السبت، ديسمبر 03، 2005

تعلمتُ مُؤخــراً

عندما تتعامل مع الناس يجب أن تُحدد لهم مِن البداية مَن أنت

بمعنى إنك تعمل قاعدة حلوة كده وتجمع الناس الجديدة إللي عاوز تتعامل معاهم وتقولهم :
بصوا بقى أنا شخصيتي كذا وباحب كذا وباكره كذا
ومش معنى إني باطنش أو باعديها يبقى أنا ضعيف
ومش معنى إني باقف على الواحدة يبقى أنا نرفوز
ومش معنى إني باوافق بسهولة يبقى تنسوا تاخدوا رأيي
ومش معنى إني بآخد وقت طويل في التفكير يبقى تزهقوا مني
ده يبقى أنا
وغير مسموح بتخطي الحدود الحمراء

لحد امتى يا ناس هنفضل نتغاضى عن حقوق الغير تحت مُسمى إننا نعرفهم وإنهم مش هيزعلوا ؟!!!

هناك 12 تعليقًا:

Romantic Rose يقول...

مش ضروري نقعدهم و نقولهم واحد اتنين تلاته .. ده حتي غير منطقي .. تخيلي لو انا بصاحبك جديد و رحت قايلالك بصي بقي يا ايمان انا بحب كذا و ما حبش كذا ولازم تفهمي كذا و كذا .. اكيد انطباعك عني هيكون .. ايه البت النفخ دي .. هي ناقصاها ؟؟

اعتقد ان الشئ الاكثر منطقيه-من وجهة نظري- ان كثرة الاحتكاك و التعامل هي اللي هتخلي الناس تعرف اللي انتي بتحبيه و اللي انتي بتكرهيه ..

و ان حد عدي الخط الاحمر هيكون مش بقصد انه "يستوطي حيطك" لكن يمكن عشم ..

ما تزعليش نفسك يا حبيبي ..

Mohamed Meshref يقول...

Not a must, this is true that some poeple make a lot of things and they do know that i may make you sad, but just because they are your friends they say: "No, we're his friends, he won't be sad from us".

te3mah يقول...

أنا طبعا مش قصدي نعمل قاعدة بجد يا روز
ده أسلوب تهكم مني مش أكتر
لإني للأسف باعاني من المشكلة دي كتير
لمجرد إني باعدي مواقف أو مش باتعنت في آرائي
أتفاجيء بإن إللي قدامي بقى بيتصرف فيما يخصني بمزاجه
وعذره : إني مش هازعل لما أعرف !!!!

te3mah يقول...

أنا فاهمة يا محمد إنهم بيتصرفوا بمبدأ الصداقة
بس أنا كمان صديقة
ومع ذلك باستأذن في كل كبيرة وصغيرة طالما إن الأمر يخص شخص تاني معايا

منور المدونة يا محمد :)

ارحم دماغك! يقول...

طعمة..يعني أنا مقدر فعلا اللي بتقوليه..

لكن أعتقد انه المواقف دي..واردة في أي وسط هاتشتغلي فيه..

شوفي ياستي..في كلمة أنا صغتها مؤخرا وبقيت باقولها ياما اليومين دول..
البشر نوعين:
-نوع بيتعب في حياته..
-ونوع بيوائم أموره!

أقصد بكده قول الشاعر العربي:
إذا أنت لم تشرب مرارا على القذى..
ظمئت وأي الناس تصفو مشاربه؟!

والله يا طعمة أنا شايف انه ده لما يكون عيب رفاقي الوحيد..يبقى أنعم بهم من رفاق..

لأن تخطي المشكلة دي سهل جدا..أسهل مما تتصوري!

مرة هايتصرفوا بشكل ميعجبنيش..أقول لأ..من فضلكم..
كمان مرة..برضو لأ..من فضلكم..

بعد شوية هايعرفوا وهايكونوا أكثر حرصا..
المهم الواحد ميشيلش..اتعاملي مع الموقف ببساطة عن كده!
لا يمكن تعيشي في العالم المثالي قبل ما تموتي "ربنا يوعدك ويوعدنا":)

te3mah يقول...

يا يحيى أنا فاهمة كل الكلام ده والله
بس فيه ناس بتتعود منك الهدوء والسكوت
ولو عملت غير كده
تلاقيها هي إللي تزعل وتدايق
!!!!

shady يقول...

مين دول؟
ههههههههههههههه

te3mah يقول...

دول بقى يا شادي
:D

Ahmed Shokeir يقول...

الواحد يقدر من خلال تصرفاته إنه يوصل للآخرين شخصيته بكل أبعادها
بس على المقابل لا يجب ألا نغفل عن محاولة فهم شخصية الآخرين

te3mah يقول...

ما هو يا أحمد مش ممكن تطلع كل ردود أفعالك مرة واحدة وبدون أي سبب
وده بيخلي الناس تحكم عليك من الظاهر ليهم ويعاملوك على اساس حاجات أنت ما عبرتش عنها اصلا

باينلي اتجننت ولا إيه :(

tamer يقول...

كلام جميل


لكل انسان ثقافة وفكر تختلف عن الاخرين والطباع لها دور ايضا مما يعمل عند المواقف بعض الصدمات


لكن من واجب الصداقة ان يفهم كل صديق صديقة ويعلم مو يزعلة ولايفعلة معة

تسلمى طعمة على المشاركة

وفقنا الله لما فية الخير

مع خالص تحياتى

AFKaaaR.blogspot.com
احتاج للتشجيع
تامر

طـعـمـة يقول...

كلامك سليم يا تامر
وتسلم للمشاركة :)