الأربعاء، نوفمبر 30، 2005

أتاري الكل رافع راية بيضا يا أمتي



وانا بين خواتي سمعت صوت القنابل
سألت ماما قالت لي جيش غدار وقاتل
طلعت بصيت في السما لقيت ورق مرمي علينا
سألت ماما قالت لي بيقول سلموا تبقوا فعنينا
وسألت تيتة بوشوشة إزاي يا تيتة نستسلم ؟
قالت لي نرفع راية بيضا فوق بيتنا وبلاش نتكلم
وواحدة واحدة أخدت طرحة تيتة البيضا
وطلعت فوق بيتنا وربطتها بشريطة
ونزلت أجري قوام وأنا حاضنة لعبتي
من خوفي قلت أنام تداريني مخدتي
وشفت فالأحلام ورد وأمان وسلام
وصحيت على الألغام وصرخة جدتي
وفضلت أجري وأنادي عالناس في قريتي
أتاري الكل رافع راية بيضا يا أمتي
لتحميل الأغنية زوروا الصفحة دي
ولتحميل الفلاش دوسوا على الرابط ده

هناك 10 تعليقات:

Romantic Rose يقول...

صدقيني يا طعمه .. مع الوقت مش هيبقي ف ايدينا رفاهية رفع الرايه البيضا .. لان الفقر مش هيخلي عند حد فينا طرحه بيضا .. كفايه الطرحه السودا اللي لبسها الرجاله قبل الستات باستسلامهم و خنوعهم و رضائهم بحياة الرفاهيه الحاليه .. يااااا رب افق الامه لتنزاح الغمه قبل فوات الاوان ..

te3mah يقول...

يااااا رب افق الامه لتنزاح الغمه قبل فوات الاوان
اللهم آمين

عندك حق يا رومانتيك
الكل دلوقتي لبس الطرح بدل ما يرفعها

Shoks يقول...

رومانتيك .. "كفايه الطرحه السودا اللي لبسها الارجاله قبل الستات باستسلامهخم وخنوعهم " حسستيني انك مش عايشه في مصر وشايفه الاحوال ماشيه ازاي مش احنا اللي لابسينها بمزاجنا الطرحه ديه اكيد عارفه اصحاب المصالح والمعونات اللي بتيجي في جيوبهم واللي بيتحججوا بمعاهدات السلام ادي نص الشعب والنص التاني بيجري ورا لقمه العيش ومش شايف قدامه غير طريق ازاي يصرف علي اولاده طبعا انا مش باعلق المشاكل علي شماعات وابعدها عني لكن بدل ما نقعد في بيتنا وندعي ان ربنا يزيح الغمه ننزل ونحاول نصلح ولو حتي 1 % وندعي ان ربنا يزيح الغمة وان شاء الله النصر قريب انا متفائل بعد ده كله وبقول خلاص قرب اوي اليوم اللي احنا هنرفع فيه راسنا ..:)

te3mah يقول...

رومانتيك مش قصدها اتهام الناس كلها
بس للأسف الأغلبية السيئة بتخلي الحكم عام
ونماذج الشباب والبنات إللي منتشرة اليومين دول بقيت مخذية فعلا

ربنا يعافينا جميعا ويعفو عنا

اللهم آمين

حائر في دنيا الله يقول...

كنت كل ما احاول افرج بنات اختي على حاجة أفهمهم بيها يعني فلسطين ويعني ايه احتلال ويعني إيه منسبش حقنا
مكنتش بلاقيلهم حاجة
أي حاجة أحاول أعرضها عليهم من غير كارتون توم وجيري يرفضوا لأنها رخمة وهما عايزين القط أو البطة
وطبعاً مقدرش أفرجهم غصب عنهم
لغاية من شهر لقيت الكليب الجميل دا وهما اللي بيطلبوا إني أعيدوا كل ما يخلص ونا بحاول أفهمهم البنت الصغيرة عايزة تقول إيه
===
لو تعرفوا كليبات بالجمال دا ياريت تقوليلي أهي أحسن من بابا فين

te3mah يقول...

ربنا يخليك ليهم يا حائر ويباركلك فيهم

وعلى موقع هدير دوت كوم هتلاقي أغنيتين أطفال لرمضان
فيهم أغنية باحبها قوي :
أغنية رمضان السنة دي
اللينك أهو بتاع الصفحة :
http://www.hadeer.com/asp/arabic/misc/production.asp

رشا عبد الرازق يقول...

رائع يا طعمه
نادرا ما نجد اغاني وأناشيد عند العرب بالمستوى الجيد ده من حيث الكلمة والأداء والتعبير
أناشيد الاطفال فن له قيمته ووسيلة قوية لو نعلم
لله الأمر

te3mah يقول...

فعلا
لو تم الاهتمام بالأطفال شوية بعيدا عن البرامج المتخلفة إللي بتتقدم ليهم في الوطن العربي
صدقيني هتفرق معانا جامد جدا

tamer يقول...

واقع مؤلم


شكرك طعمة على المشاركة

وفقنا الله لما فية الخير


مع خالص تحياتى

te3mah يقول...

فعلا واقع مؤلم

جزاك الله كل خير يا تامر