الجمعة، مايو 11، 2007

جاوب بينك وبين نفسك




في يوم من الأيام وأنت بتبص في المراية ... وشايف نفسك بوضوح ... ولقيت إن عندك نعم كتيرة جدا ربنا مَن عليك بيها ...
يا ترى في اليوم ده افتكرت إنك تشكر ربنا على نعمه الكتيرة عليك ؟
" قُلْ هُوَ الَّذِي أَنشَأَكُمْ وَجَعَلَ لَكُمُ السَّمْعَ وَالْأَبْصَارَ وَالْأَفْئِدَةَ قَلِيلًا مَّا تَشْكُرُونَ " الملك (23)
أخدت بالك من كلمة (قليلا ما تشكرون) ؟
مش كفاية إنك تقول الحمد لله ...
ومش كفاية إنك تتكلم عن النعمة دي ... " وَأَمَّا بِنِعْمَةِ رَبِّكَ فَحَدِّثْ " الضحى (11)
شكر النعمة كما يجب بيكون باستخدامها فيما يُرضي الله ...

لو نظرك قوي ما شاء الله وبتقدر تشوف وتستمتع بالألوان والمناظر الحلوة حواليك ... افتكر إن ليك أخوة وأخوات فقدوا نعمة البصر في حياتهم أو خُلقوا من غيرها ... افتكر إنهم ما يعرفوش يعني إيه ألوان أو أشكال لإنهم ماشافوهاش قبل كده أصلا ... ولو عاوز تعيش التجربة غمض عنيك لمدة 10 دقايق وشوف هتقدر تتصرف إزاي من غير بصرك ... افتكرهم كويس قوي ... واشكر ربنا على إنه إداك نعمة البصر بإنك تقف جنبهم وتساعدهم في ظلامهم علشان تحوله لنور ... اقرالهم الحروف واكتبلهم الجُمل وخليك معاهم في دراستهم وامتحاناتهم ... وصدقني هتلاقي نفسك يوم نجاحهم فرحان أكتر منهم ... عارف ليه فرحان ؟ لإنك أديت شكر النعمة كما يجب ... وافتكر دايما قول الله تعالى في سورة الحج : " فَإِنَّهَا لَا تَعْمَى الْأَبْصَارُ وَلَكِن تَعْمَى الْقُلُوبُ الَّتِي فِي الصُّدُورِ " ... فقدان البصر مش عيب ... لكن موت القلوب هو إللي مأساة .

ولو أنت قادر تسمع أنغام حلوة وأصوات عذبة وبترد على أي حد يسألك بلسان طلق ... افتكر إن ليك أخوة وأخوات حُرموا من نعمة السمع والكلام ... جرب تتعامل مع إللي حواليك بلغة الإشارة من غير ما تنطق ولا حرف ... ساعتها بس هتحس بمعانتهم وإحساسهم بالغربة وسط عالم كله بيسمع وبيتكلم ... هتحس بوحدتهم وإنعزالهم عن الدنيا كلها لإحساسهم بإنهم مش كفؤ للاختلاط بالناس ... ساعدهم على الخروج من عزلتهم دي بإنك تكون ودانهم إللي بتسمع ولسانهم إللي بيتكلم ... اتعلم لغة الإشارة الخاصة بيهم وحسسهم إنهم مهمين جدا في حياتنا علشان كده اتعلمت لغتهم ... عرفهم إنهم جزء مننا ومش ممكن أبدا نستغنى عنهم.

ولو أنت عايش في ظل رعاية والدك ووالدتك ... وكبرت وأنت ساكن جوا بيت بتقول فيه كلمة بابا وماما بمنتهى الحرية ... وآخر اليوم بتتجمعوا كلكم علشان تاكلوا مع بعض ... ويوم مرضك لقيت إللي سهران جنبك ... ويوم أجازتك لقيت إللي بيفسحك ... افتكر وقتها إن فيه أطفال مايعرفوش معنى كلمة عائلة لإنهم حُرموا من وجود الأب والأم جنبهم ... افتكر معاناتهم نتيجة لنبذهم لمجرد إنهم أيتام ... افتكر نبيك محمد (صلى الله عليه وسلم) وإزاي اتيتم من قبل ما يتولد حتى ... عاوز تشكر ربنا على نعمة العائلة إللي أنت عايش وسطها ؟ ونفسك تبقى رفيق للنبي الحبيب في الجنة ؟ نفذ وصيته واكفل يتيم ... وكُن على يقين من إنك رفيقه بإذن الله تعالى في الجنة ... " أنا وكافل اليتيم في الجنة كهاتين ، وأشار إلى السبابة والوسطى" رواه البخاري ... وكفالة اليتيم مش مجرد مبلغ هتدفعه أول كل شهر وتمشي ... خليك جدع ... اقضي من وقتك ولو نص ساعة مع الأيتام ... تحس بيهم ويحسوا بيك ... وتزرع الأمان في قلوبهم بإنهم مش لوحدهم في الدنيا ... وإن ليهم ضهر وسند .

ولو أنت بصحتك ما شاء الله ومش بتعاني من أي مرض ... وبتلعب رياضة وبتجري وتمرح ... افتكر إن فيه ناس المرض منعهم من الخروج أو إنهم يشوفوا ضوء الشمس حتى ... افتكر إنهم نايمين ليل ونهار في السرير وجنبهم أدوية كتيرة بتخفف عنهم آلامهم الجسدية ... واعرف دورك الحقيقي في إنك تخفف عنهم آلامهم النفسية ... روح زورهم واقضي معاهم يوم أو حتى ساعة من وقتك ... وعرفهم إننا مش بعيد عنهم ولا خايفين من مرضهم ... وأكدلهم إنهم على عينا وراسنا وفاكرينهم في كل وقت ... وخلي بالك إن دعوتك عند زيارة المريض مقبولة بإذن الله ... عارف ليه ؟ اقرا الحديث القدسي وأنت تعرف : " يا ابن آدم مرضت ولم تعدني ، فيقول : فكيف أعودك وأنت رب العالمين ؟ فيقول : مرض عبدي فلان أما تعلم أنك لو عدته لوجدتني عنده " .

وماتنساش آباءك وأمهاتك من المسنين ... وتخيل – لا قدر الله – لو والدك ووالدتك كبروا في السن ومالقوش إللي يرعاهم أو يهتم بيهم أو يديهم دواهم ... هتحس بإيه وقتها ؟ ... وخلي كلام الرسول (صلى الله عليه وسلم) دايما قدام عنيك : " ليس منا من لم يرحم صغيرنا ويوقر كبيرنا " صحيح الجامع ... مش معقولة يبذلوا علشانا شبابهم وننساهم في كبرهم وعجزهم !!!!

وتأكد بإنك كل ما هتشكر ربنا ... كل ما هيزيدك ربنا ...
" وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ " إبراهيم (7) .

إيمان الحسيني

هناك 28 تعليقًا:

رفقة عمر يقول...

مواضيعك دايما كلها حلو
ونسيتى تقولى ان من شكر النعمه عدم استخدامها فى الحرام
زى النظره الحرام الكلام البذئ والغيبه والنميمه
المشى الى اماكن الفسق
استخدام اليد فى الرشوة والسرقه او التحرش بالبنات
الكف عن كل هذا ايضا من شكر النعمه
وفققك الله ورزقكى الزوج الصالح الذى يستحقك اللهم امين قريبا انشاء الله بس ابقى اعزمينا

إيمان الحسيني يقول...

ربنا يكرمك ويعزك يا رفقة عُمر

ماهو أنا من ضمن الكلام قولت :
شكر النعمة كما يجب بيكون باستخدامها فيما يُرضي الله

أسأل الله العفو والعافية لي ولكِ ولجميع المسلمين
اللهم آمين

عدى النهار يقول...

"وذكر إن الذكرى تنفع المؤمنين"

إيمان الحسيني يقول...

جزاك الله خير الجزاء يا عدى النهار

محمد مصطفى يقول...

جزاكم الله عنا خيرا يابشمهندسة
في إنتظار عودتك
ابتسامة
بارك الله فيكِ

يا مراكبي يقول...

رغم إن الموضوع أكثر من رائع إلا إن العنوان كان مؤلم للغاية ومحرج للغاية .. أخفض رأسي خجلا

جزاك الله خيرا على هذه التذكرة وأدعو الله عز وجل أن يلهمنا شكره وذكره وحسن عبادته

إيمان الحسيني يقول...

منور المدونة يا محمد :)
تقبل الله منا ومنكم صالح الأعمال
اللهم آمين

إيمان الحسيني يقول...

نسأل الله العفو والعافية يا مراكبي

الواحد مجرد ما يجيله دور برد ولا شوية صداع بيتأفف ويغضب ويتدايق من قدر الله
فما بالك بالناس إللي أنا ذكرتها في الموضوع ؟
سبحان الله
كتير منهم صابر وراضي ومتقبل حياته زي ما ربنا كتبهاله

سمعت كلمة جميلة جدا من أحد العلماء :
في أمور الدنيا ... انظر لمن هو أقل منك وقُل الحمد لله
وفي أمور الدين ... انظر لمن هو أعلى منك وتنافس معه

نسأل الله العفو والعافية
اللهم آمين

masry يقول...

بوست جميل وجزاك الله خيرا عليه

إيمان الحسيني يقول...

وإياكم يا مصري :)

طهقان يقول...

اطالب بعودة البلوج للديزاين الالولاني
لاني جالي عما بصراحة

الاول كان افضل بكثير مع احترامي للمضمون

مشروع انسان يقول...

وان تعدوا نعمة الله لا تحصوها

Ahmed يقول...

فعلاً نعم الله كتيرة بس مين يحس ويعرف
اللهم لك الحمد والشكر على كل نعمك
ما نعلمها ومالا نعلمها

إيمان الحسيني يقول...

سبحان الله يا طهقان أفندي :)
فيه ناس ارتبطوا بالديزاين الأولاني
لكن ما رفضوش الجديد
معلش ... يومين تلاتة وتتعود عليه :)

إيمان الحسيني يقول...

جزاك الله خير الجزاء يا إمام الجيل

إيمان الحسيني يقول...

جزاك الله خير الجزاء يا أحمد
اللهم أعنا على ذكرك وشكرك وحُسن عبادتك
اللهم آمين

كرم مسلم يقول...

السلام عليكم
أشكر نعمة ربك عليك
فكم من نعمة وهبها الله للانسان وهو لا يوافى شكرها فلا يصرفها الى ما خلقت له فتجد من الناس من وهبه الله عز وجل نعمة الحفظ فتراه لا يصرفها فيما فيه فلاحها من حفظ كتاب الله عز وجل والسنة ، ومنهم من وهبه الله عز وجل ملكة الفهم والتدبر فلا تراه يستخدمها فى تدبر آى الذكر الحكيم والنصوص الشرعية ،وهكذا تجد الناس لا يشكرون الله عز وجل على نعمائه باستعمالها فيما يرضيه ، فيمحق الله عنهم تلك النعم
وهكذا تجد حال المسلمين اليوم
نسال الله عز وجل أ، يغير الحال الى أفضل حال ورد المسلمين الى دينهم ردا جميلا وارزقنا شكرك على الوجه الذى يرضيك عنا
اللهم امين
موضوع جميل اختنا الفاضلة ربنا يوفقق

غير معرف يقول...

جزاك الله خيرا
ايوه لازم حد يفكرنا على طول بنعمة ربنا علينا
لان الانسان دايما بينسى
اتمنى لو تزوري مدونتي وبالذات تدوينة هل انت سعيد وتقوليلي رايك

إيمان الحسيني يقول...

جزاك الله خير الجزاء يا كرم
وأدعو الله أن نكون من أصحاب القلوب والألسنة الشاكرة
اللهم آمين

إيمان الحسيني يقول...

منورة الموضوع يا لحظة
وأنا متابعة مدونتك من فترة
وكمان اعتبرتها من ضمن المدونات الصديقة :)

إيمان الحسيني يقول...

يا ربنا لك الحمد كما ينبغي لجلال وجهك وعظيم سلطانك

غير معرف يقول...

شكرا لمرورك ولكن انا من فترة نقلت الى البلوج سبوت


http://www.alomrla7tha.blogspot.com/

ارجو تعديل الرابط لديك وشكرا جزيلا لمتابعتك وتعليقك الجميل

غير معرف يقول...

تعليق خارج الموضوع

لسة منزلة اللوجو اللي انت صممتيه من اجل تدوين نظيف
وقلت لازم اشكرك بنفسي

جزاك الله خيرا

إيمان الحسيني يقول...

جزاكِ الله كل خير يا لحظة
وتم تعديل الرابط :)

khaled يقول...

مجهود جميل
جزاك الله خيرا

أُكتب بالرصاص يقول...

مبرووك على النيو لوك

جميل قوي
ولكن
اطالب بالعوده للديزاين الاولاني

من فات قديمه تاه:)

إيمان الحسيني يقول...

جزاناوإياكم يا خالد

إيمان الحسيني يقول...

الله يبارك فيك يا أكتب بالرصاص

وقليل من التغيير يبعث الكثير من النشاط :)