نصائح طعمة للزيجة الناعمة

ردا على نصائح أحمد شقير للرجال ...

أقدم لكُــن :

نصائح طعمة للزيجة الناعمة

أولا : في فترة الخطوبة لازم تظهري قدامه بإنك البنت البريئة جدا الخام إللي ماتفهمش حاجة في أي حاجة واقنعيه إن هو إللي بيعلمك كل حاجة (اعمليله منظر يعني) لإن الراجل يحب الست إللي تنفخ فيه .

ثانيا : أي تنازل من ناحيتك – خاصة في الأمور المادية والاتفاق – لازم تفضلي تحسسيه دايما إنه تنازل ومش حق مكتسب يا إما هيسوق فيها ويجبرك بعد كده على إنك تتنازلي على طول .

ثالثا : إوعي تتكلمي عن شراء حاجة هو أصلا مش مقتنع بيها ، ولو نفسك في الحاجة دي فعلا إوهميه إن هو إللي بينصحك بيها وإن من غير نصيحته دي كنتي هتلوصي ... واحتمال كبير يجبهالك بنفسه بعد كده .

رابعا : عوديه من أول يوم زواج إنه يساعدك في شغل البيت تحت بند (عصفورين الحب) ، ولو رفض تبدئي فورا بالهجوم واتهامه بإنه مش بيحبك قد انتي ما بتحبيه ، وإنه اشترى جارية تخدمه وماتجوزش واحدة بيحبها .

خامسا : لو معجبة بفنان ما إياكي تُظهري الإعجاب ده قدامه يا إما الشكوك هتملا نفسه ، بس حاولي بمنتهى الذكاء تحوليه لصورة الفنان ده بإنك توهميه إنه دنجوان عصره وأوانه ... مثـلا : يا سلام لو تخللي الدوجلاس ... شكلها خطير قوي عليك وهتخلي كل البنات يبصولك .

سادسا : إوعي تحطيه في موضع مقارنة مع رجل تاني يا إما تبقى بتنهي حياتك الزوجية بإيدك ، وإذا كان لا بد من المقارنة لتوضيح وجهة نظرك فجيبهاله بطريقة ذكية ، يعني مثلا قبل عيد جوازكم تعيشي في دور الهبلة العبيطة إللي مش فاكرة حاجة وتقومي خابطاه بالجملة دي : تخيل صاحبتي امبارح جوزها جابلها كوليه دهب شيك جدا بمناسبة عيد جوازهم !!!

سابعا : حسسيه دايما إن انتي إللي فاضلاله وباقيلاه في الدنيا دي ومايقدرش يستغنى عنك يا إما هيجري على الست الوالدة عند أول مشكلة .

ثامنا : دايما خللي البيت والأولاد لغز مُحير بالنسباله ، يعني إوعي يحفظ أماكن الحاجات في البيت أو يفهم طباع الأولاد علشان يفضل دايما محتاجلك جنبه ، وتفضلي دايما مُسيطرة على الوضع :) .