذا كان الرجل بيحب يشعر إنه مرغوب فيه بنسبة 100%
فالمرأة تحب تشعر إنه مرغوب فيها بنسبة 200%
ودي طبيعة خلق كل منهم
وفيه مليون وسيلة يقدر الزوج بيها يخلي زوجته تظهر مشاعرها من غير ما يخوفها أو يحسسها بالتهديد

يا أخي الكريم الرجل ممكن يطلب ده بشكل صريح
لكن المرأة تعمل إيه إذا كان زوجها منفضلها ؟
وعذرا لاستخدام لفظ عامي زي ده :)

أقسم بالله العظيم إن فيه زوجات من قلة اهتمام أزواجهم بيهم بدأوا يطلبوا أزواجهم للفراش بشكل صريح
ورغم انكسار الزوجة في لحظة زي دي
لكن برضه تلاقي الزوج بيتكبر ويرفض
وفي بعض الأحيان بيتهم زوجته بقلة الأدب والحياء !!!


الأكيد في الموضوع إن تقوى الله هي الحل

أمــانــى يقول...

الســلام عليكم
كالعادة اختى الفاضلة موضوعات جميلة زيك
امال بقى اللى بيرميها كل شوية وفى وجودها انا من رايى ده اصلا ميعرفش ايه طلاق ولا يعرف دين الله ولا شرعه
نجى بقى للتهديد انا بقى اللى باشوفها كتير ولا الزوجة ملاك ولا الزوج برضو ملاك ولا شياطيين
هو اسوء ما فى الموضوع ازاى التانى يضغط على الاخر علشان هو عارف ان حب التانى اكثر له وانه ميقدرش يستغنى عنه وعلى فكرة مش علشان الراجل عنده القدرة على الطلاق والتعدد للاسف الشديد حتى الزوجة لها اسلوبها يعنى ايه معناها لما هى تخيره بينها وبين والدته برضو عدم خوف من الله وتعسف
يبقى المشكلة فى التعسف فى استعمال الحقوق
اذا لم يوجد خوف من الله فيبقى الاتنين من المفروض الناس تخاف منهم
تحياتى لكى

Dr.khaled يقول...

اختنا الاستاذة/طعمة
انت قلتي (وما ذنبها) ؟؟؟

نعم
الذنب ذنبها وذنب ابيها او ولي امرها -اجمالا-

لان احدهم لم يحسن الاختيار

واقول ...في هذا الامر
عادة اللي بيقول الكلام ده
على الطلاق وعلي الحرام من ديني
ويا ابن دين كذا...

الغالب...او كله
مبيبقاش وليد اللحظة
بل انه قد تعود على هذه النوعية من الكلام في حياته
فوجب ان يسأل الاهل عن اخلاق الخاطب ودينه قبل ان يوافقوا على تزويج ابنتهم منه
مش معنى ان البنت خايفة القطر يفوتها -زي ما بعض الناس بتقول- يبقى خلاص تتجوز اي واحد والسلام

اقول...: افضل لها من ان تبقى طوااال عمرها بدون زوج
ولا انت تفتن في دينها بسبب زوج الظاهر منه الفساد...
على كل...
الشيخ ابو اسحاق قال كلمة طيبة جدا في المسالة دي
قال :
الراجل اللي كل شوية عمال يقول لمراته هطلقك وعلي الطلاق وكده
الراجل ده بينزل من نظر الزوجة
وبتحس انه مش راجل
لانه عمال يتكلم ويهدد وخلاص ولا بيطلق ولا غيره
تحليل من وجهة نظر جيدة -برأيي-
نسأل الله السلامة والعافية وحسن الخاتمة
وان ييسر للشباب والفتيات الزوج الصالح

تنويه :
لماذا لم تشتركي حتى الآن في موقع افحت؟؟؟

طفضلا زوري مدونتي وستجدي زرار افحت في المدونة

ولمزيد من الاطلاع على موضوع افحت
تفضلي بزيارة مدونة اخونا الاستاذ/الديب
هنا

http://eldeebs.blogspot.com/2007/05/blog-post_07.html

وفقكم الله والسلام عليكم ورحمة الله

الربان يقول...

تحياتي

الحياة تحت الضغوط و التهديد بتصبح كالعدم...

و التهديد و الوعيد في الحياة الزوجية يؤدي الي الانهيار... الاصل ان الزواج هو سكن و موده و رحمه.... غير هذا يبقي اي شيء أخر ...لكن ليس بزواج.

الزوج لزوجته لباس ...يعني الثوب الذي يحتويها...فلا يظهر مفاتنها أو عيوبها... اي الحنان و الرحمة ...
و كذلك الزوجه ...هي نفس الشيء للزوج

ياريت كل واحد و و احدة يقفوا مع نفسهم وقفة صدقة ...و يعرف كل و احد فيهم أين هو من الزواج الذي يريده الله
و أين هو من سنه الرسول الكريم في معاملة الزوجة....

تحياتي و شكرا علي هذا الموضوع و يارب
كلنا نحاول نصلح من أنفسنا حتي تنصلح دنيانا و أخرانا.

كرم مسلم يقول...

السلام عليكم
الحقيقة انا شايف أن السبب وراء ذلك هو عدم فهم السبب الحقيقى من الزواج
قال عمر بن الخطاب رضى الله عنه
:::
والله إني لأكره نفسي على الجماع رجاء
أن يخرج الله مني نسمة تسبح الله

الذى يهدد زوجته بالطلاق أو هذا الذى يهرج مع اصدقاءه هل عرف الان الغرض من زواجه

فى سبب تانى ولكن اشار اليه الاخ خالد الا وهو الاختيار

ربنا يوفقك أختى الفاضلة

masry يقول...

أزمة أخلاق في وقت يحكي الكثير عن الصحوه الاسلاميه ,اين هي الصحوه الاسلاميه ولا هي صحوه فقط داخل المسجد ؟