الأربعاء، نوفمبر 14، 2007

زمان ودلوقتي

* زمان كان الواحد بيدفع الرشوة علشان ياخد حاجة مش من حقه ، دلوقتي الواحد بيدفع الرشوة علشان ياخد حقه ... وغالبا مش بياخده برضه !!!

* زمان كانت الواحدة لما بتتعاكس بتستنجد بعسكري الشرطة ، ودلوقتي الواحدة بتتعاكس من ضباط الشرطة ... واحتمال تُغتصب كمان !!!

* زمان كان الواحد بيعمل الغلط وهو بيداري وخايف من الناس ، دلوقتي الواحد بيعمل الصح وهو بيداري وخايف من الناس ... ومن الحكومة !!!

* زمان كان سواق التاكسي يقف بمجرد ما تشاورله ويوصلك لأي حته أنت عاوزها وتدفع إللي العداد بيقول عليه وبس ، دلوقتي السواق يا إما يقف يا إما لأ ، وإذا ركبت يشترط عليك الأجرة إللي هياخدها ، وفيه احتمال كبير ينزلك في مكان بعيد عن إللي أنت عاوزه ... وإذا كان عاجبك !!!

* زمان كانت مدرسة الحقوق مش بيدخلها غير أولاد البشاوات وإللي معاهم وسايط جامدة ، دلوقتي كلية الحقوق بقيت أقل الكليات في المجموع والدفعة الواحدة فيها ما يقرب من 3000 طالب وطالبة ... وبيتخرجوا على مهلهم !!!

* زمان كان الراجل يرجع من شغله يتغدا وينام ساعتين ويصحى يقعد مع مراته في البلكونة ساعة العصرية يشربوا شاي ويأزأزوا لب ، دلوقتي مابقيناش عارفين الفجر من العصر من العِشا ومابقاش فيه بلكونة علشان اتقفلت واتعملت أوضة للعيال ومافيش هوا نشمه والشاي بقى نشارة خشب مغلية ... بس الحمد لله اللب لسه موجود !!!

هناك 24 تعليقًا:

و القادم....أجمل يقول...

السلام عليكم

أولا بعتذر عن ردي عليكي في مدونتي
قمت بحذف الرد
و اتمني ان تتفهمي وجهة نظري
:)

،،،،،،،،،،،،،،،،،،،

ثانيا الحمدلله اللب موجود
تحت بيتنا مقلة اد الدنياااا
هههههههههه

لا بجد اختلاف الوقت
و الحكم
و مستوي المعيشة
بيغير كل شيء
اتمني اننا نحتفظ بمبادئنا
و لا نتهم بالمثالية

تحياتي و تقديري لكي

:)

إيمان الحسيني يقول...

وعليكم السلام ورحمة الله وبركاته
ولا يهمك يا ولاء
أنا أصلا ماقرأتش ردك
:D

كنت دايما باسمع ماما وبابا وهما بيحكولنا عن طفولتهم والخير والبركة في الرزق والوقت
وباقارن ما بين كلامهم ده ووضعنا الحالي
وباحزن ... مش على نفسي لأ
عليهم لإني باشوف في عنيهم نظرة الاغتراب والقلق

أعتقد إن ده له علاقة بتدوينتك
الغربة حتى داخل الأوطان

منوراني :)

عصفور المدينة يقول...

أنا شفت في صغري الأتوبيس بيقف ينتظر الركاب في المحطات
وشفت في كبري الكمسري ماسك كرباج بيضرب على الأرض عشان يحرك الركاب يركبوا بسرعة

إيمان الحسيني يقول...

هههههههههههههههه

أنا بقى شوفت سواقين الميكروباص وهما على استعداد يقعدواالركاب دور تاني علشان يعملوا دورين في دور

حسبنا الله ونعم الوكيل

اسكندراني اوي يقول...

حاجات كتيير اوي اتغيرت في حياتنا
مفاهيم واساليب ملتويه دخلت في موضوع تخليص الحاجات

وحاجات كتير منعت الزوج والزوجه انهم يقعدو في البلكونه مع بعض

المشكله الاكبر انك نسيتي تقولي
زمان كان الواحد فينا بيقعد يتكلم مع نفسه في الصح وفي الغلط
النهارده معدش حد عارف فين الصح وفين الغلط


اه يااااااااااااااااااااني

محمد عبد الغفار يقول...

انه الأتجاه المعاكس عزيزتى

a Dreamer with feet on the Floor يقول...

Dear ...the recent is much more better than the Past( in the whole other Countries)....as the have developed with the run of the Time...,yet..Egypt is the opposite...we go back...why..
as the otheres have democracy ...while we have solseres who leads us ...( 2 the back-
that is why we allwayes say -Zaman-..while all nation ..hate 2 B back 2 past...
I hope U read what I wrote about solderes and the other Contributions...U will find my answeres on what U wonder about .
best regardes.

إيمان الحسيني يقول...

فعلا يا إسكندراني
المشكلة إن مابقاش فيه وقت حتى علشان الواحد يفكر في الاختيارات إللي مطروحة قدامه وإيه الصحيح فيها وإيه الخطأ
علشان كده الكل ريح دماغه وبطل يحاسب نفسه

إيمان الحسيني يقول...

الاتجاه المعاكس
كل ما أسمع اسم البرنامج ده أحس باتنين بيتخانقوا جنبي
:D

إيمان الحسيني يقول...

للأسف أخي الحالم
العالم كله بيتقدم للأمام
وإحنا بس إللي عاملين للخلف دُر
بإذن الله أزور مدونتك وأقرأ الموضوع إللي أشرت إليه

ftafeet يقول...

السلام عليكم ورحمه الله وبركاته
موضوعك حلو اوى على فكره بس زى مانتى بتولى اهه ده كان زمااااااااااااااااان والله الواحد لما بيأعد يفكر مع نفسه كده بيبقى نفسه يرجع يعيش ايام الملك فاروق تيته بتقولى انها كانت ايام عز برغم اللى كان فيها
بس هانقول ايه بقى كل ماكتر عدد البشر كل ماكترت المصايب والجرائم وقله الاخلاق
ربنا يرحمنا برحمته ان شاء الله

اختك فى الله فتافيت

Mohamed Mankola يقول...

السلام عليكم

لما اشوف المشاكل الذى تحدث فى المجتمع
دائما اسال نفسى ما السبب او السر الذى يجعلنا فى القاع

هو سبب سياسى

هو نحن السبب ام الحكام ام البيئة المحيطة

ام ماذا

لكن انا اعتقد ان كل هذه الاسباب تجمعت و نتج بعضها من بعض

بنت الصالحين يقول...

اااه ياطعمه عندك حق
مافيش بركه فى الرزق والوقت
وده من علامات يوم القيامه
وبعدين ين اللى يقعد مع مراته
دى لو كانت بتشتغل تبقى تلاقيها بتشطب فى الصحون لاما بتذاكر للاولاد
ولو مش بتشتغل يبقى بتغسل الهدوم او بتشوف طلبات الاولاد
والزوج اكيد طبعا بيناملو ساعه علشان يلحق يروح الشغل التانى

ايام زمان بجدمااحلاها
وربنا يستر

allfollowsome يقول...

دلوقتى اللى انتى بتقولى عليه ابتدى يدخل فى نطاق زكان ربنا يستر من الجاى

إيمان الحسيني يقول...

منورة مدونتي يا فتافيت
على فكرة أنا باحب القناة دي جدا :)

عندك حق
الواحد بيسمع كلام من الناس الكبار بيخليه يفقد الأمل في النهاردة وبكرة

إيمان الحسيني يقول...

وعليكم السلام ورحمة الله وبركاته أخي محمد عبد السلام

هي فعلا ظروف متداخلة ومتشابكة
بس أعتقد إن الأصل فيها هو السكوت عن الحق

إيمان الحسيني يقول...

منوراني يا عاشقة الفردوس

والله المرأة العاملة دي مشكلة كبيرة فعلا
أنا مش ضد عمل المرأة خاصة وإننا بنحتاجها في أماكن كتيرة زي الطب والتعليم والتمريض
بس للأسف المجتمع بشكل عام - والزوج بشكل خاص - بيبقى منتظر منها إنها تكون المرأة الخارقة برة وجوا البيت

في حين إن الزوج بيعمل برة البيت فقط وبيرجع البيت عاوز يرتاح وبس
!!!!

ربنا يحفظنا جميعا
اللهم آمين

إيمان الحسيني يقول...

جزاك الله كل خير أخي طاهر
فعلا عندك حق
مع انعدام البركة في الوقت أعتقد إننا المفروض نتلكم عن النهاردة وبكرة بصيغة الماضي

وربنا يسترها معانا في المستقبل

محمد عبد الغفار يقول...

انا مكنتش اقصد البرنامج اللى انامعرفوش

انا كنت اقصد التدوينه قبل الأخيره عندى

إيمان الحسيني يقول...

معقولة ماتعرفش برنامج الاتجاه المعاكس إللي بيجي على الجزيرة ؟
حاول تتفرج على حلقة واحدة منه :)

محمود بهجت يقول...

زمان كان الراجل يرجع من شغله يتغدا وينام ساعتين ويصحى يقعد مع مراته في البلكونة ساعة العصرية يشربوا شاي ويأزأزوا لب ، دلوقتي مابقيناش عارفين الفجر من العصر من العِشا ومابقاش فيه بلكونة علشان اتقفلت واتعملت أوضة للعيال ومافيش هوا نشمه

إيمان الحسيني يقول...

عجبك التليق يا باشمهندس ؟
بالله عليك مش هو ده الواقع دلوقتي ؟

منور المدونة :)

أُكتب بالرصاص يقول...

الله يفتح عليك يا طعمه

دي الحقيقة فعلا...والاعجب ....في الافلام المصرية.... زمان كان يشاور لتاكسي..يلاقيه في قفاه على طول

دلوقت
في الافلام برضه

بطل يشاور..انما .بيركب التاكس على طول...وبعدين يقول له ..أطلع يا اسطى..يروح طالع الاسطى.... من غير ما يسئله رايح فين ولا تدفع كام

زمان كان فيه عداد للتاكس..دلوقت ...تقوله عايز كام ...يقول لك ... زي ما يكون بيشحت...اللي تدفعه.. وغالبا ما بيعجبوش اللي بتدفعه

زمان كان فيه بلكون بيقف فيها الشباب بيعاكسوا بنت الجيران
دلوقت مابقاش فيه بنات للجيران

عجبي


تحياتي

إيمان الحسيني يقول...

هههههههههههههه
ماهو يا اكتب بالرصاص بنات الجيران دلوقتي مش محتاجين بلكونات بعد ما الشارع بقى مفتوح على مصراعيه ليهم
إلا من رحم ربي