أحلام مش عادية

أوقات كتيرة قوي بالاقي ماما بعد صلاتها بتقعد تدعي ربنا إنه يطمنها عليا قبل ما يدركها الأجل

وفي بعض الأحيان دي بالاقيها بتبكي من شدة قلقها عليا وفي نفس الوقت تعلقها بالله وإنه وحده القادر على أن يرزقني بزوج صالح يجعلها تطمئن عليا

دي وجهة نظر والدتي في الاطمئنان عليا ... إني أتزوج واستقر في بيت الزوجية

كل ما باشوفها كده مش بالاقي حاجة أصبرها بيها غير إني أذكرها بحلمنا الجميل بدخول الجنة :

يا ماما يا حبيبتي عاوزة تطمني عليا يبقى مافيش قدامك غير حاجة واحدة وبس : " وَلْيَخْشَ الَّذِينَ لَوْ تَرَكُواْ مِنْ خَلْفِهِمْ ذُرِّيَّةً ضِعَافًا خَافُواْ عَلَيْهِمْ فَلْيَتَّقُوا اللَّهَ وَلْيَقُولُواْ قَوْلاً سَدِيدًا " النساء (9)

يعني ما عليكي غير إنك تتقِ الله في كل كبيرة وصغيرة في حياتك وبس

بعدين أنا عندي مخططات سرية لمسألة الزواج دي

من مصلحتي إني أموت من غير زواج

علشان لما - بإذن الله تعالى - أدخل الجنة يوم القيامة برحمة ربنا أختار العريس إللي على مزاجي بقى :D

وأنا بصراحة حاطة عيني على عُمر بن الخطاب

وأنا عارفة طبعا إن الطلب عليه هيبقى كتير

علشان كده حطيت في بالي اختيارين تانيين

عمر بن عبد العزيز وعلي بن أبي طالب

إيه رأيك بقى يا ست الكل ؟ بالله عليكي فيه أحلى من كده جوازة ؟

ياريت ماحدش ينبهر بكلامي لماما لإني طبعا ماصلتش لحد الكمال

أنا إنسانة زي أي إنسانة بتيجي عليا أوقات كتيرة قوي باحزن وأكتئب بسبب شعوري بالوحدة لإني لا تزوجت ولا أصبحت أم لحد دلوقتي

لكن أحلامي دي هي بريق الأمل إللي بيخليني متمسكة بالآخرة دايما

لإن رحمة الله يوم القيامة مش بتخضع لأي قانون

مالهاش دخل بأي حاجة غير إن ربنا رحمن رحيم

والرحمن الرحيم مش محتاج سبب علشان يرحمنا