من يومين كنت باتفرج على برنامج (عم يتساءلون) على قناة دريم
وكان المذيع أحمد عبدون مُستضيف الدكتورة سعاد صالح
اتصلت سيدة وحكيت مشكلتها على الهواء مباشرة :
متزوجة من 13سنة وعندها 3 أطفال
زوجها مبهدلها وبيضربها وبيسبها في عرضها وهي عاوزة تطلق منه
بس أهلها قالولها : لو اطلقتي ماتجيش لينا وإحنا مالناش دعوة لا بيكي ولا بأولادك !!!
وقالت إن فيه رجل كبير في السن بتقوله يا خال اتوسط بينها وبين زوجها وعرض عليها إنه يطلقها منه في مقابل إنها تتجوزه بعد كده !!!
وقالت إن فيه مشاكل تانية كتيرة قوي بس مش هتقدر تتكلم
ولما المذيع ألح عليها في الكلام قالت إن زوجها بيأتيها وهي حائض وبيمارس معاها اللواط
مشكلة بشعة مش كده ؟!!!
إللي غاظني فعلا وخلاني بكيت الرد إللي لا بيقدم ولا بيأخر من بعض الشيوخ والعلماء : اصبري واحتسبي !!!
مع احترامي للدكتورة سعاد صالح ولكل العلماء
الصبر والاحتساب مش حل لكل مشكلة وماينفعوش مع كل حالة
واحدة بتقولكم إن زوجها بيأتها في وقت الحيض وبيمارس معاها اللواط ... تصبر إزاي يعني ؟
وتصبر لحد إمتى ؟
لحد ما يجيلها الإيدز مثلا ؟!!!
أرجو إن علماءنا الأفاضل يكون عندهم حلول عملية أكتر
وأرجو من أغنياء المسلمين إنهم يشاركوا في حل المشكلات دي
ويوفروا الرعاية والعمل للحالات المماثلة علشان ماتضطرش الزوجة إنها تنحرف أو تلجأ للحرام علشان تخلص من عذابها مع زوجها إللي المفروض إنه تزوجها على كتاب الله وسنة رسوله !!!
تخيلوا معايا الحلول المتواجدة أمام المرأة دي في الوقت الحالي :
1- تنتحر .
2- تقتل زوجها .
3- تطلق منه علشان تتجوز العجوز إللي طمعان فيها .
4- تسيب ولادها وتهرب علشان تعيش حياتها زي ما هي عاوزة .
5- تصبر وتحتسب .
تفتكروا المرأة في وضع زي ده وتحت الضغوط دي كلها وحتى أهلها مش سائلين فيها ... ممكن تختار إيه ؟
وفي جميع الاختيارات هتطلع هي إللي غلطانة في نظر المجتمع
حتى لو اختارت الصبر والاحتساب ... الناس هتقول : ليه ماتكلمتش وحاولت تاخد حقها ؟!!!! هي غلطانة إنها سكتت !!!
أعتقد - والله أعلم - إن الحالات إللي زي دي بتخلي الأمة كلها آثمة لإن ماحدش فينا بيتحرك علشان يحل المشكلة ويرد الحق لأصحابه ...
والله المستعان
هناك 12 تعليقًا:
ربنا يسامحهم
اظن ان ربنا شرع الطلاق لحالات اقل من كدة
اما موضوع الولاد وهتعمل ايه وهي ماعندهاش دخل ولا حته تروحها
فده اللي بيخلى الشغل للمراة ضرورة مش رفاهية ولا مساواه ولا تحقيق ذات
اما اهلها
هيروحو من ربنا فين ما هم اللي جوزوهولها من الاول
وواضح انهم لا همهم لا دينه ولا خلقه
ربنا يتولانا جميعا برحمته
بجد موضوع خطيييييييييييييير جدا جدا
انا مش حفتي واقول ايه الحل
لكن بجد الموضوع خطيييييير
لازم يكون له حل
الله المستعان
نعم ولكن اتمنى من الله ان يفرج كربها
اولا بيبقي في رد فوضوي من العلماء مع احترامي ليهم بس كتير بتفرج وبلاقي جايبين كذا عالم وبخدش رد عدل يوحد ربنا في الاخر
الي جانب الحلول زي ما قولتي اللي الصبر والاحتساب بس بالعقل دا مش في كل حاجه
من الاخر حضرتك اختصرتي كلام كان بجد واقف في زوري غير تحجير الدماغ من الاهل وحيره الست بترضي احيانا بالامر الواقع دونما التحرك خطوه واحده تنجد بيها نفسها وولادها و عندها ولاد
فعلا يا لحظة
مسألة التعليم والعمل للمرأة في العصر الحالي بقى صرةرو من صروريات الحياة
مش مجرد رفاهية أو إنها بتتعلم علشان تنفع ولادها وبس
الموضوع خطير فعلا يا إسكندراني
دي مشكلة واحدة من مشكلات كتيرة قوي بتتعرض كل يوم على العلماء
وللأسف مش بالاقي غير نفس الرد :
اصبري واحتسبي
أنا مش متعصبة ضد الرجالة
بس الرجل يوم ما هيتظلم من زوجته هيبقى قدامه 100 حل عملي
لكن المرأة إللي متعذبة في زواجها وأهلها رافضينها
تروح فين ؟!!!!!!!!!!!!!!
ياريت يا كوكا كلامنا يوصل للعلماء الأفاضل ولأغنياء المسلمين
ياريت حد يتحرك علشان نوجد حلول فعلية للمشاكل دي إللي مش هتيجي غير بالخراب على المجتمع المسلم
والله المستعان
الأخت الكريمة طعمة
كل عام و أنت بألف خير
ـ موضوعك في غاية الأهمية
بل هذه المواضيع و ما شابهها كثير ..التي يجب تحويلها الى قضايا ملحـّة و مستعجلة و تناولها على كافة المستويات .. نحن دائما نسمع هذا الكلام من العلماء .. اصبر و احتسب
لا شك أن الصبر و الإحتساب حق ..لكن هؤلاء العلماء لم يسمـّوا علماء عبثا .. و ليس ليخرجوا على الشاشات و يطلبوا منا الدعاء و الاحتساب
لو كانت حادثة كهذه حدثت في صدر الدولة الاسلامية أو حتى العهد الأموي و العباسي و ذهبت المرأة الى القاضي الذي سيكون عالم دين بالضرورة كان أمر بتطليقها من زوجها فورا و أمر بعقابه و أمر أيضا أن يتكفـّل بيت المال بإعالة هذه المرأة ..أما أن يطلب منها الصبر و الإحتساب ..فلا أجد داع لوجوده لا على شاشة و لا على منبر .. نحن بحاجة لإصلاح المجتمع بالعمل و العلم و الأخلاق التي تعكس حقيقة الأديان السمحة .. و ليس بالكلام و التنظير و ترك الناس تموت قهرا أو حتى انتحارا .. أنا لا ألوم هذه المرأة إن انتحرت لا سمح الله فبنظري ليست هي المجرمة بحق نفسها .. بل سيكون موتها برقبة مجتمع ضائع مشوّه و رقبة رجال دين أصبح معظمهم كالببغاوات .. يرددون عبارات نحن نعرفها جميعا ..حتى و أنت تسمعينها من أفواههم .. تشعرين أنها بلا روح ..
ـ نحن جميعا مسؤولون عن هكذا حالات
و يجب عدم السكوت عنها أبدا .. و يجب وضع رجال الدين أمام مسؤولياتهم و عدم الخجل منهم و التعامل معهم و كأنهم أولياء الله يخاف الناس أن يغضبوهم ..
العالم الذي لا يغضب لحق و يسعى بكل طاقته الى تغييره .. لا يستحق أن يـُسأل ( بضم الياء)
ـ أعترف ان جملة اصبري و احتسبي أغضبتني جدا هنا .. كمن يرى إنسانا يموت من العطش و بيده ماء و لا يسقيه بل يقول له .. ما تخاف .. طوّل بالك .. و أول ما تموت رح أقرأ الفاتحة على روحك و أترحـّم عليك .. موت و لا يهمك
جزاك الله كل خير يا جو
بس برضه أنا ماقدرش أحمل علماء الدين المسئولية لوحدهم
فين بيت مال المسلمين ؟
فين زكاة أموال المسلمين ؟
فين أغنياء المسلمين ؟
لو الناس دي عرفة إن الزكاة حق الآخرين في أموالهم وإنها في الأساس مش رزقهم
أعتقد الموضوع هيفرق جامد بعد كده
يا جماعة والله العظيم زكاة أموالكم دي مش رزقكم
دي رزق الآخرين وضعه الله أمانة عندكم
فاتقوا الله فيما استأمنكم عليه
المشكلة ليست مشكلة عالم وحده، فهذا أقدر ما يستيطع قوله في تلك اللحظة، المشكلة بحق مشكلة نظام اجتماعي شامل، الي من غير الله تشكو المرأة الظلم الواقع عليها
المفروض لقاضي شرعي يفصل بينها وبين زوجها ومن ثم يأخذ لها حقه او يأخذ له حقه وان وجد لها طلاقا طلقها ثم بعد ذلك ضمن لها مسكن ومصدر رزق شهري لها ولأولادها
ولكن المجتمع لا يعرف حلاً كهذا فموت ياحمار لو عرفت تأخذ ورقة الطلاق وموتي يا جنينة الحيوانات كلها لو عرفت أن تأخذ منه أو من الدولة مال تعيش به وتنفق به على أولادها ناهيك عن سكن محترم
أنا مع الصبر والاحتساب نعم ولكني أكثر وأكثر مع نظام أكثر عدالة ونزاهة مما نحن فيه
لك تحياتي
وكل عام وانت بخير
والسلام عليكم
يا اختى طعمة متبقيش حساسة اوى الموضوع صحيح مقرف وزى الزفت بس الفضائيات مش عايزة وجع قلب كل الى يهمهم الاعلانات مش اكتر ومش بعيد تكون الست دى تبع البرنامج والصبر والاحتساب اعتقد فى راى لة حدودة لان الانسان لة طاقة وحدود فلو صبر اكتر من اللزم بيبقا زى الشمعة بيحرق فى نفسة وفى الحالة دى مش بينور لغيرة
كل عام وانتم بخير
تقبل الله منا ومنكم
اعاد الله عليكم العيد في العام القادم
ونحن علي ابواب المسجد الاقصي ان شاء الله
هدية المحارب للمحاربين في يوم العيد
تجدونها فقط
في
ارض الحرب
حكاية الصبر والاحتساب على هذه الجرائم التى تنتهك كرامة المرأة مرفوض رفضا قاطعا. فلابد من سن تشريعات رادعة لهؤلاء المعتدين، كما ينبغى تفعيل المؤسسات التى تدعم هؤلاء النساء المضطهدات..
إرسال تعليق