الاثنين، أبريل 17، 2006

حقــوق وواجبــات

سين وصاد أخ وأخت ... توأم هما ...
اتولدوا في نفس البيت من نفس الأم ونفس الأب ...
وكالعادة لازم تمر الأيام والسنين ... سنة الحياة ...
لكن العجيب إن بالرغم من إن هما الاتنين أخ وأخت توأمين ...
إلا إن سين كان بيتقالوا كلام غير صاد !!!
والأعجب كمان إن أمهم هي إللي كانت بتقول الكلام ده :
- لازم تعرف يا سين حقوقك كراجل .
- وانتي يا صاد لازم تعرفي واجباتك .
- أنت يا سين هتكبر وتتجوز ... والزوج ليه حقوق كتيييييرة قوي ... اسمعها مني واحفظها .
- وانتي يا صاد هتبقي ست العرايس ونزفك لبيت جوزك ... لكن لازم تحفظي واجباتك كويس قوي .
- أنت يا سين هتبقى راجل البيت ليك الأمر والنهي ، هتبقى الملك على مملكتك ، وزوجتك وأولادك هيدينوا ليك بالولاء والطاعة ، الكلمة تقولها ما تتردش ، وإذا مراتك رديت أدبها ولو بالضرب ، ده حقك ربنا ادهولك ، وإللي ترد عليك تبقى قليلة التربية وعاوزة تتربى من جديد .
- وانتي يا صاد هتبقي ست البيت ، تسمعي وتقولي طيب وحاضر وأمرك ، ومافيش عصيان لأوامر جوزك ولا حتى تشتكي منه إن شا الله حتى يضربك قدام الناس ، تشتغلي خدامة تحت رجليه وتحمدي ربنا إنه صاينك .

ويبص سين وصاد لبعض ... ويفكروا في كلام أمهم ... وتسأل صاد البريئة :
- طب افرضي يا أمي أمرني بحاجة تغضب ربنا ... أطيعه برضه ؟
- يا بنتي الواحدة مننا مالهاش غير بيتها وجوزها .
- يعني أطيعه وأغضب ربي ؟
- ربنا خلقك بنت علشان تقومي بالواجبات دي من غير ما تسألي ولا تعترضي ، ولا عاوزة ربنا يغضب عليكي ؟
وسكتت المسكينة من خوفها من غضب ربها عليها .



لكن سين كان حيران ... بيبص لأخته وجواه ميت سؤال ... وقرر يسأل أمه السؤال :
- يا أمي ... هو إللي أنا هاعمله مع مراتي لما أكبر هيجي واحد يعمله مع أختي صاد ؟
- أيوة يا سين يا ابني ... دي سنة الحياة ... انت راجل وهي بنت .
سكت سين ... وبص لأخته ... وقام حضنها وهو بيقول لأمه :
- أنا آسف يا أمي ... بس أنا ماقبلش إن حد يعامل أختي المعاملة دي .

ولسه بيوتنا مليانة بأولاد وبنات يشبهوا سين وصاد
الإبن بيحفظوه حقوقه ...
والبنت بيحفطوها واجباتها ...
ولا سين عرف حاجة عن واجباته ...
ولا صاد خدت فكرة عن حقوقها ...

ونرجع نسأل بيوتنا مات فيها الحب ليه ؟!!!
ونسبة الطلاق ارتفعت ليه ؟!!!
عارفين ليه ؟
لإن إللي ليه حق عليه واجب ... وإللي عليه واجب ليه حق .

إيمان الحسيني

هناك 10 تعليقات:

حائر في دنيا الله يقول...

لإن إللي ليه حق عليه واجب ... وإللي عليه واجب ليه حق

صح

ولو كان اللي ليه حق بيعمل الواجب اللي عليه واللي عليه واجب خد حقه
كانت أغلب مشاكلنا تتحل تلقائي

أنا أختلف دوماً مع اللي يقول ان المشكلة من الرجل أو حتى من المرأة المشكلة الأول في التربية والبئية الموجودين فيها ثم
في فهم مالنا وما علينا

و
السلام عليكم

إيمان الحسيني يقول...

وعليكم السلام ورحمة الله وبركاته

بالضبط يا حائر
المشكلة مش مشكلة رجل أو امرأة
المشكلة في التربية والأعراف إللي بنحفظها من صغرنا وهي بعيدة كل البعد عن أساس دينا

ربنا يعافينا ويعفو عنا جميعا
اللهم آمين

Ahmed Shokeir يقول...

اللفتة اللي لاحظتها ومش عارف إذا كانت مقصودة ولا لأ

إن اللي قالت الكلام ده أمهم يعني واحدة ست ، يعني هيا مقتنعة بالكلام ده لدرجة أنها توصي ولديها به

أحببت عموما طريقة صياغة الفكرة

إيمان الحسيني يقول...

ماهي دي الكارثة يا أحمد
والكلام ده واقعي جدا مش من خيالي
للأسف فيه أهالي كتير بيعتبروا العادات والتقاليد والأعراف اشايء مقدسة لا يجوز المساس بها
حتى لو تعارضت مع الشريعة وأوامر الله
العرف في بلادنا لو الأولوية في التنفيذ عن الشريعة !!!!

ROMANTIC ROSE يقول...

حلوه قوي طريقة الصياغه فعلا يا طعمه .. عجبتني بجد ..

بس المشكله ان ف الموضوع بتاعك سين حضن صاد و ما رضاش عليها ده .. ف بيوتنا دلوقتي ممكن قوي اول ما سين اللي اصغر من صاد يسمع الكلام ده من امه ولا ابوه "او حتي المجتمع" يقوم ضاربها بالقفا و يقولها قومي با بت انجري اعمليلي شاي .. اومال انتي لزمتك ف الدنيا ايه ؟

إيمان الحسيني يقول...

جزاكِ الله كل خير يا رومانتيك روز
وللأسف الصورة إللي انتي قولتيها موجودة فعلا
بس أنا حبيت أنهي التصور بتاعي بشيء من التفاؤل

والله المستعان

شايفنكم يقول...

ادخل على موقعنا او مدونتنا و خد شعار التضامن مع حملة القضاه و انشره معانا

عبدالله مفتاح يقول...

انا شايف ان عاداتنا وتقاليدنا فيها الكثيييييير من الخير والقليل من السوء
وان كانت بعض العادات بتتعارض مع الدين ده شيء سيء وانا لما بكلم حد فيه بيزعل منه
اقرب مثال ليه ان العادات بتفرض ان يكون في غرفة واحده للضيوف ويعد فيها الرجال مع النساء مع ان ده فيه تعارض مع الدين المفروض الرجال لوحدهم والنساء لوحدهم
ولا انا غلطان؟

إيمان الحسيني يقول...

كلامك سليم يا عبد الفتاح
وموضوعي حقوق وواجبات بأقصد بيه كل ما هو مُخالف للدين الحنيف من عاداتنا وتقاليدنا
وللأسف الناس بتتبع العادات دي على حساب شرع الله

منور المدونة يا عبد الله :)

shady يقول...

اللهم أجعله خير
معقول ده كله الدماغ مافيهاش حاجه تتكتب
!!!!!!!!!!!