الثلاثاء، فبراير 05، 2008

افهمها حتى تُسعدك



السلام عليكم جميعا
بعد ما قرأت تدونية :
الصراحة طلعت مش راحة عند أخونا ما علينا
قررت إني أُعيد فتح باب النقاش في موضوع قديم شوية كنت قبل كده فتحته في أحد المنتديات
والحمد لله وقتها لاقى قبول كبير وكان النقاش فيه ساخن جدا
الموضوع بسيط جدا
وهو إننا كبنات وسيدات بنوجه دعوة للشباب والرجال علشان يوجهوا لينا التساؤلات إللي بتخطر في بالهم وبتخلينا بالنسبة ليهم مجرد علامات استفهام وتعجب كبيرة
تساؤلات تخليهم قادرين على أن يفهموا طبيعة المرأة
المرأة عند الكثير إنسان غامض مالهوش أول من آخر ومافيش حاجة بترضيها أو تسعدها
بس صدقوني لو فهمتوا هترتاحوا وتريحونا معاكم

بداية لازم نتكلم عن شوية حقائق علمية معروفة من قديم الأزل
مش من العصر الحديث والعلوم وبس ... لأ دي حاجات معروفة من زماااااااان جدا مِن أول ما ربنا خلق حواء من ضلع آدم

أولا : حواء علميا تُعتبر جزء من آدم وعلميا الجزء بيحمل جميع صفات الكُل ولكن بنسب مختلفة ... يعني إيه ؟
يعني الرجل والمرأة من الناحية النفسية زي بعض في كل حاجة بس بنسب مختلفة لإن كل واحد فيهم خُلق ليؤدي مهمة مُحددة في حياته
" كل مُيسر لما خُلق له " ... صحيح البخاري
يبقى عاوزين نتفق على أساسيات :
الرجل بيحب ... والمرأة كمان
الرجل بيغير ... والمرأة كمان
الرجل بيلفت نظره جمال الجنس الآخر ... والمرأة كمان
الرجل محتاج الحنان ... والمرأة كمان
الرجل يحب الاستقلالية وحيز من الخصوصية في حياته ... والمرأة كمان
الرجل بيتحمل تعب العمل ومجهوده البدني ... والمرأة بتتحمل آلام الحمل والولادة وما بعد الولادة
الرجل يحب يحس إنه مرغوب فيه ... والمرأة كمان
الرجل تُلح عليه الغريزة الجنسية ويطلب إشباعها (بالحلال طبعا) ... والمرأة كمان

إلى آخره من الطبائع البشرية التي جُبلنا عليها منذ بداية الخلق ولكن بنسب متفاوتة قد ترتفع عند الرجل وتقل عند المرأة ... أو العكس

ثانيا : من ضمن الصفات إللي بيشترك فيها آدم وحواء هي عملية تغير مستوى الهرمونات في الجسم من وقت للتاني بشكل طبيعي جدا مالناش أي دخل فيه
ولكن الموضوع ده عند حواء بيتم بشكل أسرع ومُتقارب عن الرجل
علشان كده الحالة المزاجية لحواء بتكون في أغلب الأوقات مُتقلبة لأنها بتمر بفترات اكتئاب كتيرة في حياتها غصب عنها
فترة الاكتئاب دي بتمر بيها كل شهر لمدة أسبوع على الأقل ولمدة 9 شهور خلال الحمل وبتستمر بعد الولادة لفترة ليست بالقصيرة برضه
وأسوأ مرحلة اكتئاب بتمر بيها المرأة لما بتوصل لسن انقطاع الطمث بيبقى اكتئاب مزدوج ، اكتئاب نتيجة لتغير مستوى الهرمونات في الجسم واكتئاب نتيجة لإحساسها بأنها مابقيتش امرأة وإن عمرها الافتراضي انتهى
تقريبا حواء بتقضي نص عُمرها وهي في حالة اكتئاب
وفي بعض النساء بيضطروا إنهم ياخدوا أدوية مضادة للاكتئاب خلال فترة العذر الشهري بأمر من الطبيب !!!

ثالثا : فيه مفهوم شائع - الله أعلم شاع منين بالضبط - بيقول : إن المرأة كلما زاد مستوى ثقافتها وتعليمها قلت الأعراض العاطفية والنفسية عندها !!!
طبعا ده مفهوم خاطيء جدا جدا جدا
لإن أي امرأة في الدنيا مهما وصلت من مستوى ثقافي أو مراكز علمية فهي في النهاية امرأة لها طبيعة خاصة ونفسية خاصة لازم تُحترم منها هي شخصيا في المقام الأول ومن إللي حواليها كرجال ونساء في المقام التاني .
وكمثال بسيط علشان النقطة دي تكون واضحة لأخونا آدم :
هل الرجل لو وصل لأعلى درجات التحضر والتعليم والثقافة والرقي ... هل ممكن إنه يتنازل عن قوامته ؟
الرجل الغربي بيعاني نفسيا من النقطة دي لإنه مُجبر على إنه يتناسى غريزته إللي خُلق بيها كقيم على المرأة ومُطالب بإنه يتعامل معاها على إنها نِد ليه في كل شيء وأي شيء !!!
يبقى نتفق على إن مستوى التعليم والثقافة مالهومش أي دخل بما جُبلنا عليه من فطرة وغرائز كرجال وإناث على حد السواء .

أكيد مش هتكون دي كل النقاط إللي عاوزين نتكلم فيها بس نكتفي بالنقاط دي في الوقت الحالي
ونبدأ ناخد اتصالات من السادة المشاهدين :) .
-----------------------------------------------------
تحديث (1) :
تقول السيدة عائشة (رضي الله عنها) : كنت أتعرق العظم وأنا حائض فيأخذه رسول الله (صلى الله عليه وسلم) فيضع فمه حيث كان فمي ، وأشرب من الإناء فيأخذه رسول الله (صلى الله عليه وسلم) فيضع فمه حيث كان فمي وأنا حائض ... صححه الألباني .
-----------------------------------------------------
تحديث (2) :
يقول رسول الله (صلى الله عليه وسلم) : أُريت النار فإذا أكثر أهلها النساء ، يكفرن .
قيل : أيكفرن بالله ؟
قال : يكفرن العشير ، ويكفرن الإحسان ، لو أحسنت إلى إحداهن الدهر ، ثم رأت منك شيئا ، قالت : ما رأيت منك خيرا قط ... رواه البخاري .

هناك 18 تعليقًا:

هوندا يقول...

سلام عليكم

جزاكم الله خيرااولا
انا بأيدك ان فعلا سبب اكتر المشاكل وفشل العلاقات عدم فهم طرفى العلاقه بطبيعه الاخر ،زى مانتى وضحتى بالظبط الاتنين ليهم نفس الاحتياجات بس طريقه التعبير عنها اوقات بتختلف فى الاسلوب من الست او الراجل

الست مش بتفكر بنفس طريقه تفكير الرجل لاختلافات ربنا خلقها فيهم ، كمان لو الراجل مفمهش طبيعه الست ونفسيتها وقدر يتعامل مع تقلب مزاجها بحكمه ومعرفه هيحسها فعلا غامضة او غربيه بعش الشىء يبقا الافضل ان قبل مااى حد يقبل ع حاجة يدرس الشخص التانى يقرا كتاب عن طبيعته ويفهمه بحيث يقدر يتعامل معاه بطريقه افضل عشان يرتاح ويريحها
:)

إيمان الحسيني يقول...

وعليكم السلام ورحمة الله وبركاته
جزاكِ الله خير الجزاء يا هوندا

المشكلة إن كل واحد من الطرفين بيعامل التاني بنظرته الشخصية وبعقليته
والاتنين ناسيين تماما إنهم مش زي بعض في طريقة التفكير وفي ترتيب الأولويات
(كل ميسر لما خلق له)
وفي نفس الوقت الاتنين مايقدروش يعيشوا من غير بعض
لإن الجزء لازم يرجع للأصل إللي اتاخد منه علشان يبقوا مُكتملين ضمنيا

منوراني :)

الطائر الحزين يقول...

العلاقة هى تكامل وتوافق

نحتاج الى من يكملنا أحيانا وأحيان أخرى الى من يتوافق معنا

تحياتى

عصفور المدينة يقول...

السلام عليكم بخصوص الموضوع الأصلي - اللي هو الصراحة والوضوح-
عنصر هام في الفهم إن كل طرف يبرز التفاصيل الحقيقية التي تفيد الطرف الآخر في فهمه وخاصة أن كما أشرت أنت أن هناك خصوصيات لكل امرأة وخصوصيات لكل رجل وهذه الفروق هي التي تكون الإنسان وأعتقد أن الصفات العامة كثيرا ما تكون مفهومة مسبقا والوصايا تسقط عليها ولكن كما يقول رجال السياسة "الشيطان يطمن في التفاصيل"

فمتهيأ لي كدة انت بتأيدي الصراحة والوضوح التامين
:)

إيمان الحسيني يقول...

كلامك سليم أخي الطائر الحزين
بس للأسف العلاقة الآن أصبحت :
الغَلبة لمن ؟

إيمان الحسيني يقول...

وعليكم السلام ورحمة الله وبركاته
جزاك الله كل خير أخي عصفور المدينة

أنا طبعا ضد الكذب والخداع على طول الخط
لكن في واقع الحياة بيبقى فيه حاجات ممكن تتقال بشكل صريح جدا
وحاجات تتقال بشكل صريح متزوق
وحاجات من الأفضل السكوت عنها لإن التصريح بيها - بأي شكل كان - هيضر أكتر مما هينفع

المهم إن كل طرف يبقى فاهم احتياجات الطرف الثاني
ويبقى عارف إن هما الاتنين خُلقوا زي بعض في المضمون وإن اختلفوا في الشكل وطريقة التفكير وترتيب الأولويات

باب البحر يقول...

جزاكم الله خيرا .. أتمنى أن تكون الإجابات هذه المرة قاطعة ، فهناك أسئلة فعلا لا أعرف إجاباتها.

- هناك فترة دورية متكررة كل شهر تصبح فيها المرأة متقلبة المزاج .. هل التعامل مع أختي أو زوجتي - إن شاء الله - يكون بتركها لترتاح أم بالترفيه عنها أم ماذا تنتظر الأخت أو الزوجة من الأخ أو الزوج حينئذ ؟؟

- سمعت أن المرأة العاملة يظهر عليها تقدم السن أكثر من المرأة ربة المنزل . فهل هذا صحيح؟

- هل تسعد المرأة بمساعدة زوجها لها في البيت .. أم تعتبره تدخل في خصوصياتها و أنه يسئ لصورتها و يوحي أنها مقصرة فيما أوجبته على نفسها من أعمال البيت؟

- هل يمكن أن تمثل الفتاة أو المرأة أنها قنوعة أو راضية .. و كيف لي أن أعلم أنها كذلك أو لا (أقصد طبعا الفتاة التي أتقدم لها)

هذه هي الأسئلة التي تدور بخلدي الآن .. و جزاكم الله خيرا

قوت القلوب يقول...

السلام عليكم ورحمة الله وبركاته

هذه أول زيارة في مدونتك

استمتعت بها..بارك الله فيكِ

جذبني موضوعك جدا..دائما افكر في هذا الموضوع.. واحوال المتزوجين

ورايي في الموضوع .. انه يجب ان يفهم كلا الطرفين ان الزواج ليس بلعبة..ولكنها علاقة جميلة ومقدسة بينهم

ولتحقيق السعادة فعلا.. يجب ان يتقوا الله في كل شيئ

وهذا والله سبب السعادة الزوجية

اسال الله ان يسعد الجميع

وجزاكِ الله خيراً يا طعمه :)

أختكِ في الله

قوت القلوب

قوت القلوب يقول...

السلام عليكم ورحمة الله وبركاته

هذه أول زيارة لي في مدونتك الجميلة

استمتعت بها..اسأل الله أن يوفقك ويبارك لكِ

بالنسبة للموضوع الذي طرحتيه

فرايي انه يجب على كلا الطرفين..ان يفهموا ان الزواج ليس بلعبة.. وانه مسؤولية..وعلاقة مقدسة وجميلة بين رجل وامراة

ويجب ان يؤدي كل منهم دورة بحب وامانة

وأن يطيعوا الله ويتقوه..وبذلك ينالون رضاه..ويشعروا بالسعادة الحقيقية

وكل منهم يفهم ما يريده الآخر وينفذه بكل رضا

اسال الله ان يسعد المتزوجين..ويتزوج من لم يتزوج ويعيشوا بسعادة في ظل رضا الله

بارك الله فيكِ أخيتي

أختك في الله..قوت القلوب

Dr.khaled يقول...

ولهن مثل الذي عليهن بالمعروف

كلمة طيبة جدا ان سيدنا عبد الله ابن عباس..
كان يستشهد بهذه الاية ويقول (انا احب ان اتزين لامرأتي كما تتزين هي لي)

رحم الله السلف...وعلم السلف

إيمان الحسيني يقول...

وإياكم أخي الكريم باب البحر

الأسئلة إللي حضرتك سألتها منطقية بس ماينفعش يبقى فيها إجابات حاسمة لأنها بتختلف من فتاة لأخرى

بمعنى إن حضرتك لما بتكون متضايق مثلا بتحب تقعد مع حد وتتكلم معاه
فيه رجل تاني غيرك بيحب يقعد لوحده وهو في نفس ظروف الضيقة

المرأة عامة في خلال التعب الشهري بتحب تحس إن فيه اهتمام بيها وبإنها تهم إللي حواليها وإنهم متدايقين لتعبها
فيا ريت الزوج يروح عن زوجته في الفترة دي ويحسسها بإنه راغب فيها بالرغم من تعبها وإللي أكيد بيظهر على ملامح وجهها
إحنا كبنات بنعرف التعب ده بمجرد النظر لوجوه بعض
وأكيد الزوج هيتعرف على الملامح دي بعِشرته لزوجته
بس في نفس الوقت لما يكون التعب في ذروته أعتقد إن أغلبية النساء بيحبوا يكون المكان هاديء حواليهم خاصة من الكلام لإن أقل صوت في الوقت ده بيبقى مزعج جدا للبنت بالذات إذا كان رغي أو إلحاح أو حتى كلمات تهدئة بسيطة
التزام الصمت ولمسة حانية بتكون كافية جدا في وقت الذروة

بالنسبة لظهور السن على المرأة فده برضه بيختلف من مرأة لأخرى حسب اهتمام المرأة بنفسها
يعني ممكن تكون عاملة ومجهدة لكن قادرة على إنها تحافظ على شبابها
وممكن تكون ربة منزل وتترك نفسها للسمنة وأعراض التقدم في السن لأنها مش هاتخرج ومافيش حد يهمها إنه يشوفها في شكل كويس وجوزها اتعود على شكلها كده
طبعا ده تفكير خاطيء لإن أولى الناس بالاهتمام بالنفس هو الزوج أولا وأخيرا

بالنسبة لمساعدة الزوج لزوجته في أعمال المنزل
فدي برضه بتختلف من شخصية لأخرى
فيه مرأة بتكون ديكتاتورية في المنطقة دي من الحياة الزوجية وبتعتبر البيت ملكية خاصة بيها وإنها الوحيدة إللي المفروض تهتم بيه
وفيه مرأة تانية بتسعد جدا لما زوجها يساعدها في الأعباء المنزلية
بس الشيء الأكيد إن المرأة عامة بتحس بالاطمئنان والراحة النفسية إذا حسيت إن زوجها عنده الاستعداد لمساعدتها في أعمال المنزل حتى لو الاستعداد ده ماتحولش لفعل

بالنسبة لرضى المرأة
المرأة - غالبا - بيظهر على ملامحها إللي بتحس بيه أو بتفكر فيه
يعني لو حضرتك قدمت هدية لزوجتك - بإذن الله تعالى - والهدية دي أسعدتها فعلا هتشوف ده في عنيها بشكل واضح جدا وهتفهمه بمعاشرتك ليها
ولو فرحت بالهدية مجاملة ليك .. برضه هاتحس بالمجاملة دي
بس المرأة بشكل عام بتهتم بطريقة تقديم الهدية أكثر من الهدية نفسها
يعني الكيف مش الكم
بمعنى إنك ممكن تقدملها وردة بلدي قاطفها من الشارع لكن بطريقة وأسلوب تخليها تشوف الوردة دي أغلى ماسة في الدنيا
وممكن تجيبلها خاتم ألماظ وتقدمه ليها بطريقة وأسلوب تخليها تكره تلبسه أو حتى تلمحه من بعيد

أدعو الله أن أكون قد وفقت في الإحابة على أسئلتك أخي الكريم
وأحب أأكد في الآخر إن أسئلة حضرتك نسبية جدا وبتختلف إجابتها من فتاة للتانية
علشان كده فترة الخطوبة مهمة في إنك تتعرف على شخصيتها ونفسيتها

أسأل الله لك التوفيق في اختيار شريكة حياتك
اللهم آمين

إيمان الحسيني يقول...

وعليكم السلام ورحمة الله وبركاته أختي الحبيبة قوت القلوب
منورة مدونتي :)

وطبعا فيه تأييد كامل لرأيك
إن الزوجين لازم يعرفوا إن رباط الزواج ميثاق غليظ لا يُستهان به
والعلاقة الزوجية مش علاقة نِدية
دي علاقة سكن ومودة ورحمة وتكامل

إيمان الحسيني يقول...

جزاك الله خير الجزاء أخي الدكتور خالد
وياريت الرجال في العصر الحالي يفهموا الأمر ده
لإن للأسف لما الزوجة بتطلب من زوجها إنه يتطيب برائحة هي بتحبها أو يسرح شعره المنكوش بيكون الرد مؤلم :
ده شغل ستات وأنا راجل
!!!

ma 3lina يقول...

بسم الله
إن كان ع التساؤلات فعندي .. لكن ابدأ بالتعليق على الحقائق
اللي حملت دفاع كامل عن المرأة وتبرير لأي تصرف يمكن أن يصدر منها

فالحقيقة الأولى تجعل الصفات التي تحملها المرأة وتضايق الرجل مصدرها الرجل نفسه لأن المراة جزء منه .. يبقى الست براءة وانت يا آدم السبب .. ولكن المشكلة ليست في الصفة وإنما في النسبة كما تفضلت وذكرت .. كون الصفة موجودة في الإنسان لا تجعل منه إنسان سيء إلا إذا زادت النسبة عن المسموح .. والست أراها لا تقوم بأي مجهود لضبط نسبها ..

الحقيقة التانية تحمل برضه سبب وعذر لأي تصرف تقوم به المرأة .. ببساطة نشاط هرموني .. ما هو لو دا عذر .. تبقى المرأة مش مكلفة وقتها الشهري .. فهل دا صحيح وهل دا مبرر لأنها تبقى كئيبة وتعكس كآبتها بتصرفات تيجي فوق نافوخ آدم

الحقيقة الثالثة وكنت اتكلمت عنه قبل كده في مدونتي إن قلة العاطفة عند غالب نساء اليوم بغض النظر عن التعليم والمستوى الثقافي ..

الموضوع مش صراع بين الرجل وبين المرأة .. لكن بما إن حضرتك طرحتي الموضوع نتكلم

(:

إذا كان مزاج المرأة متقلب .. إزاي أحاول افهمها .. ما هي كمان 24 ساعة حتغير مزاجها .. مش كده وبس .. دي مشاعرها كمان ببتحول 180 درجة وفي 24 ساعة

ليه الست لما تسألها عن حاجة بتكون إجابتها نموذجية طول ما هي بعيدة عن التطبيق .. لكن وقت التطبيق بيتصرفوا تصرفات تانية خالص .. وبيبقى عندهم مبررات كتيرة واقتناع كامل ان دا الصح .. زي أخت صديق لي كانت من اشد المؤيدين للمقاطعة .. ولما جت تتجوز اشترت في جهازها حاجات مستوردة وقالت اصل دي ضرورة ..
وأي واحدة تسألها تختار بين الماديات والأخلاق .. ستذكر الأخلاق طبعا .. لكن عند التنفيذ ترفض الأخلاق لأسباب مادية .. دا بقا بيحصل كتيييير

إيمان الحسيني يقول...

منور الموضوع أخي الكريم ما علينا :)

والله العظيم أنا مش عاملة الموضوع للدفاع عن المرأة ولتبرير تصرفاتها وكإنها لا تُخطيء أبدا
أنا عملته كمحاولة للتقريب والتفاهم خاصة وإن أغلب الحقائق إللي أنا ذكرتها فيه رجالة كتيرة جدا مايعرفوش عنها حاجة

أولا : أنا لما ذكرت إن حواء جزء من آدم كان قصدي الحقيقي - والله يشهد عليا - إني ألفت نظر آدم إلى إن حواء ليها متطلبات وغرائز زيها زيه بالضبط
في مجتعنا الشرقي يا أخي الكريم لو المرأة اشتكت من إن زوجها لا يأتيها إلا كل شهر مرة تصبح فاسقة وقليلة التربية والدين والأخلاق لأن العادات والتقاليد أجبرت المرأة على أن تلفظ من تفكيرها مسألة الاحتياج الغريزي للزوج كرجل
أعتقد إن إهمال الزوج للأمر ده صفة سيئة جدا فيه كرجل ، وكثير من الرجال مش بيسعوا لتعديل صفاتهم السيئة لإن المجتمع رباهم على إنهم رجال وكفى .

ثانيا : بالنسبة للتغيرات الهرمونية فدي حقائق علمية وطبية لكنها لا تلغي أن المرأة مُكلفة في الوقت ده زي أي وقت تاني طالما إنها بعقلها ، لكن برضه وللأسف رجالة كتير مش قادرة تفهم ده وبيعاملوا زوجاتهم أسوأ معاملة والمرأة صامتة ، فلما بتيجي في الوقت ده وتنفجر ماحدش بيفهم هي انفجرت ليه .
وفي أحيان أخرى الزوج بتحصله مشكلة في الشغل ولما بيرجع البيت ولأي كلمة أو موقف يصدر من الزوجة تلاقيه بيمسكها ويضربها وبعد كده يبرر تصرفه ده بإنه عنده مشاكل في الشغل ، تفتكر أنهو أكثر تأثيرا على تصرفات الفرد ... مشاكل العمل ولا التغيرات الهرمونية داخل الجسد ؟!!!

ثالثا : قلة العاطفة غالبة على الاتنين يا أخي الكريم وده نتيجة للظروف إللي الكل بيمر بيها وإللي مش مديا لحد الوقت إنه يفكر بعواطفه شوية .

رابعا : بالنسبة لمزاج المرأة وتغير مشاعرها بين يوم وليلة فده الرسول (صلى الله عليه وسلم) ذكره في حديث صحيح :
يعني الأمر معروف من أيام الرسول ، والحبيب المصطفى قدر يتعامل مع الصفة دي في زوجاته ، والفروض إنه قدوة حسنة ليكم زي ما زوجاته قدوة حسنة لينا .

خامسا : أما بالنسبة للكلام النموذجي والتطبيق الغير نموذجي فده برضه على الاتنين وأضربلك مثل من حياتي الشخصية ، في يوم طلب شخص إنه يتقدملي علشان أكون زوجته الثانية وقال إنه بيعمل ده كنوع من المشاركة الخالصة لوجه الله لحل أزمة العنوسة ، أنا وافقت من حيث المبدأ، ولما هو عرف إني أصغر منه بـ 3 سنين بس رفضني من غير حتى ما يشوفني لإنه عاوز واحدة أصغر منه بما لا يقل عن 5 سنين .

أحب أأكد يا أخي الكريم إني طرحت الموضوع لإني فوجئت إن فيه رجالة كتير ماتعرفش حاجة عن تكوين المرأة الجسدي والنفسي وبيتعاملوا معاها على أساس موروثات خاطئة لا تمت للحقيقة أو الدين بصلة .

أسأل الله أن يرزقنا جميعا الرضا بقضائه
اللهم آمين

إيمان الحسيني يقول...

عفوا يا أخي الكريم نسيت أذكر الحديث الشريف :

" .... ورأيت أكثر أهلها النساء ، قالوا لما يا رسول الله ؟ قال : بكفرهن . قيل يكفرن بالله ؟ قال يكفرن العشير ، ويكفرن الإحسان لو أحسنت إلى إحداهن الدهر ، ثم رأت منك شيئا ، قالت : ما رأيت منك خيرا قط " ... رواه البخاري

ibn_abdel_aziz يقول...

انا مش بزعق ولا حاجة يا ايمان

وبعدين انا بتكلم في مبادئ عامة جدا
ولا اعرف انتي بتتكلمي علي مين ولا وليها مين
ولا يفرق معايا بصراحة التفاصيل دي

المبدأ الواضح وضوح الشمس هو ان الفتاة يجب ان يكون رأيها هو الفيصل
ودي مسألة منتهي فيها النقاش عندي

من حيث الناس
نص الشعب المصري حاشر نفسه في حل مشاكل النص التاني

واللي معاكي في الشغل انفسهم قد لا يقومون بما ينصحوكي به
من التجربة العملية اكتشفت ان الكلام ببلاش وكثر منه

انا مش عاوزك تفكري كثير في موضوع فرق السن بشكل سلبي او ايجابي يا ايمان

الفكرة كلها ان انتي ممكن تكوني رافضة حد اكبر منك ب 20 سنة لان انتي شايفة انه ده فرق كبير
وممكن كمان شهرين تتعرفي علي شخص فرق السن حوالي 20 سنة وتتعايشي معاه كام شهر من خلال شغل او انشطة وتلاقي نفسك بتغيري رايك
في النهاية اللي انا بقوله انك انتي بس اللي تقدري تحددي
متقارنيش نفسك بالناس
متقوليش اصل فلانة اتجوزت واحد فرق السن سنتين بس واهي سعيدة اهي لاننا منعرفش فرق السن هو السبب اصلا واللا لأ؟
محدش يعرف لان فيه اسباب تانية كثيرة

انا زي ما قلت انا لا ضد ولا مع
كل واحد يشوف اللي يناسبه ايه وخلاص
لا بحط انماط ولا يهمني تجارب الناس ايه
ولا بقارن نفسي بيهم
ولا الشخص اللي عاوز اقترن بيه بالبنات التانيين

القضية وما فيها ان سيادتك يجب ان تحددي لنفسك ما هو مناسب وما هو غير مناسب
واول شئ حرري نفسك تماما من كلام الناس
اللي مع او اللي ضد

انتي لو جالك عريس اصغر منك بخمس سنين
الناس حتقول ايه؟
حيقوللك ما ينفعش ومش طبيعي وازاي
وكيت وكيت
في النهاية محدش سايب حد في حاله

احسن نصيحة تاخديها مش شخص بيحبك بجد و حريص عليكي
هو الشخص اللي يحط نفسه قدامك محايد تماما
اللي ميقولشي يا اما ده يا اما بلاش
اللي يقوللك رأيه بحب من غير تأنيب وعتاب وصداع وتحدي وتسفيه لرأيك انتي
لو لقيتي الشخص ده امسكي فيه بايدك وسنانك لان ده صديق موضوعي بيفكر معاكي زي مبيفكر لنفسه بالظبط

حاجة اخيرة
انا طبعا مش معترض ان الدكتور خالد يقول رايه
انا بس حسيت ان موضوع ولي الامر ده حسب طريقته في سرد رأيه
مش متزن بالمرة
تقريبا لغى راي البنت تماما وخلي الموضوع كله في ايد ولي الامر
او ده اللي فهمته
وده انا شخصيا رافضه تماما
ولي الأمر هو شخص معين علي اتخاذ القرار برفق وحب ومشاورة مش بتسليم الامر له تماما وكأنه هو الذي يدري ويعلم والفتاة ليس لها من الامر شئ

بصي يا ايمان انا عندي ليكي قصة تانية
واحدة عندها 22 سنة واتقدملها شخص عنده 36 سنة
هي موافقة واهلها رفضوا تماما
لو البنت دي كان عندها 30 وهو عنده 44 كانوا وافقوا
خدتي بالك انا قصدي ايه ؟
في النهاية البنت شوال بطاطس
وللاسف صاحبات نفس البنت اللي معاها في سنها وهي عندها 22 حيقولولها : ليه يعني دنتي لسة 22 سنة استني شوية ويجيلك سيد سيده " ولو كان عندها 30 نفس الصديقات حيوقلولها :" يا هبلة طبعا اقبلي هو حد لاقي يتجوز ؟ "

في النهاية
لا البنت نفسها كانت تفرق معاهم
ولا الشخص اللي اتقدم فرق معاهم
كله مقارنات ف مقارنات ف مقارنات
فشل في فشل في فشل

بس كدة

إيمان الحسيني يقول...

والله العظيم أنا فاهمة رأيك ده يا شريف ومقتنعة بيه وده إللي أنا باقوله دايما
بس الزن على الودان بيخلي الواحد للحظة يشك إنه على صواب
فبيطلب آراء الآخرين علشان يعرف هو صح ولا غلط

على فكرة أنت رديت في موضوع تاني
:D