السبت، مارس 01، 2008

والله العظيم إحنا بني آدمين

* لما معدلات الجريمة والاغتصاب تزيد بسبب عدم توفر مقومات الحياة الأساسية ونلاقي إن أهل الأمر والنهي مستغربين ، يبقى ده اسمه إيه ؟ ... مع العلم إن مقومات الحياة الأساسية موجودة وبكثرة بس للي يقدر على تمنها !!!!
* لما تكون 80% من الأغذية المتواجدة في بلدنا غير مطابقة للمواصفات العالمية والمياه غير صالحة للاستخدام الآدمي والعلاج من غلاء إلى غلاء ، يبقى ده اسمه إيه ؟
* لما نلاقي المسئولين الكبار بيتحججوا بإن غلاء الأسعار في جميع دول العالم مش في مصر بس ، هل المسئولين دول عندهم خبر إن جميع دول العالم رفعت مرتبات العاملين عندها إلا مصر ؟!!!!
* لما الفريق القومي ياخد مكافآت - من داخل مصر فقط - ملايين ... الملايين دي فين من المرضى والفقراء ؟ أو بمعنى أصح فين زكاة أموال أغنياء مصر إللي طلعوا الملايين دي كهدايا لناس مش محتاجة أصلا ؟!!!
* لما نواب مجلس الشعب يتبادلون اللب والسوداني والشيكولاتة داخل جلسات المجلس الموقر ، وبعض المصريين بيستوردوا لحوم من برة الكيلو منها بـ (500) جنيه مصري لإن البقرة إللي جاية منها اللحمة دي مُدللة وبتشرب بيرة ، وبقية الشعب مش لاقي ياكل ... يبقى ده اسمه إيه ؟


يا رب ارحمنا يوم تبعث عذابك
فلا نملك إلا أنفسنا
وأنت الشهيد علينا
اللهم آمين

هناك 11 تعليقًا:

أسد مسجون يقول...

بدايه السلام عليكم ورحمه الله وبركه

موضوع جميل جدا بس المشكله اني احنا في نظر النبي ادمين للاسف عكس ذلك لاننا رضينا ان نكون كذلك ان الله لايغير ما بقوما حت يغيروا ما بأنفسهم

والسلام عليكم

إيمان الحسيني يقول...

وعليكم السلام ورحمة الله وبركاته
أنا عارفة يا أخي الكريم إن المشكلة في أنفسنا إحنا أصلا مصداقا لحديث رسول الله (صلى الله عليه وسلم) : يا معشر المهاجرين ! خصال خمس إذا ابتليتم بهن ، وأعوذ بالله أن تدركوهن :
1-لم تظهر الفاحشة في قوم قط ؛ حتى يعلنوا بها ؛ إلا فشا فيهم الطاعون والأوجاع التي لم تكن مضت في أسلافهم الذين مضوا .
2-ولم ينقصوا المكيال والميزان إلا أخذوا بالسنين وشدة المؤنة ، وجور السلطان عليهم .
3- ولم يمنعوا زكاة أموالهم إلا منعوا القطر من السماء ، ولولا البهائم لم يمطروا .
4- ولم ينقضوا عهد الله وعهد رسوله إلا سلط الله عليهم عدوهم من غيرهم ، فأخذوا بعض ما كان في أيديهم .
5- وما لم تحكم أئمتهم بكتاب الله عز وجل ويتحروا فيما أنزل الله إلا جعل الله بأسهم بينهم ... صححه الألباني .

الطائر الحزين يقول...

من كان يريد العاجلة عجلنا له فيها ما نشاء لمن نريد ثم جعلنا له جهنم يصلاها مذموما مدحورا


تحياتى

إيمان الحسيني يقول...

مش عاوزين أي حاجة من العاجلة يا أخي الكريم غير إننا نعيش عيشة كريمة زي ما ربنا كرّم بني آدم
الله المستعان

جزاك الله خير الجزاء أخي الكريم

محمد عبد الغفار يقول...

فكرتينى بحسن عابدين لما بيسأل محمد نجم فى المسرحية

انا حيوان يا بن ادم؟

عصفور المدينة يقول...

أول تعليق لأسد مسجون وهذا هو واقعنا

إيمان الحسيني يقول...

جزاك الله كل خير يا محمد
ليا واحدة صاحبتي في الشغل بتقولي إن كل شوية تقولي : تعليق من مسرحية أو فيلم ؟
قولتلها : للأسف التعليقات دي بقيت بتمثل واقعنا بشكل كبير جدا .

الله المستعان

إيمان الحسيني يقول...

نسأل الله أن يحررنا من الذنوب
فهي السبب الحقيقي لتثاقلنا
جزاك الله كل خير أخي عصفور المدينة

امنية يقول...

مصر اسودت من سكاتنا
من رضانا بالمهانه والذل
من تفريطنا فى حقنا..
كل جيل معتمد على الجيل اللى قبله والجيل اللى بعده فى الاصلاح!!

ربنا يغفر لنا تقصيرنا..

شهيدة يقول...

اقولك انا دا يبقى ايه

يبقى انت اكيد .. اكيد في مصر

والله اصبح واقعا مضحك مبكي .. شر البلية ما يضحك ..

لكن لما اصغر عامل او موظف على باب الله في الدولة يقبل على نفسه الرشوة .. متستغربيش ان اكبر عامل او وزير فيها قابل برضو على نفسه الرشوة .. وهو كل واحد بيرتشي على قد حجمه ومنصبه ..

صحيح لمثال الذي ذكرته مضحك . لكنه واقعي .. ورغم انه واقعي .. الا ان هذا لا يبرر لنا الجلوس والنحيب على حالنا .

بقدر ما علينا ان نصلح قدر الامكان ونغير قدر الامكان .. لنزيح الظلم والظلاّم .. او لنقل لتقل دائرة الفساد الى اقل نسبة ويكون صلاح الحال والاخلاق والامانه والعدل هم السمه الغالبه على مصرنا

إيمان الحسيني يقول...

أمنية وشهيدة
نورتوا مدونتي
بس إيد لوحدها ماتسقفش
وكل ما بنحاول نبني طوبة نلاقي بلدوزر ورانا بيهد الطوبة باللي بناها
وأكبر دليل على كده التربية
أغلب شبابنا وبناتنا - إلا من رحم ربي - بمجرد ما يختلطوا بالعالم الخارجي بينسوا كل إللي اتعلموه على إيد أهاليهم
الله المستعان