الأحد، نوفمبر 13، 2005

نصائح طعمة للزيجة الناعمة

ردا على نصائح أحمد شقير للرجال ...

أقدم لكُــن :

نصائح طعمة للزيجة الناعمة


أولا : في فترة الخطوبة لازم تظهري قدامه بإنك البنت البريئة جدا الخام إللي ماتفهمش حاجة في أي حاجة واقنعيه إن هو إللي بيعلمك كل حاجة (اعمليله منظر يعني) لإن الراجل يحب الست إللي تنفخ فيه .

ثانيا : أي تنازل من ناحيتك – خاصة في الأمور المادية والاتفاق – لازم تفضلي تحسسيه دايما إنه تنازل ومش حق مكتسب يا إما هيسوق فيها ويجبرك بعد كده على إنك تتنازلي على طول .

ثالثا : إوعي تتكلمي عن شراء حاجة هو أصلا مش مقتنع بيها ، ولو نفسك في الحاجة دي فعلا إوهميه إن هو إللي بينصحك بيها وإن من غير نصيحته دي كنتي هتلوصي ... واحتمال كبير يجبهالك بنفسه بعد كده .

رابعا : عوديه من أول يوم زواج إنه يساعدك في شغل البيت تحت بند (عصفورين الحب) ، ولو رفض تبدئي فورا بالهجوم واتهامه بإنه مش بيحبك قد انتي ما بتحبيه ، وإنه اشترى جارية تخدمه وماتجوزش واحدة بيحبها .

خامسا : لو معجبة بفنان ما إياكي تُظهري الإعجاب ده قدامه يا إما الشكوك هتملا نفسه ، بس حاولي بمنتهى الذكاء تحوليه لصورة الفنان ده بإنك توهميه إنه دنجوان عصره وأوانه ... مثـلا : يا سلام لو تخللي الدوجلاس ... شكلها خطير قوي عليك وهتخلي كل البنات يبصولك .

سادسا : إوعي تحطيه في موضع مقارنة مع رجل تاني يا إما تبقى بتنهي حياتك الزوجية بإيدك ، وإذا كان لا بد من المقارنة لتوضيح وجهة نظرك فجيبهاله بطريقة ذكية ، يعني مثلا قبل عيد جوازكم تعيشي في دور الهبلة العبيطة إللي مش فاكرة حاجة وتقومي خابطاه بالجملة دي : تخيل صاحبتي امبارح جوزها جابلها كوليه دهب شيك جدا بمناسبة عيد جوازهم !!!

سابعا : حسسيه دايما إن انتي إللي فاضلاله وباقيلاه في الدنيا دي ومايقدرش يستغنى عنك يا إما هيجري على الست الوالدة عند أول مشكلة .

ثامنا : دايما خللي البيت والأولاد لغز مُحير بالنسباله ، يعني إوعي يحفظ أماكن الحاجات في البيت أو يفهم طباع الأولاد علشان يفضل دايما محتاجلك جنبه ، وتفضلي دايما مُسيطرة على الوضع :) .

هناك 23 تعليقًا:

shady يقول...

مابلاش حكاية النفخ دى حنلاقيها منكم ولا من امن الدوله
وبعدين ايه حكاية شغل البيت دى كمان رجاله اخر زمن هو الحزين يرجع من الساقيه اللى بيدور فيها علشان يشتغل فى البيت كمان
فعلاً إن كيدهن عظيم

إيمان الحسيني يقول...

أعتقد إن أمن الدولة أرحم بكتير مننا
ههههههههههههههههههههه

ماله شغل البيت بقى يا شادي ؟
رسولك كان بيخصف نعله ويخيط ثوبه بنفسه وهو متزوج 9 نساء

هتكون أحسن منه يعني ؟!!!

أما غريبة والله
:P

shady يقول...

أديكى قولتيها رسووووول

إيمان الحسيني يقول...

وبشر
وقدوة

ii يقول...

LOL!1
عجبتيني
والله دي الستات والا بلاش
:))

ايــــــــــــــــــوب يقول...

يعنى بأختصار لخبطيله حاله وشقلبيله كيانه ولفى ودورى عليه وخديه على قد عقله واكتبى على جنانه
ماحدش يسمع كلام طعمه

إيمان الحسيني يقول...

أي خدمة يا سعلوة :)
أنا تحت أمر النساء :))

إيمان الحسيني يقول...

بالضبط يا أيوب
عليك نووور :P

منور من تاني :)

غير معرف يقول...

على فكرة أحمد شقير نصايحه أوضح..لأنها مدعمة بأمثلة من واقع الحياة!!

إيمان الحسيني يقول...

مانحبش نقلد حد يا يحيى :)
لازم نكون متميزين
:P

sydalany-وش مكرمش يقول...

دايما خللي البيت والأولاد لغز مُحير بالنسباله ، يعني إوعي يحفظ أماكن الحاجات في البيت أو يفهم طباع الأولاد علشان يفضل دايما محتاجلك جنبه ، وتفضلي دايما مُسيطرة على الوضع

إيه النصايح دي
صباح الرعب
ده حاجة تخوف
أومال لو واحدة بيعاها و مش متدينة حتعمل إيه
أكيد تبقى مجهزة الكياس و سنة السكاكين
:0p

إيمان الحسيني يقول...

أنت ماعرفتش آخر الأخبار يا صيدلاني
مش دلوقتي بقوا بيكتبوا السكاكين والاكياس في القايمة

:P

ROMANTIC ROSE يقول...

كل ده يا طعمه ؟؟؟
اول مره امر عندك .. نصايح طعمه بجد .. بس هتفضل الجوازه بعدها ناعمه ؟؟ لا اعتقد ..

إيمان الحسيني يقول...

هو أنا مغسل وضامن جنة يا بفضفض :P
اتكلي انتي على الله بس

إيمان الحسيني يقول...

مسكين ؟!!!!
هو أنت يا فراس ماقريتش نصائح أحمد شقير ؟!!!

الصبر من عندك يا رب

منور :)

إيمان الحسيني يقول...

منورة يا رومانتك روز
ماحنا هنتبع أسلوب الجذب والشد
يعني لما المسائل تتصعد نهدي اللعب
ولما هو يطمن ويدي الأمان نشد إحنا تاني :)

Eman M يقول...

:))))))
"تخيل صاحبتي امبارح جوزها جابلها كوليه دهب شيك جدا بمناسبة عيد جوازهم "
و هو لازم كوليه دهب يعنى؟
ماله الألماظ:P

"ولما هو يطمن ويدي الأمان نشد إحنا تاني :)"
حسانا فى مطش كورة :)

إيمان الحسيني يقول...

منورة يا إيمي :)
وبإذن الله نكسب الماتش
ويحيا الألماظ :)

Ahmed Shokeir يقول...

إيه ده .. إيه ده

إيه النصايح التحفة دى ياطعمة

إنتى متأكدة إنك ماتعرفيش مراتى؟

أنا إبتديت أقلق

إيمان الحسيني يقول...

هههههههههههههه
أنا لو منك أهاجر وأنفد بجلدي
:P

beeboo يقول...

حسبي الله ونعم الوكيل

إيمان الحسيني يقول...

طبعا الموضوع كله على سبيل الدعابة يا مكين :)
مع وجود بعض النقاط المطلوبة فعلا
;)

إيمان الحسيني يقول...

حسبي الله ونعم الوكيل على كل ظالم ومفتري
:P

يا ترى حد من الرجالة المتضررين قرأ تدوينة أحمد شقير إللي أنا بارد عليها أصلا ؟!!!