الثلاثاء، يناير 08، 2008

استكمالا للفضفضة

* ليا صديقة اتعرفت عليها عن طريق أحد المنتديات اسمها أمنية ، صراحة إللي يشوفها لأول مرة لازم يُخدع فيها وفي هدوءها في حين إنها على النقيض تماما ، وعليها رسائل تهنئة تِعِل ...
في العيد الصغير بعتتلي الرسالة دي على الموبايل : (كل عام وأنتم بخير) نظرا للظروف الاقتصادية وارتفاع أسعار الرسائل هذه التهنئة صالحة لمدة سنة وتشمل : رمضان – عيد الفطر – عيد الأضحى – تعيين – ترقية – نجاح – سنة جديدة – مولود – طهور – نقل – زواج .... إلخ .
في العيد الكبير اترحمت منها لأنها سافرت تحج (تقبل الله منها ومنا صالح الأعمال ... اللهم آمين) .
النهاردة بقى وبمناسبة رأس السنة الهجرية بعتتلي الرسالة دي : قال أحد الحكماء في الجاهلية : ما رأيت أبخل من ثلاثة : شخص يلبس القديم ولديه الجديد ، وشخص يمنع نفسه عن الطعام ولديه منه المزيد ... وسكت ، فقيل له : من الثالث ؟ ... فدمعت عيناه وطأطأ رأسه وقال : شخص لا يُرسل لأصحابه تهنئة بالعام الجديد ولديه رصيد ... ثم أجهش بالبكاء حتى بكى الحاضرون معه في الكوفي شوب .
أمنية ... صراحة مش لاقية حاجة أعلق بيها غير دعائي المفضل : عوّض عليا عوض الصابرين يا رب .

* في جريدة الأهرام النهاردة وبمناسبة مرض أنفلوانزا الطيور لقيت مانشيت لخبر بيقول : إعادة 16 ألف كتكوت من قنا للمنوفية ... دول برضه كانوا تبع الهجرة الغير شرعية ؟!!!

* واحدة صاحبتي في الشغل رخمة وغتيتة ، وهيا عارفة نفسها كويس قوي وأنا عارفة إنها هتقرا الموضوع ده ، المهم صاحبتي دي باعتني النهاردة في كوبري القبة لتاني مرة ولنفس السبب ، أحب أوجهلها نداء من على هذا المنبر وأقولها : يوم الخميس تلمي حاجتك وترجعي لمكتبك القديم بدل ما الإدارة كلها تلاقيكي متعلقة على باب زويلة ... والله إني أحبك في الله يا مروة :) .

هناك 23 تعليقًا:

محمد عبد الغفار يقول...

طعمة شايل سيفه

كل سنة وانت طيبة

الطائر الحزين يقول...

كل عام انت بخير

إيمان الحسيني يقول...

هههههههههههههههههههه
لا والله يا محمد لسه ماشترتيش السيف
احتمال أنزل آخد فكرة في الأوكازيونات

كل سنة وأنت وأهل بيتك طيبين

إيمان الحسيني يقول...

كل عام وأنت وأهل بيتك بكل خير أخي الطائر الحزين

اسكندراني اوي يقول...

ههههههههههههههه

حلوه عوض عليا عوض الصابرين يارب
والله بجد بوست عسل

كل سنه وانتي طيبه

امنية يقول...

دخلت المدونه بالصدفه
واتخضيت اما قريت اسمى
:O

معلش ربنا يعوض عليكى
فكرتينى بعملك الردى

:D:D:D

الغلاسه نوع من انواع الحب
دايما بقولها لرضوى
وانهارده بقولهالك
والله بحبك فى الله يا طعمه
ومعلش استحملينى:D

جنين يقول...

هههههههههههههه
امنية دي مشكلة يا ايمان
وحشتيني ع فكرة جدا

جنين يقول...

امنية دي مشكللللة فعلا
وحشتيني يا ايمان جدا
انا ندى على فكرة

Lasto-adri *Blue* يقول...

هو دا مش يعتبر نم؟

إيمان الحسيني يقول...

وأنت طيب يا إسكندراني
وربنا يرزقك بأصحاب زي أصحابي دول
:P

إيمان الحسيني يقول...

والله أنا باحبك قوي يا أمنية
باحب الشخصيات إللي تجيب جلطة للي قدامها بمنتهى الهدوء دي
:D
ومستحملاكي يا ست البنات على العين والراس :)

إيمان الحسيني يقول...

ندى (تكفن عياش) ؟
منوراني يا ندودا يا عسل
وأمنية دي الصراحة يتفاتلها بلاد وقارات واحتمال الكرة الأرضية كلها
:)

إيمان الحسيني يقول...

Lasto-adri *Blue*
هو يعتبر نميمة لو أنا باتكلم من وراهم وأنا حريصة على إنهم ما يقروش الكلام ده ولا ياخدوا بيه خبر
لكن أنا كتبته على المدونة وأنا على يقين إن هما الاتنين هيقروه
بدليل إن أمنية رديت عليا أهو
وزميلتي إللي في الشغل جات النهاردة وهي عاوزة تنتقم مني
:)

radwa يقول...

هييييييييييييييييه
كلنا اتخدعنا فيها
وقلنا ملاك برئ رقيق
طلعت صاحبة اكبر المقالب

فعلا يا ايممان
عوض علينا عوض الصابرين يارب

إيمان الحسيني يقول...

فكرتيني بأغنية المطرب الكبير عمرو بن دياب لما قال :
كان طيب كان حنين
أتاريه كداب كبير

معلش يا رضوى
هو ابتلاء ولازم نصبر عليه
يا احنا يا هيا في الدنيا دي
:D

لحظة يقول...

السلام عليكم
كل عام وانت بخير
ازيك يا طعمة وحشتيني قوي
يارب تكوني بخير وماشية كويس في دراستك
ياللا شدي حيلك وبنا معاك

DR.HAMAS يقول...

هههههههههه

بجد ضحكتونا يا ناس

جزاكم الله خيرا أختنا طعمة

دى أول زيارة لمدونتك

و أكيد مش الأخيرة

طالما كل ما نزهق شوية نيجى نضحك عندك


د.حمـــــــاس

radwa يقول...

ابتلاء واى ابتلاء
يللا خير
اهو تكفير للذنوب والسيئات

D:

يا مراكبي يقول...

ههههههه .. بجد رسائل جميلة جدا .. هأقتبسها منكم حالا دلوقت ومن غير إستئذان

ما فيش من ده تاني؟

ملحوظة: ما فيش باب زويلة خلاص .. إتخصخص

إيمان الحسيني يقول...

وعليكم السلام ورحمة الله وبركاته
منوراني يا لحظة
معلش مقصرة معاكم كلكم بسبب موضوع النت ده
الله المستعان
بإذن الله هأقدم على خدمة الـ dsl لإن واضح إن صاحب السايبر باعني خلاص

إيمان الحسيني يقول...

منور مدونتي يا د/ حماس
وربنا يجعلني سبب في رسم ابتسامة على وجوه الجميع
:)

إيمان الحسيني يقول...

ماحنا لازم نحتسب الأجر عند الله يا رضوى
بس اشمعنى قريني أنا إللي يطلع طويل ؟
:D

إيمان الحسيني يقول...

منور يا مراكبي
المدونة كلها تحت أمرك :)

ملحوظة : باب زويلة هو الاسم الحركي لباب القاعة - الإدارة - إللي احنا بنشتغل فيها
:D