السبت، مايو 05، 2007

عندما تُختزل الحياة في رَجُل

- ماتيجوا نطلع نصيف ؟
- بلاش الصيف ده يمكن تتجوزي ونحتاج الفلوس لجهازك .
- نفسي أطلع عمرة ؟
- لما تتجوزي إبقي اطلعي مع جوزك .
- عاوزة أقدم في معهد إعداد الدعاة ؟
- استني لما نشوف العريس إللي متقدملك .
- يا أحمد ... سفرني أشتغل هناك ؟
- العمر هيتسرق منك هناك وإللي بتسافر مابتتجوزش .
- نفسي ألبس النقاب ؟
- لما تتجوزي إبقي اعملي إللي انتي عاوزاه .
الحوار ده - للأسف الشديد - بيدور في أغلب بيوتنا العربية
الحياة بأكملها بالنسبة للبنت تم اختصارها واختزالها في شيء واحد هو الزواج
ومطلوب منها تفضل تدور في فلك شخص واحد - حتى لو مالهوش وجود أصلا - الشخص ده هو الزوج
لإمتى يا أولياء أمورنا هتفضلوا تضيعوا مننا سنين عمرنا علشان مستنيين العِدل ؟
ليه ماحدش فيكم قادر يقتنع بإن الزواج رزق
والرزق يا إما مكتوب يا إما لأ
يبقى فيه احتمال كبير إن مايكونش مكتوب في رزق البنت إنها تتزوج
يبقى البنت تعمل إيه في وضع زي ده ؟
تضيع عمرها كله وهي مستنية عريس الغفلة إللي مش هيجي ؟
ولا تنتحر ؟
ولا المفروض إنها تعيش حياتها بما يُرضي الله وتسعى في كل جانب تقدر تسعى فيه ؟
وإذا كان مُقدر ليها الزواج يبقى هتتزوج
وإذا كان مش مُقدر ليها ...
يبقى على الأقل لقنت نفسها الإجابة لما تُسأل يوم القيامة عن عمرها فيما أفنته
ولله الأمر من قبل ومن بعد

هناك 30 تعليقًا:

أحمد سلامــة يقول...

مشكلة الفتاة الشرقية منذ بدء الزمان
الانطفاء
مش عارف هيجي الوقت اللي الناس تصدق فية كلمة ان الجواز ده قسمة ونصيب بدل ما بيقولوها 69 مرة في اليوم من غير ما يفهمو محتواها ولا لأ هنفضل كده بتقتل في العقول اللي كل زنبها اختلاف الكروموسومات
تحياتي لكي

Dr.khaled يقول...

موضوع طيب جدا يا استاذة

حقيقة
اكثر ما يجذب فيه
هو انه عندما تتحدث الفتاة -بنفسها - عن الالتزام
تجد من داخل بيتها حربا شعواء
متستني ياختي اما تتجوزي...انتي عايزة تعنسي جمبنا...
وهكذا
وكأن الدار الآخرة لا تعني الاباء والامهات في شئ
والله كم من فتاة اعرفها
منهن من ماتت وهي صغيرة...ومنهن من ماتت بعد ان وضعت المولود الاول وعمرها لا يتجاوز ال22 عاما ..ومنهن من كانت ذات جمال ومال وحسب ولم تتجوز حتى الان
ومنهن من كانت ليست على قدر كبير من الجمال ولا الحسب..ولا الدين ...ولكنها تزوجت
فسبحان الله

أود ان اعكس موضوعك واقول (عندما تختزل الحياة في امرأة)
الكثير من الشباب يدور في فلك اما الحب الوهمي واما وهم الزواج..وربما هو لم يفرخ بعد...
ويقضي عمره بين حلم ووهم ويفيق وطارق الموت يدخل عليه بلا مقدمات
والله المستعان

وفقك الله
====================
لكن يا استاذ احمد ممكن توضح لنا مقصودك من ان الفتاة الشرقية -طبعا اسمها المسلمة- تتميز ب (الانطفاء)
اصل المعنى ده جديد ومسمعتوش قبل كده
هل تقصد الانطواء ولا ايه؟؟؟
نرجو التوضيح
وفقكم الله
اخوكم/خالد

khaled يقول...

الدنيا بالنسبة للبنات اصصبحت تقاس على الرجال
يلا ما علينا
ربنا يهدينا اجمعين
بخصوص تغيير العداد
ادخلى هنا
http://www.rapidcounter.com/signup.php
و اختارى
see other styles
و شوفى اسم الاستايل القديم و اعرفيه و بعدين اختارى الاستايل الجديد و عدلى فى الكود بحذف اسم الاستايل القديم ووضع الجديد مكانه دون تغيير اى شئ اخر
يا اما تعملى واحد جديد بس تختارى
start at
و تكتبى فيه العداد بتاعك
وفقك الله

محمد عبد الغفار يقول...

فى جزئ تانى يضاف لكلامك الجميل الذى اتفق معاه جمله وتفصيلاً

وهو انها بعد متتجوز مبتعرفش تعمل حاجه بردو

غير معرف يقول...

لكل البنات
ادرسوا وسافروا قبل الجواز
لانك بعد الجواز مش هتعرفي تعملي اي حاجة غير واجباتك كزوجة وام
وان كنت دلوقت بتعيشي زي ما اهلك عايزين عشان رضاهم و عشان المجتمع
بكرة هتعيشي بالطريقة ايللي تراعي بيها جوزك واسرتك الصغيرة وكل اللي انت عايزاه هيفضل يتاجل لحد اما الصغار يكبرو او يدخلو المدرسه او لما
هم بدورهم يتجوزو
وهتبقى حياتكم سلسله لا منتهية من التاجيلات

Ahmed يقول...

ربنا يصلحلك ويصلحلنا حالنا

BinO يقول...

أعرفها
سمعت نفس الكلام
ولكنها فعلت العكس
لبست النقاب
درست في معهد اعداد الدعاة
طلعت عمرة مرتين
ألتزمت
مخطوبة وعلي وشك أن تتزوج
الحمد لله


جزاكي الله خيراًأختي في الله
ومبروك علي الشكل الجميل للمدونة

يا مراكبي يقول...

الله عليكي .. ده موضوع جميل جدا

لكن أكيد ليس المقصود منه هو الإستغناء الكامل عن الزوج والحياة الزوجية والأسرية وخلافه .. إنما المقصود هو عدم تجميد الحياة والطموحات والإنجازات ألى أن نتحقق من شخصية الزوج الذي ربما سيأتي .. وهذا للأسف ما يفرضه علينا مجتمعنا

مادامت الفتاة تلتزم بالضوابط الشرعية فلا مانع من أن تسير في طريق طموحاتها .. وذلك سيفيد الأمة بلا شك .. إلى أن يتعارض ذلك يشكل ما مع متطلبات الأسرة فيما بعد فذلك أمر آخر

أحييكي

إيمان الحسيني يقول...

جزاك الله كل خير يا أحمد
بس استوقفتني كلمة الانطفاء ؟
تقصد إن المجتمع بيطفيها وبيمنعها من حقها في المشاركة الحياة لمجرد إنها لسه ماتجوزتش ؟!!!!

إيمان الحسيني يقول...

جزاك الله خير الجزاء يا خالد
وبخصوص موضوع الالتزام فإحنا ولله الحمد اسرة ملتزمة
حتى مسألة النقاب فأنا باتبع فيها الرأي إللي بيقول إنه فضل مش فرض
لكن نفسي فعلا ألبسه
وطبعا في البيت مش موافقين لإني مازلت آنسة
وفاكرين إن النقاب هو إللي هيمنع زواجي
طب مانا أهو من غير نقاب بقالي 31 سنة ... اتجوزت ؟!!!!!

إيمان الحسيني يقول...

جزاك الله كل خير يا باشمهندس خالد
فعلا في مجتمعاتنا الشرقية حياة البنت بتتفصل على الرجل
مالهاش رأي - غالبا - في أي حاجة إلا إذا كان فيه رأي للرجل قبلها .

الله المستعان

جزاك الله خير الجزاء لإجابة السؤال :)

إيمان الحسيني يقول...

ربنا يكرمك يا محمد
ذكرت نقطة مهمة جدا
إن البنت مع الوقت بتتعود إنها مستنية الزواج وبس
وبعد ما بتتجوز حياتها بترجع تقف تاني
لأنها عملت إللي مطلوب منها وخلاص

إيمان الحسيني يقول...

دي مشكلة البنات كلها يا لحظة
بعد إنهاء التعليم تبدأ المطالب
اتخطبت ولا لسه ؟
يعد الخطوبة ...
هتتجوز إمتى ؟
بعد الجواز بشهر ...
حامل ولا لسه ؟
بعد الطفل الأول ...
مش ناويين تخاووه ؟
وهكذا .... :)

إيمان الحسيني يقول...

أحمد الحسيني
معلش اسمك جه في التحقيق :)
بس من غلبي والله
حاسه إن عمري ضاع عالفاضي :(
الله المستعان

إيمان الحسيني يقول...

جزاك الله خير الجزاء يا بينو
وأنا بإذن الله قررت فعلا آخد خطوة إيجابية السنة دي وبإذن الله هاقدم في معهد إعداد الدعاة
ادعولي بالتوفيق

إيمان الحسيني يقول...

جزاك الله خير الجزاء يا مراكبي
وهو ده والله إللي أنا باقوله
إللي في إيدي أنجزه وأشغل نفسي بيه
بدل من إني أفضل منتظرة شيء في علم الغيب الله أعلم إذا كان هيجي فعلا ولا لأ

أمــانــى يقول...

نفسى اجيب عربية لا مينفعش لان الجهاز اولى جهاز ايه مش عارفه
وتفتكرى لو عايزة تطلعى عمرة مين هيطلع معاكى اصلا مين فاضيلك اصلا ومراته اولى يطلع معاها ولا انتى
ربــنـــا يــكــرمك يااااااااااارب ويكرمنا ويكرم جمــيع المسلمين و المسلمات يـااااااااااارب آمـــين لما فيه الخير يـاااااااااارب آمــــين

إيمان الحسيني يقول...

ربنا يكرمنا جميعا يا أماني ويهدينا للصواب
اللهم آمين

Dr.khaled يقول...

ما قصدت ابدا ان بيتكم غير ملتزم
وهذا واضح
من مدونتك
ومدونة اخيكي الاستاذ/احمد

لكن انا لما باعلق على تدوينة لاي حد
باخد كلامه وبعدين اطرح وجهة نظري
وبالطبع انا كلامي مبيبقاش ليه وحده
ده ليا وليه وللي بيقرأوا
أظن ان وجهة النظر وضحت.....
وفقكم الله
ورزقت زوجا صالحا

عدى النهار يقول...

يمكن القلق الناتج عن تأخر الزواج يقل كثيراً لو أسلوب تعامل المجتمع مع الغير متزوجين تغير. يبدو أنه يجب أن يكون هناك قانون يفرض عقوبة رادعة على كل من يسيىء بأى شكل من الأشكال لشخص ما بسبب حاله أو حالتها الإجتماعية. شىء يغيظ أن يكون الشخص راضى و قادر على التأقلم مع حالته أو حالتها الإجتماعية ولكن الناس يرفضون ذلك التأقلم ويعبرون بكل وقاحة عن رفضهم لما لا يعنيهم. ربنا ييسر لك كل خير وأرجو أن تدرسى ما تريدين دراسته فعلاً وتجدى فيه تنمية لقدراتك ويساعدك على الحصول على عمل إن كنتى ترغبين فى العمل

وشوشات يقول...

شوفي يا طعومة.. أنا الحمد لله بطلت الحكاية دي بقالي كام سنة كده.. و كل ما أنوي حاجة و ماما تقول لي طيب خلي الفلوس دي عشان الجهاز أقوم مفكراها باتفاقنا و هي اني هاتصرف كإني مش هاتجوز خالص.. و هامشي في طريقي عادي خالص بدون قيود.. و الله لو الجواز جه في الطريق و من الشخص المناسب فأهلا به و ان لم يأت فقد عشت حياتي بدون انتظار ما لا يأتي.

إيمان الحسيني يقول...

جزاك الله كل خير يا دكتور خالد

إيمان الحسيني يقول...

المشكلة فعلا يا عدى النهار إن المجتمع بقى بيعمل اعتبارات للعادات والتقاليد على حساب الشرع

ردنا الله إليه ردا جميلا
اللهم آمين

إيمان الحسيني يقول...

مانا بقيت باتبع نفس السياسة دلوقتي يا علا
كل ماما ما تطلب مني أأجل حاجة وأستنى
أقولها : مانا مستينة بقالي 31 سنة ... هاسنى لحد إمتى بالضبط ؟
مجرد سماعها لعمري بيخليها تتراجع

والله المستعان

كراكيب عادل يقول...

اولا بحب اشيد بتصميم مدونتك

والحاجة التانية اختيار مواضيعك

مواضيع ذات قيمة ربنا يوفقك

شوفت الصور القديمة لفيلكا وسرحت كتير اصل انا من النوع الي الاماكن بتسكني قبل ما اكون سكنتها

بالنسبة لموضوعك الاخير

بفسرة بخوف شديد من الاسرة علي البنت وكانها قنينة زجاج

ساعات بيكون لة فايدة لو البنت مش مسؤولة عن تصرفاتها بس لو تم اختبارها في اكتر من موقف وثبت انها علي قدر من المسؤلية فدة ظلم

فية بنات والحق يقال كفائة

ربنا يحميك

إيمان الحسيني يقول...

ربنا يكرمك ويعزك يا عادل
بس التصميم عبارة عن قالب جاهز من الموقع ده

http://www.finalsense.com/services/blog_templates/index.htm

وإللي عرفته عن طريق مدونة تعليم الخاصة بأخونا الباشمهندس خالد

http://ta3leem-khaled.blogspot.com/

وأنا بس باحط فيه بعض اللمسات البسيطة جدا الخاصة بيا
زي عناوين القوائم إللي في السايد بار وبعض الصور والإعلانات :)


بالنسبة لموضوع اختزال الحياة بالنسبة للفتاة في رجل
فالخوف من الأهل على البنت مطلوب طبعا
بس لازم يكون ليه حدود علشان مايقتلوش روح البنت ويخلوها مجرد مؤدي لطلباتهم طول الحياة
أو بمعنى أصح
تفضل البنت طول حياتها منتظرة حد يوجهها ويحددلها مهام معينة علشان تقوم بيها لأنها ماباقيتش قادرة تتخذ أي قرار بنفسها
والله المستعان

الديب يقول...

دي اول مرة اشوف مدونتك ..

انا جيت من موقع افحت ..

بجد يارتني باقرالك من زمان ..

كلام ممتاز جدا .. جزاكي الله خيرا كثيرا

السلام عليكم

شهيدة يقول...

أختي طعمة
اولا أهنيك على المدونة الجميلة

والنشيد حلو أوي

أما بالنسبة للموضوع فاللي بتقوليه صحيح جدا جدا

يعني للاسف مجتماعاتنا لسة بتعتبر ان البنت انسان ناقص مش قادرة تاخد قرار لحياتها
أو انها مثلا غير قادرة عل العيش أو تحقيق أهدافها بمفردها

طبعا انا أبدا مش ضد حكاية الزواج
بالعكس تماما

لكن زي ما قلتي
لو كانت البنت دي مقدر لها ما تتجوزش هل هذا يعني انها مرت على الدنيا دي مرور الكرام بس؟ وانها ما كانش من حقهاتعمل بصمة خاصة ليها؟

تحياتي لك دائما

همسة قلم يقول...

فكرتيني بماما ياطعمة
كللما اقولها يامام عايزة اعمل كذا تقولي لما تتجوزي يبقى جوزك يسفرك يعملك يكذا يكذا

لما كرهته قبل ما اشوفه :D

البنت الشلبية يقول...

والله عندك حق
نفس الى بيحصل معايا
لكن انا بقى بقيت بصمم على الى انا عايزاه
لانى مقتنعة انه قسمة ونصيب فى وقته
وكمان مش هضيع حياتى على حلم ممكن ميتحققش
انا اعيش حياتى صح واستمتع بيها لحد ما ربنا يكتبلى الزواج

موضوع تمام
سلام