الأربعاء، سبتمبر 19، 2007

تعرف ترسم ؟!!!

زمان قالوا الفنون جنون
وإحنا بنقول :
الجنون فن لكل عاقل في الكون
إمسك قلمك معانا
واحلم واسرح بخيالك
هتخش الجنة ويانا ؟؟؟
ابدأ ارسم مشوارك

مشوار بيبدأ بالله أكبر
من صباحك لمِساك
فجر وظهر وعصر ومغرب
وصلي العِشا قبل عَشاك
تغسل نفسك خمس مرات
عُمر الداء ما يفضل جواك
وتفضل دايما طاهر الروح
وتفضل الملايكة حبّاك

ولا عمرك تنسى إخواتك
محتاجين لرزقهم
ونصيبهم جوا زكاتك
في مالك حقهم
يسألك عليه ربك
وتقول : يا رب وصلهم

وحق جسمك عليك
صيام شهر رمضان
هتصوم بكل جوارحك
تدخل من باب الريان
والله أعلم بالمكتوب
أجرك محفوظ جوا الجِنان

ولو نفسك في باب السلام
اشتغل بقِرش حلال
واخلص النية للسلام
تحج وترجع زي زمان
ولا سيئة ولا خطيئة
ده ربك غفور رحمن

وقبل ده كله
تشهد للواحد الأحد
وتصدق نبيك أحمد
وإنه رسول الفرد الصمد
يوصلك من الخالق بركة
وتعيش سنين ليها ألف مدد
لإن ربك رزاق كريم
والكريم بيدي من غير عدد

إيمان الحسيني

* دي مجرد خاطرة لا ليها دخل لا بوزن ولا قافية :) *

هناك 10 تعليقات:

اسكندراني اوي يقول...

خاطره جميله بجددددددددددد

كل سنه والجميع بخير
على فكره انا كنت باخد 3 من عشره في الرسم

الطائر الحزين يقول...

الله المستعان
اللهم ان نسالك الجنة وما قرب اليها من قول او عمل

لحظة يقول...

يا رب نقدر

يا رب ما نبعد

يا رب ساعدنا

جزاك الله خيرا

إيمان الحسيني يقول...

جزاكم الله خير الجزاء جميعا
ونسأل الله الثبات على طريق الحق
اللهم آمين

sahr يقول...

السلام عليكم
جزاكي الله خير
جميلة اوي كلماتك
وكل سنة وانتي طيبة

إيمان الحسيني يقول...

وعليكم السلام ورحمة الله وبركاته
جزاكِ الله كل خير يا سهر

ايامنا الحلوة يقول...

ماشاء الله جميلة جدا ورائعة وشعور صادق لايشعر به سوا القلب أحييكى ياطعمة

وليد أبوالنجوم

إيمان الحسيني يقول...

ياااااااااااه
أبو النجوم في مدونتي :)
منور يا أخي الكريم
وكل سنة وأنت طيب

radwa يقول...

ايه ده بقى ده بقى ده ؟؟
بتكتبى خواطر كمان
كنتى فين من زمان يابنتى
حلوة جدا
بس حاولى توزنيها شويه



عارفه عارفه
قريت انها خاطره ومالهاش دعوة لابوزن ولا بقافيه

احبك جدا فى الله

إيمان الحسيني يقول...

أحبك الذي أحببتني فيه يا رضوى
:)