الجمعة، يونيو 01، 2007

ممكن تحكيلنا عن ردود أفعالك ؟

سؤال بسيط جدا
ماذا سيكون رد فعلك لو اتحطيت في موقف سخيف ولقيت إللي حواليك بيجبروك تعمل حاجة أنت مش مقتنع بيها أصلا أو مش قادر تعملها فعلا ؟!!!

أمثلة :
1- لو أنت ضيف عند ناس وعمالين يحلفوا عليك إنك تاكل وأنت خلاص مش قادر وحاسس إن بطنك هتنفجر – لا قدر الله – من كُتر الأكل ؟

2- لو أنت ضيف عند ناس بتؤمن بإنك لو سيبت شوية في كوباية العصير بنتهم هتبور ومش هتتجوز وبرضه نفس مُعلقة الأيمانات بتتردد على مسامعك وأنت برضه مش قادر ؟

3- لو أنت تعبان مووووت ونفسك تنام وجالك واحد صاحبك وفضل قاعد وكإن البيت بيته – عشمان فيك طبعا – ولا هو حاطت في باله إنك تعبان وعاوز تنام ؟

4- لو روحت تحضر عقيقة ابن جارك وفوجئت بإنهم عاملين سبوع وعمالين يعلقوا على رقبة الطفل حاجات غريبة منعا للحسد وطردا للشياطين ولما جيت تنصحهم بما يُرضي الله لقيت الكل منفضلك ؟

5- في النهاية ... نعمل إيه بقى علشان نفهم الناس إنهم يبطلوا يحلفوا بالله عمال على بطال علشان حاجات تافهة زي آخر قطمة من صانية البطاطس أو آخر شفطة من إزازة الحاجة الساقعة الـ 2 ليتر ؟!!!

افتكرت جورج سيدهم في مسرحية المتزوجون :
قدرة فول ياكلها حي بحاله ... آكلها أنا لوحدي ليه ؟!!!!!

هناك 18 تعليقًا:

علاء يقول...

بسم الله الرحمن الرحيم
يلا ..نبدأ على بركة الله

أول موقف :
هافضل مصر للاسف و مش واكل مهما عملوا لاني هاكون باتكلم بجد و فعلا مش قادر و هاقولهم بهزار لو كلت مش هتخلصوا مني و هابات عندكم
بس ده لأنكوا هتجيبولي دكتور

ثاني موقف :
مجتش يعني على البؤين اللي في قعر الكوبايه نشربهم و امرنا لله

ثالث موقف:
للاسف ساعتها مبعرفش اتصرف .. بس حصلت مرة اني نمت غصب عني لما كان صاحبي قاعد على الكومبيوتر و كان موقف محرج له جدا
بس كان غصب عني و الله

رابع موقف:
و الله حسب طريقة كلامي هيكون رد فعلهم
و لو طنشوا خلاص اقعد شوية و بعد كده استأذن

اعتقد انها فعلا ظاهرة خطيرة و منتشرة بشكل فظييع
باحاول دايما اقول لقرايبي و معارفنا
لكن للاسف تلاقيه كلها خمس دقايق و قام مألفلوا حلفان محترم ويقولوا
في ناس بتتسابق مين حلفانه أغلظ
أعوذ بالله
ربنا يهديهم
و أدينا بنحاول و مش ساكتين

أول زيارة لمدونتك
ربنا يباركلك
قيمة جدا

امنية يقول...

سلام عليكم

اول موقف: هقولهم هو انا غريبه؟؟
مانا لو جعانه هاكل هيتعبوا قلبى بس مش هاكل برضو


الموقف التانى : هو المفروض انى مش بسيب فى الكوبايه حاجه علشان يحلفوا عليها:D
ممكن اطلب تانى!
انتى عارفه اللى فيها بقى


الموقف التالت :
محرج جدا ومش هقدر اعمل حاجه غير انى اقاون وادعى ربنا انه يقدرنى على لصحيان لحد ما تنزل

الموقف الرابع :
مش هقدر امشى من غير ما اقولهم خاصه فهكلمهم بس باسلوب مهذب وهادى جدا لو اقتنعوا كان بها مقتنعوش يبقى انا عملت اللى عليا
:(

موضوع الحلفان عمال على بطال ده بقى مستفز
المصريين لأقل حاجه تلاقيهم يحلفوا
الموضوع محتاج على البدء فى التنبيه على النقطه دى فى التربيه من وهو صغير
انما مادام اتربى على ده الحلفان هتبقى كلمه عاديه جدا وممكن تبقى لازمه فى كلامه كمان
بس هل يحاسب عليها بما ان الاعمال بالنيات!!
عامه المفروض الحلفان ده يكون لشىء يستحق
مش احلف على صنيه بطاطس زى ما بتقولى:)

Ahmed AL-Hussany يقول...
أزال المؤلف هذا التعليق.
Ahmed AL-Hussany يقول...

السلام عليكم
انا هتصرف كده

الموقف الاول: اعتقد ان ده مش هيحصل لسبب بسيط هو ان خلاص الاكل هيكون خلص واخدت حقي تالت ومتلت

الموقف الثاني: هشرب البوقين مجتشي عليهم ونخلص

الموقف الثالث: في كلمة واحدة هنااااااااااااام ، يخبط دماغه في الحيط هسيبه وانام ولو زعل يتفلق

الموقف الرابع: انفضلهم انا كمان واسيب السبوع لرضى الله بس طبعا بعد ما اخد الحلاوة واشرب المغات

الموقف الخامس: والله نفهمهم غلطهم وان الحلفان بالله مش لعبة ولو على اخر الصنية او الحاجة الساقعة ناخدهم ونخلص اهو برضه وجع البطن ولا كب الطبيخ

ايه رايك في الاجابات نموذجية مش كده
تحياتي

يا مراكبي يقول...

المواقف دي من تقليديات شعوبنا المؤسفة

في المواقف الثلاثة الأولانيين أنا دايما بأكون صارم ومن أول مرة .. معروف عني إني زي الأجانب في طبعي

لما بأزور أي صديق أجنبي .. لو قال تحب تشرب حاجة وعملت فيها ذوق وقولت لأ .. هيقعد على طول وما يجيبش حاجة .. مش هيتحايل عليا .. لأ عندهم يعني لأ .. لكن عندنا لازم نعمل فيها ذوق ونقول لأ علشان يتحايلوا علينا

أما في الحالة الرابعة .. طبعا بأكون متوقع التنفيض من الناس لأن الواحد بيكون عامل زي العاقل الوحيد في وسط قرية مجانين فبيفتكروه إنه هو اللي مجنون .. فبأنفض أنا كمان

تحياتي

Mohamed A. Ghaffar يقول...

كل الناس هتمشى حالك

طـعـمـة يقول...

منور مدونتي يا علاء :)
جزاك الله خير الجزاء


منورة يا أمنية :)


أحمد الحسيني ... ضيف مثالي جدا :)


يا مراكبي
ماما دايما بتتخانق معايا لإني باعزم على الضيوف مرة وباسكت
باقولها : أنا لما باكون عند حد ويقدملي حاجة لو نفسي فيها هاكلها
نفسي مش فيها هاسبيها
ليه الناس ماتبقاش بسيطة في تعاملاتها كده ؟!!!!


محمد عبد الغفار
تقصد ... كل الناس هتمشي حالها ؟
طب أنت هتمشي حالك إزاي وأنت مش قادر تحط لقمة زيادة في بطنك ؟ :)

باب البحر يقول...

بصراحة لا أنوي المشاركة .. لكن لي ملاحظات أعتقد أنها ستلقي ضوء على ردي في المواقف.

1- تحت مسمى (ما تكسفش ايدي - و دي عشان خاطري) دي ما تنفعش .. لان الأمر متعلق بما أريد أو لا أريد . و ما دام النبي صلى الله عليه و سلم نصحنا ألا نجبر مريض على الأكل ، فالأولى صحيح البدن!.

2- زيارة الصديق في غير الوقت المناسب . إن كان صديقا فلن يحزنه أن أصارحه و بوضوح .. لا ننسى أن الله عز و جل أنزل قرآنا لينبه الصحابة لآداب زيارة النبي عندما خجل أن يصارحهم عليه الصلاة و السلام.

3- لا أعتقد أن الدين يرضى أن أترك قليلا من العصير (نعمة ربنا) في الكوب بغض النظر عن اعتقادات البعض .. و لو كان هناك سبب قوي لعدم اكمال الكوب . لاصارحهم به (اعذروني الكوب غير نظيف ..).

4- الدعوة تتطلب أحيانا عدم التصدي للمنكر إنما فقط إنكاره في أول الأمر .. و عندما نقترب من الشخص يكون ذلك أفضل وقت للنصح (و لو طال الوقت) .. هكذا فعل الشيخ أبو اسحاق في بداية حياته.

أردت فقط توضيح بعض الملاحظات .. و جزاكم الله خيرا

طـعـمـة يقول...

جزاك الله خير الجزاء يا باب البحر

مدونتك بقالها كتير مش بتفتح !!!
أرجو أن يكون خير بإذن الله تعالى

جنـه يقول...

ازيك يا طعمه
اول موقف:هقول عامله ريجيم يا جماعه وكده خلاص
تاني موقف : هشربهم مش مشكله
تالت موقف :هتكلم كذا مره قدام الضيف اني عملت حاجات النهارده كتير وتعبانه ومش قادره لغايه ما يحس ويقوم
اما الرابع : هسيبهم وهمشي
الخامس : انا دايما بقول اول ما حد يحلف متاكد ان حلفانك ده مش هيوديك النار واحاول افهمهم

طعمه علي فكره انا اول مره اعلق في مدونه
انا جنه
وعلي فكره عملت مدونه
ياريت تشوفيها
http://jannah2007.blogspot.com/

طـعـمـة يقول...

منور يا جنة
ما شاء الله لا قوة إلا بالله
بإذن الله ليكي عندي زيارة :)

عصفور المدينة يقول...

بالنسبة لي راسي ناشفة جدا ولو حد عارفني بيكون عارف كدة عني لو مش عارفني باحاول أعديها بس باجهزه للمرة الجاية
ولو حاجة فيها منكر باكون حازم جدا بلطف شديد وبعدين بقةدقني بتساعدني
لكن بتحصل ساعات أكون في موقف لاعتبارات خارجة ما أعرش آخذ رد فعل دي بقة بتفضل تاعباني أسبوع

لحظة يقول...

كتير اوي بنضطر نرضي النا على حساب راحتنا وبنعمل حاجات مش عايزين نعملها مضغوطين وغصب عننا
مثلا كل المواقف دي لو كانت من حد مهم جدا عندي وما ينفعش ازعله زي مثلا حد كبير في العيلة او الن هاضطر اجي على نسي واكل واشرب
انما لو حد ممكن يفهم منغير ما نعمل زعلة ومشكله زي عزومة عند اصدقاء او ناس من بعيد زمايل مثلا هاصر على موقفي
موضوع السبوع والحاجات اللي بتتعلق هاقول عليها انها ما بتنفعش وهافضل اقول ما شاء الله واصلي على رسول الله لما هم يحسوا من نفسهم انهم غلطانين
اما موضوع الحلفان فانا اعتقد انه من عادات شعبنا الاصيله واللي اتعودو عليها في الكلام لو الحالف في قرارة نفسه يقصها يبقى لازم يكفر عن حلفانة لو انا ما كلتش وهاقول له ده لو هم من الفريق التاني اللي ناوية اوقع حلفانة
انما لو مش قاصد يحلف وبيعمل كده بس عشان يعزم بذمةفانا اعتقد ان ده من لغو الايمان اللي ربنا لا يؤاخذنا عليه وهو وضميره بقى

radwa يقول...

احم
استعنا ع الشقا بالله

سؤال بسيط جدا
ماذا سيكون رد فعلك لو اتحطيت في موقف سخيف ولقيت إللي حواليك بيجبروك تعمل حاجة أنت مش مقتنع بيها أصلا أو مش قادر تعملها فعلا ؟!!!
مش هعمل اللى هما عاوزينه وهنشف دماغى وهعترض


أمثلة :
1- لو أنت ضيف عند ناس وعمالين يحلفوا عليك إنك تاكل وأنت خلاص مش قادر وحاسس إن بطنك هتنفجر – لا قدر الله – من كُتر الأكل ؟
هعتذرلهم واقولهم والله ماقادره ولو صمموا ممكن اعيط فعلا


2- لو أنت ضيف عند ناس بتؤمن بإنك لو سيبت شوية في كوباية العصير بنتهم هتبور ومش هتتجوز وبرضه نفس مُعلقة الأيمانات بتتردد على مسامعك وأنت برضه مش قادر ؟
فى حكاية العصير دى ممكن اشربهم غصب عنى مش عشان بنتهم ماتبورش ..لأ عشان ماسيبهمش للشيطان يشربهم



3- لو أنت تعبان مووووت ونفسك تنام وجالك واحد صاحبك وفضل قاعد وكإن البيت بيته – عشمان فيك طبعا – ولا هو حاطت في باله إنك تعبان وعاوز تنام ؟
مممممم هتتاوب قدامه ...واتمطع


4- لو روحت تحضر عقيقة ابن جارك وفوجئت بإنهم عاملين سبوع وعمالين يعلقوا على رقبة الطفل حاجات غريبة منعا للحسد وطردا للشياطين ولما جيت تنصحهم بما يُرضي الله لقيت الكل منفضلك ؟
ولا حاجه هسيب المكان وامشى واللى ياكل على ضرسه ينفع نفسه


5- في النهاية ... نعمل إيه بقى علشان نفهم الناس إنهم يبطلوا يحلفوا بالله عمال على بطال علشان حاجات تافهة زي آخر قطمة من صانية البطاطس أو آخر شفطة من إزازة الحاجة الساقعة الـ 2 ليتر ؟!!!
هحاول افهم ان كتر الحلفان مش حلو


افتكرت جورج سيدهم في مسرحية المتزوجون :
قدرة فول ياكلها حي بحاله ... آكلها أنا لوحدي ليه ؟
!!!!!
عشان تتنيل على عينك وتموت :d

الربان يقول...

تحياتي

اول مرة أجد المدونة الجميلة دي...

بالنسبة للسؤال...انا دائما ما أقع في هذه المشاكل...لان لي نظام خاص في الاكل.
قبل اي شيء انا بأبادر و اقول ياجماعة لو سمحتوا انا لست بضيف...و اتركوني أكل علي راحتي...و انتقي فقط ما اريد و الكمية التي أريد...و ان حصل وتم ضغط او شيء من هذا القبيل
فأني اصر علي موقفي...و اقول اتركوني علي راحتي...

ياريت كلنا نحاول الا نضر بعضنا بعضا بالحلف و القسم للاكل....لان هناك بعض الامراض التي تتعارض مع نوعيات و كميات من الاكل.

تحياتي و دائما موفقة.

امام الجيل يقول...

هو يعنى عامة لازم نعرف الناس الصح من الغلط بس بطريقة ظريفة طبعا مش خناق يعنى وممكن نرذل معاهم يعنى اللى بيخافوا لوسبت حبة عصير بنتهم تبور نسيب العصير كله ممكن بنتهم تموت ويتعظو ولا حاجة ويفوقوا من الهم ده ههههههه لا بجد لازم ندل الناس على الخير ونتحين الفرص يعنى مثلا اذا سبنا حبة عصير هنشوف تاثير ده عليهم مثلا نقلهم مالك فيه ايه ونبدا فى فتح الحوار وهو هيكون فى موقف الاضعف لحظتها لانه مكسوف منك لما يقلك خايف بنتى تبور بسببك يعنى لازم الذكاء فى الدعوة الى الله

Tarek يقول...

معاكي حق فعلا مواقف محرجة و التصرف فيها مش سهل
أما بخصوص موضوع السبوع فده مش منتشر في عيلتنا لكن أنا شايف إن الناس بتعملة كنوع من العادات و التقاليد و أنا مش شايف فيها مشكلة أصلا

أمانى وياسمين يقول...

السلام عليكم ورحمة الله وبركاته
موضوع ظريف يا طعمة وبيمس الواقع فعلا
اما بقى عن رد فعلي في المواقف دي اكيد هحاول اتصرف مع الناس بدبلوماسية واوضحلهم وجهة نظري واني مش قادرة اعمل اللي بيطلبوه مني .اكيد ده صعب شوية بس مع الوقت .
هتبقي محترفة فيه
وربنا يهدينا جميعا ويوفقنا لما يحبه ويرضاه