السبت، فبراير 02، 2008

مش محتاجين أكتر من كده

صورة واضحة للجميع في أي مكان بنمشي فيه
لازم تلاقي حد بيجري وراك ويلح عليك في السؤال سواء كنت ماشي على رجلك أو راكب عربية أو حتى في مترو الأنفاق
التسول ... أصبح مهنة العصر
لو إللي بيمتهن المهنة دي عرف وفهم وأيقن هو بياخد إيه في إيده ... كان فضّل الموت جوعا على إنه يمد إيده لحد لطلب الرزق بشكل سهل
يقول رسول الله (صلى الله عليه وسلم) : إن أحدكم ليخرج من عندي بحاجته متأبطها و ما هي إلا النار .
قال عُمر بن الخطاب : يا رسول الله ! لم تعطيهم ؟
قال : يأبون إلا أن يسألوني ، و يأبى الله لي البخل ... صححه الألباني .
الرزق مكتوب من قديم الأزل
ماحدش هياخد رزق شخص تاني
وماحدش هياخد أكتر من رزقه ولا أقل
المسألة مسألة بركة من الله تعالى ، يضعها الله في الرزق أو يمحقها منه
مش مطلوب مننا غير إننا نسعى لطلب الرزق ده ولكن بالحلال
الحرامي إللي بيسرق هو أخد رزقه إللي ربنا كاتبه ليه
لكن اختار ياخده بالحرام
ولو كان اشتغل وتوكل على الله وصبر شوية كان نفس الرزق ده هيجيله بس بالحلال ومعاه بركة كتيرة
يقول رسول الله (صلى الله عليه وسلم) : لو أنكم تتوكلون على الله حق توكله ، لرزقكم كما يرزق الطير : تغدوا خماصا وتروح بطانا ... صححه الألباني .
عمل حلال وتوكل على الله وصبر ويقين في أن رزقي لن يأخذه غيري
مش محتاجين أكتر من كده

هناك 8 تعليقات:

ibn_abdel_aziz يقول...

اللي محتاجينه كمان يا ايمان
خروج من عقدة الفشل الدايمة
يعني لازم اللي يشتغل يجيب نتيجة ولو مرة واحدة

بس انا متخيل ان مشكلة مصر بشكل عام اقتصادية وان لازم رفع مستوي المعيشة وتحسيين الخدمات يحصل اولا عشان الناس تبطل تسرق وترتشي وتكسل تعمل اللي عليها

والله اعلم

إيمان الحسيني يقول...

أنا عارفة طبعا يا شريف إن المشكلة ليها أبعاد تانية كتيرة وكبيرة
وأغلبها مش في إيدنا إحنا كأفراد
لكن المفروض - زي أنت ما قولت - كل واحد يعمل إللي عليه وإللي مطلوب منه
حالة الفشل واليأس إللي احنا عايشين فيها خلت الناس تغض الطرف عن حاجات كتيرة قوي معروف إنها غلط وحرام

الله المستعان

-_- يقول...

التسول اصبح مهنة العصر فعلا

إيمان الحسيني يقول...

أسوء مشهد ممكن تشوفه الصبح وأنت رايح شغلك
خناقة بين اتنين متسولين علشان واحد اتعدى على مكان التاني

منور مدونتي يا شرم :)

عصفور المدينة يقول...

زوجتي اتسرق منها الأكل في السوق أمس وأكلنا أكل جاهز
وقبل ما تنزل قالت تاكلوا أكل جاهز؟ قلت لها ماشي قعدت عشر دقائق وبعدين قررت تطبخ :) قصدي يعني قررت تروح تشتري أكل للحرامية
:)
وأنا سامحتهم

بس أعتقد المشكلة الكبيرة إن الناس مش بتصبر على العمل وبتستعجل النتائج السريعة اللي بتكون متوفرة في السرقة أو التسول

إيمان الحسيني يقول...

سبحان الله
فعلا ماكانش رزقكم
:)

الاستسهال وعدم الصبر وعدم اليقين بالله وقدره
دي مصائب يا أخي الكريم مش مجرد مشاكل
ولا أستثني نفسي منها
نسأل الله العفو والعافية

يا مراكبي يقول...

المشكلة مش في التسول الواضح والصريح ده وبس .. المشكلة بقت كمان في التسول الغير صريح تحت مسمى الإكراميات والخدمات الوهمية وخلافة .. ما فيش مكان إلا وتلاقي اللي طلعلك ويقولك كل سنة وإنتي طيبة وأي خدمة وحمد الله عالسلامة ... إلخ من أنواع التسول المقنع

إيمان الحسيني يقول...

صراحة إللي أنت بتقول عليه ده أنا باسميه سرقة مش تسول
وربنا يفرج كرب كل مكروب
اللهم آمين